ដោយ សុ ជីវី
2020-01-03
ស្លាក "អរគុណសន្តិភាព" ដែលបិទនៅមុខសាលាដំបូងរាជធានីភ្នំពេញ។
RFA
ក្រោយពីលោកនាយករដ្ឋមន្ត្រី ហ៊ុន សែន ចេញបញ្ជាឱ្យក្រសួង និងមន្ទីររដ្ឋគ្រប់ស្ថាប័ន ធ្វើយុទ្ធនាការ បិទពាក្យស្លោក "អរគុណសន្តិភាព" នៅទូទាំងប្រទេសមក ក្រុមពលរដ្ឋមួយចំនួន បង្ហាញទស្សនៈ ផ្សេងៗគ្នជុំវិញរឿងនេះ។ ពលរដ្ឋនៅខេត្តភាគឦសាន អះអាងថា ពាក្យ "អរគុណសន្តិភាព" របស់រដ្ឋាភិបាល គ្រាន់តែជាពាក្យ បិទបាំងកំហុសរបស់រដ្ឋាភិបាល និងក្រុមបក្ខពួក គណបក្សប្រជាជនកម្ពុជាតែប៉ុណ្ណោះ។
ក្រុមយុវជនរស់នៅរាជធានីភ្នំពេញ និងជនជាតិដើមភាគតិចព្នង (ពូនង) នៅខេត្តភាគឦសានអះអាងស្រដៀងៗ គ្នាថា ពាក្យ "អរគុណសន្តិភាព" របស់រដ្ឋាភិបាលបានផ្ដល់ប្រយោជន៍ដល់ក្រុមគ្រួសាររបស់លោក ហ៊ុន សែន និងបក្ខពួកគណបក្សកាន់អំណាចតែប៉ុណ្ណោះ ក៏ប៉ុន្តែពលរដ្ឋនៅទូទាំងប្រទេស កំពុងរងទុក្ខវេទនាគ្រប់បែបយ៉ាង រួមមាន សេដ្ឋកិច្ចធ្លាក់ចុះ ដោយសារការបំផ្លាញធនធានធម្មជាតិ អំពើពុករលួយ បក្ខពួកនិយម ការគាបសង្កត់សិទ្ធិសេរីភាព និងការរើសអើងជាដើម។
ពលរដ្ឋរស់នៅខេត្តមណ្ឌលគិរី លោក គ្រើង តុលា ឱ្យដឹងនៅថ្ងៃទី៣ មករាថា អយុត្តិធម៌សង្គម ការំលោភសិទ្ធិមនុស្ស ជម្លោះដីធ្លី បាត់បង់រ៉ែ និងព្រៃឈើ គឺជាបញ្ហាប្រឈមធ្ងន់ធ្ងរ រដ្ឋាភិបាលពុំបានយកចិត្តទុកដាក់ដោះស្រាយជាដុំកំភួននៅឡើយទេ។ លោកថា ថ្វីត្បិតតែបច្ចុប្បន្ន គ្មានសង្គ្រាមប្រដាប់អាវុធ ក្ដី ក៏ប៉ុន្តែពលរដ្ឋភាគច្រើន កំពុងជួបការលំបាក ដូចជា តុលាការមិនឯករាជ្យ ការបំផ្លាញព្រៃឈើ សត្វព្រៃ និងអំពើពុករលួយពីសំណាក់ក្រុមអ្នកមានអំណាច និងមន្ត្រីរដ្ឋាភិបាលជាដើម៖ «សង្គ្រាមខ្មែរក្រហមសម្លាប់ឆៅៗតែម្ដង តែសង្គ្រាមបច្ចុប្បន្ននេះ គឺសង្គ្រាមដោយចិត្តសាស្ត្រ មានន័យថា សង្គ្រាមដោយមនោគមន៍ អាហ្នឹងជារឿងមួយ មិនអាចទទួលយកបាន។ សន្តិភាពគ្រាន់តែក្រុមបក្ខពួកមួយក្រុម ឬជាក្រុមរបស់គាត់ ឬមួយជាបុគ្គល ជាសិទ្ធិរៀងៗខ្លួនអាហ្នឹងយើងមិនអាចបំបិទបានទេ។ ប៉ុន្តែសម្រាប់ពលរដ្ឋទូទៅ វាមិនមានសន្តិភាពទេ ពលរដ្ឋហូរទឹកភ្នែករាល់ថ្ងៃ ហើយខ្លះទៅក្លាយជាឆ្កួត»។
