ដោយ ហេង រស្មី
2021-06-25 rfa
ក្រុមស្ត្រីស្រែកតវ៉ានៅក្បែរស្ថានទូតអង់គ្លេសប្រចាំកម្ពុជា និងដាក់ញត្តិដើម្បីអន្តរាគមន៍ឲ្យដោះលែងស្វាមី និងកូន នៅថ្ងៃទី២៥ ខែមិថុនា ឆ្នាំ២០២១។
រូបពីហ្វេសប៊ុក
ក្រុមប្រពន្ធរបស់មន្ត្រីបក្សប្រឆាំងកំពុងជាប់ឃុំ នាំគ្នាដាក់ញត្តិជូនស្ថានទូតអង់គ្លេសដើម្បីស្នើសុំឲ្យជួយអន្តរាគមន៍ទៅរបបលោក ហ៊ុន សែន ឲ្យដោះលែងប្តីពីក្នុងពន្ធនាគារ និងកូនប្រុសម្នាក់ឈ្មោះ កាក់ សុវណ្ណច្ឆ័យ ដែលទើបត្រូវបានសមត្ថកិច្ចចាប់ខ្លួនកាលពីយប់ថ្ងៃព្រហស្បតិ៍។ ការដាក់ញត្តិនេះ ក៏មានកងសន្តិសុខនិងសមត្ថកិច្ចក្រុងភ្នំពេញតាមរារាំងដូចកន្លងមកដែរ។ មន្ត្រីសិទ្ធិមនុស្ស ចាត់ទុកថា ទង្វើរបស់អាជ្ញាធរនេះ គឺជាការរំលោភសិទ្ធិមនុស្សធ្ងន់ធ្ងរហើយអាចនឹងធ្វើឲ្យសហគមន៍អន្តរជាតិ ដាក់ទណ្ឌកម្មបន្ថែមទៀតលើកម្ពុជា។
មិនខុសពីលើកមុនៗទេ ក្រុមកងសន្តិសុខ និងអាជ្ញាធរក្រុងភ្នំពេញជាង ១០នាក់ នៅតែបន្តតាមរារាំង និងធ្វើបាបក្រុមស្ត្រីថ្ងៃសុក្រ នៅខាងមុខស្ថានទូតអង់គ្លេស ដោយមិនឲ្យពួកគាត់ ឈរលើកបដា និងដាក់ញត្តិស្វែងរកយុត្តិធម៌ឲ្យប្តីដែលកំពុងជាប់ឃុំដោយសារមូលហេតុនយោបាយនោះទេ។ ក្រុមសន្តិសុខ និងប៉ូលិសសុទ្ធតែជាមនុស្សប្រុសពេញកម្លាំង នាំគ្នាប្រើហិង្សារុញច្រាន និងចាប់ទាញកញ្ឆក់យកបដា និងរូបថតរបស់អ្នកជាប់ឃុំពីក្រុមស្ត្រីទាំងនោះ ព្រមទាំងបាញ់អាល់កុលដាក់មុខពួកគាត់ទៀតផង។
ប្រពន្ធសកម្មជនគណបក្សសង្គ្រោះជាតិលោក កាក់ កុម្ភារ គឺលោកស្រី ព្រុំ ចាន់ថា ដែលចូលរួមក្នុងតវ៉ាដោយសន្តិវិធីនេះ បានដើរយំផង អង្គុយយំផង ដោយសារប្តីកំពុងជាប់ឃុំហើយ កូនប្រុសម្នាក់ទៀតរបស់លោកស្រី ត្រូវបានសមត្ថកិច្ចចាប់ខ្លួនទៀត។ លោកស្រីរៀបរាប់ថា វាជារឿងអាក្រក់ហួសថ្លែងដែលក្រុមអាជ្ញាធរ តាមធ្វើបាបពួកគាត់ជាស្ត្រីទន់ខ្សោយ ខណៈពួកគាត់ គ្រាន់តែឈរលើកបដាតវ៉ាដោយសន្តិវិធីរៀងរាល់ថ្ងៃសុក្រ ដើម្បីទាមទារឲ្យដោះលែងប្ដីពួកគាត់វិញ។ លោកស្រី ស្រែកដង្ហើយសុំឲ្យស្ថានទូតអង់គ្លេស ជួយអន្តរាគមន៍ទៅរដ្ឋាភិបាលកម្ពុជា ឲ្យដោះលែងអ្នកជាប់ឃុំនយោបាយទាំងអស់ និងកូនប្រុសឈ្មោះ កាក់ សុវណ្ណច្ឆ័យ ដែលសមត្ថកិច្ច ទើបចាប់ខ្លួនកាលពីយប់ថ្ងៃទី២៤ មិថុនា។ «»
