ដោយ អាស៊ីសេរី
2020-01-24
(ឆ្វេង) លោក ម៉ន ផល្លា ប្រធានប្រតិបត្តិគណបក្សសង្គ្រោះជាតិរាជធានីភ្នំពេញ និង (ខាងស្ដាំ) បុរសជិះម៉ូតូស្លៀកពាក់ឈុតខ្មៅ ត្រូវបានគេអះអាងថា កំពុងយារដំបងវាយបុរសអាវសបង្កង់ លោក ខៀវ ឌីន ជាសកម្មជនគណបក្សសង្គ្រោះជាតិ នៅថ្ងៃទី២០ ខែមករា ឆ្នាំ២០២០។
រូប៖ ហ្វេសប៊ុក
មន្ត្រីគណបក្សសង្គ្រោះជាតិអះអាងថា សមត្ថកិច្ចនៅតែតាមឃ្លាំមើលពួកគេក្នុងបំណងយាយីលើសកម្មជនគណបក្សបក្សប្រឆាំងជាប់ជាប្រចាំ ហើយករណីនេះស្ដែងឱ្យឃើញច្បាស់តាមរយៈបទបញ្ជាថ្មីរបស់អគ្គស្នងការដ្ឋាននគរបាលជាតិ។ មេប៉ូលិសកម្ពុជាបានចេញបញ្ជាឱ្យនគរបាលគ្រប់ជាន់ថ្នាក់ក្ដាប់សភាពការណ៍នានា ពាក់ព័ន្ធនឹងឧបាយកលធ្វើឱ្យមានចលាចលសង្គម ក្នុងអំឡុងបុណ្យចូលឆ្នាំចិន-វៀតណាម។
ប្រធានប្រតិបត្តិគណបក្សសង្គ្រោះជាតិរាជធានីភ្នំពេញ ដែលកំពុងភៀសខ្លួននៅក្រៅប្រទេស លោក ម៉ន ផល្លា ជឿថា បទបញ្ជារបស់ស្ថាប័នប៉ូលិសនៅពេលនេះ មិនមែនត្រឹមជាការថែរក្សាសន្តិសុខសណ្ដាប់ធ្នាប់សង្គមនោះទេ ប៉ុន្តែអាចជាលេសមួយដើម្បីធ្វើទុក្ខបុកម្នេញលើសកម្មជនគណបក្សសង្គ្រោះជាតិនៅក្នុងស្រុក។ លោកអះអាងថា មន្ត្រីបក្សប្រឆាំងតាមមូលដ្ឋាននៅតែរងការឃ្លាំមើលពីអាជ្ញាធរ ហើយពួកគេងាយនឹងត្រូវចោទប្រកាន់ ឬចាប់ខ្លួន នៅពេលធ្វើសកម្មភាពណាមួយ ពាក់ព័ន្ធនឹងរឿងនយោបាយ។ លោកយល់ថា វិធានការរបស់សមត្ថកិច្ចនៅពេលនេះ អាចមានគោលដៅពីរ គឺបង្ការកុំឱ្យមានចលនាមហាជនដែលចង់ងើបឡើងផ្លាស់ប្ដូររដ្ឋាភិបាល និងទប់ស្កាត់មិនឱ្យមានសកម្មភាពគាំទ្រដំណើរមាតុភូមិនិវត្តន៍របស់ថ្នាក់ដឹកនាំគណបក្សសង្គ្រោះជាតិ៖ «វិធានការនៃការពង្រឹងសណ្ដាប់ធ្នាប់ផ្ទៃក្នុងរបស់អាជ្ញាធររបបក្រុងភ្នំពេញ គឺខ្ញុំគិតថា មិនមែនផ្ដោតលើកិច្ចការសន្តិសុខសណ្ដាប់ធ្នាប់ពិតប្រាកដទេ។ សំខាន់គឺ វិធានការបំភិតបំភ័យមកលើសកម្មជនគណបក្សសង្គ្រោះជាតិច្រើនជាង»។
អគ្គស្នងការនគរបាលជាតិលោក នេត សាវឿន បានដាក់ផែនការ៦ ចំណុច ដើម្បីការពារសន្តិសុខ សណ្ដាប់ធ្នាប់ និងសុវត្ថិភាពសង្គមក្នុងឱកាសបុណ្យចូលឆ្នាំចិនវៀតណាម ដែលប្រព្រឹត្តទៅចាប់ពីថ្ងៃទី២៤ ដល់២៧ មករា។ ក្នុងនោះផែនការដែលអាទិភាពជាងគេ គឺនគរបាលគ្រប់លំដាប់ថ្នាក់ត្រូវយកចិត្តទុកដាក់ប្រមូលព័ត៌មានពាក់ព័ន្ធនឹងសភាពការណ៍សន្តិសុខ សណ្ដាប់ធ្នាប់សាធារណៈ ជាពិសេសក្ដោបឱ្យបាននូវឧបាយកល សកម្មភាពបង្កអសន្តិសុខ ឬការញុះញង់នានាធ្វើឱ្យសង្គមកើតចលាចល។
អ្នកនាំពាក្យអគ្គស្នងការដ្ឋាននគរបាលជាតិ លោក ឆាយ គឹមខឿន បកស្រាយបន្ថែមថា វិធានការនេះក្ដោបជារួមអំពីបញ្ហាសន្តិសុខផ្ទៃក្នុងប្រទេស ដូចជា អំពើភេរវកម្ម អំពើប្រដាប់អាវុធ និងការអុកឡុករបស់ពួកជនពាល មិនមែនជាវិធានការចំពោះមុខសញ្ញាណាមួយនោះទេ។ លោកចាត់ទុកការលើកឡើងរបស់មន្ត្រីបក្សប្រឆាំងថា ជារឿងកេងចំណេញនយោបាយ៖ «បើគាត់កុំទៅធ្វើអ្វីខុសច្បាប់ មានអ្នកណាទៅធ្វើអ្វីគាត់? នេះគាត់ចេះតែលើកដាក់ខ្លួន ទីមួយ។ ទីពីរ (គាត់)ឆក់ឱកាសយកការផ្សព្វផ្សាយពង្រឹងសន្តិសុខជាតិទាំងមូល យកមកកេងចំណេញ។ យកមកដាក់លើខ្លួនឯង ថាខ្លួនឯងសំខាន់ណាស់អ៊ីចឹង ខ្លួនឯងធ្វើអ្វីអត់បាន គេធ្វើបាប។ ប្រជាពលរដ្ឋទូទាំងប្រទេសគេសប្បាយ ហើយការដាក់វិធានការហ្នឹង គឺដើម្បីរក្សាការសប្បាយ ភាពកក់ក្តៅប្រជាពលរដ្ឋ»។
ទោះជាយ៉ាងណា នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ (LICADHO) លោក អំ សំអាត កត់សម្គាល់ថា សកម្មជនគណបក្សសង្គ្រោះជាតិនៅតែងាយប្រឈមនឹងការចោទប្រកាន់ ឬធ្វើទុក្ខបុកម្នេញពីសំណាក់អា្ញធរ ដូច្នេះទើបបានជាពួកគេបញ្ចេញប្រតិកម្មតបទៅនឹងវិធានការរបស់សមត្ថកិច្ចបែបនេះ។ លោកបារម្ភថា បទបញ្ជារបស់សមត្ថកិច្ចនេះអាចនឹងមានសុពលភាពអនុវត្តហួសពីបុណ្យចូលឆ្នាំចិនទៅទៀត ជាពិសេសក្នុងបរិបទដែលក្រុមមេដឹកនាំបក្សប្រឆាំងនៅតែប្រកាសពីបំណងវិលចូលស្រុកវិញនៅពេលខាងមុខ៖ «ឥលូវគឺមានការរៀបចំជាយុទ្ធសាស្ត្រនៃការវិលត្រឡប់ជាលើកទីពីរឡើងវិញ អាហ្នឹងដែលធ្វើឱ្យមានការបង្កើននៃការប្រុងប្រយ័ត្ន និងការតាមដានបន្តទៀតទៅលើអតីតគណបក្សប្រឆាំង។ នេះយើងបារម្ភថា បើគម្រោងហ្នឹងវាអាចនឹងកើតចេញជារូបរាង អតីតគណបក្សប្រឆាំងនៅខាងក្នុង(ស្រុក)នេះ អាចនឹងទទួលរងនូវការធ្វើទុក្ខបុកម្នេញដូចមុនអ៊ីចឹងទៀតដែរ»។
មន្ត្រីគណបក្សសង្គ្រោះជាតិលោក ម៉ន ផល្លា ថ្លែងថា ប្រសិនបើអាជ្ញាធរពិតជាចង់រក្សាសន្តិសុខសង្គមមែន នោះអាជ្ញាធរត្រូវតែវែកមុខចាប់ជនដៃដល់ ដែលបានលួចវាយសកម្មជនបក្សប្រឆាំងជាង ១០នាក់ នៅរាជធានីភ្នំពេញ យកមកផ្ដន្ទាទោសតាមច្បាប់។ បន្ថែមពីលើនេះ លោកថា អាជ្ញាធរគ្រប់លំដាប់ថ្នាក់ត្រូវបញ្ឈប់ការតាមឃ្លាំមើលប្រជាពលរដ្ឋ និងត្រូវអនុវត្តច្បាប់ដោយគ្មានការរើសអើង ជាពិសេសកុំដាក់បន្ទុកលើសកម្មជនគណបក្សសង្គ្រោះជាតិនៅពេលពួកគេអនុវត្តសិទ្ធិរបស់ខ្លួន ដែលធានាដោយច្បាប់ជាតិ និងអន្តរជាតិ៕
No comments:
Post a Comment