ដោយ ទីន ហ្សាការីយ៉ា
2021-03-12
កិច្ចប្រជុំក្រុមសមាជិកសភាអឺរ៉ុបដែលមានប្រទេសចំនួន ២៥ ជាសមាជិក។
រូប៖ ហ្វេសប៊ុក
សភាអឺរ៉ុប (European Parliament) បានអនុម័តសេចក្ដីសម្រេចថ្មីមួយទៀតឲ្យរបបលោក ហ៊ុន សែន បញ្ឈប់ការធ្វើទុក្ខបុកម្នេញគណបក្សប្រឆាំងនិងត្រូវបើកលំហរសិទ្ធិសេរីភាពប្រជាពលរដ្ឋ សង្គមស៊ីវិល និងសារព័ត៌មានឡើងវិញ។ សភាអឺរ៉ុប ក៏ទាមទារឲ្យតុលាការរបបក្រុងភ្នំពេញ លុបចោលសាលក្រម និងសាលដីការនានា ដែលចោទប្រកាន់ប្រឆាំងនឹងសកម្មជន និងមេដឹកនាំបក្សប្រឆាំងជាបន្ទាន់ និងដោយឥតលក្ខខណ្ឌដែរ។ អ្នកវិភាគថា នេះជាសញ្ញាល្អមួយទៀតដែលសហភាពអឺរ៉ុប នៅតែយកចិត្តទុកដាក់លើការអនុវត្តប្រជាធិបតេយ្យនៅកម្ពុជា។
អ្នកវិភាគលើកឡើងថា សហភាពអឺរ៉ុបមិនបានបោះបង់កម្ពុជាទុកឲ្យលោកនាយករដ្ឋមន្រ្តី ហ៊ុន សែន ដឹកនាំប្រទេសដោយជិះសេះលែងដៃនោះទេ។
អ្នកវិភាគនយោបាយនិរទេសខ្លួននៅក្រៅប្រទេសលោក គឹម សុខ មានប្រសាសន៍ថា សភាអឺរ៉ុប បានអនុម័តសេចក្ដីសម្រេចឲ្យរបបលោក ហ៊ុន សែន ស្ដារប្រជាធិបតេយ្យឡើងវិញនេះគឺបង្ហាញឲ្យឃើញថា សហភាពអឺរ៉ុប នឹងមិនអនុញ្ញាតិឲ្យរបបក្រុងភ្នំពេញបន្តគាបសង្កត់សិទ្ធិសេរីភាពប្រជាពលរដ្ឋទៀតឡើយ៖ «អឺរ៉ុបមិនបោះបង់ប្រជាធិបតេយ្យនៅកម្ពុជាទេ គេនៅទាមទារដង្ហើមប្រជាធិបតេ្យរស់នៅកម្ពុជា ហើយអឺរ៉ុបក៏ត្រៀមតទល់នឹងរបបលោក ហ៊ុន សែន ដែរ ព្រោះអឺរ៉ុបមានរបាយការណ៍រំលោភសិទ្ធិមនុស្សរបស់លោកហ៊ុន សែន នេះពេញដៃ។
សភាសអឺរ៉ុប (European Parliament) កាលពីថ្ងៃទី១១ ខែមីនា បានអនុម័តសេចក្ដីសម្រេចមួយមានចំនួន២៥ចំណុច តម្រូវឲ្យរបបទីក្រុងភ្នំពេញបញ្ឈប់ការធ្វើទុក្ខបុកម្នេញ ការគំរាមកំហែង និង ការចោទប្រកាន់ដោយមូលហេតុនយោបាយ មកលើសមាជិកគណបក្សប្រឆាំង សមាជិកសហជីព អ្នកការពារសិទ្ធិមនុស្ស អ្នកកាសែត និងសកម្មជនសង្គមស៊ីវិល ព្រមទាំងអំពាវនាវឲ្យកងសន្តិសុខ ជៀសវាងប្រើអំពើហិង្សាមកលើពលរដ្ឋដែលធ្វើបាតុកម្មដោយសន្តិវិធី។
សេចក្ដីសម្រេចសភាអឺរ៉ុបនេះ ក៏តម្រូវឲ្យរបបក្រុងភ្នំពេញ លុបចោលសាលក្រមតុលាការ មានលក្ខណៈនយោបាយជាបន្ទាន់ និងដោយឥតលក្ខខណ្ឌ ដែលបានផ្តន្ទាទោស ថ្នាក់ដឹកនាំគណបក្សសង្គ្រោះជាតិយ៉ាងងងើល រួមមានលោក សម រង្ស៊ី អ្នកស្រី មូរ សុខហួរ លោកអេង ឆៃអ៊ាង លោក អ៊ូ ចាន់ឫទ្ធិ លោក ហូរវ៉ាន់ លោក ឡុង រី លោក ម៉ែន សុថាវរិន្ទ្រ និងលោកនុត រំដួល និងរួមទាំងកម្មជនបក្សប្រឆាំងដទៃទៀត ដែលកំពុងជាប់ឃុំនៅពន្ធនាគារ។
ក្រៅពីនេះទៀត សភាអឺរ៉ុបក៏បានអំពាវនាវដល់អាជ្ញាធរកម្ពុជាឱ្យផ្តួចផ្តើមដំណើរការការផ្សះផ្សារជាតិ តាមរយៈការសន្ទនាពិតប្រាកដ ជាមួយគណបក្សប្រឆាំងនិងអង្គការសង្គមស៊ីវិល។
