ដោយ សុជីវី
2020-06-17
លោក ហ្វីល រ៉ូប៊ឺតសុន (Phil Robertson) នាយករងនៃអង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) ប្រចាំអាស៊ី ផ្ដល់បទសម្ភាសន៍ដល់វិទ្យុអាស៊ីសេរី កាលពីអំឡុងខែមីនា ឆ្នាំ២០១៥។ RFA
Photo: RFA
អង្គការសិទ្ធិមនុស្សអន្តរជាតិ បន្តទាមទារឱ្យរបបក្រុងភ្នំពេញ បញ្ឈប់ការធ្វើទុក្ខបុកម្នេញលើក្រុមនយោបាយប្រឆាំង ដែលកើតមានតាំងពីពេលផ្ទុះរាតត្បាតជំងឺកូវីដ-១៩ មក។ មន្រ្តីនាំពាក្យក្រសួងយុត្តិធម៌ថា ក្រសួងមិនអាចធ្វើតាមសំណើនេះបានឡើយ។
នាយករងអង្គការ Human Rights Watch ទទួលបន្ទុកកិច្ចការតំបន់អាស៊ី លោក ហ្វីល រ៉ូបឺតសុន (Phil Robertson) លើកឡើងក្នុងសេចក្ដីថ្លែងការណ៍នៅថ្ងៃទី១៧ មិថុនាថា រដ្ឋាភិបាលលោក ហ៊ុន សែន ល្មមដល់ពេលបញ្ឈប់ការប្រើប្រាស់កង្វល់របស់ពិភពលោក ចំពោះជំងឺកូវីដ-១៩ ជាខែល ដើម្បីបង្ក្រាបក្រុមអ្នកប្រឆាំងតទៅទៀតហើយ។ លោកបន្តថា សហគមន៍អន្តរជាតិត្រូវតែប្រាប់លោក ហ៊ុន សែន ឱ្យច្បាស់ថា គាត់មិនអាចយកលេសរឿងមេរោគឆ្លងដ៏កាចសាហាវ ដើម្បីប្រព្រឹត្តអំពើរំលោភសិទ្ធិមនុស្សធ្ងន់ធ្ងរបាននោះទេ។
ការរិះគន់ធ្ងន់ៗ ចំពោះរបបលោក ហ៊ុន សែន នេះ ធ្វើឡើងបន្ទាប់ពីអង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃស៍ វ៉ច្ឆ (Human Rights Watch) រកឃើញថា ចាប់តាំងពីខែមករា ដល់ខែមិថុនា ឆ្នាំ២០២០ អាជ្ញាធរកម្ពុជាបានចាប់ឃុំខ្លួនមនុស្ស ១៥នាក់ ពាក់ព័ន្ធនឹងបទចោទប្រកាន់បែបប្រឌិត និងមានចរិតនយោបាយ។ ជាពិសេស មួយសប្ដាហ៍ក្រោយផ្ទុះជំងឺកូវីដ-១៩ អាជ្ញាធរកម្ពុជាបានចាប់ខ្លួនមនុស្សជាង ៣០នាក់ ដោយចោទថា ពួកគេបានផ្សព្វផ្សាយព័ត៌មានមិនពិតអំពីជំងឺថ្មីនេះនៅកម្ពុជា។
ឆ្លើយតបនឹងសេចក្ដីថ្លែងការណ៍របស់អង្គការសិទ្ធិមនុស្សនេះ រដ្ឋលេខាធិការ និងជាអ្នកនាំពាក្យក្រសួងយុត្តិធម៌ លោក ជិន ម៉ាលីន អះអាងដដែលថា ការចោទប្រកាន់ និងការចាប់ឃុំខ្លួនសកម្មជនបក្សប្រឆាំងនោះ គឺជាការអនុវត្តច្បាប់របស់កម្ពុជា។ លោកថា អង្គការ យូមែន រ៉ៃស៍ វ៉ច្ឆ គួរតែណែនាំសកម្មជនបក្សប្រឆាំងគោរពច្បាប់ឱ្យបានខ្ជាប់ខ្ជួន បើមិនចង់មានទោសទណ្ឌទេនោះ៖ «សកម្មភាពទាំងអស់នោះ មិនមែនជាការអនុវត្តសិទ្ធិដែលធានាដោយច្បាប់ជាតិ និងអន្តរជាតិនោះទេ។ សកម្មភាពទាំងអស់នោះ ត្រូវបានសមត្ថកិច្ច និងខាងតុលាការរកឃើញថា មានធាតុផ្សំគ្រប់គ្រាន់បង្កើតបានទៅជាបទល្មើស ហើយបទល្មើសហ្នឹង វាមានបញ្ញត្តិផ្សេងៗ គ្នា ទៅតាមអង្គហេតុ និងធាតុផ្សំនីមួយៗ ដែលខាងស្ថាប័នអយ្យការ និងតុលាការបានបង្ហាញយ៉ាងច្បាស់លាស់នៅក្នុងដីកានៃការចោទប្រកាន់រួចហើយ»។
ផ្ទុយពីការអះអាងនេះ អង្គការសិទ្ធិមនុស្សក្នុងស្រុកក៏យល់ឃើញស្រដៀងគ្នានឹងអង្គការ យូមែន រ៉ៃស៍ វ៉ច្ឆ ដែរថា វិធានការផ្លូវច្បាប់លើសកម្មជនបក្សប្រឆាំង ជាការរំលោភសិទ្ធិមនុស្សធ្ងន់ធ្ងរ។
កាលពីសប្ដាហ៍មុន ក្រុមសង្គមស៊ីវិល ៣០ស្ថាប័ន បានចេញសេចក្ដីថ្លែងការណ៍ ដោយសង្កត់ធ្ងន់ថា ការចោទប្រកាន់ និងចាប់ខ្លួនសកម្មជនគណបក្សសង្គ្រោះជាតិជាហូរហែមកនោះ រំលោភលើសិទ្ធិបញ្ចេញមតិ និងសិទ្ធិនយោបាយរបស់ពលរដ្ឋ។ ក្រុមសង្គមស៊ីវិលទាំងនោះអំពាវនាវដល់អាជ្ញាធរឱ្យដោះលែងអ្នកជាប់ឃុំដោយសាររឿងនយោបាយទាំងអស់ និងរកដំណោះស្រាយនយោបាយតាមគោលការណ៍ប្រជាធិបតេយ្យវិញ។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ (LICADHO) លោក អំ សំអាត យល់ថា រដ្ឋាភិបាលគួរតែទទួលយកអនុសាសន៍របស់សង្គមស៊ីវិលជាតិ និងអន្តរជាតិ ដើម្បីកែលម្អស្ថានភាពសិទ្ធិមនុស្សនៅក្នុងប្រទេស៖ «រដ្ឋាភិបាលគួរតែពិចារណាទៅលើសំណូមពរមួយចំនួន ដើម្បីយើងធ្វើការកែតម្រូវ កែសម្រួលឱ្យប្រទេសយើងហ្នឹង វាជាប្រទេសដែលប្រកាន់លទ្ធិប្រជាធិបតេយ្យ និងនីតិរដ្ឋពិតប្រាកដនោះ»។
កាលពីខែកុម្ភៈ កន្លងទៅ គណៈកម្មការអឺរ៉ុបបានប្រកាសដកហូតការអនុគ្រោះពន្ធ EBA ២០% ពីកម្ពុជា បន្ទាប់ពីរដ្ឋាភិបាលលោក ហ៊ុន សែន បានបរាជ័យក្នុងការដោះស្រាយកង្វល់ផ្នែកសិទ្ធិមនុស្សធ្ងន់ធ្ងរ ដែលក្នុងនោះក៏រួមទាំងការបង្ក្រាបរបស់អាជ្ញាធរលើក្រុមគណបក្សប្រឆាំងផងដែរ។
មន្ត្រីសិទ្ធិមនុស្សអន្តរជាតិ លោក ហ្វីល រ៉ូបឺតសុន មានប្រសាសន៍ថា សហភាពអឺរ៉ុប និងរដ្ឋសមាជិកទាំងអស់ ត្រូវដាក់បញ្ចូលករណីបង្ក្រាបថ្មីៗរបស់រដ្ឋាភិបាលកម្ពុជាលើសមាជិកបក្សប្រឆាំង នៅពេលសម្រេចជាចុងក្រោយចំពោះការដកហូតប្រព័ន្ធអនុគ្រោះពន្ធពីកម្ពុជា៕
No comments:
Post a Comment