ដោយ ថន ថារ៉ូ
2020-02-05
ប្រជាពលរដ្ឋប្រមូលផ្ដុំគ្នានៅសាលាឃុំទួលពង្រ ស្រុកម៉ាឡៃ ខេត្តបន្ទាយមានជ័យ នៅថ្ងៃទី៥ ខែកុម្ភៈ ឆ្នាំ២០២០ ទាមទារអាជ្ញាធរឱ្យដោះស្រាយទំនាស់ដីធ្លីរបស់ពួកគាត់។ រូប៖ ពលរដ្ឋ
Photo: RFA
ប្រជាពលរដ្ឋជាង ១០០នាក់ តំណាងឱ្យពលរដ្ឋជាង៤០០គ្រួសារ ដែលមានទំនាស់ដីធ្លីជាមួយអ្នកមានឥទ្ធិពលក្នុងស្រុកម៉ាឡៃ ខេត្តបន្ទាយមានជ័យ នៅព្រឹកថ្ងៃទី៥កុម្ភៈ បានប្រមូលផ្ដុំនៅមុខសាលាឃុំទួលពង្រ តវ៉ាទាមទារឱ្យអាជ្ញាធរដោះស្រាយរឿងទំនាស់ដីធ្លីរបស់ពួកគាត់ឱ្យបានឆាប់។
តំណាងក្រុមអ្នកតវ៉ាម្នាក់នៅឃុំទួលពង្រ លោក ហឿម សុវណ្ណរិទ្ធិ ថ្លែងថា មូលហេតុដែលពួកគាត់តវ៉ា ដោយសារអាជ្ញាធរសម្របសម្រួលឱ្យពួកគាត់បែងចែកដីទំនាស់របស់ពួកគាត់ជាង ៤០០គ្រួសារ ដែលមានទំហំប្រមាណ ១០០ហិកតារ នៅតំបន់ព្រំដែនកម្ពុជាថៃ ក្នុងភូមិអូរអំពឹល ឃុំទួលពង្រ ពាក់កណ្ដាលឱ្យទៅភាគីទំនាស់ម្ខាងទៀត រួមមានឈ្មោះ សួន សុខុន និង និងឈ្មោះ ពុំ វុទ្ធី ជាអ្នកមានលុយនិងមានអំណាច នៅក្នុងខេត្តបន្ទាយមានជ័យ។ លោកថា ពួកលោកមិនអាចចែកដីទំនាស់នោះតាមការស្នើសុំរបស់លោកមេឃុំបានទេ ពីព្រោះពួកគាត់បានកាត់កាប់និងដាំដុះនៅលើដីនោះជាង១០ឆ្នាំហើយ ពោលគឺតាំងនៅតំបន់នោះពុំមានការអភិវឌ្ឍន៍៖ «ថ្ងៃនេះគេអត់ទាន់សម្រេចយ៉ាងម៉េចទេ គេនឹងយកសំណុំរឿងនេះទៅដោះស្រាយនៅថ្នាក់ខេត្តទៀត ព្រោះថា គេបានទទួលបន្ទុកពីអាជ្ញាធរសង្កាត់និមិត្តមក គេអត់បានដឹងរឿង ថាពួកខ្ញុំឈ្លោះគ្នាយ៉ាងម៉េច។គេទទួលបានតែខាងប្រជាពលរដ្ឋម្ខាងទៀតមិនដឹងយ៉ាង ប៉ុន្តែគាត់ធ្វើប្លង់ដីឱ្យពួកខ្ញុំអស់ហើយ ។ខ្ញុំចង់ឱ្យអាជ្ញាធរទទួលស្គាល់ច្បាស់លាសឯកសារគាត់ធ្វើឱ្យខ្ញុំដល់ខេត្តអស់ហើយ តែឥឡូវគាត់មកសើរើសុំចែកដីពាក់កណ្ដាលវិញខ្ញុំមិនព្រមទេ»។
