ដោយ យន់ សាមៀន
2021-05-30 rfa
(ឆ្វេង) លោក រ៉ុង ឈុន ប្រធានសហភាពសជីពកម្ពុជា (កណ្ដាល) អ្នកនាង ឈឿន ដារ៉ាវី និងយុវជន ហ៊ុន វណ្ណៈ សមាជិកយុវជនខ្មែរថាវរៈ (ស្ដាំ) លោក សួង សុភ័ណ្ឌ ប្រធានគណបក្សខ្មែរឈ្នះ ដែលអាជ្ញាធរក្រងភ្នំពេញចាប់ខ្លួនក្នុងពេលថ្មីៗ ចុងក្រោយនេះ។
Photo Courtesy
គ្រួសាររបស់សកម្មជននយោបាយដែលកំពុងជាប់ឃុំ និងមន្ត្រីសង្គមស៊ីវិលរិះគន់អាជ្ញាធរពន្ធនាគារ ដែលមិនបានបង្ហាញព័ត៌មានទូលំទូលាយពីស្ថានភាពជំងឺកូវីដឆ្លងរាតត្បាតនៅក្នុងពន្ធនាគារ។ពួកគាត់ចោទថា អាជ្ញាធរពន្ធនាគារកំពុងលាក់បាំងព័ត៌មាន និងធ្វើបាបផ្លូវចិត្តរបស់ក្រុមគ្រួសារអ្នកជាប់ឃុំដែលកំពុងចង់ដឹងអំពីសុខទុក្ខ គ្នាទៅវិញទៅមក។
ស្របពេលជំងឺកូវីដ-១៩ កំពុងឆ្លងរាតត្បាតដល់អ្នកជាប់ឃុំក្នុងពន្ធនាគារនៅរាជធានីភ្នំពេញ និងខេត្តមួយចំនួននេះ អាជ្ញាធរពន្ធនាគារនិងអាជ្ញាធរពាក់ព័ន្ធផ្សេងទៀត ផ្តល់ព័ត៌មានកាន់តែតិចទៅៗ ដែលធ្វើឲ្យក្រុមគ្រួសាររបស់អ្នកជាប់ឃុំ ព្រួយបារម្ភជាខ្លាំង។
ប្រពន្ធរបស់សកម្មជនបក្សសង្គ្រោះជាតិដែលកំពុងជាប់ឃុំនៅពន្ធនាគារខេត្តកណ្តាល លោក ម៉ី សោភ័ណ គឺលោកស្រី អ៊ីន ហ៊ួត រៀបរាប់ថា លោកស្រី ព្រួយបារម្ភជាខ្លាំងអំពីសុខភាពនិងសុវត្ថិភាពរបស់ប្តី ដោយសារពន្ធនាគារខេត្តកណ្តាល កំពុងផ្ទុះជំងឺកូវីដ-១៩ ធ្ងន់ធ្ងរ។ លោកស្រីទទូចឲ្យអាជ្ញាធរពន្ធនាគារ បង្ហាញព័ត៌មានឲ្យបានទូលំទូលាយដល់គ្រួសារអ្នកជាប់ឃុំ និងដោះលែងប្តីលោកស្រីឲ្យមានសេរីភាពឡើងវិញព្រោះគាត់គ្រាន់តែបញ្ចេញមតិរិះគន់គុណភាពវ៉ាក់សាំងនៅលើហ្វេសប៊ុក(Facebook) ដោយពុំបានប្រព្រឹត្តខុសច្បាប់ឡើយ៖ «ខាងអាជ្ញាធរមានការលាក់បាំងសូម្បីតែទៅសួរសុខទុក្ខ ក៏អត់ឲ្យជួប ដូច្នេះអត់មានដឹងដំណឹងគាត់អីទាំងអស់ អ៊ីចឹងធ្វើឲ្យខ្ញុំមានការព្រួយបារម្ភ ពីគាត់ព្រោះអីជាប្តីប្រពន្ធគ្រាន់តែលឺផ្អើលជំងឺនេះ យើងតែងតែមានការភ័យពីគាត់ហើយដោយសារទីនោះមានអ្នកជាប់ឃុំច្រើននិងមិនមានអនាម័យ»។