ទាក់ទងនឹងការរារាំងក្រុមស្ត្រីថ្ងៃសុក្រនេះ អ្នកនាំពាក្យប៉ូលិសក្រុងភ្នំពេញ លោក សាន សុខសីហា នៅតែបកស្រាយដដែលៗថា វិធានការរបស់អាជ្ញាធរនេះ គឺដោយសារក្រុមស្ត្រីទាំងនេះ ធ្វើសកម្មភាពជួបជុំតវ៉ា រំខានដល់ពលរដ្ឋផ្សេងទៀត និងជាពិសេសមិនបានសុំច្បាប់អនុញ្ញាតពីអាជ្ញាធររាជធានីភ្នំពេញ។ នៅពេលអាស៊ីសេរី បន្តសួរដេញដោលអំពីករណីនេះ លោក សាន សុខសីហា បដិសេធឆ្លើយតប និងផ្តាច់ទូរស័ព្ទទៅវិញ។
ទោះជាមានការរារាំងពីអាជ្ញាធរក្ដី ក្រុមស្ត្រីថ្ងៃសុក្រនៅតែអាចដាក់ញត្តិតាមការគ្រោងទុក។ មន្ត្រីស្ថានទូតអង់គ្លេស បានចេញមកទទួលញត្តិ និងសន្យាថា នឹងប្រគល់ញត្តិនោះឲ្យដល់ដៃឯកអគ្គរាជទូតអង់គ្លេស។ ក្រោយដាក់ញត្តិរួច ក្រុមស្ត្រីថ្ងៃសុក្រ ក៏បានធ្វើដំណើរទៅស្នងការក្រុងភ្នំពេញ ដើម្បីសុំជួបយុវជន កាក់ សុវណ្ណច្ឆ័យ ដែលត្រូវបានសមត្ថកិច្ចចាប់ខ្លួន ប៉ុន្តែពេលទៅដល់ទីនោះ សមត្ថកិច្ច ប្រាប់ថា យុវជនរូបនេះត្រូវបានបញ្ជូនទៅតុលាការហើយ។
អ្នកនាំពាក្យប៉ូលិសក្រុងភ្នំពេញលោក សាន សុខសីហា អះអាងថា សមត្ថកិច្ច បានបញ្ជូនយុវជន កាក់ សុវណ្ណច្ឆ័យ ទៅសាកសួរនៅសាលាដំបូងរាជធានីភ្នំពេញ នៅម៉ោង២រសៀលថ្ងៃទី២៥ មិថុនា ប៉ុន្តែលោក មិនទាន់ដឹងថា តុលាការ សម្រេចបែបណានោះទេ មកទល់ល្ងាចថ្ងៃដដែលនេះ។ លោក បញ្ជាក់យ៉ាងខ្លីថា ការចាប់ខ្លួនយុវជនរូបនេះ គឺពាក់ព័ន្ធនឹងបទល្មើសចំនួនពីរគឺញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម និងការជេរប្រមាថមន្ត្រីរាជការសាធារណៈ តាមបណ្ដាញសង្គមតេឡេក្រាម(Telegram)។
យុវជន កាក់ សុវណ្ណច្ឆ័យ មានអាយុ១៦ឆ្នាំ និងមានជំងឺអូទីហ្សឹមពីកំណើត។ អាជ្ញាធររបបក្រុងភ្នំពេញ មានគ្នាជាង ២០នាក់ បានសម្រុកចូលចាប់ខ្លួនរូបគេដល់ក្នុងផ្ទះនៅភូមិត្នោតជ្រុំ សង្កាត់បឹងទំពុន២ ខណ្ឌមានជ័យ កាលពីម៉ោង៨យប់ថ្ងៃទី២៤ ខែមិថុនា ហើយបានបញ្ជូនទៅឃុំខ្លួន និងសួរចម្លើយទាំងយប់នៅស្នងការដ្ឋាននគរបាលរាជធានីភ្នំពេញ។ កាក់ សុវណ្ណច្ឆ័យ គឺជាកូនប្រុសរបស់សកម្មជនគណបក្សសង្គ្រោះជាតិ លោក កាក់ កុម្ភារ ដែលកំពុងជាប់ឃុំក្នុងពន្ធនាគារព្រៃស។
