ដោយ ខែ សុណង
2021-01-22
 |
ភរិយាសកម្មជនគណបក្សសង្គ្រោះជាតិ នាំគ្នាកាន់បដាទាមទារដោះលែងស្វាមី នៅថ្ងៃសវនាការជំនុំជម្រះ ថ្ងៃទី២២ មករា ២០២១។ រូបផ្ដល់ឱ្យ |
សាលាដំបូងរាជធានីភ្នំពេញនៅថ្ងៃទី២២ ខែមករា បានបើកសវនាការជំនុំជម្រះមន្ត្រីគណបក្សសង្គ្រោះជាតិ ១២នាក់ ដែលកំពុងជាប់បទល្មើស៣ ធំៗ រួមមាន បទរួមគំនិតក្បត់ ញុះញង់ឱ្យមានភាពវឹកវរធ្ងន់ធ្ងរដល់សន្តិសុខសង្គម និងញុះញង់កុំឱ្យយោធិនស្ដាប់បង្គាប់។ មេធាវីការពារក្ដីឱ្យមន្ត្រីគណបក្សសង្គ្រោះជាតិថា ចៅក្រមបានប្រើសំណួរដែលមានភាពលម្អៀងដោយហាក់សន្និដ្ឋានថា កូនក្ដីលោកមានទោស។
សវនាការជំនុំជម្រះនេះមានជនជាប់ចោទទាំងអស់ ២១នាក់ រួមមាន លោក សម រង្ស៊ី ប្រធានស្តីទីគណបក្សសង្គ្រោះជាតិ និងភរិយាលោក លោក អេង ឆៃអ៊ាង អនុប្រធានគណបក្សសង្គ្រោះជាតិ និងមន្ត្រីគណបក្សនេះផ្សេងទៀត។ ប៉ុន្តែ ពេលសួរដេញដោលមានជនជាប់ចោទ ១២នាក់មានវត្តមាននៅតុលាការពួកគេជាប្រធានប្រតិបត្តិស្រុក ខណ្ឌ និងចៅសង្កាត់ជាប់ឆ្នោតគណបក្សសង្គ្រោះជាតិ ដែលកំពុងជាប់ឃុំនៅពន្ធនាគារ។
ក្រុមមេធាវីការពារក្ដីឱ្យមន្ត្រីគណបក្សសង្គ្រោះជាតិ លោក សំ សុគង់ ឱ្យដឹងថា សវនាការថ្ងៃនេះចែកចេញជាពីរវគ្គគឺពេលព្រឹក និងពេលថ្ងៃ។ លោកឱ្យដឹងថា ពេលព្រឹកតុលាការសួរដេញដោលកូនក្ដីលោក ៣នាក់ គឺលោក យឹម សារ៉េត លោក ឃុត ច្រិក និងលោក សុខ ចាន់ថា រីឯពេលរសៀល ៣នាក់ទៀតគឺ លោក ថៃ សុគន្ធា លោក ញ៉ែម វាន និងលោក ឃឹម ភាណា។ លោកឱ្យដឹងទៀតថា អ្នកទាំង ៦នាក់នេះ ត្រូវតុលាការចោទប្រកាន់ចំនួន ៣បទល្មើសដូចគ្នាគឺ បទរួមគំនិតក្បត់ ញុះញង់ឱ្យមានភាពវឹកវរធ្ងន់ធ្ងរដល់សន្តិសុខសង្គម និងញុះញង់កុំឱ្យយោធិនស្ដាប់បង្គាប់។ លោកមេធាវីឱ្យដឹងទៀតថា សំណួររបស់ព្រះរាជអាជ្ញា និងចៅក្រមពាក់ព័ន្ធការចូលរួមចលនាគណបក្សសង្គ្រោះជាតិនៅក្រៅស្រុក ពាក់ព័ន្ធជំងឺកូវីដ និងការកៀរគរកម្លាំងទៅទទួលលោក សម រង្ស៊ី កាលពីខែវិច្ឆិកា