Monday 18 May 2020
ស្ត្រីបក្សប្រឆាំងកំពុងភៀសខ្លួនម្នាក់ ស៊ូទ្រាំក្នុងជីវភាពតោកយ៉ាក ខណៈប្ដីជាប់គុកដោយរឿងនយោបាយ
ដោយ សុជីវី
2020-05-18
rfa
លោកស្រី ស ខ្ចី និងស្វាមី។
Photo courtesy
សកម្មជនគណបក្សសង្គ្រោះជាតិ ស្រុកបាភ្នំ ខេត្តព្រៃវែង លោកស្រី ស ខ្ចី កំពុងរស់ភៀសខ្លួន ក្នុងប្រទេសថៃ យ៉ាងលំបាក ក្នុងស្ថានភាពកូនខ្ចីតែឯង ខណៈប្ដីកំពុងជាប់ពន្ធនាគារ ជាង១ឆ្នាំមកហើយ នៅប្រទេសកម្ពុជា ព្រោះរឿងនយោបាយ។
ស្ត្រីរូបនេះប្រាថ្នាឱ្យអាជ្ញាធរ ឆាប់ដោះលែងប្ដី ដើម្បីឱ្យបានឃើញមុខកូនប្រុសអាយុ ៨ខែ និងជួយធ្វើការងារសម្រាលបន្ទុកគ្រួសារដែលកំពុងជួបការលំបាកនេះ។
លោកស្រី ស ខ្ចី គឺជាសមាជិកចលនាស្ត្រី ប្រចាំស្រុកបាភ្នំ ខេត្តព្រៃវែង។ លោកស្រី ជាជនភៀសខ្លួនម្នាក់ ក្នុងចំណោមសកម្មជន និងមន្ត្រីបក្សប្រឆាំងច្រើនទៀត កំពុងភៀសខ្លួនពីការធ្វើទុក្ខបុកម្នេញ ពីរបបក្រុងភ្នំពេញ។ បច្ចុប្បន្ន លោកស្រីកំពុងភៀសខ្លួន នៅប្រទេសថៃ រស់នៅក្នុងបន្ទប់តូចចង្អៀតមួយ នៅជាយក្រុងបាងកក ពីរនាក់កូនង៉ែត អាយុជាង ៨ខែ។
លោកស្រីព្រាត់ប្ដី ជាង១ឆ្នាំមកហើយ។ កាលពីជាង១ឆ្នាំមុន គឺនៅចុងខែមករា ឆ្នាំ២០១៩ របបក្រុងភ្នំពេញ បានចាប់ខ្លួនប្ដីលោកស្រី ឈ្មោះ ប៉ាន សុខសុវណ្ណនី ជាសកម្មជនបក្សប្រឆាំងប្រចាំស្រុកកណ្ដាលស្ទឹង ខេត្តកណ្ដាល នៅពេលដែលគាត់ ចូលទៅប្រទេសកម្ពុជា ដើម្បីមើលថែម្ដាយឈឺធ្ងន់។ តុលាការបានកាត់ទោសគាត់ជាប់ពន្ធនាគារ ១ឆ្នាំកន្លះ ពីបទញុះញង់ និងចូលរួមគំនិតក្បត់ជាតិ និងឃុំឃាំងក្នុងពន្ធនាគារព្រៃស។ពេលនោះ លោកស្រី មានគភ៌ ៤ខែ។ វាសនាស្ត្រីមានផ្ទៃពោះរូបនេះ យ៉ាប់យ៉ឺនខ្លាំង តាំងពីពេលនោះមក ព្រោះបាត់បង់បង្គោលគ្រួសារ។ ឯវិបត្តិកើតឡើងទាំងផ្លូវចិត្ត និងជីវភាព។ ក្នុងការរស់នៅ ជាជនភៀសខ្លួន លោកស្រី ស ខ្ចី បានប្ដូរកន្លែងស្នាក់នៅ ពីមួយកន្លែងទៅមួយកន្លែង ដោយសារ ការគ្មានលុយបង់ថ្លៃបន្ទប់ជួល។ ចុងក្រោយ លោកស្រី បានរត់ទៅសុំស្នាក់នៅ ជាមួយសមាគមជនភៀសខ្លួនខ្មែរក្រោម នៅប្រទេសថៃ។