ម្តាយរបស់យុវជន កាក សុវណ្ណច្ឆ័យ គឺលោកស្រី ព្រុំ ចាន់ថា ថ្លែងទាំងទួញសោកថា លោកស្រី មិនទាន់បានជួបកូនប្រុសនៅឡើយ មកទល់ពេលល្ងាចថ្ងៃទី២៥ មិថុនា ដែល ធ្វើឲ្យលោកស្រីព្រួយបារម្ភជាខ្លាំងអំពីសុខទុក្ខរបស់កូន។ លោកស្រីចាត់ទុកថា ជារឿងអយុត្តិធម៌បំផុតដែលអាជ្ញាធរ ចាប់ឃុំខ្លួនប្តីលោកស្រីទាំងអយុត្តិធម៌ជាង១ឆ្នាំហើយ បែរជាបន្តចាប់ខ្លួនកូនប្រុសរបស់លោកស្រីទាំងមិនទាន់គ្រប់អាយុ និងមានបញ្ហាស្មារតីថែមទៀត។ លោកស្រីអះអាងថា កូនប្រុសលោកស្រី មិនបានប្រព្រឹត្តខុសច្បាប់ឡើយ ប៉ុន្តែអាជ្ញាធរចាប់ខ្លួននេះ ដើម្បីបំបាក់ស្មារតីលោកស្រី ដែលតែង ចេញតវ៉ាទាមទារយុត្តិធម៌ឲ្យប្តី។ «»
កាលពីដើមខែតុលា ឆ្នាំ២០២០ អាជ្ញាធររបបក្រុងភ្នំពេញ ក៏ធ្លាប់បានចាប់ឃុំខ្លួនយុវជន កាក់ សុវណ្ណច្ឆ័យ អស់រយៈពេលពីរថ្ងៃ ដោយសារតែបានចូលទៅប្រមូលទង់គណបក្សសង្គ្រោះជាតិនៅឯទីស្នាក់ការកណ្ដាលគណបក្សនេះ។ ម្តាយរបស់កាក់ សុវណ្ណច្ឆ័យ អះអាងថា ចាប់តាំងពីពេលនោះមក កូនប្រុសលោកស្រី មានស្មារតីខុសប្រក្រតីជាង មុនដូចជាមានអារម្មណ៍ភ័យខ្លាច ក្រោយសមត្ថកិច្ច ឃុំខ្លួននៅទីងងឹតម្នាក់ឯង និងសម្លុតសួរចម្លើយ ព្រមទាំងធ្វើទារុណកម្មលើរាងកាយជាដើម។ បន្ទាប់មកនៅពីថ្ងៃទី២៧ ខែមេសា ឆ្នាំ២០២០ កាក់ សុវណ្ណច្ឆ័យ បានជួបគ្រោះថ្នាក់ម្ដងទៀត ដោយត្រូវជនមិនស្គាល់មុខពីរនាក់ ជិះម៉ូតូលបគប់នឹងដុំថ្មពីក្រោយខ្នងបណ្តាលឱ្យបែកក្បាលដេរ ២០ថ្នេរ ក្នុងពេលកំពុងធ្វើដំណើរជាមួយម្តាយនៅភូមិត្នោតជ្រុំ សង្កាត់បឹងទំពុន២ ខណ្ឌមានជ័យ។ ទោះជាយ៉ាងណា សមត្ថកិច្ច បានខកខានក្នុងការតាមចាប់ជនដៃដល់យកមកផ្ដន្ទាទោសតាមច្បាប់ ប៉ុន្តែបែរជាចាប់ខ្លួន កាក់ សុវណ្ណច្ឆ័យ ដែលជាជនរងគ្រោះនៅពេលនេះទៅវិញ។
អ្នកនាំពាក្យសមាគមការពារសិទ្ធិមនុស្សអាដហុក (Adhoc) លោក ស៊ឹង សែនករុណា សោកស្តាយដែលសមត្ថកិច្ច តាមរារាំងក្រុមស្ត្រីថ្ងៃសុក្រ និងចាប់ខ្លួនយុវជន កាក់ សុវណ្ណច្ឆ័យ ហើយលោក ចាត់ទុកថា ករណីទាំងនេះ គឺការរំលោភសិទ្ធិមនុស្សធ្ងន់ធ្ងរ។ លោកអំពាវនាវឲ្យអាជ្ញាធរបញ្ឈប់ការយាយីលើក្រុមគ្រួសាររបស់សកម្មជន គណបក្សសង្គ្រោះជាតិ ហើយអនុញ្ញាតឲ្យស្ត្រីទាំងនោះ បន្តការតវ៉ាដោយសន្តិវិធី ព្រោះការស្វែងរកយុត្តិធម៌ គឺមិនមែនជាអំពើល្មើសច្បាប់នោះទេ។ មន្ត្រីសិទ្ធិមនុស្សរូបនេះ បារម្ភថា ចំណាត់ការរបស់អាជ្ញាធរនេះ នឹងធ្វើឲ្យក្រុមគ្រួសាររបស់សកម្មជនបក្សប្រឆាំងមានវិបត្តិផ្លូវចិត្ត និងវិបត្តិសេដ្ឋកិច្ចគ្រួសារធ្ងន់ធ្ងរបន្ថែមទៀត។
