Thursday 21 May 2020
ឱសថការីខ្មែរនៅអូស្ត្រាលី យល់ស្របតាមការសង្កេតរបស់លោក សម រង្ស៊ី អំពីកត្តា ដែលកម្ពុជាមានអត្រាជំងឺកូវីដ-១៩ទាប
ដោយ មួង ណារ៉េត
2020-05-21
លោក លឹម សួរ (ឆ្វេង) ឱសថការីខ្មែរអូស្ត្រាលី និងលោក សម រង្ស៊ី ប្រធានស្ដីទីគណបក្សសង្គ្រោះជាតិ
រូប៖ ហ្វេសប៊ុក
ឱសថការីខ្មែរអូស្រ្តាលី យល់ស្របតាមការសង្កេតរបស់ប្រធានស្ដីទីគណបក្សសង្គ្រោះជាតិលោក សម រង្ស៊ី អំពីកត្តាមួយចំនួន ដែលធ្វើឲ្យកម្ពុជា រួចផុតពីគ្រោះថ្នាក់ធំ នៃជំងឺកូវីដ-១៩។
ឱសថការីខ្មែរអូស្ត្រាលីលោក លឹម សួរ យល់ឃើញថា ការអង្កេតរបស់ ប្រធានស្តីទីគណបក្សសង្គ្រោះជាតិ លោក សម រង្ស៊ី អំពីមូលហេតុ ដែលធ្វើឲ្យកម្ពុជា រួចផុតពីការរាតត្បាតទ្រង់ទ្រាយធំ នៃជំងឺកូវីដ-១៩ នោះ សមស្របតាមលក្ខណៈវិទ្យាសាស្ត្រ វេជ្ជសាស្ត្រ និងតថភាពពិត នៃស្ថានភាពប្រទេសកម្ពុជា និងប្រទេសមួយចំនួន ដែលលោក សម រង្ស៊ី បានលើកយកមកបង្ហាញនោះ។
កត្តាបួនយ៉ាង ដែលោក សម រង្ស៊ី បង្ហាញនៅក្នុងសេចក្ដីសង្កេត អមដោយឯកសារស្រាវជ្រាវដែលយោងផង រួមមាន ទីមួយ កត្តា អាកាសធាតុក្ដៅ ទី២ កត្តាសេដ្ឋកិច្ច និងប្រជាសាស្រ្ត ជាពិសេសកត្តាវ័យរបស់មនុស្ស គឺមនុស្សវ័យក្មេង និងសុខភាពរឹងមាំ នៃប្រជាពលរដ្ឋ ភាគច្រើនលើសលុប ដែលរស់នៅក្នុងប្រទេសក្រីក្រ ដូចក្នុងប្រទេសកម្ពុជា និងក្នុងតំបន់ ទី៣ កត្តាភាពស៊ាំពីជំងឺគ្រុនចាញ់ និងទី៤ គឺកត្តាសារធាតុគ្រាប់ឈាមក្រហម Hemoglobin E។
ជុំវិញកត្តាអាកាសធាតុនេះ លោក លឹម សួរ យល់ស្របថា ប្រទេសដែលមានអាកាសធាតុត្រូពិក ដែលក្ដៅហើយសើម ដូចកម្ពុជា គឺមានលក្ខណៈអំណោយផលច្រើន ក្នុងការប្រឆាំងនឹងជំងឺនេះ៖ «ខ្ញុំជឿ យល់ស្របនឹងទស្សនៈរបស់គាត់។ កម្ដៅគឺអាចសម្លាប់មេរោគយ៉ាងងាយ។ ភូមិសាស្ត្រដែលគាត់ស្រាវជ្រាវមក គឺថាក្នុង ២០០២-០៣ លោកសាស្ត្រាចារ្យ នីកូល គាត់សិក្សាអំពីរោគសា (SARs)។ រោគសានេះ មិនអាចរស់នៅបានយូរទេ បើអាកាសធាតុក្ដៅ ជាពិសេសចាប់ពី ៣០ អង្សាឡើងទៅ។ ប្រទេសដែលមានសំណើមច្រើន និងក្ដៅស្អុះច្រើននេះ ធ្វើឲ្យមេរោគពិបាកឆ្លងពីមនុស្សម្នាក់ទៅមនុស្សម្នាក់ទៀត។ សំខាន់បំផុត គឺពន្លឺថ្ងៃ។ កាំរស្មី UV ធ្វើឲ្យមេរោគហ្នឹងស្លាប់យ៉ាងរហ័ស ក្នុងរយៈពេលតែ ២នាទីកន្លះទេ»។
