ដោយ ខែ សុណង
2021-05-21 rfa
មណ្ឌលអប់រំកែប្រែព្រៃស "ម២"។
Photo courtesy of Adhoc
ជំងឺកូវីដ១៩ បានរាតត្បាតដល់ពន្ធនាគាររាជធានីភ្នំពេញ និងពន្ធនាគារខេត្តព្រះសីហនុហើយដោយអាជ្ញាធររកឃើញថា យ៉ាងហោចណាស់មានអ្នកជាប់ឃុំជាង ៥០នាក់ បានឆ្លងជំងឺនេះ។ មន្ត្រីសង្គមស៊ីវិល និងសាច់ញាតិអ្នកជាប់ឃុំស្នើទៅមន្ត្រីពន្ធនាគារគួរអនុញ្ញាតឱ្យអ្នកជាប់ឃុំក្នុងបទល្មើស ស្រាលៗ អ្នកជិតរួចទោស និងអ្នកជាប់ឃុំដោយសារបញ្ហានយោបាយ ព្រំដែន និងបរិស្ថាន អាចនៅក្រៅឃុំដើម្បីបង្ការបញ្ហានេះ។
អ្នកជាប់ឃុំទាំង ៥២នាក់ដែលឆ្លងជំងឺកូវីដ១៩នោះ មាន ១៨នាក់ជាប់ឃុំក្នុងពន្ធនាគារព្រៃស ផ្នែកបុរស ឬ ម១ និង ៣៤នាក់ទៀត ជាប់ឃុំនៅពន្ធនាគារខេត្តព្រះសីហនុ។ នេះបើតាមលិខិត និងការអះអាងរបស់មន្ត្រីជាន់ខ្ពស់ពន្ធនាគារ។
ប្រធានពន្ធនាគារ ម១ ឬមណ្ឌលអប់រំកែប្រែទី១ លោក យិន គន្ធ បានផ្ញើលិខិតទៅប្រធានសាលាដំបូងរាជធានីភ្នំពេញ ដោយសុំផ្អាកនាំជនជាប់ឃុំទៅជំនុំជម្រះ និងសាកសួរនៅសាលាដំបូងរាជធានីភ្នំពេញមួយរយៈ ចាប់ពីថ្ងៃទី២០ ខែឧសភាតទៅ ក្រោយរកឃើញអ្នកជាប់ឃុំ ១៨នាក់ មានជំងឺកូវីដ-១៩។ លិខិតចុះថ្ងៃទី២០ ឧសភា ដដែលបន្តថា ពេលនេះ ពន្ធនាគារកំពុងអនុវត្តវិធានការទប់ស្កាត់ការឆ្លងរាលដាលនៃព្រឹត្តិការណ៍សហគមន៍ ២០កុម្ភៈ និងស្រាវជ្រាវរកអ្នកពាក់ព័ន្ធផ្ទាល់និងប្រយោល ព្រមទាំងយកសំណាកទៅធ្វើតេស្ត។
ជុំវិញបញ្ហានេះ អាស៊ីសេរីមិនអាចសុំការបំភ្លឺពីអ្នកនាំពាក្យអគ្គនាយកដ្ឋានពន្ធនាគារ លោក នុត សវនា និងអ្នកនាំពាក្យសាលាខេត្តព្រះសីហនុ លោក ឃាង ភារម្យ បានទេ នៅថ្ងៃទី២១ ខែឧសភា ដោយទូរស័ព្ទចូលជាច្រើនដង តែគ្មានអ្នកទទួល។
ទោះយ៉ាងណា លោក នុត សវនា បានប្រាប់ប្រព័ន្ធឃោសនារបស់លោក ហ៊ុន សែន (ហ្វ្រេសញូវ) ថា ពន្ធនាគារខេត្តព្រះសីហនុ បានរំលែកអ្នកជាប់ទោសដែលពាក់ព័ន្ធ និងអ្នកមានជំងឺនេះ ទៅដាក់នៅអគារដាច់ដោយឡែក។ ប្រភពដដែលឱ្យដឹងទៀតថា តាមការរកឃើញដំបូង ករណីអ្នកជាប់ឃុំនៅខេត្តព្រះសីហនុ ដែលមានជំងឺកូវីដ-១៩ គឺសង្ស័យឆ្លងមកពីជនជាតិតៃវ៉ាន់ ដែលជាប់ឃុំនៅទីនោះ។ រីឯករណីឆ្លងជំងឺនេះ នៅពន្ធនាគារព្រៃសក្នុងរាជធានីភ្នំពេញ ជំហានដំបូងអាចផ្ដើមចេញពីកម្មករសំណង់ ដែលដឹកជញ្ជូនសម្ភារៈសាងសង់សំណង់ក្នុងពន្ធនាគារ។
ជុំវិញរឿងនេះ អ្នកនាំពាក្យសមាគមការពារសិទ្ធិមនុស្សអាដហុក (Adhoc) លោក ស៊ឹង សែនករុណា ជំរុញឲ្យមន្ត្រីពន្ធនាគារ អនុវត្តវិធានរបស់ក្រសួងសុខាភិបាលឱ្យដិតដល់ ប៉ុន្តែលោកព្រួយបារម្ភថា បញ្ហាចង្អៀតណែនក្នុងពន្ធនាគារ និងធ្វើឱ្យពិបាកក្នុងការអនុវត្តវិធានការនេះ។ មន្ត្រីសង្គមស៊ីវិលដដែលយល់ថា ខាងពន្ធនាគារគួរអនុញ្ញាតឱ្យអ្នកអនុវត្តទោសជិតគ្រប់ចំនួន