ដោយ ខែ សុណង
2020-01-31
លោកនាយករដ្ឋមន្ត្រី ហ៊ុន សែន និងលោក ហ៊្វីល រ៉ូប៊ើតសុន (Phil Robertson) នាយករងនៃអង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch)។
រូប៖ ហ្វេសប៊ុកលោក ហ៊ុន សែន និង AFP
មន្រ្តីជាន់ខ្ពស់ឃ្លាំមើលសិទ្ធិមនុស្សអន្តរជាតិថា រដ្ឋាភិបាល លោក ហ៊ុន សែន គួរគោរពសិទ្ធិរបស់ពលរដ្ឋ ទប់ទល់នឹងការរាតត្បាតនៃមេរោគឆ្លង មានប្រភពពីប្រទេសចិន ជាជាងខំប្រឹងគេចវេះពីការស្តីបន្ទោស និងគ្មានវិធានការបិទជើងហោះហើរពីចិនចូលមកកម្ពុជា។ មេដឹកនាំរបបក្រុងភ្នំពេញវិញ យល់ថា ការបិទយន្តហោះចិនមិនឲ្យចូលស្រុកជាការសម្លាប់សេដ្ឋកិច្ច និងកាត់បន្ថយទំនាក់ទំនងរវាងកម្ពុជានិងចិន។
មន្រ្តីជាន់ខ្ពស់ឃ្លាំមើលសិទ្ធិមនុស្សអន្តរជាតិ អះអាងថា ការណ៍ដែលលោក ហ៊ុន សែន សម្រេចយករឿងទំនាក់ទំនងល្អរវាងកម្ពុជា និងចិន ធំជាងការបង្ការការរាតត្បាតនៃមេរោគកូរ៉ូណា ដែលមានប្រភពពីទីក្រុងវូហាន ប្រទេសចិន កុំឲ្យឆ្លងដល់ប្រជាពលរដ្ឋខ្មែរនោះ គឺជាកំហុសដ៏ធ្ងន់ធ្ងរបំផុត។
នាយករងនៃអង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) លោក ហ្វីល រ៉ូប៊ើតសុន (Phil Robertson) ប្រាប់អាស៊ីសេរី តាមសារអេឡិចត្រូនិក នៅថ្ងៃទី ៣០ ខែមករា ថា លោក ហ៊ុន សែន ខំប្រឹងគេចវេះពីការស្តីបន្ទោសយ៉ាងម៉េច គឺស្រេចតែគាត់ទៅចុះ។ លោកថា រដ្ឋាភិបាលគួរគោរពសិទ្ធិរបស់ពលរដ្ឋ ក្នុងការទប់ទល់នឹងការរាតត្បាតនៃមេរោគឆ្លង ដ៏កាចសាហាវនេះ។ ជាងនេះទៅទៀត រដ្ឋាភិបាលកម្ពុជា ត្រូវចាត់វិធានការបង្ការជាមូលដ្ឋាន ក្នុងកម្រិតសមហេតុសមផលមួយ ដើម្បីទប់ស្កាត់ការរីករាលដាលនៃមេរោគនេះ ព្រោះប្រទេសដូចជាកម្ពុជាមានលក្ខណៈពិសេសជាងប្រទេសដទៃ ត្រង់ថាកម្ពុជាអាចមានបញ្ហាលំបាក ក្នុងការទប់ទល់បើមានការផ្ទុះរាលដាលជំងឺដ៏កាចសាហាវបែបនេះ។
