Khmer Circle:
There is a dose of satire and a mocking tone in his words, but the draconian nature of the regime in general and, particularly, in the oppressed scope and climate of speech, more than justifies the tone.
This situation is reflected in his arrest and detention as well as the core truth in the 'offending' comments made.
^^^
ដោយ ជុន ច័ន្ទបុត្រ
2020-03-11
លោក កូយ សំអាត ហៅ ទេព វីសាល(Tep Visal) (ឆ្វេង និងអាវផ្កាកណ្ដាល) ដែលនគរបាលភ្នំពេញចាប់ នៅថ្ងៃទី៩ ខែមីនា ឆ្នាំ២០២០ បន្ទាប់ពីលោកបញ្ចេញមតិយោបល់អំពីជំងឺកូវីដ-១៩ លើហ្វេសប៊ុករបស់លោក។
រូប៖ ហ្វេសប៊ុកនគរបាលរាជធានីភ្នំពេញ និងលោក ទេព វីសាល
សាលាដំបូងរាជធានីភ្នំពេញ សម្រេចឃុំខ្លួនយុវជនម្នាក់ឈ្មោះ កូយ សំអាត ដោយសារបង្ហោះសាររឿងជំងឺកូវីដ-១៩ នៅលើទំព័រហ្ចេសប៊ុក។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូលោក អំ សំអាតឲ្យដឹងថា តុលាការ បានបញ្ជាឲ្យសមត្ថកិច្ចនាំខ្លួនលោក កូយ សំអាត ទៅឃុំក្នុងពន្ធនាគាររាជធានីភ្នំពេញ (PJ) តាំងពី ម៉ោង៥ល្ងាច ថ្ងៃទី១១ ខែមីនា បន្ទាប់ពីចំណាយពេលសាកសួរពេញមួយថ្ងៃ ប៉ុន្តែលោកមិនទាន់ ដឹងថា តុលាការចោទប្រកាន់ពីបទអ្វីនៅឡើយ។ ទោះជាយ៉ាងណា លោក យល់ថា អាជ្ញាធរ និងតុលាការ គ្មានមូលដ្ឋាន និងហេតុផលសមរម្យក្នុងការចាប់ខ្លួន ចោទប្រកាន់ និងឃុំខ្លួនលោក កុយ សំអាត ទេ ប៉ុន្តែផ្ទុយទៅវិញគេមើលឃើញពីការរំលោភលើសិទ្ធិសេរីភាពក្នុងការបញ្ចេញមតិ ដែលធានាដោយបទដ្ឋាន អន្តរជាតិស្តីពីសិទ្ធិមនុស្ស និងរដ្ឋធម្មនុញ្ញ ។ មន្ត្រីសិទ្ធិមនុស្សរូបនេះ បន្តថា អាជ្ញាធរ មិនបានបែងចែកឱ្យច្បាស់អំពីអត្ថន័យនៅក្នុងការបញ្ចេញមតិថា អ្វីជាការបញ្ចេញមតិ និងអ្វីជាបទល្មើស។ ម្យ៉ាងទៀតទាក់ទងនឹងបញ្ហាជំងឺកូវីដ-19 (covid-19) នេះ អាជ្ញាធរគួរតែបង្កើន ការផ្សព្វផ្សាយអប់រំ ឱ្យប្រជាពលរដ្ឋយល់ដឹង និងដឹងពីវិធីការពារ និងទប់ស្កាត់ ដើម្បីកុំឱ្យប្រជាពល រដ្ឋ យល់ខុស និងមានការភ័យខ្លាចខ្លាំង ព្រោះថា ជំងឺថ្មីនេះប្រទេសក្នុងសកលលោកសុទ្ធតែកំពុងព្រួយបារម្ភដូចៗ គ្នា។
អាស៊ីសេរី មិនអាចសុំការបញ្ជាក់ពីប្រធានលេខាធិការដ្ឋានរដ្ឋបាលនៃសាលាដំបូងរាជធានីភ្នំពេញ លោក អ៊ី រិន្ទ និងព្រះរាជអាជ្ញានៃអយ្យការសាលាដំបូងរាជធានីភ្នំពេញ លោក កែវ សុធា បានទេ ដោយទូរស័ព្ទចូលពុំមានអ្នកទទួល។ ចំណែកអ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន ប្រាប់អាស៊ីសេរីថា លោកមិនដឹងថា តុលាការសម្រេចបែបណានោះទេ គ្រាន់តែដឹងថា សមត្ថកិច្ច បានបញ្ជូនលោក កូយ សំអាត ទៅតុលាការចាត់ការតាមនីតិវិធីច្បាប់ នៅថ្ងៃទី១១ ខែមីនា។
កម្លាំងនគរបាលខណ្ឌមានជ័យ កាលពីថ្ងៃទី៩ ខែមីនា ឆ្នាំ២០២០នេះ សហការជាមួយកម្លាំងនគរបាលការិយាល័យប្រឆាំងបទល្មើសបច្ចេកវិទ្យានៃស្នងការដ្ឋាននគរបាលរាជធានីភ្នំពេញ ចាប់ខ្លួនបុរសឈ្មោះ កូយ សំអាត នេះ បន្ទាប់ពីលោកបានបង្ហោះហ្វេសប៊ុករបស់ខ្លួន ដែលដាក់ឈ្មោះថា ទេព វិសាល(Tep Visal )។ក្នុងវីឌីអូឃ្លីបនេះ លោក កូយ សំអាត បាននិយាយ អរគុណវៀតណាមដែលរកឃើញករណីជនជាតិជប៉ុនផ្ទុកជំងឺកូវីដ-១៩ បន្ទាប់ពីបុរសរូបនេះចេញពីកម្ពុជា។ លោកបន្តថា បើវៀតណាម មិនប្រកាសទេ កុំអីប្រជាជននៅទូទាំងប្រទេសអត់ដឹងថាប្រទេសកម្ពុជាមានកូវីដ-១៩ទេ។
ការលើកឡើងរបស់ កូយ សំអាត បែបនេះ គឺបន្ទាប់ពីសារព័ត៌មានក្នុងប្រទេសវៀតណាម កាលពីថ្ងៃទី៤ ខែមីនា បានចុះផ្សាយថា បុរសជប៉ុនម្នាក់ ដែលធ្វើដំណើរចេញពីវាលយន្តហោះខេត្ត សៀមរាប ត្រូវបានរកឃើញថា មានផ្ទុកជំងឺកូវីដ-19 នៅពេលទៅដល់វាលយន្តហោះប្រទេសជប៉ុន។ ក្រោយមានការចុះផ្សាយព័ត៌មាននោះ ក្រសួងសុខាភិបាលកម្ពុជា ក៏បានស្រាវជ្រាវភ្លាមៗ ហើយបានរកឃើញថា មានបុរសខ្មែរម្នាក់អាយុ៣៨ឆ្នាំ ដែលធ្វើការជិតស្និទ្ធជាមួយជនជាតិជប៉ុននោះ បានឆ្លងជំងឺកូវីដ-១៩ ដែលបច្ចុប្បន្ន កំពុងដាក់ព្យាបាលក្នុងមន្ទីរពេទ្យបង្អែកខេត្ត សៀមរាប៕
No comments:
Post a Comment