រីឯតំណាងក្រុមអ្នកតវ៉ាម្នាក់ទៀត លោក ណែវ សំណាង មានប្រសាសន៍ថា ដីទំនាស់នោះជាដីលំនៅឋាន ដោយអ្នកខ្លះបានកាន់កាប់ដីបណ្ដោយ ១២០ម៉ែត្រគុណនឹង ៣០ម៉ែត្រ និងខ្លះទៀតបណ្ដោយ ៦០ម៉ែត្រគុណនឹង ៣០ម៉ែត្រក្នុងមួយគ្រួសារ។ លោកបន្តថា ពួកលោកមិនអាចបែងចែកដីនេះទៅឱ្យភាគីទំនាស់បានទេ ព្រោះពួកគាត់ក្រីក្រ ហើយបានសង់ផ្ទះ និងបានដាំដើមចេក ដូង និងស្វាយនៅលើនោះ បានហុចផលបណ្ដើរៗ ហើយ៖ «សួរថា ដីបងឯងមាន ៤ហិកតារហើយគេសុំកន្លះហិកតារតើបងឯងព្រមអត់? ប្រជាពលរដ្ឋគេមិនអាចទៅនិយាយបែបនេះកើតទេ ព្រោះដីគេរស់នៅមិនមែនពីរបីថ្ងៃហើយមិនមែនមកសង់ផ្ទះពេលយប់ឯណា?។ ពួកនេះសុទ្ធតែពួកដើររំលោភដីប្រជាពលរដ្ឋដីនៅប៉ោយប៉ែតក៏បានពួកនេះរំលោភដែរ ដីនៅភូមិព្រៃព្រិច។ ខ្ញុំស្នើដល់សម្ដេច ហ៊ុន សែន ឱ្យស្លាប់ពួកនេះសុទ្ធតែពួកបង្កបញ្ហាដល់ប្រជាពលរដ្ឋខេត្តបន្ទាយមានជ័យទេ»។
ឆ្លើយតបនឹងបញ្ហានេះ មេឃុំទួលពង្រ លោក ទឹម ម៉ន ប្រាប់អាស៊ីសេរីថា លោកសម្របសម្រួលឱ្យប្រជាពលរដ្ឋជាង ៤០០គ្រួសារនោះបែងចែកដីទំនាស់ពាក់កណ្ដាលក្នុងមួយគ្រួសារឱ្យភាគីទំនាស់ម្ខាងទៀត ដើម្បីបញ្ចប់រឿង ព្រោះដីនេះមានទំនាស់ជាច្រើនឆ្នាំហើយ។ លោកបន្ថែមថា មូលហេតុដែលដោះស្រាយបែបនេះ ដោយសារប្រជាពលរដ្ឋទាំងនោះបានកាន់កាប់ដីរបស់ភាគីម្ខាងទៀត ដោយខុសច្បាស់ ប៉ុន្តែដើមបណ្ដឹងសុខចិត្តយល់ព្រមចែកដីពាក់កណ្ដាលជូនប្រជាពលរដ្ឋ ដើម្បីកុំមានបញ្ហាទៅមុខទៀត៖ «ប៉ុន្តែគោលនយោបាយរបស់យើងសុទ្ធតែដោះស្រាយឱ្យឈ្នះទាំងគ្នាទេ មិនមែនឱ្យអ្នកណាម្ខាងបានទេ ។រឿងហ្នឹងមិនមែននៅខាងឃុំខ្ញុំទេ គឺតាំងពីក្នុងសង្កាត់និមិត្តក្រុងប៉ោយប៉ែតណោះ ព្រោះពីដើមដីហ្នឹងស្ថិតនៅក្នុងសង្កាត់និមិត្តគ្រប់គ្រង ប៉ុន្តែក្រោយមកបានអាជ្ញាធរខេត្តបានកាត់ដីនោះមកខាងស្រុកម៉ាឡៃវិញ»។
អាស៊ីសេរីមិនអាចទាក់ទងភាគីទំនាស់ម្ខាងទៀត គឺលោក សួន សុខុន និងលោក ពុំ វុទ្ធី ដើម្បីអត្ថាធិប្បាយជុំវិញបញ្ហានេះបានទេនៅថ្ងៃទី៥ កុម្ភៈ។
មេឃុំទួលពង្រ លោក ទឹម ម៉ន អះអាងថា លោក សួន សុខុន និងលោក ពុំ វុទ្ធី បានទិញដីទំនាស់ពីមន្ត្រីទាហានផ្ដាច់ខ្លួននៅតំបន់នោះ ដោយមានប័ណ្ណកាន់កាប់ពីអាជ្ញាធរមូលដ្ឋានត្រឹមត្រូវ។
