ដោយ សន ចាន់រដ្ឋា
2021-01-27
 |
(ពីឆ្វេង) កញ្ញា ភួន កែវរស្មី កញ្ញា ឡុង គន្ធា និងលោក ថុន រដ្ឋា យុវជនមាតាធម្មជាតិ ដែលអាជ្ញាធរឃាត់ខ្លួន កាលពីថ្ងៃទី៣ ខែកញ្ញា ឆ្នាំ២០២០។ រូប៖ ហ្វេសប៊ុក |
សាលាដំបូងរាជធានីភ្នំពេញគ្រោងលើកយកសំណុំរឿងសកម្មជនមាតាធម្មជាតិទៅជំនុំជម្រះ នៅចុងខែកុម្ភៈខាងមុខ។ មន្ត្រីសិទ្ធិមនុស្សជំរុញឱ្យតុលាការទម្លាក់ចោលបទចោទប្រកាន់នេះ ពីព្រោះសកម្មជនទាំងនោះមិនបានប្រព្រឹត្តបទល្មើសអ្វីឡើយ។
តុលាការក្រុងភ្នំពេញនឹងបើកសវនាការសំណុំរឿងយុវជនមាតាធម្មជាតិ ៣នាក់ រួមមាន លោក ថុន រដ្ឋា កញ្ញា ឡុង គន្ធា និងកញ្ញា ភួន កែវរស្មី នៅថ្ងៃទី២៤ កុម្ភៈ បន្ទាប់ពីឃុំខ្លួនពួកគេក្នុងពន្ធនាគារព្រៃសអស់រយៈពេលជាង ៥ខែ។ សំណុំរឿងនេះមានជនជាប់ចោទ ២នាក់ទៀត ដែលស្ថិតនៅក្រៅឃុំ គឺស្ថាបនិកចលនាមាតាធម្មជាតិ លោក អាឡិច ហាន់ដ្រូហ្គន់សាឡេស ដេវីដសុន (Alejandro Gonzalez Davidson) និងយុវជនខ្មែរថាវរៈ កញ្ញា ជា គន្ធីន ដែលធ្លាប់បង្ហាញមុខក្នុងវីដេអូរបស់ក្រុមមាតាធម្មជាតិ ទាក់ទងនឹងការលុបបឹងតាមោក។ តុលាការក្រុងភ្នំពេញបានចោទប្រកាន់ពួកគេទាំង ៥នាក់ ពីបទញុះញង់ឱ្យមានភាពវឹកវរធ្ងន់ធ្ងរដល់សន្តិសុខសង្គម ដែលប្រឈមនឹងការជាប់ពន្ធនាគាររហូតដល់ ២ឆ្នាំ។
ស្ថាបនិកចលនាមាតាធម្មជាតិដែលជាជនជាតិអេស្ប៉ាញ (Spanish) លោក អាឡិច ចាត់ទុកការចោទប្រកាន់លើរូបលោក និងសកម្មជនដទៃទៀតនេះថា ជាការគំរាមកំហែង និងបំបាក់ស្មារតីអ្នកការពារបរិស្ថាន ឱ្យបញ្ឈប់សកម្មភាពរបស់ខ្លួន។ លោកអះអាងថា យុទ្ធសាស្ត្របែបនេះរបស់របបលោក ហ៊ុន សែន នឹងមិនជោគជ័យនោះទេ ពីព្រោះលោក និងសកម្មជនដទៃទៀត នឹងមិនបោះបង់ចោលសកម្មភាពតស៊ូ ដើម្បីការពារធនធានធម្មជាតិ និងបរិស្ថាននោះឡើយ៖ «តាំងពីឆ្នាំ២០១៥ គេចាប់យើងបីដង។ ក្រោយពីចាប់រយៈពេលមួយខែ ឬពីរខែ គឺស្ងាត់មែន។ ផុតពីរខែ បីខែ ចាប់ផ្ដើមរស់ឡើងវិញ ហើយមនុស្សដែលចង់ចូលរួមជាមួយយើង គឺច្រើនជាងមុន។ អ៊ីចឹងឆ្លើយសំណួរដោយខ្លី គឺមិនអាចបំបាក់ស្មារតីរបស់មាតាធម្មជាតិបានទេ។ ផ្ទុយទៅវិញ ការចាប់យើងដោយអំពើចិត្ត ធ្វើឱ្យយើងមានស្មារតីកាន់តែខ្លាំង ហើយធ្វើឱ្យឥទ្ធិពលរបស់មាតាធម្មជាតិកាន់តែខ្លាំង»។
ចលនាមាតាធម្មជាតិនៅតែបន្តលាតត្រដាងអំពីអសមត្ថភាពរបស់មន្ត្រីរបបក្រុងភ្នំពេញ ទាំងនៅថ្នាក់ជាតិ និងថ្នាក់ក្រោមជាតិ ក្នុងការការពារបរិស្ថាន ទោះជាសកម្មជន ៣នាក់ ត្រូវបានអាជ្ញាធរចាប់ខ្លួនហើយក៏ដោយ។ ពួកគេបានបង្ហោះព័ត៌មានទាំងនោះនៅលើទំព័រហ្វេសប៊ុកចលនាមាតាធម្មជាតិ (Mother Nature Cambodia) ហើយវីដេអូទាំងនោះបានទាក់ទាញអ្នកចូលទស្សនារាប់សែនដង។ អាជ្ញាធរបានចាប់សកម្មជនមាតាធម្មជាតិទាំង ៣នាក់ គឺយុវជន ថុន រដ្ឋា ឡុង គន្ធា និង ភួន កែវរស្មី កាលពីដើមខែកញ្ញា ឆ្នាំ២០២០។ ការចាប់ខ្លួននេះ កើតមានឡើងបន្ទាប់ពីកញ្ញា ឡុង គន្ធា បានបង្ហោះសារលើហ្វេសប៊ុកអំពីគម្រោងដើរពីវត្តភ្នំទៅកាន់ភូមិគ្រឹះលោកនាយករដ្ឋមន្ត្រី ហ៊ុន សែន ដើម្បីស្នើសុំជួបផ្ទាល់ជាមួយលោក និយាយអំពីរឿងការលុបបឹងតាមោក ដែលស្ថិតនៅជាយរាជធានីភ្នំពេញ។
