ដោយ អាស៊ីសេរី
2019-07-06
លោក ស ខេង តំណាងគណបក្សប្រជាជន កម្ពុជា និងលោក លោក សម រង្ស៊ី តំណាងគណបក្សសង្រ្គោះជាតិ ថ្លែងក្នុងសន្និសីទកាសែត នៅមន្ទីររដ្ឋសភា នៅថ្ងៃច័ន្ទ ទី៦ ខែមេសា ឆ្នាំ២០១៥។
RFA/Tin Zakariya
ក្រុមមេធាវីរបស់ លោក ស ខេង បានដាក់ពាក្យប្ដឹងលោក សម រង្ស៊ី ទៅសាលាដំបូងរាជធានីភ្នំពេញ ចោទពីបទញុះញង់ ឱ្យក្រុមមេដឹកនាំរបបក្រុងភ្នំពេញ និងក្រុមគណបក្សកាន់អំណាច សង្ស័យ និងបែកបាក់គ្នា ក្នុងសំណុំរឿងការស្លាប់របស់ លោក ហុក ឡង់ឌី។ មន្ត្រីគណបក្សសង្គ្រោះជាតិ យល់ថា លោក ហ៊ុន សែន បង្គាប់ឱ្យលោក ស ខេង ប្ដឹង លោក សម រង្ស៊ី ដើម្បីបញ្ជាក់ចិត្តស្មោះ។
មេធាវីរបស់លោក ស ខេង ម្នាក់ គឺលោក ហាក់ សៀកលី ប្រាប់អាស៊ីសេរី ថា បានដាក់ពាក្យប្ដឹងទៅតុលាការក្រុងភ្នំពេញ កាលពីថ្ងៃទី២ កក្កដារួចហើយ។ រហូតមកដល់ថ្ងៃទី៦ កក្កដា តំណាងអយ្យការ មិនទាន់កោះហៅភាគីខាងណា ចូលឆ្លើយបំភ្លឺទេ។ មេធាវីរូបនេះ ថា ជំហានដំបូងក្រុមមេធាវី ដាក់ភស្តុតាងជូនតុលាការ ២សិន គឺ ការសរសេរបង្ហោះក្នុងគេហទំព័រហ្វេសប៊ុក (Facebook) លោក សម រង្ស៊ី និងសំឡេងរបស់ លោក សម រង្ស៊ី ផ្ដល់បទសម្ភាសន៍ឱ្យវិទ្យុសំឡេងសហរដ្ឋអាមេរិក (VOA)៖ «ចំពោះភស្តុតាងជាជំហានដំបូង ខាងខ្ញុំបានដាក់២ហ្នឹងសិន។ ប៉ុន្តែនៅពេលដំណាក់កាលតុលាការគាត់ ចំណាត់ការនីតិវិធីប្រសិនបើមានភាពចាំបាច់យើងអាចមានភស្តុតាងបន្ថែម យើងដាក់នៅពេលស៊ើបសួរ»។
ក្នុងពាក្យប្ដឹងនោះ ក្រុមមេធាវីរបស់លោក ស ខេង អះអាងថា លោក សម រង្ស៊ី បានបង្ហោះសារ និងការផ្ដល់បទសម្ភាសន៍ឱ្យសារព័ត៌មាន ក្នុងន័យថា លោក ឌី វិជ្ជា បានដឹងច្បាស់ ពីឃាតកម្មលើ លោក ហុក ឡង់ឌី និងកំពុងរៀបចំផែនការសងសឹកឱ្យឪពុក ដែលផែនការសងសឹកនេះ គាំទ្រពី លោក ស ខេង ព្រោះ លោក ស ខេង ដឹងថា លោក ហ៊ុន សែន កំពុងរៀបចំផែនការកម្ចាត់លោកចេញដើម្បីលើកបន្តុបកូនប្រុសទាំង ៣ ឱ្យកាន់តំណែងបន្តពីលោក។ ក្រុមមេធាវីថា នេះជាការប្រឌិតព័ត៌មានទម្លាក់កំហុស និងមួលបង្កាច់ ដើម្បីឱ្យថ្នាក់ដឹកនាំជាន់ខ្ពស់រាជរដ្ឋាភិបាលសង្ស័យគ្នា បែកបាក់សាមគ្គីផ្ទៃក្នុង និងបង្កើតវិវាទផ្ទៃក្នុង។ មេធាវីអះអាងថា ការបំផុសឱ្យមានការបែកបាក់ផ្ទៃក្នុងរបស់របបក្រុងភ្នំពេញ និងបក្សកាន់អំណាច នឹងបណ្ដាលឱ្យមានចលាចល វឹកវរធ្ងន់ធ្ងរ បំផ្លាញស្ថិរភាពសង្គម និងសន្តិភាពទាំងមូល។
