ដោយ សេក បណ្ឌិត
2020-06-16
rfa
កម្លាំងអាជ្ញាធរខេត្តបាត់ដំបង សួរនាំក្រុមព្រះសង្ឃ និងសកម្មជនចលនា ខ្មែរថាវរៈ ១៤រូប ដែលធ្វើកូដកម្មបង្អត់អាហារ និងធម្មយាត្រាដោយសន្តិវិធី នៅថ្ងៃទី៩ ខែឧសភា ឆ្នាំ២០២០ ទាមទាររដ្ឋាភិបាលឱ្យជួយធ្វើអន្តរាគមន៍ទៅស្ថាប័នមីក្រូហិរញ្ញវត្ថុ និងធនាគារ ពន្យារពេលទារប្រាក់ពីប្រជាពលរដ្ឋ ក្នុងគ្រាជំងឺ covid-19 កំពុងរាតត្បាត។
រូប៖ សកម្មជនចលនាខ្មែរថាវរៈ
ព្រះសង្ឃខ្មែរថាវរៈប្រមាណ៥អង្គដាក់លិខិតទៅមន្ត្រីសង្ឃខេត្តបាត់ដំបងស្នើសុំជួបជុំគ្នាតវ៉ាដោយសន្តិវិធី ដើម្បីទាមទារសិទ្ធិសេរីភាពចូលរួមការងារក្នុងសង្គម នៅរសៀលថ្ងៃទី១៥មិថុនា។មន្ត្រីអង្គការសង្គមស៊ីវិល លើកឡើងថា ការស្នើសុំសម្ដែងមតិរបស់ព្រះសង្ឃនេះជារឿងត្រឹមត្រូវស្របតាមច្បាប់កំណត់។
តំណាងព្រះសង្ឃខ្មែរថាវរៈ នៅខេត្តបាត់ដំបង ព្រះតេជព្រះគុណ ផន សុភាង មានថេរដីកាថា មូលហេតុដែលព្រះអង្គស្នើសុំតវ៉ានេះ ដោយសារមិនពេញចិត្តនឹងព្រះចៅអធិការវត្តមួយចំនួនដែលបានរឹតត្បិតសិទ្ធិសេរីភាពដល់ព្រះសង្ឃហាមឃាត់មិនឱ្យចូលរួមធ្វើការងារនៅក្នុងសង្គម។ ព្រះអង្គបន្តថា មន្ត្រីសង្ឃធ្វើបែបនេះ គឺជាការធ្វើទុក្ខបុកម្នេញធ្ងន់ធ្ងរដល់អ្នកបួស ដោយធ្វើឱ្យព្រះសង្ឃឃ្លាតឆ្ងាយពីពុទ្ធបរិស័ទ ដែលមិនអាចចូលរួមចំណែកអភិវឌ្ឍន៍ប្រទេសបានឡើយ៖ «នៅក្នុងលិខិតនេះមានតែ២ ទេ គឺជំរុញឱ្យមានការដោះស្រាយនិងជាការជូនដំណឹងនៃការជួបជុំតែម្ដង។ ដោយសារកន្លងមកពេលដែលលោកធ្វើកិច្ចការសង្គមត្រូវបានចៅអធិការវត្តមួយចំនួនលោកហៅទៅធ្វើកិច្ចសន្យា។ អ៊ីចឹងសម្ពាធនៃកិច្ចសន្យាហ្នឹង ធ្វើឱ្យព្រះសង្ឃមិនហ៊ានចូលរួមការងារក្នុងសង្គម។ អាត្មាចង់ធ្វើយ៉ាងណាឱ្យមន្ត្រីសង្ឃកំណត់ឱ្យបានច្បាស់លាស់នូវលទ្ធភាពនៃការចូលរួមការងារសង្គមរបស់ព្រះសង្ឃនៅខេត្តបាត់ដំបងតែម្ដង»។
ព្រះអង្គមានថេរដីកាបន្តថា ព្រះអង្គបានដាក់លិខិតស្នើសុំធ្វើបាតុកម្មនេះទៅលេខាព្រះអនុគណខេត្តបាត់ដំបងរួចហើយនៅរសៀលថ្ងៃទី១៥ មិថុនា។
