ដោយ ខែ សុណង
2021-03-23
រូប៖ ហ្វេសប៊ុក នាយកដ្ឋានចត្តាឡីស័ក
អ្នកវេជ្ជសាស្ត្រ ព្រួយបារម្ភពីស្ថានភាពអ្នកជំងឺកូវីដ១៩ (Covid-19) វិវត្តន៍កាន់តែធ្ងន់ធ្ងរ ក្រោយពីអ្នកជំងឺ មានរោគប្រចាំកាយស្លាប់ជាបន្តបន្ទាប់ស្របពេល មន្ត្រីក្រសួងសុខាភិបាល ថា អ្នកជំងឺកូវីដ១៩ ចំនួន ៣នាក់ទៀត កំពុងស្ថិតក្នុងសភាពធ្ងន់ធ្ងរ។ អ្នកឃ្លាំមើលជំរុញឲ្យអាជ្ញាធរ និងពលរដ្ឋ បង្កើនវិធានការ ដើម្បីទប់ស្កាត់ការរីករាលដាលជំងឺកូវីដ១៩។
អ្នកស្លាប់ ដោយសារជំងឺកូវីដ-១៩បានកើនដល់ ៥នាក់ ហើយ ដោយអ្នកស្លាប់ចុងក្រោយ គឺជាស្ត្រីវ័យ៦២ឆ្នាំត្រូវជាម្ដាយរបស់តារាកំប្លែងកញ្ញា អ៊ិន ស្រីពីន។ ក្រសួងសុខាភិបាលប្រកាសថា អ្នកជំងឺកូវីដ-១៩រូបនេះ ចូលសម្រាកនៅមន្ទីរពេទ្យមិត្តភាពខ្មែរ-សូវៀត កាលពីថ្ងៃទី២០ ខែមីនា ក្នុងស្ថានភាពអាការៈហត់ជាច្រើនថ្ងៃមកហើយ។ គ្រូពេទ្យបានធ្វើតេស្តរកឃើញមានជំងឺកូវីដ-១៩ កាលពីថ្ងៃទី២១ ខែមីនា។
ក្រុមគ្រូពេទ្យសន្និដ្ឋានថា ស្ត្រីរូបនេះ ស្លាប់ដោយសារជំងឺកូវីដ-១៩ វាយលុកសួតទាំងសងខាងធ្ងន់ធ្ងរ ស្ទះសរសៃឈាមបេះដូង ពិសេសអ្នកស្លាប់មានជំងឺទឹកនោមផ្អែម លើសឈាម និងធាត់ខ្លាំង។
រយៈពេល ២ សប្ដាហ៍ចុងក្រោយនេះ កម្ពុជាមានមនុស្សចំនួន ៥នាក់ បានស្លាប់ ដោយសារជំងឺកូវីដ-១៩ ខណៈអ្នកឆ្លងក្នុងព្រឹត្តិការណ៍សហគមន៍ចាប់ពីថ្ងៃទី២០ ខែកុម្ភៈ មកកើនដល់ជាង ១ពាន់ (១.២៦៦) នាក់ហើយ។ អ្នកស្លាប់ទាំង ៥នាក់ នេះមិនរាប់បញ្ចូលអ្នកស្លាប់ ២នាក់ ទៀត ពេលកំពុងសម្រាកព្យាបាលជំងឺកូវីដ និងម្នាក់ទៀតស្លាប់ពេលកំពុងធ្វើចត្តាឡីស័កនោះទេ។ ទន្ទឹមនឹងគ្នានេះអ្នកវេជ្ជសាស្ត្រ ព្រួយបារម្ភអំពីការព្យាបាល ការប្រើប្រាស់ថ្នាំ និងការចម្លងនៃជំងឺកូវីដ-១៩ នៅកម្ពុជាកាន់តែធ្ងន់ធ្ងរទៅៗ។
ប្រធានសមាគមគ្រូពេទ្យគុណធម៌កម្ពុជា (CVMA) លោកវេជ្ជបណ្ឌិត អ៊ូច វុឌ្ឍី សង្កេតឃើញថា គ្រូពេទ្យស្ម័គ្រចិត្តភាគច្រើនមានវ័យក្មេងៗបានខិតខំប្រឹងប្រែង សង្គ្រោះព្យាបាលអ្នកជំងឺកូវីដ-១៩។ ប៉ុន្តែលោកព្រួយបារម្ភ អំពីការប្រើប្រាស់ថ្នាំក្នុងការព្យាបាលជំងឺនេះ ដោយសារថ្នាំខ្លះប្រតិកម្មនឹងមនុស្សវ័យចំណាស់។