ក្នុងពាក្យប្ដឹងដដែល ក្រុមមេធាវីលោក ស ខេង ទាមទារឱ្យតុលាការក្រុងភ្នំពេញ ចោទប្រកាន់ និងផ្ដន្ទាទោសទោស លោក សម រង្ស៊ី ឱ្យធ្ងន់ធ្ងរតាមច្បាប់ និងទារសងជំងឺចិត្ត លោក ស ខេង ចំនួនបួនពាន់លាន (៤.០០០.០០០.០០០) រៀល ស្មើដប់១លាន (១០០.០០០) ដុល្លារអាមេរិក។
នៅមុនសម្រេចប្ដឹងនេះ លោក ហ៊ុន សែន បានពិភាក្សា ជាមួយលោក ស ខេង ថាចង់ប្ដឹងករណីនេះ ទៅតុលាការប្រទេសបារាំង ដើម្បីចង់បានតម្លៃនៃការឈ្នះម្ដង ដើម្បីបង្ហាញសហគមន៍អន្តរជាតិ។ តែរហូតមកដល់ពេលនេះ លោក ហ៊ុន សែន និង លោក ស ខេង មិនទាន់ប្ដឹង លោក សម រង្ស៊ី ទៅតុលាការប្រទេសបារាំងទេ ខណៈលោក សម រង្ស៊ី ជំរុញឱ្យប្ដឹងលោក ៣ករណីទៀត ព្រោះលោកចោទថា លោក ហ៊ុន សែន និងប្រពន្ធ ជាអ្នកបញ្ជាឱ្យឃាតកបោកគ្រាប់បែក សម្លាប់បាតុករឆ្នាំ១៩៩៧ បាញ់សម្លាប់សិល្បករ អ្នកស្រី ពិសិដ្ឋ ពីលិកា មេដឹកនាំសហជីព លោក ជា វិជ្ជា និងអ្នកវិភាគនយោបាយ បណ្ឌិត កែម ឡី។
លោកមេធាវី ហាក់ សៀកលី ប្រាប់ថា លោកទទួលបានការពឹងពាក់ពី លោក ស ខេង តែការប្ដឹងក្នុងប្រទេសកម្ពុជាប៉ុណ្ណោះ។
មន្ត្រីជាន់ខ្ពស់បក្សប្រឆាំង លោក សោ ចាន់ដេត យល់ថា លោក ហ៊ុន សែន មិនទុកចិត្តលោក ស ខេង ទើបតម្រូវឱ្យលោក ស ខេង បង្ហាញចិត្តស្មោះ ហើយត្រូវបញ្ចេញប្រតិកម្មលើលោក សម រង្ស៊ី តាមរយៈការប្ដឹងនៅក្នុងតុលាការក្នុងប្រទេសកម្ពុជា។ តែមន្ត្រីបក្សប្រឆាំងរូបនេះ អះអាងថា គណបក្សប្រជាជនកម្ពុជា នឹងបែកជាពីរក្រុម គឺក្រុមលោក ហ៊ុន សែន គាំទ្រមានចិនជាបង្អែក និងក្រុមលោក ស ខេង មានវៀតណាមជាបង្អែក៖ «ក្រុម ហ៊ុន សែន ទោរទន់ទៅចិនខ្លាំង រីឯក្រុម លោក ស ខេង ក៏វាទោរទន់មកខាងយួនខ្លាំង។ អ៊ីចឹង យួនគេត្រូវតែបង្ខំឱ្យធ្វើអ្វីមួយ អ៊ីចឹង លោក ហ៊ុន សែន គាត់អត់ទុកចិត្តលោក ស ខេង។ ដល់ពេលអត់ទុកចិត្តលោក ស ខេង ត្រូវបង្ខំឱ្យលោក ស ខេង បញ្ចេញប្រតិកម្មមួយទៀត ទៅលោកប្រធានឲ សម រង្ស៊ី ដើម្បីបញ្ជាក់ថា លោក ស ខេង ហ្នឹងស្មោះត្រង់»។