មន្ត្រីសម្របសម្រួលសមាគមការពារសិទ្ធិមនុស្ស អាដហុក (Adhoc) ខេត្តបន្ទាយមានជ័យ លោក ស៊ុំ ច័ន្ទគា មានប្រសាសន៍ថា ដីទំនាស់នោះ មានប្រជាពលរដ្ឋខ្លះបានរស់នៅភូមិអូរអំពឹលរាប់សិបឆ្នាំមកហើយ និងមានពលរដ្ឋខ្លះឃុំក្បែរខាង ហើយទៅចាប់ទំនាស់សង់ផ្ទះនិងដាំដុះនៅលើដីនោះជាបន្តបន្ទាប់មក។ លោកបញ្ជាក់ទៀតថា អាជ្ញាធរត្រូវតែដោះស្រាយឱ្យបានសមរម្យដែរ ព្រោះពួកគាត់ក្រីក្រ និងបានកាន់កាប់ដីតាំងតែតំបន់នោះពុំទាន់មានការអភិវឌ្ឍ។ ម្យ៉ាងទៀត អាជ្ញាធរក៏មិនបានទប់ស្កាត់ពួកគាត់ដែលចូលកាន់កាប់ដីពីដំបូងនោះទេ៖ «ព្រោះខ្លួនជាអាជ្ញាធរអង្គុយកៅអីរដ្ឋមានតួនាទីដោះស្រាយជូនប្រជាពលរដ្ឋអីចឹងហើយ។ ព្រោះទោះបីប្រជាពលរដ្ឋខុសខូចប្រជាពលរដ្ឋត្រូវ គឺបាតដៃខ្នងដៃសុទ្ធតែទាំងអស់ ព្រោះជាប្រជាពលរដ្ឋខ្លួនឯង។ អីចឹងអ្នកទទួលសុខត្រូវនៅកន្លែងហ្នឹងគឺអាជ្ញាធរឧទាហរណ៍ថាប្រជាពលរដ្ឋចូលទៅរស់នៅលើដីគេ ប៉ុន្តែអាជ្ញាធរខ្លួនឯងហ្នឹងជាអ្នកទប់ស្កាត់អ្នកបង្ការកុំឱ្យបញ្ហាហ្នឹងបង្កើតនូវករណី»។
លោកបន្តថា នៅខេត្តបន្ទាយមានជ័យមានប្រជាពលរដ្ឋទំនាស់ដីធ្លីជាង ៣០០ករណីហើយ ដែលអាជ្ញាធរមិនទាន់ដោះស្រាយបាននៅឡើយ។ លោកថា ភាគីទំនាស់ភាគច្រើនជាអ្នកមានលុយនិងមានអំណាច ច្រើនប្រើប្រាស់ប្រព័ន្ធតុលាការ បង្ខំឱ្យប្រជាពលរដ្ឋទទួលយកតាមការដោះស្រាយរបស់អាជ្ញាធរ ក្នុងនោះមានប្រជាពលរដ្ឋជាច្រើន ត្រូវបានចាប់ខ្លួនដាក់គុក ដោយសារពួកគាត់មិនព្រមទទួលយកដំណោះស្រាយរបស់អាជ្ញាធរ។
តំណាងប្រជាពលរដ្ឋនៅឃុំទួលពង្រអះអាងថា ពួកគាត់នឹងលើកគ្នាតវ៉ាទៅសាលាស្រុក និងសាលាខេត្តបន្ទាយមានជ័យបន្តទៀត ក្នុងពេលឆាប់ៗ ដើម្បីទាមទារអាជ្ញាធរដោះស្រាយដីជូនពួកគាត់ឱ្យបានសមរម្យជាងពេលបច្ចុប្បន្ន និងឱ្យភាគីទំនាស់ឈប់ប្ដឹងផ្ដល់ពួកគាត់បន្តទៀត៕
No comments:
Post a Comment