ដោយ អាស៊ីសេរី
2020-03-14
ទិដ្ឋភាពសិស្សចេញពីអនុវិទ្យាល័យគោកបញ្ជាន់ ក្នុងរាជធានីភ្នំពេញ នៅព្រឹកថ្ងៃទី១៤ ខែមីនា ឆ្នាំ២០២០ ស្របពេលដែលក្រសួងអប់រំឱ្យគ្រឹះស្ថានសិក្សាក្នុងក្រុងភ្នំពេញ និងក្រុងសៀមរាប អនុវត្តន៍វិស្សមកាលតូចមុនកាលកំណត់។
រូប៖ ពលរដ្ឋ
គ្រឹះស្ថានសិក្សាទាំងរដ្ឋ និងឯកជនក្នុងក្រុងភ្នំពេញ និងក្រុងសៀមរាបមួយរយៈ ដើម្បីបង្ការ និងទប់ស្កាត់ជំងឺកូវីដ-១៩។ មន្ត្រីសង្គមស៊ីវិលយល់ថា រដ្ឋាភិបាល គួរតែមានវិធានការហាមឃាត់ឱ្យស្មើភាពគ្នា ជាពិសេស គឺហាមឃាត់អ្នកដំណើរពីប្រទេសចិនតែម្ដង ដែលជាប្រភពដើមនៃការចម្លងជំងឺកូវីដ-១៩។
ក្រសួងសុខាភិបាលសម្រេចហាមប្រជាជនមកពីប្រទេសលោកខាងលិចចំនួន៥ ចូលកម្ពុជារយៈ ពេល ៣០ថ្ងៃ គិតចាប់ពីថ្ងៃទី១៧ ខែមីនា។ ប្រទេសទាំង ៥នោះ រួមមាន អ៊ីតាលី អេស្ប៉ាញ អាល្លឺម៉ង់ បារាំង និងអាមេរិក ប៉ុន្តែមិនបានបូកចូលប្រទេសចិន ដែលជាប្រទេសនៃប្រភពកើតជំងឺរលាកផ្លូវដង្ហើម កូវីដ-១៩នោះទេ។ សេចក្តីប្រកាសក្រសួងសុខាភិបាល ចុះថ្ងៃទី១៤ ខែមីនា បញ្ជាក់ថា វិធានការហាមឃាត់នេះ គឺបន្ទាប់ពីរកឃើញករណីឆ្លងជំងឺកូវីដ-១៩ លើជនបរទេសមានសញ្ជាតិផ្សេងៗ ជាបន្តបន្ទាប់ ដែលតម្រូវឱ្យមានវិធានការការពារទប់ស្កាត់ជាបន្ទាន់ ដើម្បីកុំឱ្យមានការនាំមេរោគឆ្លងមួយនេះ ចូលក្នុងប្រទេសកម្ពុជា។
អាស៊ីសេរីមិនអាចសុំការបញ្ជាក់បន្ថែមពីអ្នកនាំពាក្យក្រសួងសុខាភិបាល លោក លី សូវ៉ាន់ និងអ្នក ស្រី ឱ វណ្ណឌីន បានទេ ដោយទូរស័ព្ទចូលពុំមានអ្នកទទួល។
រីឯអ្នកនាំពាក្យរដ្ឋលេខាធិការដ្ឋាននៃអាកាសចរណ៍ស៊ីវិល លោក ជា អូន មានប្រសាសន៍ថា បន្ទាប់ពីទទួលបានលិខិតរបស់ក្រសួងសុខាភិបាលនោះ អាជ្ញាធរអាកាសចរណ៍ស៊ីវិល កំពុងរៀបចំនីតិវិធី ជូនដំណឹងដល់ក្រុមហ៊ុនអាកាសចរណ៍ទាំងអស់ ដើម្បីចូលរួមអនុវត្តការងារនេះឱ្យមានប្រសិទ្ធភាព។ លោកបញ្ជាក់ថា ជនជាតិណាក៏ដោយ ឱ្យតែធ្វើដំណើរមកពីប្រទេសអ៊ីតាលី អេស្ប៉ាញ អាល្លឺម៉ង់ បារាំង និងអាមេរិក គឺមិនអាចដឹកពួកគេចូលកម្ពុជាដាច់ខាត។ ជាមួយគ្នានេះ លោក ជា អូន សុំមិនធ្វើអត្ថាធិប្បាយអំពីមូលហេតុ ដែលរដ្ឋាភិបាលមិនហាមអ្នកដំណើរពីប្រទេសចិននោះទេ៖ «ដូចថា