មកដល់ពេលនេះ លោក សម រង្ស៊ី កំពុងជាប់ពាក្យបណ្ដឹង នៅតុលាការកម្ពុជា ជាង១០បណ្ដឹង សុទ្ធតែចាញ់ក្ដីក្រុមមេដឹកនាំរបបមេយោធា និងសកម្មជនបក្សកាន់អំណាច។ បណ្ដឹងទាំងនោះ គឺបទចោទញុះញង់ឱ្យមានការរើសអើង ញុះញង់កងទ័ពមិនឱ្យស្ដាប់បញ្ជា ញុះញង់ប្រព្រឹត្តិបទឧក្រិដ្ឋជាអាទិ៍ ប្រមាថព្រះមហាក្សត្រ និងបរិហារកេរ្តិ៍ ទិញចំនួនឡៃ (Like) ហ្វេសប៊ុក ជាដើម។ បណ្ដឹងទាំងនោះ សុទ្ធតែប្ដឹងឱ្យចាប់ខ្លួន លោក សម រង្ស៊ី និងសងជំងឺចិត្ត រាប់ម៉ឺនដុល្លារ។ ប៉ុន្តែបណ្ដឹងទាំងជាង ១០ករណីនេះ គ្មានទាន់មានមេដឹកនាំរបបក្រុងភ្នំពេញណាម្នាក់ ហ៊ានប្ដឹង លោក សម រង្ស៊ី ទៅតុលាការបារាំង ឬតុលាការអន្តរជាតិទេ សូម្បីលោក ហ៊ុន សែន។
ពាក់ព័ន្ធនឹងការចោទថា លោក សម រង្ស៊ី ញុះញង់ឱ្យមេដឹកនាំបក្សកាន់អំណាចសង្ស័យគ្នា បែកបាក់សាមគ្គីផ្ទៃក្នុង និងបង្កើតវិវាទផ្ទៃក្នុងគណបក្សកាន់អំណាច។ កន្លងមកលោក ហ៊ុន សែន ធ្លាប់លើកឡើងថា មកពីមេដឹកនាំអន់ទើបបែកបាក់តាមគេញុះញង់៖ «ខ្ញុំសុំផ្ដាំទៅអ្នក។ អ្នកមិនគួរបន្តនិយាយភាសាហ្នឹងទេ ពីព្រោះ ភាសានិយាយថា គេបំបែក ពាក្យមួយមាត់នេះ ស្មើនឹងការបន្តុះបង្អាប់ខ្លួនឯងតែប៉ុណ្ណឹង។ បើលោកឯងពូកែ លោកឯងចេះគ្រប់គ្រង លោកឯងមិនអាចធ្វើឱ្យបក្សលោកឯងបែកបាក់ទេ»។
អ្នកវិភាគនយោបាយ លោក ហង្ស វិទូ ថា យុទ្ធសាស្ត្រប្ដឹងលោក សម រង្ស៊ី ដដែលៗ កំពុងធ្វើឱ្យបក្សកាន់អំណាច ធ្លាក់ប្រជាប្រិយភាព និងរងការចំអកពីពលរដ្ឋថា ជារឿងកំប្លែង គួរឱ្យអស់សំណើច។ លោក ហង្ស វិទូ យល់ថា រដ្ឋាភិបាលអាចប្ដឹងឈ្នះ លោក សម រង្ស៊ី តែនៅតុលាការកម្ពុជាប៉ុណ្ណោះ តែបើហ៊ានប្ដឹងនៅ តុលាការបារាំង គឺ លោក សម រង្ស៊ី មានប្រៀបឈ្នះច្រើនជាង៖ «ពាក្យបណ្ដឹងដែលកើតឡើងហូរហែមកលើ លោក សម រង្ស៊ី នេះ វាហាក់បីដូចជា ក្លាយទៅជារឿងកំប្លែងមួយ ឬក៏រឿងមួយដែលប្រជាពលរដ្ឋគាត់ស្ដាប់ឡើងសុំាទៅហើយពីមួយឆ្នាំទៅមួយឆ្នាំ ឃើញតែពាក្យបណ្ដឹងកើតឡើងចំពោះលោក សម រង្ស៊ី។ ប៉ុន្តែមិនឃើញឱ្យស្ថានការណ៍នយោបាយ ឬមួយក៏ធ្វើឱ្យលោក សម រង្ស៊ី ហ្នឹងគាត់ទៅជាស្អីទេ។ បើយើងនិយាយឱ្យចំទៅ លោក សម រង្ស៊ី នៅតែលោក សម រង្ស៊ី ឯបញ្ហាស្រុកខ្មែរនៅតែរុំកោះដដែល»។
លោក ហង្ស វិទូ មិនចង់ឃើញអ្នកនយោបាយបន្តប្ដឹងផ្ដល់គ្នាទេ។ លោកថា ក្រុមទាំងពីរ គឺខាង លោក ហ៊ុន សែន និងលោក សម រង្ស៊ី គួរជជែកគ្នា ដើម្បីទប់ទល់ការផ្ដាច់ប្រព័ន្ធអនុគ្រោះពន្ធ (EBA) និងពន្លឿនការដោះលែង លោក កឹម សុខា ទើបជារឿងមានប្រយោជន៍សម្រាប់ពលរដ្ឋខ្មែរ៕
No comments:
Post a Comment