អង្គការ​អន្តរជាតិ​ ​ជំរុញ​ឲ្យ​រដ្ឋមន្រ្តី​ការបរទេស​​អង់គ្លេស​ ​ដាក់​​សម្ពាធ​​កម្ពុជា​​រឿង​​រំលោភ​​សិទ្ធិមនុស្ស

Khmer Circle: 

The English [in the name of the Brits] would have responded to civil society groups' 'pressure' on them in a way no more than mentioning - in a friendly tone - human rights issues in passing.

Who cares anyway about human rights abuses as long as the rotten Cambodian elite keep buying and expending their ill-gotten wealth on their luxuary merchendise!

🔺🔺🔺 

ដោយ មួង ណារ៉េត
2021-06-22 rfa
 

(កណ្តាល) លោក  ដូមីនិក​ ​រ៉ា​អាប់​ (​Dominic Raab) ​រដ្ឋមន្រ្តី​ការបរទេស​ ​និង​អភិវឌ្ឍន៍​អង់គ្លេស ពេលទស្សនកិច្ចនៅប្រទេសវៀតណាម កាលពីថ្ងៃទី២២ ខែមិថុនា ឆ្នាំ២០២១។
រូប៖ ​Dominic Raab

 

អង្គការ​ឃ្លាំមើល​សិទ្ធិមនុស្ស​អន្តរជាតិ​ ​ថា​ដំណើរ​ទស្សនកិច្ច​ផ្លូវការ​របស់​រដ្ឋមន្រ្តី​ការបរទេស​ ​និង​អភិវឌ្ឍន៍​អង់គ្លេស​លោក​ ដូមីនិក​ ​រ៉ា​អាប់​ (​Dominic Raab) ​មក​កម្ពុជា​​នៅ​ថ្ងៃ​ទី​​២​៣​ ​ខែ​​មិថុនា​នេះ​ ​គឺ​ធ្វើឡើង​នៅ​ស្រប​ពេល​ដែល​កម្ពុជា​កំពុង​ស្ថិត​ក្នុង​វិបត្តិ​សិទ្ធិមនុស្ស​ ​ព្រោះ​រដ្ឋាភិបាល​កម្ពុជា​ ​បាន​ធ្វើទុក្ខបុកម្នេញ​សំឡេង​ប្រឆាំង​ ​និង​ចាប់​ឃុំ​ខ្លួន​សកម្មជន​ជាច្រើន​នាក់​ ​រួម​ទាំង​សកម្មជន​បរិស្ថាន​ ៣ នាក់​បន្ថែម​ទៀត​ ​នៅ​ពេលថ្មីៗនេះ​ទៀត​ផង​។​

នាយក​រង​ប្រចាំ​តំបន់​អាស៊ី​នៃ​អង្គការ​ឃ្លាំមើល​សិទ្ធិមនុស្ស​អន្តរជាតិ​ ​យូ​មែន​ ​រ៉ៃត៍ ​វ៉ច្ឆ (​Human Rights ​Watch​) ​លោក​ ហ្វ៊ីល​ រ៉ូប៊ើតសុ​ន​ (​Phil​ Robertson​) ​ជំរុញ​ឲ្យ​លោក​ ដូមីនិក​ ​រ៉ាអាប់​ ​ស្នើ​ទៅ​រដ្ឋាភិបាល​កម្ពុជា​ ​ឲ្យ​ដោះលែង​សកម្មជន​បរិស្ថាន​ទាំង​ ៣​ នាក់​នេះ​ ​និង​សកម្មជន​នយោបាយ​និង​សង្គម​ ​ដែល​ជាប់ឃុំ​ជិត​ ​៨០​ ​នាក់​ផ្សេងទៀត​ជាបន្ទាន់​ ​និង​ដោយ​ឥត​លក្ខខណ្ឌ​។​

