ដោយ អាស៊ីសេរី
2020-04-21
គោយន្តដឹកឈើគ្មានច្បាប់ ដែលកម្លាំងកងរាជអាវុធហត្ថស្រុកឱរ៉ាល់ នៅភូមិគោក ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ ថ្ងៃទី២០ ខែមេសា ឆ្នាំ២០២០។
រូប៖ បញ្ជាការដ្ឋានកងរាជអាវុធហត្ថខេត្តកំពង់ស្ពឺ
ប្រធានអង្គការប្រឆាំងអំពើពុករលួយ ទប់ស្កាត់ធនធានធម្មជាតិ និងការពារសិទ្ធិពលរដ្ឋ លោក ជា ហ៊ាន ឲ្យដឹងថា បទល្មើសកាប់បំផ្លាញព្រៃឈើ នៅតែបន្តកើតមានជារៀងរាល់ថ្ងៃ ក្នុងតំបន់ដែនជម្រកសត្វព្រៃភ្នំឱរ៉ាល់ និង ឧទ្យានជាតិជួរភ្នំក្រវាញកណ្ដាល ដែលស្ថិតក្នុងខេត្តកំពង់ស្ពឺ កោះកុង និងពោធិ៍សាត់។
លោក ថា ក្រុមឈ្មួញធំៗ ដែលរកស៊ីជួញដូរព្រៃឈើ កំពុងប្រើប្រាស់រូបភាពថ្មីៗ ដោយជួលពលរដ្ឋនៅក្នុងតំបន់នីមួយៗ កាប់ព្រៃឈើ ហើយដឹកតាមគោយន្តជាច្រើនគ្រឿង ទៅលក់ឲ្យពួកគេនៅពេលយប់ ។ លោក បន្តថា ឈើមូលធំៗ ដែលដឹកតាមគោយន្ត មានប្រភេទ សុក្រំ ផ្ចឹក ត្រាវ និងឈើទាលជាដើម បានបើកឆ្លងកាត់ទីស្នាក់ការបរិស្ថាន ច្រកស្រែកិន ឆ្ពោះទៅទីរួមខេត្តកំពង់ស្ពឺ ដោយគ្មានសមត្ថកិច្ចចុះទប់ស្កាត់ឡើយ។
រាល់ពេលទទួលបានដំណឹងពីកាប់បំផ្លាញព្រៃឈើ សកម្មជនបរិស្ថានរូបនេះ តែងតែចុះទៅស្រាវជ្រាវជាមួយបុគ្គលិកម្នាក់ ហើយពេលខ្លះទៀត លោកទៅម្នាក់ឯង ដើម្បីតាមឃ្លាំមើលនិងចាប់បទល្មើសព្រៃឈើទាំងនោះ ដោយលោកមិនខ្លាចពីសុវត្ថិភាពផ្ទាល់ឡើយ ។ ក្រោយពេលប្រមូលបានភស្តុតាងរួច លោកតែងតែរាយការណ៍រឿងទាំងនោះ ប្រាប់មន្ត្រីបរិស្ថាន និងមន្ត្រីឧទ្យានរក្ស ប៉ុន្តែវិធានការ និងចំណាត់ទប់ស្កាត់បទល្មើសព្រៃពីសំណាក់មន្ត្រីថ្នាក់ក្រោម ហាក់នៅមានកម្រិតនៅឡើយ ។
លោក ជា ហ៊ាន ស្នើដល់ប្រមុខរដ្ឋាភិបាល ដាក់ចេញវិធានការទប់ស្កាត់ព្រៃឈើនេះ ប្រកបដោយប្រសិទ្ធភាព និងឲ្យទាន់ពេលវេលា បើមិនដូច្នោះទេ ព្រៃឈើក្នុងតំបន់ភ្នំក្រវាញ និងភ្នំឱរ៉ាល់ នឹងត្រូវវិនាសបាត់បង់ជាក់ជាមិនខាងឡើយ៕
3 comments:
Hun Sen will cut his head off if he cannot stop the deforestation.
So don't worry, be happy.
Hun Sen is a coward, he dares not even cut the heads off the illegal loggers.
Don't listen to a communist. See what he does.
Post a Comment