ស្ត្រីសកម្មជនបក្សប្រឆាំងរូបនេះ រៀបរាប់ថា នៅថ្ងៃដែលលោកស្រីសម្រាលកូន ជាពេលវេលាឈឺចាប់បំផុត ព្រោះអារម្មណ៍នឹកស្រណោះប្ដីកំពុងជាប់ពន្ធនាគារ មិនអាចមកមើលថែប្រពន្ធកូន និងគ្មានលុយបង់ថ្លៃសេវាវះកាត់បង្កើតកូន។ លោកស្រី ឱ្យដឹងថា ដោយសារគ្មានលុយបង់ថ្លៃពេទ្យនោះ គឺគ្រូពេទ្យថៃ សុំឱ្យស្នាក់នៅក្នុងមន្ទីរពេទ្យច្រើនថ្ងៃសិន រង់ចាំសាច់ញាតិយកលុយមកបង់ថ្លៃពេទ្យ។ ដោយសារគ្មានជម្រើស លោកស្រី បានសុំឱ្យក្រុមជនភៀសខ្លួនខ្មែរក្រោម ជួយដើរខ្ចីលុយគេ ដើម្បីយកទៅបង់ថ្លៃពេទ្យ៖ «វេទនាណាស់បងអើយ កាលហ្នឹង ត្រូវនៅតែ ៤ថ្ងៃទេ ឡើងដល់៨ថ្ងៃ យើងអត់មានលុយឱ្យពេទ្យ គេឃាត់ទុកយើងរហូត។ យើងពិបាក ចង់និយាយថា ដូចខ្ញុំប្រាប់ខាង UN អ៊ីចឹង បើទាញពេលវេលាថយក្រោយវិញបាន ខ្ញុំចង់ឱ្យប្ដីខ្ញុំ មកនៅក្បែរខ្ញុំ»។
លោកស្រី ស ខ្ចី ពេលសម្រាលកូននៅទីក្រុងបាងកក ប្រទេសថៃ។ Photo courtesy
នៅពេលចេញពីមន្ទីរពេទ្យភ្លាម កាលនោះកូនង៉ែត មានអាយុ ១៨ថ្ងៃ លោកស្រី ស ខ្ចី បានបីកូន ដើរសុំលុយតាមអង្គការជាដៃគូ របស់អង្គការសហប្រជាជាតិទទួលបន្ទុកជនភៀសខ្លួន (UNHCR) ដើម្បីរកលុយមកសងគេវិញ។ លោកស្រី ដើរបីកូនយំតាមអង្គការ ទើបមានការអាណិតអាសូរ ទទួលបានលុយខ្លះ សងថ្លៃសេវាវះកាត់កូន។ បន្ទាប់មក លោកស្រី ស ខ្ចី ក៏ខិតខំរ៉ាប់រងចិញ្ចឹម មើលថែកូន តែម្នាក់ឯង ក្នុងជីវភាពគ្មានប្រាក់ចំណូល៖ «ពិបាកហៅមិនលឺ ពិបាកមិនដឹងរកលេខអ្វីមកដាក់។ ដោយសារពេលខ្លះ យើងចង់ ដូចថា យើងតប់ប្រមល់ខ្លាំងមែនទែន យើងចង់ដើរចេញបន្តិច ឱ្យវាស្រឡះអារម្មណ៍ហើយ មកកាន់កូនវិញ ក៏យើងធ្វើអត់បាន។ ដោយសារយើងមិនអាចដើរចោលកូនបាន បន្តិចក៏យើងដើរចោលអត់កើត ហើយយើងចង់ទៅទិញអ្វី មួយភ្លែតៗ មិនចង់យកកូនទៅ ក៏យើងមិនអាច មិនអាចផ្ញើគេបាន ត្រូវកណ្ដៀតកូនទៅតាម។ សូម្បីពីម្សិលម្ង៉ៃ ខ្ញុំទៅពេទ្យ ក៏ត្រូវយកកូនទៅតាម និយាយថា មហាពិបាកហួស»។
