ដោយ មួង ណារ៉េត
2021-02-05
 |
លោក ហ៊ុន សែន (ស្ដាំ) លោក ស៊ី ជីនពីង (កណ្ដាល) និងលោក ហ៊ុន ម៉ាណែត។ រូបពីហ្វេសប៊ុក |
លោកនាយករដ្ឋមន្ត្រី ហ៊ុន សែន ថា ការណ៍ដែលកម្ពុជា ប្រញាប់យកវ៉ាក់សាំងចិន ដើម្បីចាក់ជូនពលរដ្ឋខ្មែរ ទោះអង្គការសុខភាពពិភពលោកមិនទាន់ទទួលស្គាល់វ៉ាក់សាំងនេះ គឺដោយសាររឿងនយោបាយ។ ប៉ុន្តែអ្នកជំនាញ ថាកម្ពុជាមិនគួរណាប្រញាប់ប្រញាល់ និងប្រថុយប្រថានយកវ៉ាក់សាំង ដែលគ្មានការទទួលស្គាល់ជាអន្តរជាតិ បែបនេះនោះឡើយ ព្រោះវាអាចនាំឱ្យគ្រោះថ្នាក់ដល់សុខភាពរបស់ពលរដ្ឋ។
លោក ហ៊ុន សែន កាលពីថ្ងៃទី៤ ខែកុម្ភៈ ថ្លែងតាមសារសំឡេងពីគេហដ្ឋានរបស់លោកថា រឿងប្រញាប់ប្រញាល់ទទួលយកវ៉ាក់សាំង ដោយមិនរង់ចាំការទទួលស្គាល់ ពីអង្គការសុខភាពពិភពលោក គឺដោយសារលោកចាត់ទុកវ៉ាក់សាំងចិននេះ ថាមានតម្លៃជាយុទ្ធសាស្ត្រ និងពាក់ព័ន្ធរឿងនយោបាយ៖ «មិនត្រូវរង់ចាំទេ គឺខ្ញុំបានបញ្ជាក់ហើយថា នេះវាជាទំនិញយុទ្ធសាស្ត្រ ហើយវាបានក្លាយជាបញ្ហានយោបាយក្នុងស្រុកផង នយោបាយក្រៅប្រទេសផង។ ដូច្នេះយើងត្រូវប្ដូរផ្ដាច់ធ្វើការងារនេះឱ្យបាន ដោយដណ្ដើមពេលវេលា។ បើសិនជាបណ្ដោយតទៅទៀត អាល័យតែចូលឆ្នាំចិនអីចេះអីចុះ គឺមានការលំបាក»។
លោក ហ៊ុន សែន បានបង្ហាញជំហរងាកខ្លាំងទៅរកប្រទេសចិន រហូតដល់ធ្វើសកម្មភាពផ្នែកការទូតជាច្រើន ដើម្បីបង្ហាញនិន្នាការនេះ ដូចជាលោកត្រូវប្រថុយធ្វើដំណើរទៅប្រទេសចិន ដោយដឹកដៃកូនប្រុសច្បងរបស់លោកគឺលោក ហ៊ុន ម៉ាណែត ទៅឱ្យជួបប្រធានាធិបតីចិន ទាំងជំងឺកូវីដ-១៩ កំពុងផ្ទុះរាលដាលពេញបន្ទុកនៅទីនោះ។ ក្រោយមកទៀត លោកបង្ហាញការផ្តល់កម្លាំងចិត្តដល់រដ្ឋាភិបាលចិន ដោយអំពាវនាវឱ្យនិស្សិតខ្មែរដែលជាប់ផុងនៅទីក្រុងវូហាន និងដែលគ្នាសុំឱ្យជួយអន្តរាគមន៍បានមកខ្មែរវិញនោះ ឱ្យនៅបន្តខាំស្មៅ នៅរួមសុខរួមទុក្ខជាមួយជនជាតិចិន ដែលកំពុងភ័យខ្លាចនឹងជំងឺកូវីដ-១៩ នេះដែរ។
ចំណែកភាគីចិនឯណោះវិញ រដ្ឋាភិបាលនៃប្រទេសនេះ បានធ្វើនយោបាយការទូត ដោយយកវ៉ាក់សាំងជាត្រីមុខ ដើម្បីស្អំចិត្តពិភពលោក ឱ្យមើលឃើញចិនថាជាតួអង្គអ្នកសង្គ្រោះ មិនមែនជាប្រភពនៃជំងឺកូវីដ-១៩ ដ៏កាចសាហាវនេះនោះទេ។