ស្រដៀងគ្នានេះ ប្រពន្ធរបស់ប្រធានគណបក្សខ្មែរឈ្នះ លោក សួង សុភ័ណ្ឌ គឺលោកស្រី ហង្ស ផារី ថ្លែងថា លោកស្រី គ្រាន់តែដឹងថា ប្តីរបស់លោកស្រី បានឆ្លងជំងឺកូវីដ នៅក្នុងពន្ធនាគារព្រៃស ផ្នែកបុរស(ម១) ប៉ុន្តែមកទល់ពេលនេះ អាជ្ញាធរពន្ធនាគារមិនបានផ្តល់ដំណឹងដល់លោកស្រីអំពីស្ថានភាពរបស់ប្តី និងការព្យាបាលបែបណានោះទេ។ លោកស្រីរិះគន់ថា ការបិទព័ត៌មានមិនឲ្យគ្រួសាររបស់អ្នកជាប់ឃុំដឹងអំពីសុខទុក្ខគ្នាក្នុងស្ថានភាពនេះ គឺជាធ្វើទារុណកម្មផ្លូវចិត្ត ព្រោះពួកគាត់ ត្រូវរស់នៅជាមួយទុក្ខក្រៀមក្រំនិងក្តីព្រួយបារម្ភឥតគណនារហូតភ្លេចបាយភ្លេចទឹក។ ប្រពន្ធរបស់អ្នកជាប់ឃុំនយោបាយរូបនេះបន្តថា មន្ត្រីពន្ធនាគារ និងលោកនាយករដ្ឋមន្ត្រី ហ៊ុន សែន សុទ្ធតែមានក្រុមគ្រួសារមានប្រពន្ធនិងកូន ដូច្នេះគួរតែរៀនយល់អំពីទុក្ខសោករបស់ពលរដ្ឋដូចជាពួកគាត់ផង៖ «បើនៅតែបំបិទសិទ្ធិមិនឲ្យខ្ញុំដឹងព័ត៌មានមិនព្រមដោះលែងគាត់ឲ្យមានសេរីភាពមិនព្រមយកពួកគាត់មកព្យាបាលនៅខាងក្រៅដូច្នេះរឿងទាំង អស់នេះ លោកនាយករដ្ឋមន្ត្រី ហ៊ុន សែន និងមន្ត្រីពន្ធនាគារទាំងអស់ ត្រូវតែទទួលខុសត្រូវចំពោះក្រុមគ្រួសារពួកខ្ញុំទាំងអស់គ្នា ព្រោះពួកគាត់អត់មាន ទោសពៃរ៍ឯណា អត់មានបានទៅលួចទៅឆក់ទៅប្លន់ ទៅបំផ្លាញសម្បត្តិជាតិ ឬលក់ដូរគ្រឿងញៀនទេ»។
ការលើកឡើងរបស់ក្រុមគ្រួសារអ្នកជាប់ឃុំនយោបាយនេះ គឺបន្ទាប់ពីជំងឺកូវីដ-១៩ កំពុងឆ្លងរាតត្បាតដល់ក្នុងពន្ធនាគារចំនួន៣ហើយ គឺពន្ធនាគារព្រៃសផ្នែកបុរស(ម១) ពន្ធនាគារខេត្តកណ្តាល និងពន្ធនាគារខេត្តព្រះសីហនុ។ របាយការណ៍បឋមរបស់អាជ្ញាធរពន្ធនាគារ បង្ហាញថា យ៉ាងហោចណាស់ មានអ្នកជាប់ឃុំ ៣៥០នាក់ដែលបានឆ្លងជំងឺ covid-19 ដោយភាគច្រើនបំផុតគឺនៅក្នុងពន្ធនាគារខេត្តកណ្តាល។ ទោះជាយ៉ាងណា អាជ្ញាធរពន្ធនាគារមិនបានបង្ហាញព័ត៌មានទូលំទូលាយបន្ថែមទៀតនោះទេ។
អាស៊ីសេរី បានព្យាយាមទាក់ទងអ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃ លោក នុត សវនា ជាច្រើនលើក ប៉ុន្តែចាប់តាំងពីជំងឺកូវីដផ្ទុះឡើងធ្ងន់ធ្ងរនៅក្នុងពន្ធនាគារនោះមក លោកពុំទទួលទូរស័ព្ទរបស់អ្នកយកព័ត៌មានអាស៊ីសេរីទៀតឡើយ។
ទាក់ទងករណីនេះ នាយករងទទួលបន្ទុកផ្នែកឃ្លាំមើល និងការពារសិទ្ធិមនុស្សនៃអង្គការលីកាដូ (Licadho) លោក អំ សំអាត មានប្រសាសន៍ថា ការផ្តល់ព័ត៌មានពេញលេញដល់គ្រួសាររបស់អ្នកជាប់ឃុំក្នុងស្ថានភាពនេះ គឺជារឿងចាំបាច់ ដើម្បីកុំឲ្យពួកគាត់ព្រួយបារម្ភខ្លាំង មានវិបត្តិផ្លូវចិត្ត