រីឯកត្តាសេដ្ឋកិច្ច និងប្រជាសាស្រ្តវិញ លោក លឹម សួរ យល់ស្របថា ក្នុងប្រទេសក្រីក្រដូចកម្ពុជា មិនសម្បូរពលរដ្ឋ ដែលមានអាយុច្រើនចាប់ពី ៦៥ នោះទេ។ ភាគច្រើននៃពលរដ្ឋកម្ពុជា គឺមានអាយុតិច ដែលអាចនៅមានកម្លាំងមាំមួន ជាងមនុស្សដែលមានវ័យចំណាស់ ដូចនៅប្រទេសជឿនលឿន៖ «ដែលគាត់អាចរស់នៅបាននេះ គឺដោយសារប្រព័ន្ធការពារគាត់ខ្លាំង។ ខ្លាំងដោយសារអ្វី? គឺដោយសារគាត់មិនមែនស្អាតហួសពេក។ ការស្អាតពេក ឬក្រខ្វក់ពេក ក៏យើងមិនអាចរស់នៅបាននោះដែរ។ ម្ល៉ោះហើយ ការមិនសូវស្អាតហួសហេតុនេះ ធ្វើឲ្យប្រព័ន្ធការពារយើងខ្លាំងក្លា។ បើយើងរស់នៅក្នុងភាពវេទនាក្រីក្រ បើយើងអាចឆ្លងភាពវេទនានេះរួច គឺយើងខ្លាំង។ មួយទៀត ការរស់នៅដោយភាពធម្មតា ហូបបន្លែផ្លែឈើច្រើន មិនសូវហូបសាច់ច្រើនដូចប្រទេសជឿនលឿន។ ម្យ៉ាងទៀតពលរដ្ឋក្នុងប្រទេសក្រីក្រ បញ្ចេញពលកម្មច្រើន ធ្វើឲ្យប្រព័ន្ធការពារក្នុងខ្លួនខ្លាំងមួយដែរ»។
ជាងនេះទៅទៀត ដោយសារតែប្រទេសកម្ពុជា ជាប្រទេសដែលស្ថិតក្នុងតំបន់ ដែលមានជំងឺគ្រុនចាញ់ លោក លឹម សួរ ឯកភាពថា ភាពស៊ាំនឹងជំងឺគ្រុនចាញ់ ធ្វើឲ្យពលរដ្ឋខ្មែរ អាចស៊ាំនឹងជំងឺកូវីដ-១៩ នេះបានដែរ ដោយសារតែការខាងមន្ទីរពេទ្យ អនុញ្ញាតឲ្យប្រើឱសថព្យាបាលជំងឺគ្រុនចាញ់ ទៅព្យាបាលអ្នកជំងឺកូវីដ-១៩។ ទោះជាយ៉ាងនេះ លោកថា តម្រូវឲ្យមានការសិក្សាស្រាវជ្រាវបន្ថែមទៀត ដើម្បីឲ្យដឹងច្បាស់ថា តើភាពស៊ាំនៃជំងឺគ្រុនចាញ់ ពិតជាមានភាពពាក់ព័ន្ធគ្នា នឹងភាពស៊ាំនឹងជំងឺកូវីដ-១៩ នេះ។
ទោះជាយ៉ាងនេះក្តី ចំពោះកត្តាទី៤ អំពីសារធាតុគ្រាប់ឈាមក្រហម អ៉េម៉ូក្លូប៊ីន អឺ ក្នុងឈាមរបស់ពលរដ្ឋខ្មែរ ដែលលោក សម រង្ស៊ី អះអាងថា អាចមានភាពពាក់ព័ន្ធគ្នាទៅនឹងភាពស៊ាំនឹងជំងឺកូវីដ-១៩ លោក លឹម សួរ ថា ទាល់តែសិក្សាបន្ថែម ឲ្យដឹងថា តើប្រជាពលរដ្ឋចំនួនប៉ុន្មានភាគរយ ដែលមានផ្ទុកគ្រាប់ឈាមក្រហមប្រភេទនេះ ទើបលោកអាចសន្និដ្ឋានបានថា តើអ្នកមានគ្រាប់ឈាមប្រភេទនេះ ពិតជាធន់នឹងជំងឺកូវីដ-១៩ នេះបានដែរ ឬយ៉ាងណា។