ឬអ្នកទោសស្រាលអាចអនុវត្តទោសនៅក្រៅពន្ធនាគារ។ លោកបន្តទៀតថា អាជ្ញាធរខាងពន្ធនាគារគួរពិនិត្យលទ្ធភាពទៅលើអ្នកជាប់ឃុំ ដោយសារបញ្ហាព្រំដែន បរិស្ថាន និងបញ្ហានយោបាយជាដើម ដោយអាចឱ្យពួកគេនៅក្រៅឃុំដែរ៖ «ពាក់ព័ន្ធនឹងសកម្មជនមនសិការសង្គម សកម្មជន នយោបាយបរិស្ថាន គួរតែពិនិត្យលទ្ធភាពឱ្យពួកគាត់បាននៅក្រៅឃុំដែរ ព្រោះអ្នកទាំងហ្នឹងសុទ្ធតែទៅបម្រើសកម្មភាពសង្គមជាតិយើងទេ អ៊ីចឹង ជាផ្នែកមួយបន្ថយភាពចង្អៀតណែន និងកាត់បន្ថយពីឆ្លងរាលដាលបន្តទៀតបានខ្លះៗ ដែរ»។
ចាប់តាំងពីឆ្នាំ២០២០ មក អាជ្ញាធរបានចាប់ខ្លួនសកម្មជននយោបាយ សកម្មជនសង្គម សកម្មជនបរិស្ថាន និងអ្នកបញ្ចេញមតិរិះគន់រដ្ឋាភិបាលដាក់ពន្ធនាគារជាង ៧០នាក់ហើយ ដោយភាគច្រើនតុលាការចោទប្រកាន់ពួកគេ បទរួមគំនិតក្បត់ និងបទញុះញង់។ សកម្មជនខ្លះបាន ជាប់ក្នុងពន្ធនាគារជាងមួយឆ្នាំហើយ ប៉ុន្តែតុលាការមិនទាន់រកឃើញកំហុសរបស់ពួកគេនៅឡើយទេ។លោកស្រី កុល សាត គឺជាប្រពន្ធសកម្មជនគណបក្សសង្គ្រោះជាតិ លោក គង់ ម៉ាស ដែលបានជាប់ពន្ធនាគារជិត ៥ខែ ពីបទញុះញង់នៅក្នុងសំណុំរឿងមួយផ្សេងទៀត ប៉ុន្តែតុលាការមិនទាន់ជំនុំជម្រះគាត់នោះទេ។ លោកស្រីប្រាប់អាស៊ីសេរីថា លោកស្រីព្រួយបារម្ភនៅពេលដឹងថា នៅពន្ធនាគារ ម១ ដែលឃុំខ្លួនប្តីលោកស្រី មានអ្នកជាប់ឃុំឆ្លងជំងឺកូវីដ-១៩។ លោកស្រី មិនទាន់ដឹងថា ប្ដីរបស់លោកស្រីជាប់ពាក់ព័ន្ធនឹងបញ្ហានេះ ឬយ៉ាងណានោះទេ ព្រោះមិនអាចទាក់ទងឲ្យដឹងដំណឹង ឬចូលទៅសួរសុខទុក្ខប្ដីបាន។ ប្រពន្ធសកម្មជនបក្សប្រឆាំងរូបនេះប្រាប់ថា អាជ្ញាធរចាប់ប្ដីលោកស្រីទាំងបំពាន ដូច្នេះគួរតែដោះលែងប្ដីលោកស្រីឱ្យមានសេរីភាពឡើងវិញដើម្បីគេចពីការឆ្លងជំងឺកូវីដក្នុងពន្ធនាគារផង និងជាការផ្តល់យុត្តិធម៌ឱ្យប្ដីលោកស្រីផង៖ «ដោះលែងគាត់(លោក គង់ ម៉ាស) មកវិញមកដោយសារគាត់អត់បានធ្វើអ្វីខុសទេ ចង់ឱ្យគាត់បាននៅក្រៅឃុំ ដោយសាររឿងកូវីដពួកខ្ញុំបារម្ភខ្លាំងណាស់បង»។
របាយការណ៍របស់អគ្គនាយកដ្ឋានពន្ធនាគារបង្ហាញថា អ្នកជាប់ឃុំក្នុងពន្ធនាគារទូទាំងប្រទេសមាន ៣៩.០០០នាក់។ អង្គការជាតិ និងអន្តរជាតិ ថាចំនួននេះធ្វើឱ្យពន្ធនាគារចង្អៀតណែន ព្រោះពន្ធនាគារអាចផ្ទុកមនុស្សបានត្រឹមជាង ២ម៉ឺន ៦ពាន់ប៉ុណ្ណោះ។
អង្គការសិទ្ធិមនុស្សជាតិ និងអន្តរជាតិ ក្នុងនោះក៏រួមទាំងអ្នកជំនាញសិទ្ធិមនុស្សអង្គការសហប្រជាជាតិ បានចេញសេចក្តីថ្លែងការណ៍ និងសំណើជាបន្តបន្ទាប់ទាមទារឱ្យរដ្ឋាភិបាលដោះស្រាយបញ្ហាចង្អៀតណែនក្នុងពន្ធនាគារនេះ ប៉ុន្តែរដ្ឋាភិបាលលោក ហ៊ុន សែន មិនទាន់បានដោះស្រាយបញ្ហានេះឱ្យបានគ្រប់គ្រាន់ និងមានប្រសិទ្ធភាពនៅឡើយទេ៕
No comments:
Post a Comment