ដោយ អាស៊ីសេរី
2020-02-16
លោកនាយករដ្ឋមន្ត្រី ហ៊ុន សែន ទទួលស្វាគមន៍អ្នកដំណើរបរទេស ចុះពីលើកប៉ាល់ Westerdam ពេលចូលចតនៅកំពង់ផែក្រុងព្រះសីហនុ កាលពីថ្ងៃទី១៤ ខែកុម្ភៈ ឆ្នាំ២០២០។
រូប៖ ហ្វេសប៊ុកលោក ហ៊ុន សែន
អាជ្ញាធរប្រទេសម៉ាឡេស៊ីប្រកាសបញ្ជាក់ថា លទ្ធផលធ្វើតេស្តពីរដងលើអ្នកដំណើរជនជាតិអាមេរិកម្នាក់ ដែលចុះពីកប៉ាល់ Westerdam ដែលចូលចតនៅក្រុងព្រះសីហនុនោះ នៅតែរកឃើញថា មានមេរោគកូរ៉ូណាថ្មី ឬបង្កជំងឺ កូវីត-១៩ ពេលទៅដល់ប្រទេសម៉ាឡេស៊ី។ ការធ្វើតេស្តពីរដងនេះ គឺបន្ទាប់ពីក្រសួងសុខាភិបាលកម្ពុជាមិនអស់ចិត្ត និងទាមទារឲ្យអាជ្ញាធរម៉ាឡេស៊ីពិនិត្យសាឡើងវិញ។
ឧបនាយករដ្ឋមន្ត្រីម៉ាឡេស៊ី អ្នកស្រី វ៉ាន់ អាហ្សីហ្សា វ៉ាន់ អ៊ីស្មែល (Dr. Wan Azizah Wan Ismail) ថ្លែងការពារលទ្ធផលរកឃើញវីរុសកូរ៉ូណាលើស្ត្រីអាមេរិកវ័យ ៨៣ឆ្នាំនោះថា ការធ្វើតេស្ត គឺធ្វើឡើងតាមស្តង់ដារពិភពលោក (World Class)។ អ្នកស្រីបន្តថា ស្រ្តីចំណាស់ម្នាក់នោះ ត្រូវបានធ្វើតេស្តពីរលើក ហើយលទ្ធផល គឺវិជ្ជមានទាំងពីរលើក។ មន្ត្រីជាន់ខ្ពស់ប្រទេសម៉ាឡេស៊ីរូបនេះ ក៏ប្រកាសហាមមិនឲ្យអ្នកដំណើរលើនាវា វ៉េស្ទើដាម (Westerdam) ដែលកំពុងស្ថិតក្នុងប្រទេសកម្ពុជានៅឡើយនោះ ធ្វើដំណើរចូលប្រទេសម៉ាឡេស៊ីទៀត ដោយសារតែទាក់ទងនឹងអ្នកមានវីរុសឆ្លងដ៏កាចសាហាវមួយនេះ។
ការអះអាងរបស់មន្ត្រីជាន់ខ្ពស់ម៉ាឡេស៊ីនេះ គឺបន្ទាប់ពីក្រសួងសុខាភិបាលកម្ពុជា បង្ហាញការមិនអស់ចិត្ត និងថែមទាំងបានដាក់លិខិតស្នើសុំឲ្យប្រទេសម៉ាឡេស៊ី ពិនិត្យឡើងវិញអំពីលទ្ធផលនៃការធ្វើតេស្តលើស្ត្រីជនជាតិអាមេរិករូបនោះ ដើម្បីឲ្យមានភាពសុក្រឹត។ ការមិនអស់ចិត្តនេះ ដោយក្រសួងសុខាភិបាលកម្ពុជា អះអាងថា មុននឹងចាកចេញពីកម្ពុជា ស្ត្រីជនជាតិអាមេរិករូបនោះ រួមទាំងអ្នកដំណើរផ្សេងទៀត ត្រូវបានក្រសួងពិនិត្យយ៉ាងល្អិតល្អន់ និងបានធ្វើការជាមួយអង្គការសុខភាពពិភពលោក ប៉ុន្តែរកមិនឃើញមានរោគសញ្ញាជំងឺរលាកផ្លូវដង្ហើម កូវិត១៩ នេះទេ។
អាស៊ីសេរីបានព្យាយាមទាក់ទងអ្នកនាំពាក្យក្រសួងសុខាភិបាលកម្ពុជា លោក លី សូវ៉ាន់ ជាច្រើន លើកតែពុំមានអ្នកទទួលទូរស័ព្ទ។