ជាផ្នែកមួយនៃនយោបាយការទូត ដោយយកវ៉ាក់សាំងជាត្រីមុខនេះ ប្រទេសចិនបានផ្តល់អាទិភាពឱ្យប្រទេសនៅអាស៊ានចំនួន ៥ មានទាំងប្រទេសកម្ពុជាមួយផង ដែលត្រូវទទួលបានវ៉ាក់សាំងចិន។ ប៉ុន្តែ អង្គការសុខភាពពិភពលោក មិនបានទទួលស្គាល់វ៉ាក់សាំងចិននេះនោះទេ ដោយត្រូវរង់ចាំដល់ដើមខែមីនា ទើបសម្រេចអំពីលទ្ធផលនៃការត្រួតពិនិត្យគុណភាព និងប្រសិទ្ធភាពនៃវ៉ាក់សាំងនេះ។
តាមពិតលោក ហ៊ុន សែន ស្ទាក់ស្ទើរក្នុងចិត្តរឿងចាក់វ៉ាក់សាំងចិនដែរ។ ម្ដងលោកថាលោកនឹងចាក់វាមុនគេ។ ម្ដងលោកថា ចាំទុកឱ្យបុគ្គលិកពេទ្យចាក់មុនសិន។ ម្សិលមិញ លោកថាលោកចាក់មុនក៏បាន។ ជំហរស្ទាក់ស្ទើរ និងប្រែប្រួលមិនទៀងរបស់មេដឹកនាំនៃរបបក្រុងភ្នំពេញនេះ ធ្វើឡើងក្រោយវ៉ាក់សាំងចិនចំនួន ៦ សែនដូស នៃក្រុមហ៊ុន ស៊ីណូហ្វាម (Sinopharm) នឹងមកដល់កម្ពុជា នៅថ្ងៃអាទិត្យ ទី៧ ខែកុម្ភៈ ចុងសប្ដាហ៍នេះ។
លោក ហ៊ុន សែន បានកំណត់យកថ្ងៃទី១០ កុម្ភៈ ជាថ្ងៃដែលលោក និងមន្ត្រីជាន់ខ្ពស់មួយចំនួនទៀត នឹងទទួលចាក់វ៉ាក់សាំងនេះមុនគេ «ខ្ញុំមិនអាចត្រូវរង់ចាំថា ឱ្យគ្រូពេទ្យយើងទទួលវ៉ាក់សាំងសិន ចាំទទួលក្រោយទេ។ មុន ឬក្រោយគង់តែដូចគ្នាទេ អ៊ីចឹងទេ គឺខ្ញុំនឹងទទួលវ៉ាក់សាំងនៅថ្ងៃទី១០ គឺធ្វើនៅមន្ទីរពេទ្យកាល់ម៉ែត»។
ក្រៅពីមន្ត្រីជាន់ខ្ពស់រដ្ឋាភិបាល ដែលត្រូវបានវ៉ាក់សាំងមុនគេ រដ្ឋមន្ត្រីក្រសួងការពារជាតិលោក ទៀ បាញ់ ត្រូវបានកាសែតភ្នំពេញប៉ុស្តិ៍ (The Phnom Penh Post) ដកស្រង់ប្រសាសន៍ កាលពីថ្ងៃទី៣ ខែ កុម្ភៈ ថាវ៉ាក់សាំងនេះ ចំនួនពាក់កណ្ដាល គឺ ៣ សែនដូស នឹងត្រូវចាក់ជូនកងទ័ព និងក្រុមគ្រួសារកងទ័ព ពាក់កណ្ដាលទៀតត្រូវប្រគល់ជូនក្រសួងសុខាភិបាល។
ប៉ុន្តែពេលឆ្លើយតបនឹងសំណួររបស់អាស៊ីសេរី កាលពីថ្ងៃទី៤ ខែកុម្ភៈ លោក ទៀ បាញ់ ថាលោកមិនបាននិយាយដូច្នេះ ប្រាប់អ្នកសារព័ត៌មានក្នុងស្រុកនោះឡើយ៖ «ការសម្រេចចាក់ ការសម្រេចប្រើប្រាស់ ឬការសម្រេចនាំមកធ្វើអ្វីគ្រប់បែបយ៉ាងទាំងអស់ហ្នឹង គឺវាសិទ្ធិអំណាច វាត្រូវតែអ្នកដែលដឹកនាំកំពូល ទើបគេមានសិទ្ធិបកស្រាយ និងបញ្ជាក់។ ដូច្នេះខ្ញុំហាក់ដូចជាពុំមានលទ្ធភាពទេ សូមបញ្ជាក់ឱ្យបានជាក់លាក់របៀបណាហ្នឹង គឺវាមិនជាការសមរម្យទេ ហើយអាភ្នំពេញប៉ុស្តិ៍ថា យ៉ាងម៉េចយ៉ាងណាហ្នឹង គឺគ្មានទេ។ អាហ្នឹងមិនដឹងយកមកពីណាទេ។ ខ្ញុំអត់មានទេណា»។