ពលរដ្ឋម្នាក់ទៀតរស់នៅ ខេត្តស្ទឹងត្រែង លោក ថាន់ វ៉ន យល់ថា ពាក្យ "អរគុណសន្តិភាព" ហាក់ដូចជាសញ្ញាពញ្ញាក់ស្មារតីដល់ពលរដ្ឋក្រីក្រ ឱ្យដឹងគុណគណបក្សកាន់អំណាចតែប៉ុណ្ណោះ ក៏ប៉ុន្តែធាតុពិត ពលរដ្ឋក្រីក្រពុំមានសន្តិភាពពិតប្រាកដនោះទេ។ លោកថា សូម្បីតែបទល្មើសព្រៃឈើ ប្រសិនបើពលរដ្ឋណាហ៊ានចេញមុខ ផ្ដល់ព័ត៌មានទៅប្រព័ន្ធផ្សព្វផ្សាយ ក៏រងការចោទប្រកាន់ពីអាជ្ញាធរថា ជាក្រុមបក្សប្រឆាំងដែរ។ លើសពីនេះទៀត បើអាជ្ញាធរ និងបុគ្គលណា ដែលគាំទ្រគណបក្សកាន់អំណាច គឺធ្វើអ្វីៗ បានតាមតែអំពើចិត្ត គ្មានទោសទណ្ឌនោះទេ ដូចជា កាប់ទន្ទ្រានព្រៃអស់រាប់រយហិកតារ ប្រព្រឹត្តអំពើពុករលួយ និងអំពើហិង្សាជាដើម៖ «និយាយរួមទៅសន្តិភាព តែអ្នកមានអំណាច តែពលរដ្ឋទូទៅគ្មានអី និងសន្តិភាព។ ព្រៃឈើការពារយូរៗ យកអាត្រាក់មកកាប់ រលាយអស់ អាហ្នឹងសន្តិភាពរបស់គាត់ តែសម្រាប់ពលរដ្ឋទូទាំងប្រទេស។ និយាយរួមទៅ តែបរិស្ថានក៏គ្មានសន្តិភាពផង មិនសូម្បីតែមនុស្សទេ។ សំខាន់សន្តិភាពពួកគាត់ គាត់ចង់ធ្វើអីក៏បាន ចង់ចាប់ពីណាក៏បាន ត្រូវហើយគាត់ថាហ្នឹង។ តែសម្រាប់ពលរដ្ឋក្រីក្រ អត់មានសន្តិភាពទេ មានតែការព្រួយបារម្ភ។ ព្រួយបារម្ភថា យើងឃើញអ្វីមួយ ឧទាហរណ៍ថា ឃើញខ្វះចន្លោះមេព្រៃ ព្រៃឈើបាត់បង់អស់ ដល់ពេលយើងរាយការណ៍ សុទ្ធថា យើងគណបក្សប្រឆាំង»។
ពលរដ្ឋរស់នៅរាជធានីភ្នំពេញ កញ្ញា ខាត់ ឆវី យល់ថា ពាក្យ "អរគុណសន្តិភាព" គ្រាន់តែជាពាក្យបិទបាំងកំហុសរបស់រដ្ឋាភិបាលតែប៉ុណ្ណោះ។ រីឯភាពអយុត្តិធម៌សង្គម កំពុងកើតមានគ្រប់ទីកន្លែង គ្មានដំណោះស្រាយជាវិជ្ជមាននៅឡើយទេ៖ «ចំពោះពាក្យអរគុណសន្តិភាព វាគ្រាន់តែជាពាក្យបិទបាំងរបស់រដ្ឋាភិបាលប៉ុណ្ណោះ ពីព្រោះអីរាល់ថ្ងៃហ្នឹង ប្រទេសកម្ពុជា ពុំទាន់មានសន្តិភាពពិតប្រាកដទេ គ្រាន់តែគ្មានសង្គ្រាមផ្ទុះអាវុធ តែពលរដ្ឋគ្មានសន្តិភាពផ្លូវចិត្តនៅឡើយ។ ព្រោះអីគាត់រងភាពអយុត្តិធម៌គ្រប់ទីកន្លែង ដូចជាការរំលោភសិទ្ធិមនុស្ស ការរំលោភដីធ្លី ការចាប់ចងគំរាមកំហែង សកម្មជនគណបក្សប្រឆាំង និងសិទ្ធិបញ្ចេញមតិ ពុំទាន់មានសេរីភាពនៅឡើយ»។
