ដោយ វ៉ែន សុមេធ
2020-04-26
rfa
ក្រុមសកម្មជនបរិស្ថាន និងកូនប្រុសលោក ឈុត វុទ្ធី នាំគ្នារៀបចំបុណ្យខួប ៨ឆ្នាំ នៃការស្លាប់របស់លោក ឈុត វុទ្ធី នៅព្រឹកថ្ងៃទី២៦ មេសា ២០២០ ក្នុងតំបន់ព្រៃឡង់នៃខេត្តព្រះវិហារ។
photo courtesy of N1M
កូនប្រុសរបស់លោក ឈុត វុទ្ធី និងសកម្មជនបរិស្ថាន នៅតែបន្តវើពិធីរំឮកខួបគម្រប់ ៨ឆ្នាំនៃមរណភាពរបស់លោក ឈុត វុទ្ធី នៅថ្ងៃទី២៦ ខែមេសា នៅតំបន់ព្រៃឡង់ ស្ថិតក្នុងខេត្តព្រះវិហារ ទោះបីជាអាជ្ញាធរខេត្តនេះ រារាំងពួកគេក្ដី។ មន្ត្រីសង្គមស៊ីវិល យល់ថា ទង្វើរបស់អាជ្ញាធរ គឺជាការ រឹតត្បិតសិទ្ធិសេរីភាពបញ្ចេញមតិ និងជួបជុំដោយសន្តិវិធី។
ពិធីជួបជុំប្រារព្ធខួប ៨ឆ្នាំនៃការស្លាប់របស់លោក ឈុត វុទ្ធី នៅឆ្នាំនេះ បានប្រព្រឹត្តទៅក្រោមការរារាំង និងឃ្លាំមើលពីសំណាក់អាជ្ញាធររដ្ឋាភិបាលរបស់លោក ហ៊ុន សែន ដូចឆ្នាំមុនៗដែរ។
កូនប្រុស លោក ឈុត វុទ្ធី គឺលោក ឆឺយ ឧត្តមរស្មី ប្រាប់អាស៊ីសេរីថា លោករួមនឹងសកម្មជនការពារព្រៃឈើប្រមាណជាង ៣០នាក់ បាននាំគ្នាចូលទៅក្នុងព្រៃឡង់ស្ថិតនៅក្នុងឃុំធ្មា ស្រុកជ័យសែន ខេត្តព្រៃវិហារ តាំងពីម៉ោង ១រំលងអធ្រាត្រ ឈានចូលថ្ងៃទី២៦ ខែមេសា ដើម្បីធ្វើពិធីគោរពវិញ្ញាណក្ខន្ធនិងបង្សុកូលឧទ្ទិសបុណ្យកុសលដល់លោក ឈុត វុទ្ធី។ ប្រធានអង្គការការពារធនធានធម្មជាតិរូបនេះ បញ្ជាក់ថា ការជម្នះទៅធ្វើពិធីបង្សុកូលនៅក្នុងព្រៃឡង់នោះ ព្រោះទីនោះជាកន្លែង ដែលឪពុករបស់លោក ស្រលាញ់ និងតែងចុះទៅធ្វើការញឹកញាប់កាលពីលោកនៅមានជីវិត៖ «ទោះបីជាមានការរារាំងពីអាជ្ញាធរក្តី យើងនៅតែព្យាយាម ហើយយប់មិញនេះយើងមិនបានដេកទេ។ យើងព្យាយាមរត់គេចពីកន្លែងមួយទៅកន្លែងមួយ ប៉ុន្តែ យើងនៅតែធ្វើបានជោគជ័យនៅក្នុងតំបន់ព្រៃឡង់ដដែល។ យើងមានធ្វើពិធីបង្សុកូលដល់ឪពុកខ្ញុំ ហើយបន្ទាប់មកយើងមានថ្លែងសារសាធារណៈផ្ញើជូនទៅរដ្ឋាភិបាល ឱ្យមានចំណាត់ការ បិទក្រុមហ៊ុនកាប់បំផ្លាញព្រៃឈើ ស្នើសុំឱ្យបញ្ឈប់ការផ្តល់ដីព្រៃសម្បទានដល់ក្រុមហ៊ុននានា ហើយនឹងបញ្ឈប់ការផ្តល់លិខិតអនុញ្ញាតឱ្យដឹកឈើតាមផ្លូវ»។