ជុំវិញភាពប្រញាប់ប្រញាល់ទទួលយកវ៉ាក់សាំងចិន ដែលគ្មានការទទួលស្គាល់ដោយអង្គការសុខភាពពិភពលោកនេះ អ្នកជំនាញផ្នែកឱសថសាស្ត្រភ្ញាក់ផ្អើល និងព្រួយបារម្ភជំនួសប្រជាពលរដ្ឋខ្មែរ។ ឱសថការីខ្មែរអូស្ត្រាលីលោក លឹម សួរ ថាគ្មានមូលហេតុអ្វី ដែលកម្ពុជារង់ចាំមិនបាននោះទេ ព្រោះស្ថានភាពឆ្លងជំងឺនៅកម្ពុជា មិនទាន់ធ្ងន់ធ្ងរដូចនៅប្រទេសជាច្រើនក្នុងតំបន់ និងនៅលើពិភពលោក។ ម្យ៉ាងវិញទៀត លោកថា វ៉ាក់សាំងចិននេះ ក៏គ្មានការទទួលស្គាល់ជាអន្តរជាតិ ហើយប្រសិទ្ធភាព និងផលវិបាករបស់វា ក៏មិនទាន់ដឹងនៅឡើយដែរ ព្រោះវ៉ាក់សាំងចិនខ្លះ ត្រូវបានផលិតឡើងយ៉ាងលឿន និងឱ្យប្រើប្រាស់ក្នុងប្រទេសចិនភ្លាមៗ តាំងពីផ្ទុះជំងឺនេះបានជិតកន្លះឆ្នាំមកម្ល៉េះ៖ «វ៉ាក់សាំងចិននេះ គឺថាការប្រញាប់ប្រញាល់យ៉ាងលឿន ដើម្បីបង្កើតវ៉ាក់សាំងហ្នឹង ដើម្បីចាក់ការពារប្រជាជនចិន។ ធ្វើហ្នឹងគឺលឿនប្រញាប់ប្រញាល់ពេក។ ជាករណីមួយ ដែលយើងមិនដឹងថាគុណវិបត្តិទៅអនាគតមិនដឹងយ៉ាងម៉េច ព្រោះវារហ័សពេក»។
មន្ត្រីគណបក្សសង្គ្រោះជាតិឯណោះ ថាបើជ្រុលជាពេញចិត្តនឹងវ៉ាក់សាំងចិន ដែលគ្មានការទទួលស្គាល់គុណភាពពីអង្គការសុខភាពពិភពលោក និងកំពុងតែស្ថិតក្នុងភាពប្រថុយប្រថានបែបនេះ លោកថារបបក្រុងភ្នំពេញ គួរចាក់ឱ្យតែមន្ត្រីរបបនេះជាមុនសិន ដើម្បីធានាថា វ៉ាក់សាំងនេះពុំមានប្រតិកម្ម ឬផលប៉ះពាល់ណាមួយ មុនចាក់ជូនកងទ័ព ក្រុមគ្រូពេទ្យ និងពលរដ្ឋ៖ «គាត់មិនបានគិតពីសុខភាពរបស់ប្រជាពលរដ្ឋខ្មែរជាធំ ព្រោះអាវ៉ាក់សាំងរបស់ចិនហ្នឹងវាមានហានិភ័យខ្ពស់ណាស់ សម្រាប់សុខភាពរបស់ប្រជាពលរដ្ឋខ្មែរយើង។ បានន័យថា លោក ហ៊ុន សែន កំពុងយកអាយុជីវិតប្រជាពលរដ្ឋខ្មែរទៅពិសោធន៍វ៉ាក់សាំងចិន ជំនួសសត្វកណ្ដុរ»។
ដូចគ្នានេះដែរ យុវជនខ្មែរ ក៏ព្រួយបារម្ភអំពីគ្រោះថ្នាក់ ដែលអាចកើតមានជាយថាហេតុ ព្រោះតែភាពគ្មានការទទួលស្គាល់ ពីអង្គការសុខភាពពិភពលោក។ អគ្គលេខាធិការសហព័ន្ធនិស្សិតបញ្ញវន្តកម្ពុជា លោក គៀន ពន្លក ព្រួយបារម្ភថា កម្ពុជាអាចនឹងមានគ្រោះមហន្តរាយកើតឡើង ក្រោយប្រើប្រាស់វ៉ាក់សាំង