រឿងលុបបឹងនៅរាជធានីភ្នំពេញ ជាពិសេស បឹងតាមោកនេះ អាចមិនមែនជាប្រធានបទដែលសាធារណជនលើកមកនិយាយបានទូលំទូលាយដូចមុនទៀតទេ ព្រោះថ្មីៗ នេះ លោក ហ៊ុន សែន បានថ្លែងដោយខឹងច្រឡោតថា លោកធុញទ្រាន់នឹងមតិរិះគន់ជុំវិញការលុបបឹងនេះណាស់។ លោកប្រកាសថា លោកនឹងកាត់ផ្ទៃបឹងតាមោកបន្ថែមទៀត ដោយមិនខ្វល់នឹងការលើកឡើង និងសំណូមពររបស់សាធារណជនឡើយ៖ «មើលៗ និយាយគ្នាតិចមើល! ក្រែងត្រូវការអភិវឌ្ឍហេៈ? បើត្រូវការអភិវឌ្ឍ វាត្រូវការលុប។ កន្លែងនេះ មានលុបដែរ? លុបហើយ បើមិនលុបធ្វើម្តេចចាក់ដីធ្វើបាន? អ៊ីចឹង កើតទុក្ខយ៉ាងម៉េច ខ្ញុំចេះតែឆ្ងល់ថា អ្នកដទៃគេអាចធ្វើបាន។ ជំនាន់មុនធ្វើបាន ជំនាន់ខ្ញុំ ធ្វើមិនបាន?»។
អ្នកនាំពាក្យសមាគមអាដហុក (ADHOC) លោក ស៊ឹង សែនករុណា មានប្រសាសន៍ថា សកម្មភាពរបស់ក្រុមយុវជនមាតាធម្មជាតិ មិនមែនជាបទល្មើសនោះទេ។ លោកថា សកម្មភាពរបស់ពួកគេក្នុងការជួយការពារបរិស្ថាន គួរតែត្រូវបានលើកទឹកចិត្ត មិនមែនត្រូវបានចោទប្រកាន់តាមផ្លូវតុលាការបែបនេះឡើយ៖ «ក្រុមអង្គការសង្គមស៊ីវិល និងអង្គការអន្តរជាតិ ឬក៏អង្គការសហប្រជាជាតិ គេបានស្នើទទូចទៅដល់ខាងស្ថាប័នពាក់ព័ន្ធទាំងអស់ហ្នឹង ទម្លាក់ចោលបទចោទប្រកាន់ ហើយនិងដោះលែងពួកគាត់ឱ្យមានសេរីភាព ដើម្បីមានឱកាសបន្តកិច្ចការងាររបស់ខ្លួនក្នុងការជួយការពារបរិស្ថាន និងធនធានធម្មជាតិរបស់ប្រទេសកម្ពុជាបន្តទៀត»។
ក្រៅពីសវនាការលើអង្គសេចក្តីដែលនឹងត្រូវធ្វើឡើងនៅចុងខែកុម្ភៈនោះ តុលាការកំពូលក៏គ្រោងបើកសវនាការលើបណ្ដឹងសុំនៅក្រៅឃុំរបស់សកម្មជនមាតាធម្មជាតិនៅពេលឆាប់ៗ នេះដែរ។ សវនាការករណីសុំនៅក្រៅឃុំរបស់ពួកគេ នឹងប្រព្រឹត្តទៅនៅថ្ងៃទី២ ខែកុម្ភៈ សប្ដាហ៍ក្រោយនេះ។
យុវជនមាតាធម្មជាតិ ស្ថិតនៅក្នុងចំណោមមនុស្សជិត ៧០នាក់ ដែលត្រូវរបបលោក ហ៊ុន សែន ចាប់ខ្លួន និងបង្ក្រាបតាមរយៈប្រព័ន្ធតុលាការ គិតពីដើមឆ្នាំ២០២០ មក។ អ្នកខ្លះជាប់ចោទពីបទញុះញង់ ខ្លះជាប់ចោទពីបទរួមគំនិតក្បត់ និងខ្លះទៀតជាប់ទាំងពីរបទល្មើស។
ក្រុមប្រទេសប្រជាធិបតេយ្យ សង្គមស៊ីវិលជាតិ-អន្តរជាតិ និងក្រុមអ្នកជំនាញសិទ្ធិមនុស្សអង្គការសហប្រជាជាតិ នៅតែស្នើយ៉ាងទទូចឱ្យរបបលោក ហ៊ុន សែន ដោះលែងអ្នកទោសមនសិការទាំងនេះ ហើយងាកមកគោរពសិទ្ធិពលរដ្ឋវិញ។ សហគមន៍ជាតិ និងអន្តរជាតិទាំងនោះគូសបញ្ជាក់ថា មានតែធ្វើបែបនេះ ទើបកម្ពុជាអាចចៀសផុតពីទណ្ឌកម្មរបស់សហគមន៍អន្តរជាតិ៕
No comments:
Post a Comment