កាលពីយប់ថ្ងៃទី២៥ ខែមេសា អភិបាលរងស្រុករវៀង និងមន្ត្រីបរិស្ថាន បានដាក់កម្លាំងរារាំងមិនឱ្យសកម្មជនបរិស្ថានទាំងអស់ ជិះម៉ូតូចូលក្នុងព្រៃឡង់ ដើម្បីប្រារព្ធខួប៨ឆ្នាំនៃការស្លាប់របស់លោក ឈុត វុទ្ធី នោះទេ ដោយលើកហេតុផលថា ដើម្បីចូលរួមទប់ស្កាត់ជំងឺកូវីដ-១៩។ អាជ្ញាធរទាំងនេះ ព្រមានឱ្យពួកគេបំបែកគ្នា បើមិនដូច្នេះទេ អាជ្ញាធរនឹងអនុវត្តទៅតាមវិធានការច្បាប់។
អាស៊ីសេរី មិនអាចសុំការឆ្លើយតបរឿងនេះពីស្នងការនគរបាលខេត្តព្រះវិហារ លោក សួស សុខដារ៉ា បានទេ នៅថ្ងៃទី២៦ ខេមេសា ដោយទូរស័ព្ទចូលពុំមានអ្នកទទួល។
លោក ឆឺយ ឧត្តមរស្មី ថ្លែងថា ការរារាំងរបស់អាជ្ញាធរនេះ គឺមិនមែនជារឿងចម្លែកនោះទេ ពីព្រោះថា ការធ្វើបុណ្យខួបឪពុករបស់លោក តែងតែត្រូវបានអាជ្ញាធររារាំងនិងឃ្លាំមើលរាល់ឆ្នាំ ហើយការលើកហេតុផលថា ដោយសារជំងឺកូវីដនេះ គឺជាគ្រាន់តែជាលេសប៉ុណ្ណោះ៖ «យើងមិនល្មើសបទបញ្ជារបស់ក្រសួងសុខាភិបាលទេ ប៉ុន្តែយើងមានសម្ភារៈគ្រប់គ្រាន់ក្នុងការពិនិត្យនិងការពារដូចជា ម៉ាស់ការពារ ជែលលាងដៃ ម៉ាស៊ីនស្កេនកម្តៅ និងរក្សាគម្លាតគ្នាជាដើម ប៉ុន្តែចៅហ្វាយស្រុងរងនោះ នៅតែឱ្យយើងបំបែកដដែល ហើយគាត់ខ្លួនឯងនឹងអត់ឃើញពាក់ម៉ាស់ផង»។
សកម្មជនព្រៃឈើមួយរូបលោក មេន ម៉ាត់ ថ្លែងថា មូលហេតុដែលលោកចូលរួមប្រារព្ធខួប ៨ឆ្នាំ នៃការស្លាប់ របស់លោក ឈុត វុទ្ធី នៅក្នុងព្រៃឡង់ ពីព្រោះលោក ចង់តបស្នងសងគុណ និងរំលឹកដល់ស្នាដៃ របស់វីរជនការពារព្រៃឈើដ៏អង់អាចក្លាហានរូបនេះ។ លោកបន្តថា សកម្មជនការពារព្រៃឈើទាំងអស់ បានប្ដេជ្ញាចិត្តការពារព្រៃឈើបន្តពីលោក ឈុត វុទ្ធី ទោះបីជាប្រឈមគ្រោះថ្នាក់បែបណាក្ដី។
ក្រុមសកម្មជនបរិស្ថាន និងកូនប្រុសលោក ឈុត វុទ្ធី នាំគ្នារៀបចំបុណ្យខួប ៨ឆ្នាំ នៃការស្លាប់របស់លោក ឈុត វុទ្ធី នៅព្រឹកថ្ងៃទី២៦ មេសា ២០២០ ក្នុងតំបន់ព្រៃឡង់នៃខេត្តព្រះវិហារ។ photo courtesy of N1M
