ដោយ សុជីវី
2020-04-15
លោក ជុំ ចាន់ សមាជិកក្រុមប្រឹក្សាខេត្តព្រៃវែងជាប់ឆ្នោតគណបក្សសង្គ្រោះជាតិ ដែលត្រូវប៉ូលិសចាប់ខ្លួន នៅស្រុកពាមរក៍ នៅថ្ងៃទី១៣ ខែមេសា ឆ្នាំ២០២០។
រូប៖ សកម្មជនគណបក្សប្រឆាំងផ្ដល់ឱ្យ
ប្រពន្ធរបស់សកម្មជនគណបក្សសង្គ្រោះជាតិខេត្តព្រៃវែង គឺលោក ជុំ ចាន់ អះអាងថា ប៉ូលិសក្រសួងមហាផ្ទៃបានបញ្ជូនប្ដីរបស់លោកស្រីទៅឃុំឃាំងនៅពន្ធនាគារព្រៃសហើយ ថ្ងៃទី១៥ មេសា។ លោកស្រីហៅការចាប់ខ្លួនរបស់ប៉ូលិសនេះ ថាជារឿងអយុត្តិធម៌មិនអាចទទួលបានឡើយ។
សមាជិកក្រុមប្រឹក្សាខេត្តព្រៃវែងជាប់ឆ្នោតគណបក្សសង្គ្រោះជាតិ លោក ជុំ ចាន់ ត្រូវបានប៉ូលិសក្រសួងមហាផ្ទៃសហការជាមួយប៉ូលិសមូលដ្ឋានចាប់ខ្លួននៅស្រុកពាមរក៍ នៅថ្ងៃទី១៣មេសា ហើយបញ្ជូនទៅឃុំខ្លួននៅរាជធានីភ្នំពេញភ្លាមៗក្រោយពេលចាប់ខ្លួន។
ប្រពន្ធជនជាប់ឃុំ លោកស្រី ធន ស៊ីនឿន ថ្លែងនៅព្រឹកថ្ងៃទី១៥ មេសាថា ប៉ូលិសមូលដ្ឋានបានបញ្ឆោតប្តីលោកស្រីឱ្យទៅជួបពិភាក្សាការងារជាមួយអធិការនគរបាលស្រុកពាមរក៍នៅប៉ុស្តិ៍ប៉ូលិសឃុំព្រែកខ្សាយខ ហើយក៏ស្រាប់តែប៉ូលិសចាប់ខ្លួនប្ដីរបស់លោកស្រីតែម្ដង។ លោកស្រីបន្ថែមថា ចាប់តាំងពីប៉ូលិសចាប់ខ្លួនប្ដីមក លោកស្រីទើបតែទទួលដំណឹងថាប្ដីនៅក្នុងពន្ធនាគារព្រៃស ដោយសារគាត់បានទូរស័ព្ទមកប្រាប់ឱ្យលោកស្រីឱ្យផ្ញើប្រាក់ ១០ម៉ឺនរៀល ដើម្បីចាយវាយនៅក្នុងពេលជាប់ឃុំ។ ប្រពន្ធរបស់សកម្មជនបក្សប្រឆាំងរូបនេះ អះអាងថា ប្ដីរបស់ខ្លួនមិនបានប្រព្រឹត្តខុសច្បាប់ដូចការចោទប្រកាន់របស់តុលាការឡើយ៖ «ខ្ញុំអត់យល់ថាគេចាប់ប្ដីខ្ញុំរឿងអីទេ។ ខ្ញុំមិនបានទទួលទេវតាទេចូលឆ្មាំខ្មែរឆ្នាំនេះ ព្រោះខ្វល់រឿងប៉ូលិសចាប់ប្ដីដាក់គុក។ ខ្ញុំចង់ឱ្យរដ្ឋាភិបាលទម្លាក់ចោលបទចោទមកលើប្ដី ហើយដោះលែងគាត់ឱ្យមានសេរីភាពវិញ ព្រោះប្ដីខ្ញុំជាបង្គោលក្នុងគ្រួសារជួយប្រាក់ដោះស្រាយជីវភាពប្រចាំថ្ងៃ។ ខ្ញុំពីមុនមកគ្រាន់បានប្រាក់ខែគ្រូបង្រៀនអីខ្លះ ដល់ពេលគេលុយឈ្មោះគ្រូបង្រៀនរបស់ប្ដីខ្ញុំមកខ្ញុំអត់មានប្រាក់ចំណូលទេ»។