ដែលពុំមានការទទួលស្គាល់ត្រឹមត្រូវនេះ។ លោកបន្តថា ការប្រកាសចាក់វ៉ាក់សាំងនេះមុនគេ របស់លោក ហ៊ុន សែន និងមន្ត្រីជាន់ខ្ពស់ មួយចំនួនទៀត គឺគ្រាន់តែជាការផ្គាប់ចិត្តមិត្តចិន ដែលបានផ្តល់ជំនួយវ៉ាក់សាំងនេះ តែលោក មិនបានគិតគូរដល់សុវត្ថិភាពសុខភាពពលរដ្ឋឡើយ។ លោកស្នើឱ្យរដ្ឋាភិបាលគួរពិចារណាឡើងវិញ និងមិនគួរប្រញាប់ប្រញាល់ក្នុងការចាក់វ៉ាក់សាំងនេះ ជូនពលរដ្ឋឡើយ៖ «ប្រសិនបើវ៉ាក់សាំងនេះ ចាក់ទៅមានប្រសិទ្ធភាព អាហ្នឹងមិនអីទេ ក៏ប៉ុន្តែប្រសិនបើវ៉ាក់សាំងនេះចាក់ទៅមានបញ្ហា តើរដ្ឋាភិបាលហ៊ានទទួលខុសត្រូវដែរឬទេ? នេះគឺជាបញ្ហា»។
គិតត្រឹមល្ងាចថ្ងៃទី០៤ កុម្ភៈ កម្ពុជាមានអ្នកជំងឺកូវីដ-១៩ សរុបទូទាំងប្រទេសកើនដល់ចំនួន ៤៦៧នាក់ ក្នុងនោះអ្នកជាសះស្បើយ ៤៥១នាក់ និងអ្នកកំពុងសម្រាកព្យាបាលនៅក្នុងមន្ទីរពេទ្យមានចំនួន ១៦នាក់៕
1 comment:
It is highly likely that Yuon and its slave Ah Kwack Hun Sen will release Kem Sokha and let him resume his job as President of the CNRP and let the CNRP participate in the next election without Sam Rainsy. And the result the CNRP will get shit from that election.
To counter the problem, in the present, the CNRP's leaders need to act swiftly to remove Kem Sokha as President of the CNRP to prevent Yuon and Ah Kwack from materializing their plan.
Ah sex maniac Kem Sokha has betrayed Khmer people and Cambodia. The CNRP's leaders need to launch a preemptive strike to remove Kem Sokha to strengthen the CNRP. The fight for the CNRP's reinstatement must go on.
Just remember that we cannot win our struggle without losing any people. Through our ultimate sacrifice that Cambodia will survive the onslaught deployed by the evil Vietnam. Ah Kwack Hun Sen is just a tool (no life) for the evil Yuon to use to accomplish its goal of swallowing Cambodia.
Bun Thoeun
Post a Comment