អាស៊ីសេរីមិនអាចទាក់ទងលេខាព្រះមេគណខេត្តបាត់ដំបង ព្រះតេជព្រះគុណ ពេជ្យ សៀក ដើម្បីមានថេរដីកាជុំវិញបញ្ហានេះបានទេ នៅថ្ងៃទី១៥ មិថុនា ដោយទូរស័ព្ទចូលជាច្រើនដងពុំមានអ្នកទទួល។
ទោះជាយ៉ាងណាមន្ត្រីសម្របសម្រួលសមាគមការពារសិទ្ធិមនុស្ស អាដហុក (Adhoc) ខេត្តបាត់ដំបង លោក យិន ម៉េងលី កត់សំគាល់ថា ក្រុមព្រះសង្ឃខ្មែរថាវរៈទាំងនោះពិតជារងការរឹតត្បិតសិទ្ធិសេរីភាពចូលរួមការងារនៅក្នុងសង្គមពីមន្ត្រីសង្ឃប្រាកដមែន។លោកបញ្ជាក់ថា បន្ទាប់ពីដាក់លិខិតជូនដំណឹងដល់មន្ត្រីសង្ឃហើយក្រុមព្រះសង្ឃទាំងនោះអាចជួបជុំសម្ដែងមតិទាមទារសិទ្ធិសេរីភាពរបស់ព្រះសង្ឃនៅក្នុងទីវត្តអារាមបាន ដោយពុំខុសច្បាប់ឡើយ៖ «ចំណុចនេះហើយខ្ញុំទទូចឱ្យមានការជួបគ្នាស្ដាប់ភាគីទាំងសង្ខាងស្ដាប់ប្រសាសន៍របស់ព្រះអង្គដែលថារឹតត្បិតហ្នឹងឱ្យព្រះអង្គលើកឡើង ហើយយើងបង្ហាញហេតុផលហើយស្ដាប់មើលថាតើព្រះអង្គចង់បានអី? ហើយយើងអាចសម្របសម្រួលគ្នាបានត្រឹម កម្រិតណា កាលណាយើងអត់បានជួបគ្នាបានន័យថាអត់យល់គ្នា កាលណាអត់យល់គ្នា បញ្ហាវាកើតមានឡើងអីចឹង»។
កាលពីថ្ងៃទី១០ ឧសភា ព្រះចៅវត្តទួលតាឯកនិងវត្តមួយចំនួនទៀតនៅក្រុងបាត់ដំបង បាននិមន្តព្រះសង្ឃចំនួន ៥អង្គ ដោយ ៣អង្គហៅទៅព្រមាននិង ២អង្គទៀតបង្ខំឱ្យព្រះអង្គធ្វើកិច្ចសន្យាឱ្យឈប់ចូលរួមការងារសង្គមបន្តទៀត។មន្ត្រីសង្ឃធ្វើបែបនេះ បន្ទាប់ពីព្រះសង្ឃទាំងនោះចូលរួមការងារសង្គមជាមួយក្រុមយុវជនថាវរៈចំនួន ៩នាក់ ធ្វើកូដកម្មបង្អត់អាហារ និងធម្មយាត្រានៅក្រុងបាត់ដំបង ដើម្បីទាមទារឱ្យរដ្ឋាភិបាលជួយអន្តរាគមន៍ដល់ស្ថាប័នមីក្រូហិរញ្ញវត្ថុ និងធនាគារឱ្យពន្យារពេលសងបំណុលរបស់ពលរដ្ឋទៅស្ថាប័នទាំងនោះ ដោយសារពួកគាត់អត់ការងារធ្វើបណ្ដាលមកពីវិបត្តិជំងឺកូវីដ១៩ ហើយគ្រឹះស្ថានទាំងនោះនៅតែបន្តទារប្រាក់ពីពលរដ្ឋ។ ក្រុមព្រះសង្ឃទាំងនោះ គ្រោងធ្វើការតវ៉ានៅបរិវេណពោធិ៍វាលជាប់មាត់ស្ទឹងសង្កែនៅកណ្ដាលក្រុងបាត់ដំបង ដើម្បីទាមទារឱ្យមន្ត្រីសង្ឃខេត្តនេះផ្ដល់សិទ្ធិសេរីភាពពេញលេញដល់ព្រះសង្ឃឡើងវិញក្នុងពេលដ៏ខ្លីខាងមុខនេះ៕
No comments:
Post a Comment