ដោយ អាស៊ីសេរី
2020-04-20
បុគ្គលិកកាសែត ឌឹ ខេមបូឌា ដេលី (The Cambodia Daily) ក្នុងនេះមានលោក អូន ភាព (នៅជួរមុខពីស្ដាំមកឆ្វេង) ដែលជាប់បណ្ដឹងពីបទ “ញុះញង់" នៅតុលាការខេត្តរតនគិរី លើកបដាស្វែងរកការជួយសង្គ្រោះកាសែតនេះ កាលពីថ្ងៃទី២៣ ខែសីហា ឆ្នាំ២០១៧។ Photo courtesy of The Cambodia Daily
Photo courtesy of The Cambodia Daily
តុលាការខេត្តរតនគិរីមិនទាន់កំណត់ថ្ងៃជំនុំជម្រះសំណុំរឿងអតីតអ្នកកាសែត ឌឹ ខេមបូឌា ដេលី ពីររូប គឺលោក អូន ភាព ដែលបច្ចុប្បន្នកំពុងបម្រើការឱ្យអាស៊ីសេរីនៅទីក្រុងវ៉ាស៊ីតោន (Washington, DC) និងលោក ភីតធ័រ ហ្សមប៊័រ (Peter Zsombor) នៅឡើយទេ ក្រោយលើកពេលសវនាការរឿងនេះកាលពីធ្នូ ឆ្នាំ២០១៩ កន្លងទៅ។ អ្នកជំនាញផ្នែកសារព័ត៌មានស្នើដល់តុលាការឱ្យពន្លឿនរឿងក្ដីនេះ ដើម្បីផ្ដល់យុត្តិធម៌ដល់អ្នកកាសែតទាំងពីរនាក់។
មេធាវីការពារក្ដីឱ្យអតីតអ្នកកាសែតខេមបូឌា ដេលី លោក សេក សុភ័ណ្ឌ ឱ្យដឹងនៅថ្ងៃទី២០ មេសាថា លោកបានសាកសួរមន្ត្រីតុលាការខេត្តរតនគិរីជាច្រើនដងមកហើយ អំពីថ្ងៃសវនាការរឿងក្តីនេះ ក៏ប៉ុន្តែមន្ត្រីតុលាការប្រាប់លោកថា ចៅក្រមមិនទាន់ដាក់ថ្ងៃជំនុំជម្រះជាថ្មីនៅឡើយទេ។ លោកថា លោកបានស្នើទៅមន្ត្រីតុលាការឱ្យជួយពន្លឿនរឿងនេះដែរ តែមិនទាន់មានការវិវឌ្ឍន៍បែបណានៅឡើយទេ។
មេធាវី សេក សុភ័ណ្ឌ បញ្ជាក់ថា ការអូសបន្លាយសំណុំរឿងបែបនេះ ធ្វើឱ្យប៉ះពាល់ដល់សិទ្ធិ និងប្រយោជន៍កូនក្ដីរបស់លោកជាខ្លាំង ទោះបីជាពួកគាត់កំពុងស្ថិតនៅក្រៅឃុំក៏ដោយ៖ «វាប៉ះពាល់ខ្លាំងដោយសារតែសិទ្ធិទទួលបានការកាត់សេចក្ដីដោយយុត្តិធម៌ហ្នឹង ត្រូវមានរយៈពេលមួយសមស្របសម្រាប់ឱ្យមានការវិនិច្ឆ័យ ហើយការស៊ើបអង្កេតហ្នឹងទៀត ក៏មិនត្រូវបន្លាយពេលដែរ ព្រោះវាពាក់ព័ន្ធនឹងគេហៅថា សិទ្ធិទទួលបានការចាត់ទុកថាគ្មានទោសរហូតដល់មានសាលក្រមស្ថាពរ»។
តុលាការខេត្តរតនគិរីបានចោទប្រកាន់អតីតអ្នកកាសែតខេមបូឌាដេលី (Cambodia Daily) ពីររូប គឺលោក អូន ភាព ជនជាតិខ្មែរ និងលោក លោក ភីតធ័រ ហ្សមប៊័រ (Peter Zsombor) ជនជាតិកាណាដា ពីបទ “ញុះញង់ឱ្យប្រព្រឹត្តបទឧក្រិដ្ឋជាអាទិ៍”។ ការចោទប្រកាន់នេះ ធ្វើឡើងក្រោយពេលអ្នកកាសែតទាំងពីររូបនេះបានចុះទៅសម្ភាសពលរដ្ឋពលរដ្ឋឃុំប៉ាតេ ស្រុកអូរយ៉ាដាវ ខេត្តរតនគិរី កាលពីខែសីហា ឆ្នាំ២០១៧ ទាក់ទងនឹងការបោះឆ្នោតក្រុមប្រឹក្សាឃុំសង្កាត់។