ការលើកឡើងរបស់លោក ហ្វីល រ៉ូប៊ើតសុន (Phil Robertson) បន្ទាប់ពីលោកនាយករដ្ឋមន្ត្រី ហ៊ុន សែន ថ្លែងក្នុងសន្និសីទសារព័ត៌មាននៅថ្ងៃទី៣០ មករា នៅឯវិមានសន្តិភាពថា លោក ហ្វីល រ៉ូប៊ើតសុន បានប្រៀនប្រដៅស្ដីបន្ទោសមកលើរដ្ឋាភិបាលកម្ពុជាដែលមិនបានបិទជើងហោះហើរពីប្រទេសចិនចូលមកកម្ពុជា គឺជារឿងអយុត្តិធម៌ចំពោះកម្ពុជា ដែលមានបំណងរករឿងតែកម្ពុជាប៉ុណ្ណោះ៖ «ហើយក៏សូមផ្ដាំផ្ញើទៅអ្នកដែលថា គួរតែស្ដីបន្ទោសរដ្ឋាភិបាលភ្នំពេញ អំពីការបើកឲ្យមានការហោះសូមឲ្យអ្នកឯងនិយាយដូចគ្នានេះ ទៅកាន់ប្រទេសដទៃដែលមានករណីជំងឺនេះ បើអ្នកឯងមិននិយាយទេបានសេចក្ដីថា រឿងទាំងឡាយអ្នកឯងរករឿងតែកម្ពុជាមួយគត់។ អាហ្នឹងចង្អុលឈ្មោះវាឲ្យច្បាស់ហ្មងគឺថា អាHuman Rights Watch អាហ្នឹងឈ្មោះស្អី? ហ្វីល រ៉ូប៊ើតសុន (Phil Robertson)។ ផ្ដាំទៅហ្វីល រ៉ូប៊ើតសុន បើលោកឯងជ្រុលជាមកប្រដៅឲ្យរដ្ឋាភិបាលខ្មែរត្រូវតែទទួលខុសត្រូវគួរស្ដីបន្ទោស ទៅស្ដីបន្ទោសឲ្យរដ្ឋាភិបាលគ្រប់ប្រទេសទៅរាប់ទាំងប្រទេសអ្នកឯងស្ថិតនៅផងដែរ ព្រោះជំងឺកើតនៅក្នុងប្រទេសអ្នកឯងម៉េចក៏អ្នកឯងមិនស្ដីបន្ទោសរដ្ឋាភិបាលអ្នកឯង? ហើយស្ដីបន្ទោសតែខ្ញុំ? អយុត្តិធម៌រឿងហ្នឹង! វាមិនមែនជាsingle standard (ស្ដង់ដារមួយ) ស្ដង់ដារទេ វាចូលទៅស្ដង់ដារទ្វេ ឬស្ដង់ដារ៣ គឺវាស្ដង់ដារច្រើនណាស់»។
លោកនាយករដ្ឋមន្ត្រី ហ៊ុន សែន ថ្លែងថា ជារឿងដែលគួរឲ្យអកុសលមានវិទ្យុបរទេសផ្សាយជាភាសាខ្មែរ ដែលទំនងលោកចង់សំដៅមកវិទ្យុអាស៊ីសេរី ដែលបានសម្ភាសន៍ លោក ហ្វីល រ៉ូប៊ើតសុន ដែលថា គួរតែថ្កោលទោស ទង្វើធ្វេសប្រហែសរបស់រដ្ឋាភិបាល ដែលមិនព្រមទប់ស្កាត់ជនជាតិចិនឲ្យចូលកម្ពុជា និងបានអនុញ្ញាតឲ្យក្រុមហ៊ុនយន្តហោះចិន បន្តដឹកអ្នកដំណើរដោយហោះត្រង់ពីក្រុងវូហាន (Wuhan) មកកម្ពុជា។ លោក ហ៊ុន សែន ថា ហេតុអ្វីលោក ហ្វីល រ៉ូប៊ើតសុន មកបន្ទោសរដ្ឋាភិបាលប្រទេសកម្ពុជាដែលមានអ្នកឆ្លងមេរោគថ្មីនេះតែមួយករណី ស្របពេលដែលប្រទេសរបស់ខ្លួនមានអ្នកឆ្លងមេរោគថ្មីនេះដែរនោះ?