អាស៊ីសេរីមិនអាចទាក់ទងប្រធានអង្គភាពអ្នកនាំពាក្យរដ្ឋាភិបាលលោក ផៃ ស៊ីផាន ដើម្បីសួរអំពីបញ្ហានេះបាននៅឡើយទេកាលពីយប់ថ្ងៃទី១១ ខែមីនា។
អនុប្រធានគណបក្សសង្រ្គោះជាតិលោក អេង ឆៃអ៊ាង មានប្រសាសន៍ថា របបក្រុងភ្នំពេញកំពុងតែខូចមុខមាត់កាន់តែខ្លាំងនៅលើឆាកអន្តរជាតិ។ លោកបញ្ជាក់ថា សភាអឺរ៉ុបទាមទារឲ្យមានការចរចាប្រើប្រាស់វប្បធម៌សន្ទនា ដើម្បីផ្សះផ្សារជាតិនេះជារឿងត្រឹមត្រូវ។ លោកបញ្ជាក់ថា គណបក្សសង្រ្គោះជាតិក៏មិនដែលបិទដែរចំពោះការប្រើប្រាស់វប្បធម៌សន្ទនាដើម្បីបញ្ចាប់ជម្លោះនយោបាយ៖ «ដំណោះស្រាយអ្វីក៏ដោយមិនជៀសផុតពីការនិយាយគ្នា ការជជែកគ្នានោះទេ ហើយវាមិនធ្វើឲ្យខាតបង់ផលប្រយោជន៍ប្រទេសជាតិ និងប្រជាពលរដ្ឋដែរ»។
ទាក់ទងនិងបញ្ហានេះលោក គឹម សុខ បញ្ជាក់ថា គណបក្សប្រឆាំង និងគណបក្សកាន់អំណាច ងាកមកប្រើប្រាស់វប្បធម៌សន្ទនាដូចដែលសភាអឺរ៉ុបទាមទារនេះជាជំរើសល្អសំរាប់មេដឹកនាំ ជៀសវាងទណ្ឌកម្មផ្សេងៗទៀតពីសហគមន៍អន្តរជាតិ៖ «កិច្ចសន្ទនាជាជម្រើសល្អមួយសំរាប់កម្ពុជា ភូមា និងថៃក្ដី ដែលសហគមន៍អឺរ៉ុបចង់បាន ហើយដើម្បីឲ្យមេដឹកនាំទាំងនេះជៀសផុតពីទណ្ឌកម្មសហគមន៍អឺរ៉ុប»។
សភាអឺរ៉ុបក៏ជំរុញឲ្យក្រុមប្រឹក្សាអឺរ៉ុបអនុម័តជំហររបស់ខ្លួនជាផ្លូវការអំពីស្ថានភាពសិទ្ធិមនុស្ស និងការធ្លាក់ចុះប្រជាធិបតេយ្យនៅកម្ពុជា។ សភាអឺរ៉ុបបន្តថា កិច្ចប្រជុំកំពូលអាស៊ី-អឺរ៉ុប ឬហៅថា ASEM មិនគួរសហភាពអឺរ៉ុបយល់ព្រមចូលរួមកិច្ចប្រជុំនេះ នៅទីក្រុងភ្នំពេញនាចុងឆ្នាំ២០២១នេះឡើយ ដរាបណារបបឯកបក្សមិនស្ដារប្រជាធិបតេយ្យឡើងវិញទេនោះ។ លើសពីនេះទៀត សភាអឺរ៉ុបក៏អំពាវនាវរដ្ឋជាសមាជិកទាំងអស់បញ្ឈប់រាល់ការគាំទ្រផ្នែកហិរញ្ញវត្ថុដល់រដ្ឋាភិបាលកម្ពុជា។ ផ្ទុយទៅវិញជំនួយហិរញ្ញវត្ថុទាំងនោះគួរផ្ដោតទៅលើអង្គការសង្គមស៊ីវិលនិងគណបក្សប្រឆាំងវិញ។
សភាអឺរ៉ុបបានដាក់ទណ្ឌកម្មរបបលោក ហ៊ុន សែន តាមរយៈការដកប្រព័ន្ធអនុគ្រោះពន្ធលើទំនិញគ្រប់មុខលើកលែងតែអាវុធគឺ EBAចំនួន២០% ចេញពីកម្ពុជាម្ដងរួចមកហើយ ដោយសារតែរបបឯកបក្សមិនព្រមស្ដារលទ្ធិប្រជាធិបតេយ្យឡើងវិញ។
អ្នកវិភាគថា បើសិនជារបបលោក ហ៊ុន សែន នៅតែបន្តធ្វើទុក្ខបុកម្នេញប្រជាពលរដ្ឋ សកម្មជនគណបក្សប្រឆាំង អង្គការសង្គមស៊ីវិល និងប្រព័ន្ធផ្សព្វផ្សាយឯករាជ្យទៀតនោះ របបនេះនឹងរងទណ្ឌកម្មកាន់តែធ្ងន់ធ្ងរពីសហភាពអឺរ៉ុប សហរដ្ឋអាមេរិក និងក្រុមប្រទេសសម្ព័ន្ធមិត្តរបស់អាមេរិកនិងអឺរ៉ុបថែមទៀតនៅពេលខាមុខជាមិនខាន៕
No comments:
Post a Comment