ដោយ មួង ណារ៉េត
2020-03-07
rfa
បុរសខ្មែរ (ក្នុងរង្វង់) ដែលមានផ្ទុកវិរុសកូវីដ-១៩ ពេលត្រូវហៅសាកសួរ ក្រោយបុរសជនជាតិជប៉ុន មានផ្ទុកជំងឺនេះ។
Photo courtesy
មន្ត្រីសុខាភិបាលកម្ពុជា បានបញ្ជាក់នៅក្នុងសន្និសីទសារព័ត៌មាន មុនការផ្សាយនេះបន្តិច ថាជនជាតិខ្មែរម្នាក់ នៅខេត្តសៀមរាប ត្រូវបានធ្វើតេស្តរកឃើញថា មានផ្ទុកមេរោគកូរ៉ូណាថ្មី ឬកូវីដ-១៩ (Covid-19)។
អ្នកនាំពាក្យក្រសួងសុខាភិបាល អ្នកស្រី ឱ វណ្ឌឌីន បញ្ជាក់ថា បុរសជនជាតិខ្មែររូបនេះ មានវ័យ ៣៨ ឆ្នាំ និងជាអ្នកគ្រប់គ្រងកិច្ចការធុរកិច្ចផ្ទាល់ របស់ជនជាតិជប៉ុន ដែលត្រូវបានអាជ្ញាធរជប៉ុន រកឃើញថា មានផ្ទុកជំងឺកូវីដ-១៩ នេះដែរ ក្រោយចាកចេញពីក្រុង សៀមរាប៖ «នៅព្រឹកនេះ យើងទទួលបានព័ត៌មានថា គាត់រកឃើញ នូវជនប៉ះពាល់បន្ថែមទៀត ជាពិសេសក្រុមគ្រួសារ របស់បុរសអាយុ ៣៨ ឆ្នាំនោះ ហើយពួកគាត់ទាំងអស់នេះ បានមកដាក់ឱ្យនៅដាច់ដោយឡែកនៅមន្ទីរពេទ្យបង្អែកសៀមរាបរួចហើយ»។
មន្ត្រីដដែលបន្ថែមថា សមាជិកក្រុមគ្រួសាររបស់បុរសជនជាតិខ្មែរ ដែលមានផ្ទុកជំងឺនេះ និងដែលជាអ្នកប៉ះពាល់ផ្ទាល់ជាមួយនឹងបុរសនេះ ហើយត្រូវបានយកមកដាក់ក្នុងបន្ទប់ដោយឡែក នៅមន្ទីរពេទ្យខេត្តសៀមរាបនោះ មាន ៣ នាក់ គឺទីមួយប្រពន្ធរបស់បុរសនោះ និងពីរនាក់ទៀតជាប្អូនថ្លៃរបស់គាត់។
ក្រោយជនជាតិជប៉ុនវ័យ ៤០ ឆ្នាំ ដែលត្រូវបានអាជ្ញាធរជប៉ុន រកឃើញថា មានផ្ទុកមេរោគកូរ៉ូណាថ្មី ឬកូវីដ-១៩ នេះ ក្រសួងសុខាភិបាលកម្ពុជាបានដាក់មនុស្ស ៤ នាក់ដែលប៉ះពាល់ផ្ទាល់ជាមួយជនជាតិជប៉ុននេះ នៅក្នុងបន្ទប់ដាច់ដោយឡែក នៅមន្ទីរពេទ្យខេត្តសៀមរាប។ បើតាមអ្នកស្រី ឱ វណ្ណឌីន អ្នកទាំងបួននោះ គឺជាបុគ្គលិកក្នុងការិយាល័យ ដែលធ្វើការប៉ះពាល់ផ្ទាល់ជាមួយជនជាតិជប៉ុននោះ។ ក្នុងនោះមានបុរសជនជាតិខ្មែរវ័យ ៣៨ ឆ្នាំ ដែលទើបនឹងរកឃើញថា មានផ្ទុកជំងឺនេះ។
ដោយឡែកក្រសួងសុខាភិបាល មិនទាន់បានចាត់វិធានការជាក់លាក់ណាមួយ ដើម្បីតាមដាន ឬពិនិត្យសុខភាពបុគ្គលិក នៃមន្ទីរពេទ្យឯកជន ដែលជនជាតិជប៉ុននោះ បានទៅពិនិត្យជំងឺនោះឡើយ។
អ្នកនាំពាក្យក្រសួងសុខាភិបាល លោកវេជ្ជបណ្ឌិត លី សូវ៉ាន់ ក្នុងកម្មវិធីវេទិកាអ្នកស្ដាប់វិទ្យុអាស៊ីសេរី កាលពីថ្ងៃទី២៩ ខែកញ្ញា ឆ្នាំ២០១៥។ Photo: RFA