លោក​ ហ្វ៊ីល រ៉ូប៊ើតសុន​ ​ថា​សកម្មភាព​ទាំងឡាយ​របស់​សកម្មជន​ ​ក្នុង​ការ​បញ្ចេញមតិ​ជា​សាធារណៈ​ ​ប្រមូលផ្តុំ​គ្នា​ដោយ​សន្តិវិធី​ ​ដើម្បី​ទាមទារ​ឲ្យ​រដ្ឋាភិបាល​ដោះស្រាយបញ្ហា​សង្គម​ ​ឬ​ចងក្រង​ឯកសារ​អំពី​ការ​បំផ្លាញ​បរិស្ថាន​ ​និង​ធនធានធម្មជាតិ​ ​និង​ទាមទារ​ឲ្យ​រដ្ឋាភិបាល​ការពារ​បរិស្ថាន​ជាដើម​នោះ​ ​គឺ​មិន​អាច​ចាត់ទុកថា​ ជា​បទឧក្រិដ្ឋ​បាន​នោះ​ទេ​។​

ជាពិសេស​ជាង​នេះ​លោក​ ហ្វ៊ីល រ៉ូប៊ើតសុន​ ​ស្នើ​ឲ្យ​រដ្ឋមន្រ្តី​ការបរទេស​អង់គ្លេស​រូប​នេះ​ ​យក​បញ្ហា​សិទ្ធិមនុស្ស​ជា​អាទិភាព​ ​ដោយ​ដាក់​សម្ពាធ​លើ​រដ្ឋាភិបាល​កម្ពុជា​ ​ឲ្យ​ស្តារ​សិទ្ធិមនុស្ស​ ​ប្រជាធិបតេយ្យ​ឡើង​ ​និង​ជាពិសេស​សិទ្ធិ​ការងារ​ឡើងវិញ​ ​មុននឹង​បន្ត​ទំនាក់ទំនង​ពាណិជ្ជកម្ម​រវាងប្រទេស​ទាំងពីរ​។​

មិនតែប៉ុណ្ណោះ​លោក​ ​ស្នើ​ឲ្យ​រដ្ឋមន្រ្តី​ការ​រ​ទេស​អង់គ្លេស​រូប​នេះ​ ​លៃលក​រក​ពេលវេលា​ ​ដើម្បី​ជួបមន្រ្តី​ជាន់ខ្ពស់​បក្ស​ប្រឆាំង​ ​រួម​មាន​លោក​ កឹម​ ​សុខា​ ​ជាដើម​ ​ដែល​កំពុង​​ប្រឈម​នឹង​ការ​ជាប់ពន្ធនាគារ​យូរឆ្នាំ​ ​ដោយសារតែ​បទ​ចោទ​បែប​ប្រឌិត​និង​គ្មាន​មូលដ្ឋាន​ ​និង​គួរ​ជួប​តំណាង​ប្រព័ន្ធ​ផ្សព្វផ្សាយ​ឯករាជ្យ​ ​និង​អ្នកកាសែត​ ​ដែល​​អាជ្ញាធរ​ធ្វើទុក្ខបុកម្នេញ​រាល់ថ្ងៃ​ ​មិន​ឲ្យ​ពួកគាត់​រាយការណ៍​ព័ត៌មាន​បាន​ដោយសេរី​។​

​រដ្ឋមន្រ្តី​ការបរទេស​អង់គ្លេស​លោក​ ដូមីនិក​ ​រ៉ាអាប់​ (​Dominic Raab) ​គ្រោង​ធ្វើ​ទស្សនកិច្ច​បី​ថ្ងៃ​ទៅកាន់​ប្រទេស​ចំនួន​បី​ក្នុង​តំបន់​អាស៊ាន​ ​ដោយ​ផ្តើម​ពី​ប្រទេស​វៀតណាម​ ​បន្ទាប់មក​កម្ពុជា​ ​និង​បញ្ចប់​ទស្សនកិច្ច​នៅ​ប្រទេស​សិង្ហបុរី​។​ ​ក្រសួងការបរទេស​អង់គ្លេស​បញ្ជាក់​ថា​ ​ដំណើរ​ទស្សនកិច្ច​របស់​មន្រ្តី​ការបរទេស​អង់គ្លេស​មក​កម្ពុជា​នេះ​ ​គឺ​ដើម្បី​ពង្រឹង​ភាពជា​ដៃគូ​រវាង​អង់គ្លេស​ ​និង​សហគមន៍​អាស៊ាន​ ​ដែល​ប្រទេស​កម្ពុជា​នឹង​ធ្វើជា​ប្រធាន​ប្តូរ​វេន​ ​នៅ​ឆ្នាំក្រោយ​។​