ការវាយតម្លៃរបស់ក្រសួងសុខាភិបាលយើង ថា តើហានិភ័យ(Risk ) ពីប្រទេសណាខ្លះ ក្នុងចំណោមប្រទេសទាំងអស់ដែលធ្វើដំណើរមកប្រទេសយើង ដូច្នេះហើយគាត់វាយតម្លៃ។ ចំពោះខ្ញុំអត់អាចអត្ថាធិប្បាយរឿងហ្នឹងទេ អាហ្នឹងរឿងក្រសួងសុខាភិបាល ប៉ុន្តែយើង ធ្វើម៉េចយោងទៅលើសេចក្ដីប្រកាសគឺយើងនឹងរៀបចំប្រព័ន្ធគ្រប់អ្នកដំណើរ ដែលធ្វើដំណើរតាមយន្តហោះមក»។
ទន្ទឹមគ្នានេះ ខាងក្រសួងការបរទេស ក៏ប្រកាសផ្អាកការផ្ដល់ទិដ្ឋាការដល់អ្នកដំណើរពីប្រទេសទាំង៥ តាមសេចក្ដីជូនដំណឹងរបស់ក្រសួងសុខាភិបាលនោះដែរ។
នាយកប្រតិបត្តិនៃអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ បញ្ចេញទស្សនៈថា
រដ្ឋាភិបាលកម្ពុជា គួរតែមានវិធានការហាមឃាត់ឱ្យបានស្មើភាពគ្នា ជាពិសេស ប្រទេសដែលជាប្រភពមេរោគ ដូចជាប្រទេសចិនជាដើម។ លោក យល់ថា មិនសមទំនងនោះទេ ដែលរដ្ឋាភិបាលហាមឃាត់អ្នកដំណើរពីប្រទេសលោកខាងលិច តែបើកចំហសម្រាប់អ្នកដំណើរពីប្រទេសចិន៖ «សរុបសេចក្តីមក យើងចង់ឃើញវិធានការបែបនេះដាក់បញ្ចូលអ្នកធ្វើដំណើរមកពីប្រទេសចិនដែរ។ ការដែលមិនទាន់ធ្វើការសម្រេចចិត្តហាមប្រាមអ្នកដែលធ្វើ ដំណើរពីប្រទេសចិន អាចបង្ហាញអំពីការឆ្លើយតបជាមួយនឹងគុណស្រ័យដែលកម្ពុជាមានទំនាក់ទំនងជាមួយនឹងប្រទេសចិន ដូចដែលយើងឃើញហើយថា ចិនគឺជាប្រទេសដែលផ្តល់ជំនួយនិងកម្ចី មកកម្ពុជាច្រើនជាងគេ ប៉ុន្តែសម្រាប់ករណីនេះ ការរីករាលដាលនៃករណីមេរោគកូវីដ-១៩នេះ គួរតែត្រូវបានចាត់ទុកដោយឡែកមួយ ពីទំនាក់ទំនាក់អន្តរជាតិ»។
ក្រៅពីវិធានការហាមអ្នកដំណើរពីប្រទេសលោកវខាងលិចនោះ ខាងក្រសួងអប់រំយុវជន និងកីឡា វិញ នៅថ្ងៃទី១៤ ខែមីនា ក៏សម្រេចឱ្យគ្រឹះស្ថានសិក្សាទាំងរដ្ឋ និងឯកជនក្នុងក្រុងភ្នំពេញ និងក្នុងទីរួមខេត្តសៀមរាប សម្រាកវិស្សមកាលតូចមុនកាលកំណត់ផងដែរ ដើម្បីបង្ការជំងឺកូវីដ-១៩។ ក្រសួងក៏អំពាវនាវអាណាព្យាបាលជំរុញឱ្យកូនធ្វើស្វ័យសិក្សា និងចៀសវាងទៅកន្លែងដែលប្រឈមនឹង ការឆ្លង ដូចជា កន្លែងហែលទឹកសាធារណៈ កន្លែងហាត់ប្រាណ សួនកុមារ និងកន្លែងផ្សេងទៀត។