និងអាចបញ្ចេញមតិខុសនាំឲ្យមានការចោទប្រកាន់មកលើពួកគាត់វិញថា ផ្សាយព័ត៌មានមិនពិត ឬបរិហារកេរ្តិ៍ជាដើម។ លោក បន្តថា គ្រួសាររបស់អ្នកជាប់ឃុំមិនបានដឹងសុខទុក្ខជាច្រើនខែមកហើយ ដូច្នេះនៅពេលមានដំណឹងក្រៅផ្លូវការផ្សេងៗពីការឆ្លងជំងឺកូវីដចូលក្នុងពន្ធនាគារ គឺប្រាកដជាធ្វើឲ្យពួកគាត់ព្រួយបារម្ភជាខ្លាំង៖ «ពេលមានពាក្យចចាមអារ៉ាមទៅទៀត ធ្វើឲ្យគាត់បារម្ភកាន់ តែខ្លាំងហើយបើយើងស្រម៉ៃទៅវិញនៅក្នុងពន្ធនាគារ គឺមនុស្សម្នាក់មិនមានកន្លែងគ្រប់គ្រាន់ប្រហែលមិនបាន១ម៉ែត្រការ៉េផង ក្នុងម្នាក់ដូច្នេះយើងស្រម៉ៃថា តើភាពចង្អៀតណែនេះនៅពេលមានការឆ្លង តើវាអាចយ៉ាងម៉េចទៅវិញ? កន្លងមក បើមាន អ្នកកើតរម៉ាស់ ឬផ្ដាសាយអី គឺមួយបន្ទប់ឆ្លងទាំងអស់ ដូច្នេះស្រម៉ៃទៅមើលថាបើមាន កូវីដចូល គឺវាត្រូវដូចគ្នាដែរ។ ដូច្នេះហើយបានជាក្រុមគ្រួសាររបស់គាត់បារម្ភខ្លាំងដោយមិនមានព័ត៌មានគ្រប់គ្រាន់»។
កាលពីពេលថ្មីៗនេះ អង្គការឃ្លាំមើលសិទ្ធិមនុស្សអន្តរជាតិ (Human Rights Watch) និងអង្គការលើកលែងទោសអន្តរជាតិ (Amnesty International)បានអះអាងថា ពួកគេទទួលបានព័ត៌មានសំងាត់ថា មានអ្នកជាប់ឃុំនៅពន្ធនាគាររាជធានីភ្នំពេញ ឬ ប៉េហ្ស៊ី (PJ) រាប់រយនាក់បានឆ្លងជំងឺកូវីដ១៩ ប៉ុន្តែអាជ្ញាធរបានលាក់ព័ត៌មានដោយបង្ហាញតួលេខអ្នកឆ្លងតិចតួចបំផុត។ រីឯគ្រួសាររបស់អ្នកជាប់ឃុំដោយមូលហេតុនយោបាយវិញ ពួកគាត់ក៏ទទួលបានព័ត៌មានសំងាត់ជាបន្តបន្ទាប់ពីឆ្មាំពន្ធនាគារដែរថា មានសកម្មជនយោបាយនិងសកម្មជនសង្គមមួយចំនួន បានឆ្លងជំងឺកូវីដ-១៩។
ករណីនេះបានធ្វើឲ្យក្រុមគ្រួសាររបស់អ្នកជាប់ឃុំទាំងនោះ ព្រួយបារម្ភ និងចាប់ផ្តើមចេញតវ៉ាជាថ្មី ដោយទាមទារឲ្យរបបលោក ហ៊ុន សែន ប្រគល់សេរីភាពជូនសកម្មជននយោបាយ និងសកម្មជនសង្គមឡើងវិញ ដើម្បីឲ្យពួកគាត់មានឱកាសថែទាំសុខភាព និងព្យាបាលជំងឺកូវីដដោយត្រឹមត្រូវនៅមន្ទីរពេទ្យក្រៅពន្ធនាគារ។ ក្រុមអង្គការជាតិនិងអន្តរជាតិ រួមទាំងគ្រួសាររបស់អ្នកជាប់ឃុំ ព្រមានថា គ្រោះមហន្តរាយនៅក្នុងពន្ធនាគារ អាចនឹងកើតឡើង ប្រសិនបើអាជ្ញាធររបបលោក ហ៊ុន សែន បន្តលាក់បាំងព័ត៌មាន និងមិនចាត់វិធានការដោះស្រាយឲ្យបានត្រឹមត្រូវពីពេលឥឡូវនេះទេនោះ៕
No comments:
Post a Comment