ដោយ ជាតិ ចំណាន
2021-06-27 rfa
(ឆ្វេង) យុវជន កាក់ សុវណ្ណច្ឆ័យ អាយុ១៦ឆ្នាំ កញ្ញា ស៊ុន រដ្ឋា យុវជន លី ចាន់ដារ៉ាវុធ និងលោក យឹម លាងហ៊ី។
រូប៖ RFA
អ្នកវិភាគនយោបាយមើលឃើញថា ការចាប់ខ្លួនយុវជនការពារបរិស្ថាន និងសមាជិកគ្រួសាររបស់សកម្មជនបក្សប្រឆាំងជាបន្តបន្ទាប់នៅរយៈពេលចុងក្រោយនេះ ដោយសាររដ្ឋាភិបាល ភ័យព្រួយខ្លាចបាត់បង់អំណាច ពាក់ព័ន្ធនឹងប្រជាប្រិយភាពរបស់ខ្លួនមិនរឹងមាំ។ ទោះជាយ៉ាងណា ការបង្ក្រាប់ទៅលើសំឡេងរិះគន់ឥតឈប់ឈរនេះ មិនបានធ្វើឲ្យរដ្ឋាភិបាលចំណេញអ្វីទេ ផ្ទុយទៅវិញបែរជារងការថ្កោលទោស និងការរិះគន់ពីគ្រប់មជ្ឈដ្ឋានថែមទៀត។
ប្រធានក្រុមអ្នកវិភាគវ័យក្មេងកញ្ញា លី ស្រីស្រស់ សង្កេតឃើញថា ការរិះគន់ខ្លាំងលើរដ្ឋាភិបាលដោយសារតែតុលាការបានប្រើប្រាស់បទចោទប្រកាន់ធ្ងន់ធ្ងរហួសហេតុលើសកម្មជនបរិស្ថានទាំង ៣ នាក់ ហើយបទចោទនេះបានបង្ហាញសារអាក្រក់មួយ ដល់សកម្មជនផ្សេងទៀត។ កញ្ញាសោកស្ដាយចំពោះសកម្មភាពបង្ក្រាបនេះព្រោះមិនបានផ្ដល់ផលចំណេញដល់ប្រទេសជាតិទេ៖ «ហើយផ្ទុយទៅវិញ វាអត់បានលើកទឹកចិត្តឲ្យពលរដ្ឋណាដែលគាត់ហ៊ានរិះគន់ឬក៏លើកឡើងពីបញ្ហាសង្គមហ្នឹង លើកទឹកចិត្តឲ្យពួកគាត់និយាយទេ។ អ៊ីចឹងច្បាស់ណាស់ថា ប្រសិនបើរដ្ឋាភិបាលធ្វើអ៊ីចឹង មតិសាធារណៈជនហ្នឹង គឺវាកាន់តែមានការរិះគន់បន្ថែម ក៏ដូចជាខ្វះជំនឿជាក់ទៅលើប្រព័ន្ធយុត្តិធម៌ ក៏ដូចជារបៀបដឹកនាំរបស់រដ្ឋាភិបាល»។
រយៈពេល ១០ ថ្ងៃចុងក្រោយនេះ តុលាការបានឃុំខ្លួនយុវជនចំនួន ៤ នាក់ ក្នុងនោះមាន ៣ នាក់ គឺជាសកម្មជនបរិស្ថានកញ្ញា ស៊ុន រដ្ឋា លោក យឹម លាងហ៊ី និងលោក លី ចាន់ដារ៉ាវុធ និងម្នាក់ទៀត គឺជាកូនប្រុសរបស់សមាជិកប្រតិបត្តិគណបក្សសង្គ្រោះជាតិរាជធានីភ្នំពេញ កំពុងជាប់ឃុំក្នុងពន្ធនាគារព្រៃសលោក កាក់ កុម្ភា គឺយុវជន កាក់ សុវណ្ណច្ឆ័យ ដែលមានអាយុ ១៦ ឆ្នាំ និងមានបញ្ហាផ្នែកសតិបញ្ញា។ តុលាការបានចោទសកម្មជនបរិស្ថានទាំង ៣ នាក់ ពីបទរួមគំនិតក្បត់ និងប្រមាថព្រះមហាក្សត្រ។ ដោយឡែកយុវជន កាក់ សុវណ្ណច្ឆ័យ ត្រូវបានចោទពីបទញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម និងបទប្រមាថអ្នករាជការសាធារណៈ ពាក់ព័ន្ធនឹងការជជែកនៅក្នុងបណ្ដាញសង្គមតេឡេក្រាម(Telegram)។ តែយ៉ាងណាអាជ្ញាធរមិនបានបង្ហាញខ្លឹមសារ ឬបញ្ជាក់ពីដើមហេតុដែលនាំឲ្យមានការជេរប្រមាថនោះទេ។