ក្រុមស្ត្រីថ្ងៃសុក្រ អះអាងថា ទោះបីជាអាជ្ញាធរ ធ្វើទុក្ខបុកម្នេញពួកគាត់បែបណាក្តី ក៏ពួកគាត់ នឹងមិនបញ្ឈប់ការតវ៉ាទាមទាររកយុត្តិធម៌នោះទេ។ ក្រុមស្ត្រីទាំងនេះ បញ្ជាក់ថា ពួកគាត់អាចបញ្ឈប់ការតវ៉ាបាន លុះត្រាតែអាជ្ញាធររដ្ឋាភិបាល ទម្លាក់ចោលការចោទប្រកាន់មិនត្រឹមត្រូវទាំងនោះ និងដោះលែងសមាជិកគ្រួសាររបស់ពួកគាត់ឲ្យមានសេរីភាពឡើងវិញ៕
តុលាការសម្រេចឃុំខ្លួនយុវជន កាក់ សុវណ្ណច្ឆ័យ ដោយចោទពីបទញុះញង់ និងបទជេរប្រមាថ
ព្រះរាជអាជ្ញាសាលាដំបូងរាជធានីភ្នំពេញ លោក សេង ហៀង នៅព្រលប់ថ្ងៃទី២៥ មិថុនា សម្រេចចោទប្រកាន់យុវជនកាក់ សុវណ្ណច្ឆ័យ ចំនួនពីរបទល្មើស គឺរួមមានបទញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម និងប្រមាថអ្នករាជការសាធារណៈ។ នេះបើតាមការចុះផ្សាយរបស់សារព័ត៌មានក្នុងស្រុកដែលគាំទ្ររដ្ឋាភិបាល។
អាស៊ីសេរី មិនទាន់អាចសុំការបញ្ជាក់បន្ថែមពីអ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ បានទេ ដោយទូរស័ព្ទចូល ពុំមានអ្នកទទួល។ អ្នកនាំពាក្យប៉ូលិសក្រុងភ្នំពេញ លោក សាន សុខសីហា ថ្លែងថា លោកមិនទាន់ដឹងថា តើតុលាការ នឹងបញ្ជូនយុវជនកាក់ សុវណ្ណច្ឆ័យ ទៅឃុំនៅពន្ធនាគារតែម្តង ឬផ្ញើឃុំខ្លួននៅស្នងការដ្ឋាននគរបាលរាជធានីភ្នំពេញមួយយប់ទៀតនោះទេ មកទល់ព្រលប់ថ្ងៃដដែលនេះ។
រីឯនាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ (LICADHO) លោក អំ សំអាត ថ្លែងថា តាមព័ត៌មានដែលលោកទទួលបាន គឺតុលាការ សម្រេចបញ្ជូនយុវជន កាក់ សុណ្ណច្ឆ័យ ទៅឃុំខ្លួននៅពន្ធនាគារព្រៃស (ម២ )បណ្ដោះអាសន្នហើយ ដើម្បីរង់ចាំសវនាការកាត់ក្តី។
បទញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម អាចប្រឈមជាប់ពន្ធនាគារពី ៦ខែ ទៅ២ឆ្នាំ និងពិន័យជាប្រាក់មួយ លានរៀលទៅបួនលានរៀល ខណៈបទប្រមាថអ្នករាជការសាធារណៈវិញ ប្រឈមជាប់ពន្ធនាគារពី១ថ្ងៃ ទៅ៦ថ្ងៃ និងពិន័យជាប្រាក់ពីមួយពាន់រៀលទៅមួយសែនរៀល៕
No comments:
Post a Comment