ដោយ មួង ណារ៉េត
2019-09-21
មន្ត្រីអង្គការសង្គមស៊ីវិលប្រារព្វទិវាសន្តិភាពពិភពលោក នាទីលានប្រជាធិបតេយ្យថ្មី នៅថ្ងៃទី២១ ខែកញ្ញា ឆ្នាំ២០១៩។
RFA
នៅថ្ងៃទី២១ ខែកញ្ញា គឺជាទិវាសន្តិភាពអន្តរជាតិ។ សង្គមស៊ីវិលលើកឡើងថា កម្ពុជាពុំទាន់មានសន្តិភាពពេញលេញនោះទេ និងផ្ញើសារឱ្យរបបក្រុងភ្នំពេញ ស្ដារលទ្ធិប្រជាធិបតេយ្យ និងការគោរពសិទ្ធិមនុស្សឡើងវិញ។ រីឯមេដឹកនាំរបបក្រុងភ្នំពេញទទួលស្គាល់ជាលើកដំបូងថា សន្តិភាព របស់កម្ពុជា ស្ថិតក្នុងស្ថានភាពផុយស្រួយ ប៉ុន្តែនឹងខិតខំថែរក្សាឱ្យបានតាមរយៈការពង្រឹងឯកភាព ការអនុវត្តវប្បធម៌សន្ទនា និងដោះស្រាយបញ្ហាដោយសន្តិវិធី។
ក្រុមអង្គការសង្គមស៊ីវិលសហគមន៍ និងប្រជាពលរដ្ឋប្រមាណ ២រយនាក់ នាំគ្នាប្រារព្ធទិវាសន្តិភាពពិភពលោកលើកទី១៧ ក្រោមប្រធានសន្តិភាពសម្រាប់ទាំងអស់គ្នា នៅបរិវេណទីលានប្រជាធិបតេយ្យ នៅព្រឹកថ្ងៃទី២១ ខែកញ្ញា។ អ្នកចូលរួម ថ្លែងស្រដៀងៗ គ្នាថា ប្រទេសកម្ពុជាពុំមានទាន់សន្តិភាពពេញលេញនោះទេ ព្រោះតែវិបត្តិនយោបាយជាប់គាំង ធ្វើឱ្យបញ្ហាប្រជាធិបតេយ្យ និងការគោរពសិទ្ធិមនុស្សធ្លាក់ចុះ។
ប្រធានសមាគមបណ្ដាញយុវជនកម្ពុជា និងជាអ្នកសម្របសម្រួលនៃសហភាពផ្ទះសាមគ្គី លោក ទឹម ម៉ាឡៃ មានប្រសាសន៍ថា គោលបំណងនៃការជួបជុំប្រារព្ធទិវានេះ គឺចង់ផ្ញើសារដល់អ្នកដឹកនាំ ប្រទេស និងអ្នកនយោបាយ ចរចាគ្នាបញ្ចប់វិបត្តិនយោបាយរ៉ាំរ៉ៃនៅក្នុងប្រទេសកម្ពុជា ដើម្បីប្រជាពលរដ្ឋគ្រប់រូប គ្រប់និន្នាការនយោបាយរស់នៅដោយសុខដុមរមនាជាមួយ។ លោកពន្យល់ថា សន្តិភាពពេញលេញ គឺត្រូវមានទាំងសន្តិភាពផ្លូវកាយ និងសន្តិភាពផ្លូវចិត្ត តែសព្វថ្ងៃនេះប្រជា ពលរដ្ឋកម្ពុជា នៅតែមានអារម្មណ៍ភ័យខ្លាច មិនស្ងប់សុខក្នុងចិត្ត ដោយសារតែបញ្ហានយោបាយ ការគំរាមកំហែង ការចាប់ដាក់ពន្ធនាគារទាំងអយុត្តិធម៌ និងបញ្ហាអសន្តិសុខសង្គមជាច្រើនទៀត៖ «»
នៅក្នុងថ្ងៃទិវាសន្តិភាពអន្តរជាតិនេះ មេដឹកនាំរបបក្រុងភ្នំពេញ ក៏បានចេញសារលិខិតចូលរួមអប អរសាទរផងដែរ ដោយបានឡើងនូវគោលនយោបាយឈ្នះៗ របស់រដ្ឋាភិបាល ដើម្បីផ្ដួលរលំរបបប្រល័យពូជសាសន៍ ប៉ុល ពត ដើម្បីទទួលបានសន្តិភាព និងបានឈានដល់ការអភិវឌ្ឍសេដ្ឋកិច្ចជាតិ។ ទោះយ៉ាងណាក្តី លោក ហ៊ុន សែន បានប្រកាសទទួលស្គាល់ជាលើកដំបូងថា សន្តិភាព របស់ប្រទេសកម្ពុជាកំពុងស្ថិតក្នុងស្ថានភាពផុយស្រួយ ប៉ុន្តែលោកបន្ទោសថា មកពីមានការគំរាមកំហែង ការយាយី