សព្វថ្ងៃនេះ លោកស្រីក៏ទទួលបានថវិកាខ្លះ ពីគណបក្សសង្គ្រោះជាតិនៅក្រៅប្រទេសដែរ គឺប្រហែល៣ពាន់បាត ឬស្មើមួយរយ (១០០)ដុល្លារអាមេរិក ក្នុងមួយខែ។ ប៉ុន្តែ លោកស្រី ថា ប្រាក់ទាំងនោះ គឺសម្រាប់តែបង់ថ្លៃបន្ទប់ជួលទេ។ ឯលុយចំណាយ ទឹកដោះគោកូន ម្ហូបអាហារ និងការចាយវាយរបស់ប្ដី ក្នុងពន្ធនាគារព្រៃស គឺជាវិបត្តិធ្ងន់ធ្ងររបស់លោកស្រី។
សកម្មជនជនរូបនេះ បានភៀសខ្លួន ទៅប្រទេសថៃ កាលពីដើមខែកក្កដា ឆ្នាំ២០១៨ គឺមុនព្រឹត្តិការណ៍បោះឆ្នោត ឆ្នាំ២០១៨ ជិតមួយខែ។ លោកស្រីបានធ្វើសកម្មភាពបង្ហោះសារម្រាមដៃស្អាត ហើយប៉ូលិសចោទថា លោកស្រី ប្រឆាំងរដ្ឋាភិបាល ដោយញុះញង់ពលរដ្ឋ មិនឱ្យទៅបោះឆ្នោត។
លោកស្រី បានភៀសខ្លួនទៅប្រទេសថៃ ដើម្បីសកម្មភាពបំផុសយុទ្ធនាការម្រាមដៃស្អាត តាមហ្វេសប៊ុក (facebook) ឱ្យបានទូលាយជាង ក្នុងប្រទេសកម្ពុជា។ លោកស្រីប្រាប់ថា ធ្លាប់ត្រូវប៉ូលិសថៃ ឃាត់ខ្លួនម្ដងហើយ ជាមួយប្ដីលោកស្រី ហើយប៉ូលិសថៃ បានព្រមានឱ្យបញ្ឈប់ធ្វើសកម្មភាពទាំងឡាយ ក្នុងប្រទេសថៃ ក្នុងន័យប្រឆាំងរដ្ឋាភិបាលកម្ពុជាតទៀត បើមិនដូច្នោះតម្រួតថៃ នឹងចាប់បញ្ជូនទៅប្រទេសកម្ពុជាវិញ។
ស្ត្រីជនភៀសខ្លួនខ្មែរក្រោម ដែលចេះភាសាថៃ គឺជាកម្មករលើកបន្លែតាមឡាន ដែលហាក់ដូចជាសាច់ញាតិតែម្នាក់គត់ របស់លោកស្រី ស ខ្ចី នៅប្រទេសថៃ គឺ លោកស្រី លឹង ធីថាយ ប្រាប់អាស៊ីសេរីថា អ្នករស់ក្នុងសមាគមជនភៀសខ្លួនខ្មែរកម្ពុជាក្រោម មានក្ដីអាណិត លោកស្រី ស ខ្ចី ណាស់ ព្រោះមិនចេះភាសាថៃ ហើយមានជីវភាពលំបាក ឯប្ដីកំពុងជាប់ពន្ធនាគារ។
លោកស្រី លឹង ធីថាយ ប្រាប់ថា នៅថ្ងៃសម្រាលកូន ជនភៀសខ្លួនខ្មែរក្រោមរ៉ៃអង្គាសលុយគ្នាជួយ បានតែបន្តិចទេ ព្រោះខ្មែរក្រោម ក៏គ្មានប្រាក់ដែរ។ ម្ល៉ោះហើយ នៅពេលទាល់ខ្លាំង លោកស្រីទៅសុំខ្ចីលុយម្ចាស់ផ្ទះជួល ជាជនជាតិថៃ ដោយសន្យារកសងវិញ។
លោកស្រី ស ខ្ចី (ឆ្វេង) និងលោកស្រី លឹង ធីថាយ ពេលនៅមន្ទីរពេទ្យសម្រាលកូន។ Photo courtesy