ឆ្នាំ២០១៩ ជាដើម៖ «សួរទៅហាក់ដូចសន្មតទុកជាមុនថា មានទោសដូចមានភាពលំអៀងអ៊ីចឹងគេ (ចៅក្រម) សួរផ្ដោតគោលបំណងប្រមូលមនុស្សទៅចូលរួមទទួលឯកឧត្ដម សម រង្ស៊ី នៅថ្ងៃទី៩ ខែវិច្ឆិកា ក៏ដូចការបញ្ជាផ្សេងៗ ទៀត ប៉ុន្តែពួកគាត់ (កូនក្ដី) គាត់បានបដិសេធមិនបានទទួលបញ្ជាពីអ្នកណាទេ គឺអ្វីដែលគាត់ធ្វើគឺដោយឆន្ទៈនិងគំនិតគាត់ផ្ទាល់ទេ»។
លោកមេធាវីដដែលឱ្យដឹងថា កូនក្ដីរបស់លោកភាគច្រើននៅតែបដិសេធថា ពួកគេមិនបានប្រព្រឹត្តិល្មើសដូចការចោទប្រកាន់ទេ។ លោកបន្តថា ក៏មានកូនក្ដីផ្សេងទៀត បដិសេធមិនឆ្លើយសំណួរតុលាការព្រោះពួកគេមានបញ្ហាសុខភាព និងមានការភ្លេចភ្លាំងច្រើន ព្រោះសារធាតុវិទ្យុសកម្មនៅក្នុងពន្ធនាគារ៖ «គេដាក់ប្រព័ន្ធទូរស័ព្ទណាធ្វើឱ្យគាត់ (សកម្មជន និងមន្ត្រីបក្សប្រឆាំងជាប់ពន្ធនាគារ) ជួបបញ្ហាភ្លេចភ្លាំងច្រើន ហើយអ្នកផ្សេងៗ គាត់បានឆ្លើយថា គាត់មិនមានទំនាក់ទំនងអីចលនាសង្គ្រោះជាតិទេ។ ពួកគាត់គ្រាន់តែអតីតសកម្មជន អ្នកគាំទ្រ គណបក្សសង្គ្រោះជាតិមិនមានផែនផ្ដួលរំលំរដ្ឋាភិបាលទេ»។
ពាក់ព័ន្ធនឹងការបន្តដំណើរការកាត់ក្តីមន្ត្រី និងសកម្មជនគណបក្សសង្គ្រោះជាតិជាច្រើននាក់ក្នុងពេលតែមួយនេះ នាយករងប្រចាំតំបន់អាស៊ីនៃអង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) លោក ហ្វ៊ីល រ៉ូប៊ើតសុន (Phil Robertson) អំពាវនាវដល់រដ្ឋាភិបាលបរទេស ទីភ្នាក់ងារអង្គការសហប្រជាជាតិ និងក្រុមប្រទេសម្ចាស់ជំនួយ ទាមទារឱ្យលោក ហ៊ុន សែន បញ្ឈប់ការបង្ក្រាបឥតឈប់ឈរមកលើក្រុមអ្នករិះគន់ និងទម្លាក់ចោលរាល់បទចោទទាំងអស់ប្រឆាំងនឹងជនជាប់ចោទទាំងនេះ។ លោកថា មន្ត្រី និងសកម្មជនគណបក្សសង្គ្រោះជាតិទាំងនេះ ត្រូវបានយាយីដោយប្រព័ន្ធយុត្តិធម៌ ដោយសារតែការជាប់ពាក់ព័ន្ធរបស់ពួកគេទៅនឹងវិស័យនយោបាយ និងការបន្តទាមទារនូវសិទ្ធិរបស់ពួកគេក្នុងការជួបប្រជុំ និងសម្ដែងមតិជាសាធារណៈដោយសន្តិវិធី។