និងការអន្តរាគមន៍ចូលកិច្ចការផ្ទៃក្នុងប្រទេសកម្ពុជាពីសំណាក់បណ្ដាប្រទេសមហាអំណាច និងប្រទេសលោកខាងលិចមួយចំនួន ក្រោមលេសប្រជាធិបតេយ្យ និងសិទ្ធិមនុស្ស។ ក្នុងសារលិខិតនោះ លោក ហ៊ុន សែន ក៏ប្ដេជ្ញាថែរក្សាការពារសន្តិភាព ដែលមានស្រាប់ និងពង្រឹងឯកភាពជាតិ អនុវត្តវប្បធម៌សន្ទនា ការគោរពច្បាប់ ដោយស្រាយបញ្ហាដោយសន្តិវិធី និងទប់ស្កាត់នូវអ្វី ដែលរបបលោកចាត់ទុកថា ជាឧបាយកល និងការប៉ុនប៉ងគ្រប់រូបភាព ដែលមានគោលបំណងធ្វើឱ្យប្រទេសជាតិធ្លាក់ក្នុងស្ថានភាពវឹកវរ និងអស្ថិរភាព។
ប្រធានសមាគមបណ្ដាញយុវជនកម្ពុជា ស្វាគមន៍គំនិតរបស់លោក ហ៊ុន សែន ដែលអំពាវនាវចង់ឱ្យថែរក្សាសន្តិភាព ប៉ុន្តែប្រសិនបើការថែរក្សាសន្តិភាព តាមរយៈការធ្វើទុក្ខបុកម្នេញទៅលើពលរដ្ឋខ្មែរ មួយក្រុមឬ គណបក្សប្រឆាំង គឺមានន័យថា មិនអាចថែរក្សា និងធ្វើសន្តិភាពឱ្យបានពេញលេញនោះ ទេ។ ម្យ៉ាងវិញទៀត អ្វីដែលសហគមន៍អន្តរជាតិ ជំរុញឱ្យរដ្ឋាភិបាលស្ដារលទ្ធិប្រជាធិបតេយ្យ និង ការគោរពសិទ្ធិមនុស្សវិញនោះ មិនមែនជាការជ្រៀតជ្រែកកិច្ចការផ្ទៃក្នុងឡើយ៖ «»
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការ លីកាដូ (LICADHO) លោក អំ សំអាត មានប្រសាសន៍ថា សន្តិភាពមួយដែលគ្មានការគោរពសិទ្ធិមនុស្ស គ្មានលទ្ធិប្រជាធិបតេយ្យ និងយុត្តិធម៌ គឺជាសន្តិភាពដែលគ្មាននិរន្តរភាពនោះទេ។ លោកចង់ឃើញកម្ពុជា មានការគោរពសិទ្ធិមនុស្ស កសាងលទ្ធិប្រជាធិបតេយ្យពិតប្រាកដ និងសង្គមមានយុត្តិធម៌ ពីព្រោះបញ្ហាទាំងបីនេះនៅតែប្រឈមខ្លាំងនៅឡើយសម្រាប់កម្ពុជា៖ «»
ទោះបីលោក ហ៊ុន សែន ប្រកាសចង់រក្សាសន្តិភាពក៏ដោយ ក៏ប៉ុន្តែ លោក ហ៊ុន សែន បានគំរាមកម្ទេចគណបក្សប្រឆាំងឱ្យដល់ឫសគល់ ទោះក្នុងរូបភាពណាក៏ដោយ ជាពិសេសលោកបានប្រកាសព្រមានបិទផ្លូវចរចាជាមួយគណបក្សសង្គ្រោះជាតិទៀតផង។ ក្នុងរយៈពេល ៩ខែ នៃឆ្នាំ២០១៩ នេះ អាជ្ញាធររបប ក្រុងភ្នំពេញ បានចាប់ខ្លួនសកម្មជនបក្សប្រឆាំងនៅតាមមូលដ្ឋានសរុប ២៧នាក់ ដាក់ក្នុងពន្ធនាគារ និងបានកោះហៅសកម្មជនបក្សប្រឆាំងទៅសាកសួរ កើនដល់ ១៥៦នាក់។
សង្គមស៊ីវិលព្រួយបារម្ភថា ប្រសិនបើគណបក្សកាន់អំណាច នៅបន្តសារនយោបាយហិង្សា និង បង្ក្រាបឥតឈប់ឈរ ហើយគណបក្សសង្គ្រោះជាតិ នៅតែព្រមានងើបឈរតវ៉ាទម្លាក់លោក ហ៊ុន សែន ចេញពីអំណាចតែរបៀបនេះរហូត គឺសន្តិភាពកម្ពុជាមិនគង់វង្សឡើយ ហើយងាយនឹងផ្ទុះសង្គ្រាមស៊ីវិលជាថ្មីផងដែរ៕
No comments:
Post a Comment