បន្ថែមទៅលើការសង្កេតរបស់លោក សម រង្ស៊ី លោកឱសថការីខ្មែរអូស្ត្រាលី ថាកត្តានៃមធ្យោបាយធ្វើដំណើររបស់ពលរដ្ឋខ្មែរ ដែលជិះរថយន្តទ្រង់ ឬរ៉ឺម៉កសណ្ដោង ឬមធ្យោបាយធ្វើដំណើរផ្សេងទៀត ដែលមិនបិទជិត ដែលមានខ្យល់ចេញចូល និង មិនសូវប្រមូលផ្តុំគ្នាក្នុងអគារ ឬកន្លែងបិទជិត ក៏ជាលក្ខណៈអំណោយផល រួចផុតពីការឆ្លងនៃជំងឺកូវីដ-១៩ នេះដែរ។
ការសង្កេត និងសិក្សាស្រាវជ្រាវរបស់លោក សម រង្ស៊ី និងលោកឱសថការីខ្មែរអូស្រ្តាលី លឹម សួរ ហាក់បីដូចជាផ្ទុយគ្នាស្រឡះ ទៅនឹងខ្លឹមសារក្នុងវីដេអូរយៈពេលជិត ២០នាទី របស់អង្គភាពព័ត៌មាន និងប្រតិកម្មរហ័សនៃទីស្ដីការគណៈរដ្ឋមន្ត្រីរបបលោក ហ៊ុន សែន ដែលអួតសរសេរថា ការណ៍ដែលកម្ពុជាមានអ្នកជំងឺកូវីដ-១៩ តិច ព្យាបាលជាដាច់ និងមិនមានករណីថ្មីរយៈពេលជាង ៣០ថ្ងៃជាប់ៗ គ្នា គឺដោយសារតែភាពឈ្លាសវៃ និងប្រកបដោយគតិបណ្ឌិតរបស់លោក ហ៊ុន សែន ក្នុងការដឹកនាំប្រទេស។
ជាងនេះទៅទៀត លោក ហ៊ុន សែន រងការរិះគន់ជុំទិសថា ប្រថុយប្រថានគ្រោះថ្នាក់ខ្លាំងបំផុត ដែលយកអាយុជីវិតពលរដ្ឋខ្មែរមួយប្រទេស ទៅប្រឈមនឹងជំងឺនេះ ដោយសារពីដំបូងលោកបើកដៃឲ្យជនជាតិចិនហូរចូលពីទីក្រុងវូហាន ដែលជាតំបន់ផ្ទុះមេរោគនេះ និងប្រកាសប្រាប់ពលរដ្ឋខ្មែរកុំឲ្យភ័យខ្លាចនឹងជំងឺនេះ ដោយលោកថា ទាល់តែមានថ្ងៃទី៣១ ខែ កុម្ភៈ (ឬទាល់តែសេះដុះស្នែង) ទើបមានពលរដ្ឋខ្មែរឆ្លងជំងឺនេះ។ មិនតែប៉ុណ្ណោះ លោកប្រថុយអនុញ្ញាតឲ្យកប៉ាល់ទេសចរណ៍ ដឹកមនុស្សជាង ២ពាន់នាក់ចូលចតនៅកម្ពុជា ទោះប្រទេសជាច្រើនមិនហ៊ានឲ្យចូលចត។ ក្រោយមកទៀត លោកបានព្រមានពលរដ្ឋមិនឲ្យពាក់ម៉ាស់ ដោយគំរាមបណ្ដេញចេញពីសាលសន្និសីទ បើហ៊ានពាក់ម៉ាស់ការពារជាដើម។
ទោះកម្ពុជាអះអាងថា អស់មានករណីជំងឺកូវីដ-១៩ ក៏ប្រទេសជាច្រើនបានដាក់កម្ពុជាក្នុងបញ្ជីខ្មៅ នៃប្រទេសដែលមានហានិភ័យខ្ពស់ ក្នុងការចម្លងជំងឺនេះ។ ប្រទេសដែលដាក់កម្ពុជាក្នុងបញ្ជីខ្មៅ និងមិនទាន់ដកទៅវិញនៅឡើយ រួមមានប្រទេសជប៉ុន ថៃ និងវៀតណាម៕
Subscribe to:
Post Comments (Atom)
No comments:
Post a Comment