លោកវេជ្ជបណ្ឌិតក៏ព្រួយបារម្ភ អំពីកត្តាឧបករណ៍សម្រាប់ជួយសង្គ្រោះអ្នកជំងឺនៅមានកម្រិតទាប ខណៈឧបករណ៍វេជ្ជសាស្ត្រ និងសំលៀកបំពាក់ពេទ្យ ដើម្បីទប់ស្កាត់ជំងឺកូវីដ-១៩ គឺកម្ពុជាទទួលបានពីប្រទេសចិន៖ «ពេទ្យរបស់យើង ក៏មានកម្រិតទៀត។ កន្លែងហ្នឹងហើយ ដែលធ្វើឲ្យយើងបារម្ភ។ ទី១ មិនដឹងថា ពួកគាត់ខ្វះអនាម័យ ឬយ៉ាងម្ដេចជាមួយអ្នកជំងឺអ្វីហ្នឹង ហើយការប៉ះពាល់គាត់ ព្រោះបច្ចេកវិទ្យាយើងយកពីគេប្រើទាំងអស់។ យកពីចិន ប្រើទាំងអស់ ដូចជា ខោអាវ ម៉ាស់ពាក់អ្វីហ្នឹង មកពីចិនទាំងអស់។ យើងមើលស្ថានភាពដែលត្រូវមើលអ្នកជំងឺទាំងអស់ហ្នឹង ដែលមើលទៅគ្រោះថ្នាក់ណាស់។ គ្រោះថ្នាក់ទាំងពេទ្យ គ្រោះថ្នាក់ទាំងអ្នកជំងឺ ព្រោះយើង វាអត់មានវិជ្ជាសាស្ត្រអ្វីឲ្យបានជឿនលឿនទំនើបដូចគេទេ ដែលការពារខ្លួនឯង។ ក្រុមពេទ្យហ្នឹង ឃើញគាត់តស៊ូណាស់ ក្មេងៗហ្នឹង គាត់ចេញក្រោយហ្នឹង តស៊ូជួយពលរដ្ឋ»។
លោកវេជ្ជបណ្ឌិត អ៊ូច វុឌ្ឍី ពន្យល់ទៀតថា ការចាក់វ៉ាក់សាំងលើអ្នកមានជំងឺផ្លូវដង្ហើម ឬអ្នកមានជំងឺកូវីដ-១៩ ដោយមិនដឹងខ្លួន ក៏បណ្ដាលឲ្យមានគ្រោះថ្នាក់ធ្ងន់ដល់សុខភាពដែរ។ ចំពោះវិធានការទប់ស្កាត់ជំងឺកូវីដ-១៩វិញ លោកសង្កេតឃើញថា រដ្ឋាភិបាល បានដាក់ចេញវិធានការល្អ តែលោកជំរុញឲ្យរដ្ឋាភិបាលផ្អាកឲ្យជនបរទេសចូលមកកម្ពុជាមួយរយៈសិន ដើម្បីជាផ្នែកមួយជួយទប់ស្កាត់ការឆ្លងរាលដាលចូលក្នុងសហគមន៍៖ «ទី៣ គាត់អត់ដឹងថា គាត់មានជំងឺហ្នឹងហើយ គាត់ទៅចាក់វ៉ាក់សាំង។ អាវ៉ាក់សាំង វាសម្រាប់តែមនុស្ស ដែលអត់ទាន់មានជំងឺទេ អត់ឈឺ។ តែគាត់អត់បានដឹងថា គាត់មានជំងឺហ្នឹងនៅក្នុងខ្លួនផងហ្នឹង។ ដល់ចាក់ទៅ អាហ្នឹង វាប្រឆាំងគ្នា វាអត់ run។ វាទៅប្រឆាំងវា វាវាយគ្នា លុកពេញសួតយើង។ ធ្វើឲ្យគាត់ស្ទះ ដូចវេជ្ជបណ្ឌិតមួយ ដែលគាត់ស្លាប់ប៉ុន្មានថ្ងៃមុន ដោយសារ គាត់មានជំងឺផ្លូវដង្ហើម ហើយគាត់ចាក់ទៅគាត់មានជំងឺហ្នឹង គាត់មានអាមេរោគហ្នឹង កាន់តែធ្ងន់តែម្ដង។ អ៊ីចឹង គេខ្លាចបំផុត អ្នកដែលផ្ទុកអាមេរោគកូវីដ១៩ហ្នឹង នៅក្នុងខ្លួន មើលអត់ឃើញ ហើយចាក់វ៉ាក់សាំង។ អាហ្នឹង គ្រោះថ្នាក់ ជាងអ្នកកើតទៀត»។