រីឯស្ថានទូតអាមេរិកប្រចាំកម្ពុជា ប្រកាសថា ខ្លួនបានដឹងអំពីសេចក្ដីរាយការណ៍នានា ដែលថា អ្នក ដំណើរជនជាតិអាមេរិកម្នាក់ ត្រូវបានធ្វើតេស្តនៅប្រទេសម៉ាឡេស៊ី រកឃើញមានជំងឺកូវិដ១៩ បន្ទាប់ពីចាកចេញពីកប៉ាល់ វេស្ទ័រដាម (Westerdam) ដែលចូលចតនៅប្រទេសកម្ពុជា កាលពីថ្ងៃទី១៤ កុម្ភៈ។ ស្ថានទូតអាមេរិក កំពុងសម្របសម្រួលជាមួយអាជ្ញាធរកម្ពុជា និងស្ថានទូតសហរដ្ឋអាមេរិកប្រចាំតំបន់ និងក្រុមហ៊ុនកប៉ាល់នោះ ដើម្បីធានាថា ពលរដ្ឋអាមេរិកទាំងនោះទទួលបានជំនួយជ្រោមជ្រែងនានា។
ក្រសួងសុខាភិបាលប្រទេសម៉ាឡេស៊ី កាលពីថ្ងៃទី១៥ ខែកុម្ភៈ បានរកឃើញរោគសញ្ញាជំងឺរលាក ផ្លូវដង្ហើម កូវិត១៩ (Covid-19) នេះ នៅលើស្រ្តីជនជាតិអាមេរិក វ័យ ៨៣ឆ្នាំ ដែលធ្វើដំណើររួមគ្នាជាមួយអ្នកដំណើរ ១៤៤នាក់ផ្សេងទៀត តាមជើងយន្តហោះពីភ្នំពេញទៅប្រទេសម៉ាឡេស៊ី កាលពីថ្ងៃទី១៤ កុម្ភៈ។ មនុស្សទាំង ១៤៥នាក់នេះ ស្ថិតក្នុងចំណោមអ្នកដំណើរ ១.៤៥៥ នាក់ និងបុគ្គលិក ៨០២នាក់នៅលើកប៉ាល់ វ៉េស្ទើរដាម (Westerdam) ដែលរបបក្រុងភ្នំពេញអនុញ្ញាតឲ្យចូលចតនៅកំពង់ផែក្រុងព្រះសីហនុ និងបន្តដំណើរតាមជើងយន្តហោះ ទៅកាន់ប្រទេសរៀងៗ ខ្លួន។
កប៉ាល់ទេសចរណ៍មួយនេះ បានចាកចេញពីទីក្រុងហុងកុង ប្រទេសចិន កាលពីថ្ងៃទី១ ខែកុម្ភៈ ប៉ុន្តែមានប្រទេសចំនួន៥ បដិសេធមិនឱ្យចូលចតឡើយ ព្រោះខ្លាចក្នុងចំណោមមនុស្សរាប់ពាន់នាក់នៅលើកប៉ាល់នោះ មានផ្ទុកមេរោគវីរុសបង្ករលាកផ្លូវដង្ហើម កូវីត១៩ (Covid-19)។ លោក ហ៊ុន សែន មិន ត្រឹមតែនាវានេះចូលចតនៅកម្ពុជានោះទេ លោកថែមទាំងទទួលដោយផ្ទាល់ និងប្រកាសឲ្យអ្នកទេសចរទាំងនោះ អាចស្នាក់នៅកម្ពុជា និងដើរកម្សាន្តគ្រប់ទីកន្លែង។ លោក ហ៊ុន សែន ទាំងអំពាវ នាវកុំឲ្យប្រជាពលរដ្ឋកម្ពុជា ជាពិសេស តាមសណ្ឋាគារ និងភោជនីយដ្ឋាន មិនត្រូវរើសអើង និងភ័យខ្លាចនោះទេ។
