ដោយ ខែ សុណង
2021-06-05 rfa
(រូបឆ្វេង) គ្រាប់កាំភ្លើងដែលពលរដ្ឋរើសបានក្រោយហេតុការណ៍យោធាបាញ់រះលើពលរដ្ឋ (រូបស្ដាំ) អាវពលរដ្ឋដែលរងគ្រាប់របស់យោធាបាញ់រះក្នុងហេតុការណ៍តវ៉ានៃជម្លោះដី នាភូមិអង្គស្រែពោធិ៍ ឃុំទួលព្រិច ស្រុកអង្គស្នួល ខេត្តកណ្តាល នៅថ្ងៃទី៣ ខែមិថុនា ឆ្នាំ២០២១។
Photo Provided
អង្គការសង្គមស៊ីវិលទាមទារឱ្យអាជ្ញាធរពាក់ព័ន្ធពន្លឿនការស៊ើបអង្កេតករណីយោធាបាញ់ប្រជាពលរដ្ឋម្នាក់ឲ្យរបួសដួលដេកលើវាលស្រែកាលពីថ្ងៃទី៣ មិថុនា។ ការអំពាវនាវនេះ ធ្វើឡើងដោយសារតែ អាជ្ញាធរមិនទាន់បង្ហាញតម្រុយណាមួយដល់សាធារណជន និងគ្រួសារជនរងគ្រោះពីលទ្ធភាពស៊ើបអង្កេតករណីហិង្សាបាញ់បោះនេះនៅឡើយទេ ក្នុងរយៈពេល៣ ថ្ងៃមកនេះ។
សង្គមស៊ីវិលចាត់ទុកករណីយោធាបាញ់ប្រជាពលរដ្ឋ នៅភូមិអង្គស្រែពោធិ៍ ឃុំទួលព្រិច ស្រុកអង្គស្នួល ខេត្តកណ្តាល គឺជាអំពើរំលោភបំពានសិទ្ធិមនុស្ស និងច្បាប់យ៉ាងធ្ងន់ធ្ងរ។
ប្រធានផ្នែកសមាគមការពារសិទ្ធិមនុស្សអាដហុក (ADHOC) លោក នី សុខា ថ្លែងថា ជំហានដំបូងអាជ្ញាធរត្រូវចាប់ជនល្មើសដែលបាញ់លើប្រជាពលរដ្ឋយកមកអនុវត្តតាមច្បាប់ដើម្បីផ្តល់យុត្តិធម៌ដល់ជនរងគ្រោះ និងឈានទៅលុបបំបាត់អំពើនិទ្ទណ្ឌភាពក្នុងសង្គម។ លោកបញ្ជាក់ថា ទោះបីក្រុមយោធាចុះអនុវត្តតាមបញ្ជារបស់អង្គភាពក៏ដោយ ប៉ុន្តែច្បាប់មិនអនុញ្ញាតឱ្យយោធាប្រើប្រាស់អំពើហិង្សាបាញ់បោះដោយសេរីលើប្រជាពលរដ្ឋនោះទេ ដូច្នេះជនដែលបង្កត្រូវទទួលខុសត្រូវចំពោះមុខច្បាប់។
មន្ត្រីសង្គមស៊ីវិលរូបនេះ ជំរុញឱ្យអាជ្ញាធរស្រាវជ្រាវ និងពន្លឿនការស៊ើបអង្កេតស្វែងរកជនប្រព្រឹត្តយកមកផ្ដន្ទាទោស ដើម្បីបង្ហាញអំពីការយកចិត្តទុករបស់អាជ្ញាធរ និងបង្កើនទំនុកចិត្តដល់ពលរដ្ឋ។ លោកបន្តថា ប្រសិនបើអាជ្ញាធរមិនបានវែកមុខចាប់ជនល្មើសយកមកផ្ដន្ទាទោសត្រឹមត្រូវនោះទេ នឹងធ្វើឱ្យប្រជាពលរដ្ឋអស់ជំនឿលើការអនុវត្តច្បាប់របស់សមត្ថកិច្ច ហើយមានន័យស្មើនឹងការអនុញ្ញាតឱ្យអំពើនិទ្ទណ្ឌភាពកើតលើប្រជាពលរដ្ឋខ្មែរថែមទៀត៖ «រឿងវិវាទដីធ្លីនេះដោយសារតែយើងមិនព្រមធ្វើការដោះស្រាយ ហើយយើងចេះតែអូសបន្លាយពេលធ្វើឱ្យវិវាទនឹងកាន់តែរាំរ៉ៃទៅៗ អាហ្នឹងហើយដែលបង្កជាអំពើហិង្សាផ្សេងៗ ដូច្នេះខ្ញុំគិតថាដើម្បីបញ្ចៀសឱ្យបាននូវអំពើហិង្សាផ្សេងៗ ដើម្បីជួយសម្រាលសម្រួលទៅដល់ស្ថានភាពជីវភាពរបស់ប្រជាពលរដ្ឋខ្ញុំគិតថាអាជ្ញាធរអ្នកដែលមានសមត្ថកិច្ចគួររូតរះក្នុងការដោះស្រាយ ធ្វើម៉េចរកផ្លូវ ឬរកយន្តការដោះស្រាយបញ្ចប់រឿងដីធ្លីហ្នឹងទៅដើម្បីឱ្យប្រជាពលរដ្ឋអាចរស់នៅបានសុខសាន្ត»។
កាលពីថ្ងៃទី៣ មិថុនា ពលរដ្ឋជាង៣០០ នាក់ បានលើកគ្នាទៅឃាត់គ្រឿងចក្រ ដែលក្រុមយោធាបម្រុងយកទៅឈូសឆាយដីស្រែដែលកំពុងមានទំនាស់ជាមួយប្រជាពលរដ្ឋ។ ពេលពលរដ្ឋកំពុងតវ៉ា ស្រាប់តែក្រុមយោធាបានបង្ក្រាបពលរដ្ឋ ដោយបាញ់គ្រាប់កាំភ្លើងពិតបណ្តាលឱ្យពលរដ្ឋម្នាក់របួសធ្ងន់។
អាស៊ីសេរីមិនអាចទាក់ទង អ្នកនាំពាក្យក្រសួងការពារជាតិ លោក ឈុំ សុជាត និងលោក អ៊ុក សុវណ្ណ ដើម្បីសុំការបកស្រាយជុំវិញរឿងនេះ បានទេ នៅថ្ងៃទី៥ មិថុនា ដោយទូរស័ព្ទចូលពុំមានអ្នកទទួល។ ប៉ុន្តែលោក ឈុំ សុជាត បានប្រាប់សារព័ត៌មានក្នុងស្រុកថា ក្រសួងបានទទួលរបាយការណ៍ករណីក្រុមយោធាប្រើប្រាស់អាវុធបាញ់លើប្រជាពលរដ្ឋហើយ តែអាជ្ញាធរកំពុងស៊ើបអង្កេតនិងស្រាវជ្រាវដើម្បីយកជនបង្កយកមកផ្ដន្ទាទោស។
ទោះជាយ៉ាងណា ប្រពន្ធជនរងគ្រោះ លោក មុំ ចន្ថា គឺ លោកស្រី គាំ សាវន ប្រាប់អាស៊ីសេរីនៅថ្ងៃទី០៥ មិថុនាថា រយៈពេលជាច្រើនថ្ងៃមកហើយ សមត្ថកិច្ចពុំទាន់ផ្តល់ដំណឹង និងបង្ហាញលទ្ធផលនៃការស៊ើបអង្កេតស្វែងរកជនល្មើសយកមកផ្ដន្ទាទោសតាមច្បាប់នៅឡើយទេ។ លោកស្រីសង្ឃឹមថាស្ថាប័នពាក់ព័ន្ធ និងប្រជាពលរដ្ឋនឹងជួយជំរុញទៅសមត្ថកិច្ចពន្លឿនស្វែងរកចាប់ជនល្មើស ដើម្បីផ្តល់យុត្តិធម៌ដល់គ្រួសារលោកស្រី។