ទោះជាយ៉ាងណា មេធាវី សេក សុភ័ណ្ឌ ពន្យល់ថា អំពើរបស់កូនក្តីលោកទាំងពីរនាក់ គឺជាការអនុវត្តតាមវិជ្ជាជីវៈសារព័ត៌មាន មិនមែនជាការញុះញង់ ដូចតុលាការចោទប្រកាន់នោះឡើយ៖ «ច្បាស់លាស់ហើយ គឺគាត់បំពេញវិជ្ជាជីវៈគាត់ជាអ្នកសារព័ត៌មាន សម្រាប់ខ្ញុំ វាអត់មានបទល្មើសអ្វីទេ។ អ៊ីចឹងហើយបានខ្ញុំសុំឱ្យតុលាការតម្កល់ទុកឥតចាត់ការតាំងពីដំបូងម៉្លេះ ហើយដល់ពេលស៊ើបទៀត ខ្ញុំក៏បានសុំឱ្យទម្លាក់បទចោទទៀត ប៉ុន្តែតុលាការគេនៅស្ងៀម ហើយបន្តនីតិវិធីរហូតដល់សវនាការ»។
ចៅក្រមស៊ើបសួរតុលាការខេត្តរតនគិរី បានប្រើពេលស៊ើបអង្កេតរឿងនេះជាង ២ឆ្នាំ រួចក៏បានកំណត់យកថ្ងៃទី២៥ ខែធ្នូ ២០១៩ ជាថ្ងៃបើកសវនាការ ក៏ប៉ុន្តែនៅថ្ងៃនោះមកដល់ ស្រាប់តែប្រធានក្រុមប្រឹក្សាជំនុំជម្រះប្រកាសថា សវនាការត្រូវលើកទៅធ្វើនៅថ្ងៃក្រោយវិញ ដោយសារចៅក្រមមួយរូបជាប់រវល់ទៅក្រៅប្រទេស។
អាស៊ីសេរីមិនអាចទាក់ទងអ្នកនាំពាក្យតុលាការខេត្តរតនគិរី លោក កែវ ពិសុទ្ធ ដើម្បីសាកសួររឿងនេះបានទេ នៅថ្ងៃទី២០ មេសា ដោយទូរស័ព្ទចូល ពុំមានអ្នកទទួល។
សមាជិកក្រុមប្រឹក្សាសម្ព័ន្ធអ្នកសារព័ត៌មានកម្ពុជា (CamboJA) លោក ម៉ៃ ទិត្យថារ៉ា ស្នើឱ្យតុលាការបើកការជំនុំជម្រះករណីនេះឱ្យបានឆាប់ ព្រោះសំណុំរឿងនេះបានអូសបន្លាយជាច្រើនឆ្នាំមកហើយ ហើយបានបង្កការភ័យខ្លាចដល់អ្នកសារព័ត៌មាននៅកម្ពុជា៖ «បើមានការពន្លឿនពេលវេលានៃការបើកអង្គសវនាការលើរឿងហ្នឹង ខ្ញុំគិតថា វាផ្ដល់ផលប្រយោជន៍ជាច្រើនដែរទៅដល់អ្នកសារព័ត៌មានផ្សេងទៀតដើម្បីកុំឱ្យពួកគាត់មានការភ័យខ្លាចក្នុងការធ្វើការងាររបស់ពួកគាត់»។
សព្វថ្ងៃនេះ លោក អូន ភាព និងលោក ភីតធ័រ ហ្សមប៊័រ (Peter Zsombor) កំពុងរស់នៅក្រៅប្រទេស ដើម្បីគេចពីការចាប់ខ្លួន ឬការយាយីពីសំណាក់អាជ្ញាធរកម្ពុជា។
ចាប់តាំងពីចុងឆ្នាំ២០១៧ មក របបលោក ហ៊ុន សែន បានធ្វើទុក្ខបុកម្នេញស្ថាប័ន និងអ្នកសារព័ត៌មានឯករាជ្យឥតឈប់ឈរ មានជាអាទិ៍ ការបិទកាសែត ខេមបូឌា ដេលី ការបិទហ្វ្រេកង់វិទ្យុមួយចំនួន ការចោទប្រកាន់បែបព្រហ្មទណ្ឌប្រឆាំងនឹងអ្នកសារព័ត៌មាន និងការចាប់ខ្លួនអតីតអ្នកយកព័ត៌មានអាស៊ីសេរីពីររូបដោយគ្មានភស្តុតាងក្រោមបទចោទនៃអំពើចារកម្មជាដើម៕
No comments:
Post a Comment