លោកស្រីថា ការហូបចុករបស់លោកស្រី ស ខ្ចី ទាំងមុនពេលសម្រាកកូន និងពេលសម្រាកកូនរួច ក៏ទទួលបានការជួយពីក្រុមជនភៀសខ្លួនខ្មែរក្រោមធ្វើការតាមផ្សារដែរ គឺពួកគេបានរើសបន្លែ និងឆ្អឹងជ្រូក ដែលគេទុកចោលនៅតាមផ្សារ មកចែកគ្នាស្លហូប៖ «ខ្ញុំរើសបន្លែ រើសអ្វី ដែលគេសល់ៗ។ គេលក់សល់យកចែកគ្នាហូប។ ជួនកាល មានគេចោលឆ្អឹង(ជ្រូក) ចោលអ្វី ក៏ខ្ញុំរើសយកមកហូប។ គាត់អត់មានអ្នកមើលថែគាត់ទេ ហើយខ្ញុំហ្នឹងក៏ចុះឡើងទៅមើលគាត់ហ្នឹង រហូតដល់ទទួលយកគាត់ហ្នឹង មកបន្ទប់វិញ ដដែលហ្នឹងណា។ គាត់ត្រូវវះផង គាត់កើត (សម្រាលកូន) អត់បាននោះ។ គេ(ពេទ្យ) ឱ្យរកប្ដី ដល់គ្មានប្ដី រកសាច់ញាតិ ខ្ញុំហ្នឹងក៏រកសាច់ញាតិ (លោកស្រី) ស ខ្ចី ហ្នឹងទៅ។ ខ្ញុំក៏ស៊ីញេទៅ»។
លោកស្រី លឹង ធីថាយ ប្រាប់ថា តាំងពីប្រទេសថៃ រងការរាតត្បាតជំងឺកូវីដ១៩ (Covid-19) មក ក្រុមជនភៀសខ្លួនខ្មែរក្រោម នៅប្រទេសថៃ មិនអាចជួយឧបត្ថម្ភបន្លែសល់ៗ និងឆ្អឹងជ្រូក ដល់លោកស្រី ស ខ្ចី និងកូនតូចបានទៀតទេ ព្រោះពួកគេជួបការលំបាកខ្លាំងដែរ ដោយមិនអាចចេញទៅធ្វើការ នៅតាមផ្សារ បានដូចមុន។ លោកស្រីថា រដ្ឋាភិបាលថៃ បានដាក់បម្រាមគោចរ (ចេញដើរ) ចាប់ពីម៉ោង១០យប់ ដល់ម៉ោង៤ព្រឹក ធ្វើឱ្យខ្មែរក្រោម មិនអាចធ្វើការលើកបន្លែតាមឡាន នៅពេលយប់បាន។
លោកស្រី ស ខ្ចី ប្រាប់ថា ការស៊ូទ្រាំ ក្នុងជីវភាពលំបាកតោកយ៉ាក ក្នុងប្រទេសថៃ ព្រោះតែចង់បន្តឆន្ទៈ ចូលរួមស្ដារប្រជាធិបតេយ្យនៅកម្ពុជា។ លោកស្រីបន្តថា ការមិនព្រមវិលត្រលប់ចូលកម្ពុជាវិញ តាមការអំពាវនាវរបស់លោកនាយករដ្ឋមន្ត្រី ហ៊ុន សែន ដោយសាររបបក្រុងភ្នំពេញ នៅតែបន្តចាប់ចង និងការលបវាយប្រហារលើសកម្មជនបក្សប្រឆាំង។
ចាប់តាំងពីដើមឆ្នាំ២០២០មក មានសកម្មជនបក្សប្រឆាំង ១២នាក់ រងការចាប់ខ្លួន និង១៦នាក់រងការវាយប្រហាររបួសក្បាល និងរបួសដៃ ពីជនមិនស្គាល់មុខ។ ប៉ុន្តែប៉ូលិសមិនដែលចាប់បានជនដៃដល់ ដែលវាយប្រហារលើសកម្មជនបក្សប្រឆាំង បានម្នាក់ណាទេ។
ទោះយ៉ាងណា លោកស្រី ស ខ្ចី សង្ឃឹមថា នឹងបានជួបមុខប្ដី ឆាប់ៗ នៅក្នុងប្រទេសថៃ ក្រោយពេលលោក ប៉ាន សុខសុវណ្ណនី ត្រូវអាជ្ញាធរដោះលែង ពេលអនុវត្តទោសពន្ធនាគារចប់សព្វគ្រប់ នៅចុងខែសីហា ខាងមុខ៕
Subscribe to:
Post Comments (Atom)
No comments:
Post a Comment