ថ្មីៗ នេះ សារបែកធ្លាយជាសំឡេងរបស់ នាយករដ្ឋមន្ត្រី ហ៊ុន សែន បានបញ្ជាឱ្យក្រសួង មន្ទីររដ្ឋគ្រប់ស្ថាប័ន និងអាជ្ញាធរគ្រប់ជាន់ថ្នាក់ រួមទាំងសិស្សានុសិស្សផង ឱ្យបិទស្លាកពាក្យស្លោកថា "អរគុណសន្តិភាព"។ លោក ហ៊ុន សែន ចាត់ទុកសារ "អរគុណសន្តិភាព" ជាសមិទ្ធផលដែលរដ្ឋាភិបាលសម្រេចបាន៖ «បំផុតចលនា សរសេរពាក្យអរគុណសន្តិភាព ដើម្បីយកភាសាហ្នឹង ជាភាសាគន្លឹះដែលត្រូវឱ្យទាំងអស់គ្នា ស្រឡាញ់សន្តិភាព ហើយការពារសន្តិភាព។ ភាសាហ្នឹងមិនមែនជាភាសា ប្រឆាំងជាមួយអ្នកណាទាំងអស់។ អ៊ីចឹងទេ ខ្ញុំស្នើថា បណ្ដារដ្ឋមន្ត្រីតាមស្ថាប័ន ហើយអាជ្ញាធរខេត្តគ្រប់ខេត្ត ដឹកនាំចលនាហ្នឹង និងចុះតាមសាលារៀនទៀត»។
អ្នកសិក្សាផ្នែកអភិវឌ្ឍន៍សង្គម គឺបណ្ឌិត កែម ឡី កាលលោកនៅមានជីវិត ធ្លាប់លើកឡើងថា ប្រទេសកម្ពុជា ថ្វីត្បិតតែអត់មានសង្គ្រាមប្រដាប់អាវុធក្ដី ក៏ប៉ុន្តែមានពោរពេញដោយអសន្តិសុខមនុស្សជាតិ មានអំពើហិង្សា រំលោភដីធ្លី អយុត្តិធម៌សង្គម និងការរំលោភបំពានសិទ្ធិកម្មករជាដើម៖ «សន្តិភាពហ្នឹងបើយើងញែក ឱ្យដាច់វាត្រូវមានការគោរពសិទ្ធិមនុស្ស។ បើអត់មានការគោរពសិទ្ធិមនុស្ស រំលោភសិទ្ធិគ្នាទៅវិញទៅមក វៃគ្នាទៅវិញទៅមក មានអីហ្នឹងសន្តិភាព។ អត់មានសង្គ្រាម ប៉ុន្តែអសន្តិសុខមនុស្សជាតិ បើមានអំពោះហិង្សា រំលោភដីធ្លី អំពើអយុត្តិធម៌ ការំលោភបំពានកម្មករច្រើន»។
ក្រោយបញ្ជារបស់លោក ហ៊ុន សែន ពេលប៉ុន្មានថ្ងៃចុងក្រោយនេះ គេឃើញក្រសួងមន្ទីរ តុលាការ និងស្ថាប័នរដ្ឋជាច្រើន បាននាំគ្នាសរសេរពាក្យស្លោកថា "អរគុណសន្តិភាព" បិទតាមរបង និងខ្លោងទ្វារមន្ទីរស្ថាប័នទាំងនោះព្រោងព្រាត ព្រមទាំងបង្ហោះលើបណ្ដាញសង្គមនានា ផង និងទៅព័រសារព័ត៌មានគាំទ្រលោក ហ៊ុន សែន ផង៕
No comments:
Post a Comment