តុលាការបានចោទប្រកាន់លោក ជុំ ចាន់ ចំនួន ៣បទល្មើស គឺបទ រួមគំនិតក្បត់ជាតិ ញុះញង់ឱ្យប្រព្រឹត្តអំពើបង្កឱ្យមានភាពវឹកវរធ្ងន់ធ្ងរដល់សន្តិសុខសង្គម និងញុះញង់កុំឱ្យយោធាស្ដាប់បង្គាប់ ប្រព្រឹត្តទៅរាជធានីភ្នំពេញ និងកន្លែងផ្សេងទៀត អំឡុងខែមករា និងខែកុម្ភៈ ឆ្នាំ២០១៨។ ចៅក្រមស៊ើបសួរសាលាដំបូងរាជធានីភ្នំពេញលោក កូយ សៅ បានបញ្ជាក់នៅក្នុងដីកាចុះថ្ងៃទី១៣មេសាថាលោក ជុំ ចាន់ បន្តធ្វើសកម្មភាពញុះញង់ និង ប៉ុនប៉ងផ្ដួលរំលំរដ្ឋាភិបាលក្រុងភ្នំពេញរហូតមកទល់ឆ្នាំ២០២០។
ទោះជាយ៉ាងណា អ្នកនាំពាក្យសមាគមការពារសិទ្ធិមនុស្ស អាដហុក (Adhoc) លោក ស៊ឹង សែនករុណា មានប្រសាសន៍ថា ការចាប់ខ្លួននេះ គឺជាការគំរាមកំហែងផ្នែកនយោបាយច្រើនជាងការអនុវត្តច្បាប់ ពីព្រោះជនជាប់ឃុំជាសកម្មជនគណបក្សប្រឆាំង និងជាអតីតគ្រូបង្រៀនម្នាក់ក្នុងចំណោម ១១នាក់ ដែលក្រសួងអប់រំយុវជននិងកីឡា បានលុបឈ្មោះចេញពីក្របខ័ណ្ឌរដ្ឋកន្លងទៅ ហើយគាត់តែងចូលរួមទាមទារឱ្យក្រសួងអប់រំផ្ដល់ក្របខ័ណ្ឌគ្រូបង្រៀនដល់ពួកគាត់វិញ៖ «យើងឃើញគាត់ជាសកម្មជនដ៏សកម្មការទាមទារទៅលើផលប្រយោជន៍ឬក៏ជាអតីតភាពមន្ត្រីរាជការស៊ីវិលដែលគាត់ធ្លាប់មានតួនាទីអីទាំងអស់ហ្នឹង ។ហើយប្រសិនជាចាត់វិធានការដើម្បីបំបិទនូវសំឡេងការទាមទារតវ៉ាតាមផ្លូវច្បាប់ដែលកំពុងតែដំណើរការរឿងនេះនៅក្នុងតុលាការស្រាប់ផង វាជាការមួយបំបិទសិទ្ធិ សេរីភាពក្នុងទាមទារតវ៉ាទៅតាមនីតិវិធីច្បាប់ហ្នឹងហើយ»។
គិតត្រឹមថ្ងៃទី១៥ មេសា មានសកម្មជនគណបក្សប្រឆាំងចំនួន ៨នាក់ហើយ ដែលតុលាការឃុំខ្លួនអំឡុងពេលរាតត្បាតជំងឺកូវិដ១៩ ក្នុងនោះមានប្រធានគណបក្សសង្គ្រោះជាតិខេត្តកំពង់ឆ្នាំង និងជាអតីតសមាគមគ្រូបង្រៀនឯករាជកម្ពុជាម្នាក់ផងគឺលោក កែវ ថៃ ក្រោមបទចោទប្រកាន់ដូចៗ គ្នា គឺពីបទរួមគំនិតក្បត់ជាតិ ញុះញង់ឲ្យយោធាមិនស្តាប់បញ្ជា និងញុះញង់ឲ្យប្រព្រឹត្តបទឧក្រិដ្ឋជាអាទិ៍ ហើយបញ្ជូនទៅឃុំខ្លួននៅក្នុងពន្ធនាគារព្រៃសរ (ម១-ព្រៃស)៕
No comments:
Post a Comment