ប្រពន្ធជនរងគ្រោះរូបនេះរៀបរាប់ទៀតថា ស្ថានភាពមុខរបួសប្តីរបស់លោកស្រីបានធូរខ្លះហើយ ប៉ុន្តែលោកស្រីពុំទាន់អាចចូលជួបប្តីបាននោះទេ មូលហេតុនេះធ្វើឱ្យលោកស្រីបន្តព្រួយបារម្ភពីស្ថានភាពប្តីជាខ្លាំង ។ លោកស្រីក៏កំពុងខ្វល់ខ្វាយ ដោយមិនដឹងរកប្រាក់កាកឯណាដើម្បីទិញថ្នាំព្យាបាលឱ្យប្តីក្រោយត្រឡប់ព្យាបាលនិងថែទាំងនៅផ្ទះវិញ ខណៈគ្រួសារលោកស្រីក្រីក្រមិនអាចទ្រទ្រង់ជីវភាពនេះបានទេ៖ «ចា៎អយុត្តិធម៌ បើគេចាប់បានយុត្តិធម៌ បើថាអាចធ្វើបាបយើងទៀតហ្នឹង ដោយសាររកអត់ឃើញអ៊ីចឹងហ្នឹង បាញ់មួយហើយគ្មានអាណារករឿងផង គ្មានអាណាដេញចាប់ផង ខ្ញុំមានតែសុំជួយគ្រួសារខ្ញុំកំពុងខ្វះខាតហ្នឹង»។
កន្លងមក រដ្ឋមន្ត្រីក្រសួងមហាផ្ទៃ លោក ស ខេង ធ្លាប់បានបញ្ជាក់ថា ការប្រើប្រាស់យោធាចុះអនុវត្តសាលដីកាតុលាការវិវាទដីធ្លី គឺជាទង្វើខុសច្បាប់។ ទោះជាយ៉ាងណា ករណីកម្លាំងយោធាចុះបង្ក្រាបពលរដ្ឋរឿងដីធ្លី ឈានដល់ការបាញ់ប្រហារពលរដ្ឋនោះ តែងកើតមានជាញឹកញាប់ ដូចជានៅខេត្តក្រចេះក្នុងឆ្នាំ២០១៨ និងខេត្តព្រះសីហនុនៅឆ្នាំ២០១៩ ជាដើម។ ករណីទាំងនោះពលរដ្ឋសុទ្ធតែទទួលរងគ្រាប់កាំភ្លើងពិតរបស់ក្រុមយោធា បណ្តាលឱ្យរងរបួសធ្ងន់ និងពលរដ្ឋខ្លះថា ដល់ថ្នាក់ស្លាប់ផងក៏មានករណីនៅខេត្តក្រចេះ។
សង្គមស៊ីវិល និងប្រជាពលរដ្ឋទាមទារឱ្យអាជ្ញាធរស៊ើបអង្កេតករណីហិង្សាបាញ់បោះលើប្រជាពលរដ្ឋនេះដោយត្រឹមត្រូវ តម្លាភាព ដោយវែកមុខជនល្មើសយកមកផ្ដន្ទាទោសតាមច្បាប់ ដើម្បីលុបបំបាត់អំពើនិទ្ទណ្ឌភាព។ ពួកគាត់ក៏ស្នើឱ្យអាជ្ញាធរ បញ្ឈប់ការប្រើប្រាស់កម្លាំងប្រដាប់អាវុធបង្កហិង្សាលើជនស្លូតត្រង់បន្តទៀត។
ទាក់ទងនឹងដីមានទំនាស់២៨០ ហិកតារនោះវិញ ក្រុមពលរដ្ឋឱ្យដឹងថា ពួកគាត់នឹងចេញតវ៉ាបន្តទៀតនៅព្រឹកថ្ងៃទី៦ មិថុនា ដើម្បីស្នើឱ្យសមត្ថកិច្ចពាក់ព័ន្ធជួយអន្តរាគមន៍ឱ្យយោធាដកគ្រឿងចក្រឈូសឆាយដី ឡានទឹក និងដកកងកម្លាំងយោធាចេញ ដើម្បីឈានរកដំណោះស្រាយករណីនេះដោយសន្តិវិធី ព្រោះពលរដ្ឋកំពុងភ័យខ្លាចចំពោះក្រុមយោធាបោះតង់នៅក្នុងទីតាំងនោះ។ ពលរដ្ឋអះអាងថា ការចេញតវ៉ាបន្តទៀតនេះ ក៏ដើម្បីជរុញឱ្យសមត្ថកិច្ចស្វះស្វែងចាប់ជនល្មើសដែលបាញ់ប្រជាពលរដ្ឋយកមកអនុវត្តទោសតាមច្បាប់ផងដែរ៕
No comments:
Post a Comment