ជុំវិញស្ថានភាពជំងឺកូវីដ-១៩ នៅកម្ពុជានេះ អាស៊ីសេរី មិនអាចសុំការបញ្ជាក់បន្ថែមពីអ្នកនាំពាក្យក្រសួងសុខាភិបាលអ្នកស្រី ឱ វណ្ណឌីន បានទេ នៅថ្ងៃទី២៣ ខែមីនា។ តែយ៉ាងណា អ្នកស្រីបានប្រាប់វិទ្យុក្នុងស្រុកថា ក្រៅពីស្ត្រីវ័យ ៦២ឆ្នាំ ស្លាប់ នៅថ្ងៃដដែលនេះ ក្រុមគ្រូពេទ្យកំពុងជួយសង្គ្រោះអ្នកជំងឺកូវីដ-១៩ ចំនួន៣នាក់ទៀត ដែលកំពុងស្ថិតនៅក្នុងស្ថានភាពជំងឺធ្ងន់ធ្ងរ។
ចំណែកអ្នកឃ្លាំមើលសង្គមជំរុញឲ្យអាជ្ញាធរនិងពលរដ្ឋ សហការគ្នាឲ្យដិតដល់ដើម្បីទប់ស្កាត់ជំងឺកូវីដ-១៩ នេះ។ នាយកប្រតិបត្តិអង្គការអភិវឌ្ឍន៍ផ្នត់គំនិត (MDO) លោក សេក សុជាតិ សង្កេតឃើញថា ពលរដ្ឋខ្លះ នៅតែមិនអនុវត្តតាមការណែនាំរបស់ក្រសួង ដោយបន្តការជួបជុំគ្នា តាមកន្លែងមួយចំនួនដដែល។ លោកព្រួយបារម្ភថា បើសិនការឆ្លងជំងឺនេះកាន់តែធ្ងន់ធ្ងរទៅ កម្ពុជានឹងពិបាកទប់ស្កាត់ និងព្យាបាល៖ «យើងពិបាកបន្ទោសអំពីថា វិធានការ ឬប្រសិទ្ធភាពព្យាបាលជំងឺរបស់ពេទ្យកម្ពុជាយើង វាអន់ពេក ឬយ៉ាងម្ដេចទេ គឺខ្ញុំពិបាកមែនទេ។ ខ្ញុំមិនអាចវាយតម្លៃបាន ព្រោះដោយសារយើង ផ្ទៀងផ្ទាត់ជាមួយប្រទេសជឿនលឿនដទៃ សុទ្ធតែមានអ្នកស្លាប់ នៅពេលអ្នកជំងឺកូវីដ១៩ ឈានទៅដល់ដំណាក់កាលមួយ ដែលគាត់មានការពិបាកដកដង្ហើមខ្លាំង ហើយជំងឺនេះ វាវាយលុកលឿនទៅលើបញ្ហាសួតរបស់អ្នកជំងឺ»។
នៅថ្ងៃដដែលនេះ អាជ្ញាធររាជធានីភ្នំពេញបានចាប់ផ្ដើមយុទ្ធនាការចាក់វ៉ាក់សាំង អាល់ស្ត្រាហ្សេណេកា( Astra Zeneca ) របស់អង់គ្លេស ឲ្យពលរដ្ឋមានអាយុ៦០ឆ្នាំឡើងទៅ។
តាមគម្រោងក្រសួងសុខាភិបាល នឹងចាក់វ៉ាក់សាំង ឬថ្នាំបង្ការកូវីដ១៩ ជំហានដំបូង លើមនុស្សចាស់ជាង ៥ម៉ឺន៥ពាន់ (៥៥.៧០០) នាក់ នៅតាមមណ្ឌលសុខភាពដែលបានកំណត់ ក្នុងរាជធានីភ្នំពេញ។ ក្រសួងសុខាភិបាលបញ្ជាក់ថា ការចាប់ផ្ដើមយុទ្ធនាការដំបូងនៅភ្នំពេញ ដោយសារជាកន្លែងរងការរាតត្បាតជំងឺកូវីដ-១៩ ធ្ងន់ធ្ងរជាងគេ។
គិតត្រឹមថ្ងៃទី២៣ ខែមីនា កម្ពុជាមានអ្នកកើតជំងឺកូវីដ-១៩ ជិត ២ពាន់ (១.៧៨៨)នាក់។ អ្នកជាសះស្បើយ ជិត១ពាន់(៩៩៩)នាក់ ស្លាប់៥នាក់ និងអ្នកជំងឺ៨រយ (៧៨៣) ផ្សេងទៀត កំពុងសម្រាកព្យាបាលតាមមន្ទីរពេទ្យនានា និង សណ្ឋាគារឌឺហ្គ្រេតឌូក (The Great Duke) ភ្នំពេញ៕
No comments:
Post a Comment