តំណាងរាស្រ្ត​សេរីនិយមអន្តជាតិ ១២ គណៈបក្ស ថ្លែងការណ៍គាំទ្រដំណើរមាតុភូមិនិវត្តន៍របស់លោក សម រង្ស៊ី

លោក មួង ណារ៉េត
2019-10-17


លោក សម រង្ស៊ី និង មន្រ្តីគណបក្សសង្គ្រោះជាតិ ជាមួយតំណាងរាស្រ្ត នៃគណបក្សសេរីនិយម ទីក្រុងបែលក្រាដ (Belgrade) ប្រទេសស៊ែប៊ី (Serbia) ថ្ងៃទី ១៤ ខែ តុលា ឆ្នាំ ២០១៩។
Screenshot ពីគេហទំព័រ Liberal International




គណៈនយោបាយសេរីនិយមអន្តជាតិចំនួន ១២ នៃ ចលនាសេរីនិយម​​អន្តរជាតិ ឬ Liberal International ថ្លែងការណ៍គាំទ្រ​ដំណើរមាតុភូមិនិវត្តន៍​របស់​លោក សម រង្ស៊ី។

នៅក្នុង​សេចក្តី​ថ្លែងការណ៍ ក្នុង​ទម្រង់​ជាលិខិត​ចំហ កាលពីថ្ងៃទី ១៦ ខែ តុលា បណ្តាញពិភពលោក​នៃ​គណៈបក្សសេរីនិយមទាំងនេះ បញ្ជាក់ថា ក្នុងនាមជាអ្នកសេរីនិយម និង ជាអ្នកគាំប្រជាធិបតេយ្យ ពួកគាត់​អំពាវនាវ​ឲ្យ​លោក ហ៊ុន សែន ដែលពួកគាត់​ហៅថាជាមេដឹកនាំផ្តាច់ការ ចុះចេញពីតំណែង និង ធ្វើ​យ៉ាង​ណា​សម្រួលឲ្យ​លោក សម រង្ស៊ី និង អ្នកគាំគណបក្ស​សង្គ្រោះ​ជាតិ​ដទៃទៀត អាចធ្វើដំណើរវិល​ត្រឡប់​ទៅប្រទេសកម្ពុជាវិញ ដោយសុវត្ថិភាព។

ជាងនេះទៅទៀត បណ្តុំគណបក្សនយោបាយអន្តរជាតិ​ទាំង​ ១២ នេះ ស្នើ​ឲ្យ​របបលោក ហ៊ុន សែន គោរព​ឆន្ទៈរបស់​ប្រជាពលរដ្ឋខ្មែរ ដែលចង់បាន​ប្រជាធិបតេយ្យ។

ជាមួយគ្នានេះដែរ ចលនាសេរីនិយម​​អន្តរជាតិនេះ បានបញ្ជាក់ជំហរថា ខ្លួននឹង​ជួយ​រក​មេធាវីអន្តរជាតិ ដើម្បី​ប្តឹង​ករណីលោក ហ៊ុន សែន និង មន្រ្តីរបបនេះ គម្រាមកំហែង​អាយុជីវិត​លោក​ សម រង្ស៊ី ទៅ​តុលាការ​ព្រហ្មទណ្ឌ​អន្តរជាតិ (ICC)។

លោក ហ៊ុន សែន ធ្លាប់​គម្រាម​ថា​នឹង​កម្ទេចលោក សម រង្ស៊ី នៅព្រំដែន ដោយប្រើកាំភ្លើងទំនើប ដើម្បីបង្ក្រាប កុំឲ្យ​លោក សម រង្ស៊ី វិលចូលស្រុកវិញ។ មន្រ្តីជាន់ខ្ពស់ផ្នែកការពារ​ជាតិ លោក ទៀ បាញ់ ក៏បាន​គម្រាមកម្ទេចក្រុម​ប្រឆាំង និង ពលរដ្ឋ​ស៊ីវិល​ឯទៀត ដែលអម​ដំណើរ​លោក សម រង្ស៊ីនោះដែរ។

ស្ថាប័នគណបក្សនយោបាយ​អន្តរជាតិ​ដដែលនេះ ចាត់ទុក​ការ​ប្រមាថអាយុជីវិត​លោក សម រង្ស៊ី និង អ្នកគាំទ្របក្សប្រឆាំង ថាជារឿង​មិន​អាច​ទទួល​យកបាន​ជាដាច់ខាត។

គណបក្ស​នយោបាយ​ទាំងនេះ ប្តេជ្ញាថា នឹង​កៀរគតំណាងរាស្រ្ត និង រដ្ឋាភិបាលប្រទេសេរី នៅជុំវិញពិភពលោក ដើម្បីដាក់សម្ពាធនយោបាយ លើ​របបលោក ហ៊ុន សែន ឲ្យ​ស្តារសិទ្ធិមនុស្ស និង ប្រជាធិបតេយ្យ​ឡើងវិញ។

បន្ថែមលើនេះ ក្រុមគណបក្សនយោបាយ​អន្តរជាតិ​ទាំងនេះ ជួយ​តស៊ូមតិ និង កៀរគ​រក​ការគាំទ្រពី​មហាជន ដើម្បីគាំទ្រដំណើរវិលត្រឡប់​ទៅ​កម្ពុជាវិញរបស់លោក សម រង្ស៊ី ដោយ​បង្កើត​ជាយុទ្ធនាការមួយតាមបណ្តាញ​អ៊ិនធើណិត ដាក់ឈ្មោះថា ខ្ញុំគាំទ្រ​លោក សម រង្ស៊ី ឬ I Stand With Sam Rainsy។​

អាស៊ីសេរី មិន​ទាន់អាចសុំការឆ្លើយតបទៅនឹង​បញ្ហានេះ ពី​មន្រ្តីនាំពាក្យ​របបក្រុង​ភ្នំពេញ​ លោក ផៃ ស៊ីផាន បាន​នៅឡើយទេ នៅពេលនេះ។

គណបក្សនយោបាយសេរីនិយម​ទាំង ១២ នោះ ​មាន​មកពីប្រទេសអង់គ្លេស អាល្លឺម៉ង់​ ស្វ៊ីស និង ហុល្លង់ ជាដើម។

​ចលនាសេរីនិយម​​អន្តរជាតិ ឬ Liberal International ជាសហព័ន្ធ​ពិភពលោកនៃ​គណបក្សនយោបាយ​សេរីនិយម និង ប្រជាធិបតេយ្យ​ ដែលមានមូលដ្ឋាននៅទីក្រុងឡុង ប្រទេសអង់គ្លេស និង មាន​សមាជិកជាង ១០០ ប្រទេស (១០៦ ប្រទេស​ ត្រឹមខែ ធ្នូ ឆ្នាំ ២០១៨)៕