យ៉ាងណាក៏ដោយ លោក ហ៊ុន សែន បានបញ្ជាក់ថា លោកក៏មិនទទួលយកសំណើរបស់ប្រជាពលរដ្ឋកម្ពុជា ដែលស្នើសុំឲ្យបិទជើងហោះហើរពីប្រទេសចិននោះដែរ ទោះបីជាជំងឺឆ្លងផ្លូវដង្ហើមបង្កដោយវីរុស កូរ៉ូណា មានប្រភពពីប្រទេសចិនកំពុងរាតត្បាតស្ទើរពេញពិភពលោកក្តី។ លោកថា លោកមិនខ្វល់រដ្ឋាភិបាលប្រទេសផ្សេងៗគិតយ៉ាងម៉េចនោះទេ។ រដ្ឋាភិបាលរបស់លោកគឺគ្មានវិធានការបិទជើងហោះហើរពីប្រទេសចិន និងគ្មានវិធានការជម្លៀសពលរដ្ឋ និងនិស្សិតខ្មែរឡើយ។ លោកសង្កត់ធ្ងន់ថា ជំហរបែបនេះ គឺដើម្បីរក្សាកំណើនសេដ្ឋកិច្ច និងទំនាក់ទំនងល្អជាមួយប្រទេសអំណាចកុម្មុយនិស្តចិន។ លោក ហ៊ុន សែន សោកស្ដាយចំពោះនិស្សិតខ្មែរមួយចំនួនដែលបាននាំគ្នាចាកចេញពីប្រទេសចិនក្នុងស្ថានភាពបែបនេះ ដោយមិនព្រមនៅរួមសុខទុក្ខជាមួយប្រជាជនចិន។
ដោយហេតុផលនេះហើយ ទើបក្រុមនិស្សិតកម្ពុជាមួយចំនួន ដែលកំពុងសិក្សានៅប្រទេសចិន បានសម្រេចចិត្តទិញសំបុត្រយន្តហោះដោយខ្លួនឯងមកកម្ពុជាវិញ ដើម្បីគេចចេញពីការឆ្លងមេរោគមួយនេះ ដោយមានការអនុញ្ញាតពីសាលារបស់ពួកគេ។
និស្សិតមួយរូបដែលទើបមកដល់ប្រទេសកម្ពុជា គឺលោក សោម ពេជ្រដូល្លា ថ្លែងថា ប្រសិនបើបន្តស្នាក់នៅប្រទេសចិន គឺពិតជាល្អជាងមកកម្ពុជាមែន ព្រោះសាលានិងរដ្ឋាភិបាលចិន មានការយកចិត្តទុកដាក់ខ្ពស់ចំពោះសុវត្ថិភាព និងសុខភាពរបស់ពលរដ្ឋគ្រប់រូប មិនថាជនបរទេសនោះទេ។
ជំងឺរលាកផ្លូវដង្ហើមដែលបង្កដោយវីរុសកូរ៉ូណាថ្មីនេះ បានផ្ទុះឡើងនៅទីក្រុងវូហាន ខេត្តហ៊ូបេ (Hubei) ប្រទេសចិន ចាប់តាំងពីចុងខែធ្នូ ឆ្នាំ២០១៩។ គិតត្រឹមល្ងាចថ្ងៃទី៣០ ខែមករា វីរុសកូរ៉ូណាថ្មីនេះ បានសម្លាប់មនុស្សនៅក្នុងប្រទេសចិនជាង១៧០នាក់ និងបានឆ្លងទៅមនុស្សជិត៨ពាន់នាក់។
សហរដ្ឋអាមេរិក ជប៉ុន អង់គ្លេស និងសិង្ហបុរី រួមទាំងប្រទេសមួយចំនួនទៀត បានជម្លៀសពលរដ្ឋរបស់ខ្លួនចេញពីតំបន់ផ្ទុះវីរុសដ៏កាចសាហាវមួយនេះ និងថែមទាំងរឹតបន្តឹង និងកាត់បន្ថយជើងហោះហើរពីប្រទេសចិនផងដែរ។