នាយកប្រតបត្តិអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ មានប្រសាសន៍ថា នៅ ពេលដែលអ្នកដំណើរត្រូវបានរកឃើញថា មានវីរុសបង្កជំងឺ កូវីត១៩ ក្រោយការចាកចេញពីកម្ពុជានេះ ធ្វើឲ្យមានការចោទសួរយ៉ាងខ្លាំងទៅលើសមត្ថភាពរបស់ក្រសួងសុខាភិបាលកម្ពុជា។ ទន្ទឹមគ្នានេះ លោកយល់ថា រដ្ឋាភិបាលកម្ពុជា ត្រូវតែផ្សព្វផ្សាយឲ្យប្រជាពលរដ្ឋមានការប្រុងប្រយ័ត្នខ្ពស់ ដូចជា ការពាក់ម៉ាស់ការពារជាដើម ពោលគឺមិនត្រូវលើកទឹកចិត្តកុំឲ្យពលរដ្ឋពាក់ម៉ាស់ការពារនោះទេ ព្រោះវីរុសប្រភេទថ្មីនេះ មានការឆ្លងឆាប់រហ័ស សូម្បីតែគ្រួពេទ្យនៅប្រទេសចិនជាង ១ពាន់ ៧រយនាក់ ក៏បានឆ្លង និងគ្រោះថ្នាក់ដល់អាយុជីវិតដែរ៖ «»
នេះមិនមែនជាករណីទីមួយទេ ដែលអ្នកធ្វើដំណើរមានផ្ទុកជំងឺរលាកផ្លូវដង្ហើម កូវិត-១៩ នេះ ត្រូវបានរកឃើញ ក្រោយចាកចេញពីប្រទេសកម្ពុជា។ កាលពីចុងខែមករា មានជនជាតិចិន ៣នាក់ ត្រូវបានរកឃើញថា មានជំងឺនេះ ក្រោយចាកចេញពីប្រទេសកម្ពុជាដែរ។
អង្គការសុខភាពពិភពលោក ធ្លាប់ប្រកាសពីការព្រួយបារម្ភថា ប្រទេសដែលមានប្រព័ន្ធសុខាភិបាល ទន់ខ្សោយ អាចមិនមានសមត្ថភាពរកឃើញវីរុសប្រភេទថ្មីនេះទេ។
ដើម្បីចូលរួមទប់ស្កាត់ជំងឺរលាកផ្លូវដង្ហើម កូវិត១៩ នេះ ស្ថានទូតប្រទេសជប៉ុន ក៏បានប្រកាសផ្តល់ សម្ភារៈ៤ប្រភេទដល់កម្ពុជា ក្នុងមានដូចជាអាវបំពង់ជាង ៩ពាន់ (៩.៣៦០) ឈុត អាកុលសម្អាតដៃ វ៉ែនតាការពារសុវត្ថិភាពចំនួន ៥៤០ និងស្រោមដៃជាង ២ម៉ឺន ៤ពាន់ (២៤.៤០០) គូ។
គិតត្រឹមថ្ងៃ១៦ ខែកុម្ភៈជំងឺរលាកផ្លូវដង្ហើម កូវិត១៩ ដែលបង្កឡើងដោយមេរោគវីរុស សារស៊ីអូវី២ (SARS-Cov-2) ដែលមានប្រភពរីករាលដាលពីក្រុងវូហាន ប្រទេសចិន បានសម្លាប់មនុស្សកើនដល់ជាង ១ពាន់ ៦រយ (១៦៦៩) នាក់ហើយ ខណៈអ្នកឆ្លងកើនដល់ជិត ៧ម៉ឺន (៦៩.២៦៤) នាក់។ អ្នកឆ្លង និងស្លាប់ ភាគច្រើន គឺនៅប្រទេសចិន។ វីរុសនេះ បានឆ្លងរីករាលដាលដល់ប្រទេសជិត ៣០ទៀត នៅលើពិភពលោក។ ប្រទេសមួយចំនួន រឹតបន្តឹងអ្នកធ្វើដំណើរពីប្រទេសចិន ដើម្បីទប់ស្កាត់វីរុសដ៏កាចសាហាវនេះ ហើយមានតែរដ្ឋាភិបាលកម្ពុជានោះទេ ដែលបង្ហាញជំហរមិនព្រួយបារម្ភ និងស្វាគមន៍អ្នកដំណើរទាំងអស់ដូចធម្មតា ទោះបីជាប្រព័ន្ធសុខាភិបាលកម្ពុជា រងការរិះគន់ថា នៅទន់ខ្សោយក្តី៕
No comments:
Post a Comment