អ្នកនាំពាក្យក្រសួងសុខាភិបាលមួយរូបទៀត គឺលោក លី សូវ៉ាន់ បានត្រឹមតែបញ្ជាក់នៅក្នុងសន្និសីទសារព័ត៌មានដដែលនោះថា មន្ត្រីសុខាភិបាល គ្រាន់តែចុះទៅសួរនាំធម្មតា ប៉ុណ្ណោះ៖ «យើងក៏បានចុះទៅមន្ទីរពេទ្យដែរ ហើយយើងបានសាកសួរអំពីគ្រូពេទ្យដែលប៉ះពាល់ជាមួយគាត់។ ប៉ុន្តែ គ្រូពេទ្យដែលយើងជួបនោះ បានបង្ហាញថា គាត់មិនបាននៅជិតអ្នកជំងឺនោះទេ។ គាត់នៅឆ្ងាយពីអ្នកជំងឺ។ ដូច្នេះគាត់មិនបានចាត់ទុកថា ជាអ្នកប៉ះពាល់ផ្ទាល់ ឬប្រយោលនោះទេ»។
ជុំវិញវិធានការការពារវិញ មន្ត្រីសុខាភិបាល មិនបានឆ្លើយទៅនឹងសំណួររបស់អ្នកសារព័ត៌មាន អំពីថាតើរដ្ឋាភិបាល នឹងមានវិធានការរឹតបណ្ដឹងការធ្វើដំណើរចេញចូលខេត្តសៀមរាប ដែលមានផ្ទុះជំងឺនេះនោះទេ។
ទោះជាយ៉ាងនេះក្តីលោក លី សុវណ្ណ បានអះអាងថា កម្ពុជាមានប្រព័ន្ធការពារគ្រប់គ្រាន់ ដើម្បីទប់ទល់នឹងការរីករាលដាលនៃជំងឺនេះ៖ «ក្រសួងសុខាភិបាលមានប្រព័ន្ធតាមដាន និងប្រកាសអាសន្នរបស់យើង។ យើងយកព័ត៌មានពីគ្រប់មណ្ឌលសុខាភិបាល នៅទូទាំងប្រទេស។ យើងមានប្រព័ន្ធឃ្លាំមើល។ ចំនួនករណីកើនឡើងច្រើន ដោយសារយើងមានប្រព័ន្ធគ្រប់ទាំងអស់ ដើម្បីតាមដាន។ យើងមានប្រព័ន្ធតាមដានព្រឹត្តិការណ៍ ដោយប្រើលេខ ១១៥។ ពលរដ្ឋសង្ស័យរាយការណ៍មកយើង យើងចុះទៅវាយតម្លៃដល់ផ្ទះតែម្ដង»។
ប៉ុន្តែ លោកនាយករដ្ឋមន្ត្រី ហ៊ុន សែន ដែលមានងារជាបុរសសង្ហារដើរបញ្ច្រាសទិស និងដែលធ្លាប់អះអាងថា ទាល់តែសេះដុះស្នែង ឬទាល់តែមានថ្ងៃទី៣១ ខែកុម្ភៈ ទើបមានករណីកើតជំងឺកូវីដ-១៩ លើជនជាតិខ្មែរ នៅថ្ងៃនេះដែរ ក៏បានប្រកាសឱ្យបិទទ្វារសាលារៀនទាំងអស់នៅទីរួមខេត្តសៀមរាប ដើម្បីបង្ការជំងឺនេះ។ ចំណែកគម្រោងមហាសង្ក្រាន្តឆ្នាំថ្មី ដែលរងការរិះគន់យ៉ាងចាស់ដៃ ដែលថា មិនគួរគ្រោងធ្វើនោះ ក៏ពេលនេះ លោក ហ៊ុន សែន បញ្ជាឱ្យលុបចោលវិញហើយដែរ។
ស្របពេលជាមួយគ្នានេះដែរ អ្នកស្រី ឱ វណ្ណឌីន ឯណោះបានអំពាវនាវឱ្យប្រជាពលរដ្ឋខ្មែរទាំងអស់ កុំភ័យខ្លាច កុំស្លន់ស្លោ កុំនាំគ្នាស្តុកទុកទំនិញ តែសំខាន់ត្រូវរក្សាអនាម័យខ្លួនប្រាណឱ្យបានត្រឹមត្រូវ ដើម្បីបង្ការជំងឺនេះ៕
No comments:
Post a Comment