មន្ត្រីអង្គការឃ្លាំមើលសិទ្ធិមនុស្សអន្តរជាតិរូបនេះ មានប្រសាសន៍ថា គោលដៅនៃការកាត់ក្តីមនុស្សដ៏សម្បើមបែបនេះ គឺដើម្បីកម្ទេចចោលទាំងស្រុងនូវអ្វីដែលនៅសេសសល់ចុងក្រោយនៃគណបក្សសង្គ្រោះជាតិនៅក្នុងប្រទេស និងដើម្បីបំបិទមាត់អ្នករិះគន់ទាំងអស់ ដែលនៅក្លាហានហ៊ានបញ្ចេញបញ្ចេញមតិ ប្រឆាំងនឹងការដឹកនាំបែបឯកបក្ស និងផ្ដាច់ការរបស់គណបក្សប្រជាជនកម្ពុជា។
លោកថា លោកនាយករដ្ឋមន្ត្រី ហ៊ុន សែន ដឹងច្បាស់ណាស់ថា ការបោះឆ្នោតឆ្នាំ២០២២ និងឆ្នាំ២០២៣ ខាងមុខនេះ នឹងចូលមកដល់នាពេលឆាប់ៗនេះ។ ហេតុដូច្នេះហើយ លោក ហ៊ុន សែន មានបំណងចង់ធានាថា គ្មាននរណាម្នាក់អាចចេញមុខប្រឈមទៅនឹងការកាន់អំណាចរយៈពេល ៣៥ឆ្នាំ របស់លោកបានឡើយ។ លោក ហ្វីល រ៉ូប៊ើតសុន គូសបញ្ជាក់ថា ដំណើរការកាត់ក្តីទាំងនេះ គ្មានភាពជឿទុកចិត្តបានទាល់តែសោះ ដោយសារតែផ្អែកលើបទចោទបែបប្រឌិត បង្កើតឡើងក្នុងគោលដៅនយោបាយ ដើម្បីកម្ចាត់ដៃគូប្រកួតប្រជែងតែប៉ុណ្ណោះ។
អាជ្ញាធរកម្ពុជាបានចាប់ខ្លួនសកម្មជននិងមន្ត្រីគណបក្សសង្គ្រោះជាតិបន្តបន្ទាប់ដាក់ពន្ធនាគារកាលពីអំឡុងឆ្នាំ២០១៩ ជាពេលលោក សម រង្ស៊ី ប្រកាសវិលចូលស្រុកវិញ។ កាលនោះប្រធានស្ដីទីគណបក្សសង្គ្រោះជាតិ លោក សម រង្ស៊ី បានអំពាវនាវឱ្យកងទាហាន និងប៉ូលិសបង្វែរចុងកាណុងភ្ជង់ ឬបាញ់ លោក ហ៊ុន សែន វិញ បើសិនជាលោក ហ៊ុន សែន បញ្ជាឱ្យពួកគេបាញ់បង្ក្រាបពលរដ្ឋស្លូតត្រង់នៅថ្ងៃទី៩ វិច្ឆិកា។
នៅរយៈពេលចុងក្រោយនេះ អ្នករាយការណ៍ពិសេសអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា អ្នកស្រី រ៉ូណា ស្មីត (Rhona Smith) បានសរសេរលើហ្វេសប៊ុកថា អ្នកស្រីនៅតែមានកង្វល់អំពីការជំនុំជម្រះក្តីដែលមានលក្ខណៈទ្រង់ទ្រាយធំជាបន្តបន្ទាប់បែបនេះ។
លោកមេធាវី សំ សុគង់ ឱ្យដឹងថា សាលាដំបូងរាជធានីភ្នំពេញ នឹងបន្តជំនុំជម្រះលើសំណុំរឿងនេះបន្តទៀតនៅថ្ងៃទី៤ ខែកុម្ភៈខាងមុខ៕
No comments:
Post a Comment