ជុំវិញការចាប់ខ្លួនយុវជនទាំង ៤ នាក់នេះ អាស៊ីសេរីមិនអាចសុំការបញ្ជាក់ពីអ្នកនាំពាក្យរដ្ឋាភិបាលលោក ផៃ ស៊ីផាន និងអ្នកនាំពាក្យក្រសួងយុត្តិធម៌ លោក ជិន ម៉ាលីន បានទេ នៅថ្ងៃទី២៧ ខែមិថុនា នេះ។ តែយ៉ាងណារដ្ឋមន្ត្រីក្រសួងមហាផ្ទៃលោក ស ខេង បានលើកឡើងក្នុងជំនួបផ្ទាល់ជាមួយឯកអគ្គរដ្ឋទូតបារាំងប្រចាំកម្ពុជាអ្នកស្រី អេវ៉ាង្វៀនប៊ិញ (Eva NguyenBinh) កាលពីថ្ងៃទី២៤ ខែមិថុនា ថាក្នុងនាមជាស្ថាប័នអនុវត្តច្បាប់ អាជ្ញាធរគ្មានជម្រើសអ្វី ក្រៅពីការចាប់ខ្លួនសកម្មជនទាំងនោះទេ ព្រោះអាជ្ញាធរមានភស្តុតាងបញ្ជាក់ពីបទល្មើស។
អ្នកសិក្សាស្រាវជ្រាវការអភិវឌ្ឍន៍សង្គមបណ្ឌិត មាស នី យល់ថា ការចាប់ខ្លួនយុវជនទាំងនេះបណ្ដាលឲ្យពលរដ្ឋនិងសហគមន៍អន្តរជាតិកាន់តែមិនជឿជាក់លើរដ្ឋាភិបាលនិងប្រព័ន្ធតុលាការ។ លោកបន្តថា ការប្រើប្រាស់បទចោទធ្ងន់ធ្ងរលើសកម្មជនបរិស្ថានទៀតសោត បានបង្ហាញឲ្យឃើញថា ប្រព័ន្ធយុត្តិធម៌កម្ពុជា នៅតែស្ថិតក្រោមឥទ្ធិពលនយោបាយ៖ «យើងឃើញថា ប្រព័ន្ធតុលាការនៅស្រុកយើងនេះ ហាក់ដូចជាមិនទាន់ឃើញមានការកំណែទម្រង់ណាមួយ ដែលបានសន្យាដោយឯកឧត្ដមរដ្ឋមន្ត្រីក្រសួងយុត្តិធម៌នៅឡើយទេ។ យើងនៅតែឃើញថា ប្រព័ន្ធតុលាការនៅស្រុកខ្មែរបច្ចុប្បន្ននៅតែទទួលឥទ្ធិពលពីរដ្ឋាភិបាល ឬពីអ្នកនយោបាយដដែល ដោយមិនទាន់ជាមានការផ្លាស់ប្ដូរទេ»។
មកទល់ពេលនេះ អាជ្ញាធររបបក្រុងភ្នំពេញបានចាប់ខ្លួនសកម្មជននយោបាយ សង្គម និងបរិស្ថានប្រមាណ ៨០ នាក់ហើយដាក់ក្នុងពន្ធនាគារ ដោយភាគច្រើនចោទប្រកាន់ពីបទញុះញង់ និងរួមគំនិតក្បត់ ដោយសារការអនុវត្តសិទ្ធិជាមូលដ្ឋានរបស់ពួកគាត់។ ក្រុមអង្គការសង្គមស៊ីវិល និងសហគមន៍អន្តរជាតិ តែងតែប្រកាសថ្កោលទោសជាបន្តបន្ទាប់ចំពោះការចាប់ខ្លួនទាំងនេះហើយពួកគេទាមទារឲ្យមានទណ្ឌកម្មបន្ថែមទៀត លើរបបក្រុងភ្នំពេញ ក្នុងករណីរបបនេះនៅតែបន្តធ្វើទុក្ខបុកម្នេញឥតឈប់ឈរលើសំឡេងរិះគន់ និងការមិនព្រមដោះលែងសកម្មជនទាំងអស់ ឲ្យមានសេរីភាពវិញ៕
2 comments:
Hun Sen is getting old and in 15-20 years he will have to step down. Then his son will be the dictator. It is up to the youth of Cambodia to fight for a future like those in Myanmar, Thailand, and save Cambodia, not only from the puppet Hun Sen, but the evil Yuon as well. The country is dying and time is being lost. Oppression will happen even if nothing is done.
The evil Vietnam implements the Vietnamization of Cambodia policy. That's why there are so many unlawful arrests on Khmer nationalists.
Ah Roleuy Hun Sen cannot do anything facing his master Yuon.
Post a Comment