Khmer Circle:
Once CNRP activists will have been rounded up, will the regime then target all those who had voted for the opposition party as well? Not inconceivable given the regime's KR-Viet Cong mindset!
🔺🔺🔺
ដោយ ហេង រស្មី
2021-03-15
អាជ្ញាធរក្រុងភ្នំពេញ ចាប់ខ្លួនស្ត្រីម្នាក់ដែលជាសកម្មជនគណបក្សសង្គ្រោះជាតិខេត្តកំពង់ចាម កាលពីថ្ងៃទី១៤ មីនា ដោយមិនបង្ហាញដីកាពីតុលាការ។ មន្ត្រីសង្គមស៊ីវិល ចាត់ទុកការចាប់ខ្លួនដោយមិនបង្ហាញដីកា និងមិនបង្ហាញនូវព័ត៌មានជាក់លាក់ណាមួយអំពីមូលហេតុនៃការចាប់ខ្លួន គឺជាការបំពានច្បាប់ និងរំលោភសិទ្ធិរបស់ប្រជាពលរដ្ឋ។
សកម្មជនគណបក្សសង្គ្រោះជាតិ ដែលអាជ្ញាធររាជធានីភ្នំពេញ ចាប់ខ្លួន គឺអ្នកស្រី ថន គឹមសាន ជាសមាជិកក្រុមប្រឹក្សាឃុំជាប់ឆ្នោត ឃុំកោះទន្ទឹម ស្រុកកំពង់សៀម ខេត្តកំពង់ចាម។
កូនស្រី អ្នកស្រី ថន គឹមសាន គឺកញ្ញា ហន សុមេធា ប្រាប់អាស៊ីសេរីថា កាលពីថ្ងៃទី១៤ មីនា ប៉ូលិសស្លៀកពាក់ស៊ីវិលមួយក្រុម បានចាប់ម្ដាយរបស់កញ្ញា ដោយពុំមានដីកា និងមិនបានប្រាប់អំពីមូលហេតុច្បាស់លាស់ដល់សាច់ញាតិនោះទេ ខណៈម្ដាយរបស់កញ្ញា កំពុងធ្វើការនៅភោជនីយដ្ឋានមួយ ក្នុងរាជធានីភ្នំពេញ ហើយបញ្ជូនទៅសួរនាំអធិការខណ្ឌទួលគោក កញ្ញា បានព្យាយាមទាក់ទងទៅអាជ្ញាធរ ប៉ុន្តែមិនទទួលបានដំណឹងអំពីម្ដាយអ្វីឡើយ កាលពីថ្ងៃទី១៤ រហូតដល់ព្រឹកថ្ងៃទី១៥ មីនា។
កញ្ញាបន្តថា ទើបតែនៅពេលរសៀលថ្ងៃទី១៥ មីនា មានអាជ្ញាធរទំនាក់ទំនងតាមទូរស័ព្ទប្រាប់ថា អាជ្ញាធរកំពុងសាកសួរម្ដាយ តែមិនប្រាប់ទីកន្លែងសាកសួរនោះទេ ហើយក៏បានអនុញ្ញាតឱ្យកញ្ញានិយាយទូរស័ព្ទជាមួយម្ដាយមួយភ្លែត ហើយម្ដាយបានប្រាប់ថា កំពុងនៅតុលាការ។ កញ្ញា ចាត់ទុកថា ការចាប់ខ្លួននេះ គឺដោយសារមូលហេតុនយោបាយ និងជារឿងអយុត្តិធម៌បំផុត។ កូនស្រីសកម្មជនបក្សប្រឆាំងរូបនេះ កំពុងបារម្ភអំពីសុខទុក្ខ និងចង់ជួបយកថ្នាំទៅឱ្យម្ដាយ កំពុងមានជំងឺ លើសសម្ពោធឈាម លើសជាតិខ្លាញ់ ត្រូវហូបថ្នាំរាល់ថ្ងៃ៖ «រយៈពេលមួយយប់ហើយអត់ទាន់ឃើញគាត់មក ក្នុងនាមជាកូនបារម្ភពីម្ដាយ ចាប់ម្ដាយទាំងមិនដឹងមូលហេតុ អយុត្តិធម៌សម្រាប់ខ្ញុំដែលគេចាប់ម្ដាយទៅនៅពីមុខ យើងសួរនាំគេ អត់មាននិយាយអ្វី គ្រាន់តែថា យកទៅខណ្ឌទទួលគោក ខ្ញុំចង់ឱ្យពូសមត្ថកិច្ចទាក់ទងមកក្រុមគ្រួសារដើម្បីផ្តល់ដំណឹងខាងក្រុមគ្រួសារកុំឱ្យបារម្ភពីគាត់»។