នេះ​ជា​លើកទីមួយ​ហើយ​ ​ដែល​រដ្ឋមន្រ្តី​ការបរទេស​អង់គ្លេស​ ​មក​បំពេញ​ទស្សនកិច្ច​ផ្លូវការ​នៅ​កម្ពុជា​ ​ក្នុងរយៈពេល​ ​៣​០​ ​ឆ្នាំ​នៃ​ទំនាក់ទំនង​ការទូត​រវាងប្រទេស​អង់គ្លេស​ ​និង​កម្ពុជា​។​ ​ប៉ុន្តែ​​លោកនាយក​រដ្ឋមន្រ្តី ​ហ៊ុន​ ​សែន​ ​សម្រេច​លុបចោល​ជំនួប​ជាមួយ​រដ្ឋមន្រ្តី​រូប​នេះ​ ​ដោយ​លោក​អះអាង​ថា​ ​គ្រូពេទ្យ​តម្រូវ​ឲ្យ​លោក​ធ្វើ​ចត្តាឡី​ស័ក​ ​១​៤​ថ្ងៃ​ រហូតដល់​ថ្ងៃ​ទី​៣​ ​ខែ​​កក្កដា​ ​ព្រោះ​លោក​ពាក់ព័ន្ធ​ដោយប្រយោល​ជាមួយ​អ្នក​កើតជំងឺ​កូវីដ​-​១៩​។​

​ទោះ​ជា​យ៉ាងនេះ​ក្ដី​ ​លោក​ ​ហ៊ុន​ ​សែន​ ​មិនបាន​បញ្ជាក់​ថា ​តើ​លោក​ប៉ះពាល់​ដោយប្រយោល​ជាមួយ​អ្នក​កើតជំងឺ​កូ​វី​ដ​-​១​៩​ ​នោះ​ដោយ​របៀបណា​នោះ​ឡើយ​ ​បើ​លោក​ធ្វើការ​ពី​ផ្ទះ​ ​និង​នៅ​ដាច់ដោយឡែក​ពី​អ្នកដទៃ​ច្រើន​ខែ​មក​ហើយ​នេះ​។​ ​ជាង​នេះ​ទៅទៀត​លោក​ ​ហ៊ុន​ ​សែន​ ​បាន​ចាក់​វ៉ាក់សាំង​បង្ការ​ជំងឺ​កូវីដ​-​១​៩​ ​ឈ្មោះ​អាស្រ្តាហ្ស៊េណកា​ (​AstraZeneca) ​របស់​អង់គ្លេស​គ្រប់​ពីរ​ដូស​ ​ជាង​ពីរ​ខែ​មក​ហើយ​ដែរ​។​

វិទ្យុ​អាស៊ី​សេរី​ ​មិន​អាច​សុំ​ការ​បំភ្លឺ​ពី​អ្នកនាំពាក្យ​ក្រសួងការបរទេស​លោក​ ​កុយ​ គួង​ ​និង​ប្រធាន​អង្គភាព​អ្នកនាំពាក្យ​រដ្ឋាភិបាល​លោក​ ​ផៃ​ ​ស៊ី​ផា​ន​ ​ជុំវិញ​រឿង​នេះ​ ​និង​ការ​ឆ្លើយតប​ទៅ​នឹង​សេចក្តីថ្លែង​ការណ៍​របស់​អង្គការ​ឃ្លាំមើល​សិទ្ធិមនុស្ស​អន្តរជាតិ​នេះ​ ​បាន​នៅឡើយ​ទេ​។​