នាយកប្រតិបត្តិអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ ទទួលស្គាល់ថា ការបិទជើងហោះហើរពីប្រទេសចិន គឺអាចមានផលប៉ះពាល់ដល់សេដ្ឋកិច្ចកម្ពុជាផ្នែកខ្លះ ប៉ុន្តែប្រសិនបើមានករណីជនជាតិចិន នាំវីរុសកូរ៉ូណាថ្មីមកចម្លងដល់ប្រជាពលរដ្ឋខ្មែរជាយថាហេតុនោះ គឺនឹងបណ្ដាលឲ្យប៉ះពាល់ដល់សេដ្ឋកិច្ចដូចគ្នា និងថែមទាំងប៉ះពាល់ដល់អាយុជីវិតប្រជាពលរដ្ឋថែមទៀតផង។ មន្ត្រីសង្គមស៊ីវិលរូបនេះ មើលឃើញដែរថា ការជួយជម្លៀសនិស្សិតនិងពលរដ្ឋខ្មែរចេញ ពីទីក្រុងវូហាន ដែលផ្ទុះមេរោគថ្មីនេះ គឺមិនអាចនាំភាពល្អក់កករដល់ទំនាក់ទំនងកម្ពុជា-ចិនឡើយ៖ «ចំណុចទី២ រឿងពលរដ្ឋ និងនិស្សិតខ្មែរនៅទីក្រុងវូហាននេះ ខ្ញុំគិតថា ពួកគេស្ថិតនៅទីនោះមិនមែន ជាក្រុមជួយសង្គ្រោះ ឬក្រុមដែលមានប្រព័ន្ធការពារ សុវត្ថិភាព ក្នុងទម្រង់ ឬមួយក៏ជាគ្រូពេទ្យអីទេ ខ្ញុំគិតថា ពួកគេនៅទីនោះ ប្រឈមខ្លាំងនឹងហានិភ័យនៃការឆ្លងមេរោគថ្មីនេះ ដូច្នេះការជម្លៀស ពួកគេចេញ វានឹងមិនមានផលប៉ះពាល់នៃចំណង មិត្តភាពកម្ពុជា-ចិននោះទេ ខណៈប្រទេសផ្សេង គេក៏មានចំណងទាក់ទងជាមួយចិនដែរ ប៉ុន្តែគេនៅតែស្ទុះស្ទាប្រយ័ត្នប្រយែងហើយនឹងរកមធ្យោបាយ ដើម្បីជម្លៀសពលរដ្ឋរបស់គេចេញពី ទីកន្លែងដែលមានមេរោគឆ្លងដ៏កាចសាហាវនោះ»។
ក្រោយលោក ហ៊ុន សែន ប្រកាសបែបនេះ អ្នកលេងបណ្ដាញសង្គមហ៊្វេសបុក បានបង្ហោះសារឌឺដងបែបហួសចិត្តថា ការបិទជើងហោះហើរពីចិនដើម្បីសុវត្ថិភាពពលរដ្ឋមួយរយៈសោះ ខ្លាចប៉ះពាល់ សេដ្ឋកិច្ច ប៉ុន្តែបើបិទប្រព័ន្ធអនុគ្រោះពន្ធEBA របស់សហភាពអឺរ៉ុប និង GSP របស់អាមេរិក ជាឆ្នាំងបាយពលរដ្ឋរាប់លាន់នាក់ បែរជាមិនខ្លាចប៉ះពាល់សេដ្ឋកិច្ចទេ៕
1 comment:
This devil Khmer traitor Hun Sen has never cared about Khmer people's welfare. He cared only about his power, pleasing at all costs his 2 masters - the evil Vietnam and the monster China.
Post a Comment