ជុំវិញរឿងនេះ អ្នកនាំពាក្យស្នងការនគរបាលរាជធានីភ្នំពេញ លោក សាន សុខសីហា បញ្ជាក់ប្រាប់ថា សមត្ថកិច្ចចោទប្រកាន់ពីបទបង្កផលប៉ះពាល់ធ្ងន់ធ្ងរដល់សន្តិសុខសង្គម ក្រោយពីអ្នកស្រី ថន គឹមសាន បានបង្ហោះសារតាមហ្វេសប៊ុក កាលពីថ្ងៃទី១២ មីនាថា វ៉ាក់សាំងចិនគ្មានគុណភាព ចាក់ទៅនាំឱ្យគ្រោះថ្នាក់ដល់ពលរដ្ឋ។ លោកថា សមត្ថកិច្ចបានបញ្ជូនទៅតុលាការហើយ តែមិនទាន់ដឹងថាតុលាការសម្រេចឃុំនៅឡើយទេ៖ «គាត់មានទាំងផ្ញើសារជាសំឡេង ទាក់ទងនឹងការចោទប្រកាន់ថា វ៉ាក់សាំងរបស់ចិនបានធ្វើឱ្យ ចាក់ទៅធ្វើឱ្យប្រជាពលរដ្ឋស្លាប់ អ៊ីចឹងអ្វីដែលគាត់និយាយហ្នឹងខុសពីការពិត លក្ខណៈញុះញង់សុទ្ធ ញុះញង់បង្កភាពវឹកវរ បង្កឱ្យមានការយល់ច្រឡំ ជាក់ស្ដែងអត់មានបញ្ហាអ្វីទាំងអស់រហូតមកដល់ថ្ងៃហ្នឹងរដ្ឋាភិបាល បានធ្វើសន្និស័ទកាសែតអ៊ីចឹង»។
អាស៊ីសេរីបានព្យាយាមទាក់ទង អ្នកនាំពាក្យតុលាការក្រុងភ្នំពេញ លោក គុជ គឹមឡុង តែលោកមិនលើកទូរស័ព្ទ។
កន្លងមកអាជ្ញាធររបបលោក ហ៊ុន សែន បានបើកយុទ្ធនាការចាប់ខ្លួន សកម្មជននយោបាយ សកម្មជនសង្គម និងយុវជន ធ្វើឡើងដោយលាក់បាំងព័ត៌មាន មិនបង្ហាញដីកា និងជូនដំណឹងទៅក្រុមគ្រួសារពួកគេ ឱ្យបានដឹងនោះឡើយ ដែលធ្វើឲ្យសាច់ញាតិមានក្ដីបារម្ភជាខ្លាំង។
អ្នកនាំពាក្យសមាគមការពារសិទ្ធិមនុស្សអាដហុក (ADHOC) លោក ស៊ឹង សែនករុណ មានប្រសាសន៍ថា តាមច្បាប់ការចាប់ខ្លួនលើបុគ្គលណាមួយមិនមែនជាបទល្មើសជាក់ស្តែង គឺសមត្ថកិច្ចត្រូវបង្ហាញដីកាឲ្យបានត្រឹមត្រូវ មុននាំខ្លួនបញ្ជូនទីកន្លែងសមត្ថកិច្ច ដើម្បីសាកសួរ និងកសាងសំណុំរឿងបញ្ជូនទៅតុលាការ។ លោកកត់សម្គាល់ថា អាជ្ញាធរចាប់សកម្មជនគណបក្សប្រឆាំង គឺមានការលាក់បាំងព័ត៌មានចំពោះក្រុមគ្រួសារ អ្នកសារព័ត៌មាន និងក្រុមអង្គការសង្គមស៊ីវិល។ លោកបន្តទៀតថា ការចាប់ខ្លួនដែលមិនបានបង្ហាញដីកាគឺជាការរំលោភសិទ្ធិរបស់ប្រជាពលរដ្ឋ៖ «គាត់ត្រូវបានចាប់ខ្លួនអំពីអ្វី ហើយនីតិវិធីគេត្រូវបន្តរបៀបមិច ហើយក្នុងករណីនេះ យើងគិតថាគួរមានការគិតគូរអំពីការចាប់ខ្លួន និងបង្ហាញនូវព័ត៌មានខ្លះ ដែលមិនប៉ះពាល់ទៅដល់នីតិវិធី ក្នុងការអនុវត្តន៍ច្បាប់គួរមានការផ្តល់ដើម្បីកុំឱ្យមានការលាក់បាំងបែបហ្នឹង»។
ចាប់តាំងពីឆ្នាំ២០២០ មកដល់ថ្ងៃទី១៥ មីនា មានសកម្មជននយោបាយ សកម្មជនបរិស្ថាន សកម្មជនសង្គម ព្រះសង្ឃខ្មែរថាវរៈ និងយុវជនជិត ៨០នាក់ហើយ ត្រូវបានអាជ្ញាធររបបក្រុងភ្នំពេញចាប់ខ្លួនដាក់ពន្ធនាគារជាបន្តបន្ទាប់ ដោយសារការអនុវត្តសិទ្ធិសេរីភាពនៅក្នុងសង្គម និងតាមបណ្ដាញអ៊ីនធឹណិត។ តុលាការបានចោទប្រកាន់ពួកគេពីបទ រួមគំនិតក្បត់ ញុះញង់ និងប្រមាថថ្នាក់ដឹកនាំជាដើម ។
អ្នកតាមដានស្ថានការណ៍យល់ថា ការចាប់ខ្លួនពលរដ្ឋជាបន្តបន្ទាប់នេះ ជាការធ្វើទុក្ខបុកម្នេញផ្នែកនយោបាយ ដើម្បីកម្ទេចសំឡេងប្រឆាំង ដែលនៅសល់ចុងក្រោយរបស់គណបក្សសង្គ្រោះជាតិឱ្យអស់ពីកម្ពុជា៕
No comments:
Post a Comment