វិធានការហាមជនបរទេស និងផ្អាកគ្រឹះស្ថានសិក្សានេះ គឺបន្ទាប់ពីក្រសួងសុខាភិបាល កាលពីថ្ងៃ ទី១៣ ខែមីនា បានរកឃើញករណីឆ្លងជំងឺកូវីដ ២ករណី នៅក្នុងទីក្រុងភ្នំពេញកើតលើបុរសជនជាតិ កាណាដា អាយុ ៤៩ឆ្នាំ និងបុរសម្នាក់ទៀត ជាជនជាតិបែលហ្ស៊ិក អាយុ ៣៣ឆ្នាំ។ បុរសជនជាតិ កាណាដានោះ គឺជាគ្រូបង្រៀនក្នុងសាលាឯកជនមួយនៅសាខាកោះពេជ្រ ឈ្មោះថា សាលាអន្តរជាតិ កាណាដា (CIS)។ ក្រសួងសុខាភិបាល សម្រេចបិទសាលាមួយនេះបណ្ដោះអាសន្ន និងតម្រូវឱ្យគ្រូបង្រៀន និងសិស្សនៃសាលានោះ តាមដានសុខភាពផ្ទាល់ខ្លួនរយៈពេល ១៤ថ្ងៃ។ ចំណែកកូន ២នាក់របស់បុរសជនជាតិកាណាដានោះ មិនបានឆ្លងមេរោគទេ ក្រោយពីក្រសួងយកសំណាកទៅធ្វើតេស្ត ហើយលទ្ធផលអវិជ្ជមាន។ ចំណែកឯ បុរសជនជាតិបែលហ្សិកនោះ គឺជាបុគ្គលិកអង្គការអន្តរជាតិមួយ ដែលទើបតែធ្វើដំណើរមកពីអឺរ៉ុប ហើយក្រសួង កំពុងស្វែងរកអ្នកប៉ះពាល់ផ្ទាល់ និងប្រយោលជាមួយអ្នកជំងឺនេះ។
លោក សន ជ័យ លើកឡើងថា ក្រសួងសុខាភិបាល គួរតែចាត់វិធានការឱ្យមានប្រសិទ្ធភាពបន្ថែមទៀត ក្រៅពីផ្អាកគ្រឹះស្ថានសិក្សា ដូចជា គួរតែ ត្រួតពិនិត្យឱ្យបានល្អិតល្អន់តាមកន្លែងជួបជុំ និងកន្លែងគោលដៅនានា ដែលមានហានិភ័យខ្ពស់ក្នុងការចម្លងមេរោគមួយនេះ៖ «ខ្ញុំគិតថា គួរតែដាក់ករណីនេះនេះជាករណីពិសេសដើម្បីធានាថា គ្រូបង្រៀននៃសាលារៀននោះ មនុស្សដែលមានការពាក់ព័ន្ធជាមួយគាត់ មានកូនសិស្ស មានគ្រួសាររបស់គាត់ ហើយទីកន្លែងដែលគាត់ត្រូវទៅនោះ ចាំបាច់ត្រូវតែមានការត្រួតពិនិត្យឱ្យបានហ្មត់ចត់ ជៀសវាងកុំឱ្យប្រភពនៅទីនោះ វាអាចនឹងក្លាយទៅជាភ្នាក់ងារចម្លងទៅទីកន្លែងផ្សេងទៀត»។
ក្រសួងសុខាភិបាលបច្ចុប្បន្នកំពុងព្យាបាល បុរសជនជាតិខ្មែរ អាយុ ៣៨ឆ្នាំ នៅមន្ទីរពេទ្យបង្អែកខេត្តសៀមរាប។ ចំណែកបីករណីទៀត កើតលើជនជាតិអង់គ្លេសវ័យចំណាស់ ៣នាក់ ដែលធ្វើដំណើរតាមនាវាទេសចរណ៍មួយគ្រឿង ឈ្មោះ វីគីង គ្រូស ជ្យូណី (Viking Cruise Journey) ដែលចាកចេញពីប្រទេសវៀតណាម ហើយបានចូលចតនៅទីរួមខេត្តកំពង់ចាម។ ចំណែក ២ករណីថ្មីនេះ កើតលើបុរសជនជាតិកាណាដាម្នាក់ និងជនជាតិបែលហ្សិកម្នាក់។ អ្នកជំងឺជនបរទេសទាំង ៥នាក់ នេះ កំពុងដាក់ឱ្យព្យាបាល នៅមន្ទីរពេទ្យរុស្ស៊ី ឬហៅថា មន្ទីរពេទ្យមិត្តភាពខ្មែរ-សូវៀត៕
No comments:
Post a Comment