ទោះបីជា​យ៉ាងនេះ​ក្ដី​ ​ក្រសួងការបរទេស​កម្ពុជា​ ​ថ្លែង​នៅ​ក្នុង​សេចក្តីប្រកាស​ព័ត៌មាន​របស់​ខ្លួន​ ​កាលពី​ថ្ងៃ​ទី​២​១​ ​ខែ​​មិថុនា​ ​អំពី​ដំណើរ​ទស្សនកិច្ច​នេះ​ ​ថា​កម្ពុជា​ជា​អ្នក​អញ្ជើញ​រដ្ឋមន្រ្តី​ការបរទេស​អង់គ្លេស​ ​ដើម្បី​មក​ប្រជុំ​ទ្វេ​ភាគី​ ​ដែល​ផ្តោត​លើ​កិច្ច​សហប្រតិបត្តិការ​នៃ​ប្រទេស​ទាំងពីរ​ ​និង​បញ្ហា​តំបន់​និង​អន្តរជាតិ​ផង​ ​ដែល​ជា​ប្រយោជន៍​ ​និង​កង្វល់​រួម​។​

​កាល​នៅ​ជា​សមាជិក​របស់​សហភាព​អឺរ៉ុប​ ​ប្រទេស​អង់គ្លេស​ ​ជា​ប្រទេស​ឈាន​មុខ​គេ​មួយ​ ​ក្នុងចំណោម​ប្រទេស​ប្រជាធិបតេយ្យ​សេរី​ជាច្រើន​ទៀត​ ​ដែល​តែងតែ​ថ្កោល​ទោស​​របប​ក្រុងភ្នំពេញ​ ​ក្នុង​ការរំលោភ​សិទ្ធិមនុស្ស​ ​និង​បំផ្លាញ​ប្រជាធិបតេយ្យ​ ​ក្រោយ​រម្លាយ​គណបក្ស​សង្គ្រោះ​ជាតិ​ ​និង​ធ្វើទុក្ខបុកម្នេញ​សំឡេង​ប្រឆាំង​ឥត​ស្រាកស្រាន្ត​។​ ​ប្រទេស​នេះ​ ​ធ្លាប់​បញ្ជាក់​ថា​ ​ពេល​ដកខ្លួន​ចេញពី​សហភាព​អឺរ៉ុប​ ​ខ្លួន​នឹង​ពិចារណា​ឡើងវិញ​ ​អំពី​ការ​ដាក់ទណ្ឌកម្ម​កម្ពុជា​ ​រឿង​ដក​ប្រព័ន្ធ​អនុគ្រោះ​ពន្ធ​ ​EBA​ ​២០%​នោះ​។​ ​ប៉ុន្តែ​ ​ខ្លួន​នឹង​នៅតែ​ប្រកាន់​ជំហរ​ ​រឿង​គោរព​សិទ្ធិមនុស្ស​ ​និង​ប្រជាធិបតេយ្យ​។​

អ្នកឃ្លាំមើល​ការ​អភិវឌុ្ឍ​សង្គម​លោក​បណ្ឌិត​ ​សេង​ ​សារី​ ​ថា​ប្រទេស​អង់គ្លេស​ ​នៅ​មាន​ឥទ្ធិពល​លើ​ប្រទេស​កម្ពុជា​ ​តែ​ផ្នែក​ពាណិជ្ជកម្ម​មួយ​តែប៉ុណ្ណោះ​ ​ព្រោះ​ប្រទេស​នេះ​​ជា​ទី​ផ្សារ​ធំ​មួយ​ដែរ​ ​សម្រាប់​នាំចូល​ផលិតផល​ពី​កម្ពុជា​ ​រួម​មាន​ផលិតផល​កាត់​ដេរ​ ​ស្បែកជើង​ ​និង​អង្ករ​ជាដើម​ ​ដែល​មាន​ទំហំ​ជិត​ ​១​ពាន់​លាន​ដុល្លារ​ (​៦៦១ ផោន​) ​កាលពី​ឆ្នាំ​ ​២០២០៕