រីឯអគ្គលេខាធិការសម្ព័ន្ធសមាគមនិងសហជីពផ្ទះសាមគ្គី លោក ទឹម ម៉ាឡៃ ដែលចូលរួមពិធីរំលឹកខួបលោក ឈុត វុទ្ធី ដែរនោះ ថ្លែងថា ការរារាំងរបស់អាជ្ញាធរ គឺមិនមែនជាចេតនា ដើម្បីទប់ស្កាត់ ជំងឺកូវីដនោះទេ ប៉ុន្តែអាជ្ញាធរ មានចេតនាមិនចង់ឱ្យអ្នកគោរពស្រលាញ់លោក ឈុត វុទ្ធី ធ្វើពិធីបុណ្យរំឭកខួប និងទាមទារយុត្តិធម៌សម្រាប់លោក ឈុត វុទ្ធី ទៅវិញទេ។ លោកសង្កេតឃើញថា អាជ្ញាធរខ្លួនឯង តែងតែធ្វើវេទិកាសាធារណៈ និងការជួបជុំជាហូរហែ ដោយមិនខ្លាចឆ្លងជំងឺកូវីដ -១៩ នោះទេ ហើយការជួបជុំនៅកន្លែងខ្លះ គឺអាជ្ញាធរ មិនពាក់ម៉ាស់ការពារទៀតផង៖ «ខួប ៨ឆ្នាំនៃការបាញ់សម្លាប់លោកឈុត វុទ្ធី គឺជាការចងចាំរបស់ប្រជាពលរដ្ឋខ្មែរ ដែលធ្វើការការពារធនធានធម្មជាតិហើយនឹងការពារព្រៃឈើខ្មែរទាំងអស់គ្នា ។ ក្នុងនាមជាសកម្មជនទោះជាអាជ្ញាធរ មិនបើកឱកាសហើយមានយកបណ្ដឹងដោយបង្ហាញសកម្មភាពណាមួយមកបង្ហាញក៏ដោយ យើងនៅតែយល់ឃើញថា ជាការរឹតត្បិតសិទ្ធិសេរីភាព និងជាការមិនយកចិត្តទុកដាក់ពីអាជ្ញាធររដ្ឋទៅលើការទាមទារដំណោះស្រាយណាមួយរបស់ពលរដ្ឋ»។
នៅថ្ងៃនេះដែរ អ្នកប្រើប្រាស់បណ្ដាញហ្វេសប៊ុកមួយចំនួន នាំគ្នាបង្ហោះរូបថតលោក ឈុត វុទ្ធី និងសរសេរសាររំឮកអំពីស្នាដៃ ក៏ដូចជាទាមទារយុត្តិធម៌ពេញលេញសម្រាប់សកម្មជនការពារព្រៃឈើរូបនេះផងដែរ។លោក ឈុត វុទ្ធី គឺជាប្រធានអង្គការការពារធនធានធម្មជាតិ ត្រូវបានមន្ត្រីកងរាជអាវុធបាញ់សម្លាប់ក្នុងរថយន្តរបស់លោកកាលពីថ្ងៃទី២៦ ខែមេសា ឆ្នាំ២០១២ នៅចំណុចវាលបី ឃុំបាក់ខ្លង ស្រុកមណ្ឌលសីមា ខេត្តកោះកុង ខណៈលោក និងអ្នកកាសែតពីររូបទៀត បានចូលទៅស៊ើបអង្កេត និងថតរូបភាពគំនរឈើរបស់ក្រុមហ៊ុនកាប់ឈើ ដែលគេស្គាល់ឈ្មោះថា ក្រុមហ៊ុន ធីមប៊ើរ ហ្គ្រីន (Timber Green)។
ក្នុងរយៈពេល៨ឆ្នាំកន្លងមកនេះ ក្រុមគ្រួសារ និងមន្ត្រីសង្គមស៊ីវិល លើកឡើងថា សំណុំរឿងបាញ់សម្លាប់សកម្មជនបរិស្ថានដ៏លេចធ្លោ លោក ឈុត វុទ្ធី គឺមិនទាន់មានយុត្តិធម៌ពេញលេញនៅឡើយទេ ហើយទាមទារឱ្យរដ្ឋាភិបាលបន្តស្វែងរកឃាតកពិតមកផ្ដន្ទាទោសតាមផ្លូវច្បាប់៕
1 comment:
Ah Chker Chkuot Hun Sen will cut his head, if he cannot protect the forest, when Ah Mi Kanchrouk Bun Rany Hun Sen grows penis !!
Hopefully soon !!
Post a Comment