ដោយ ម៉ៅ សុធានី
2021-06-26 rfa
តំណាងអង្គការសុខភាពពិភពលោក (WHO) ប្រចាំកម្ពុជា អ្នកស្រីវេជ្ជបណ្ឌិត លី អាយលែន (Li Ailan)។
រូប៖ ក្រសួងព័ត៌មាន
តំណាងអង្គការសុខភាពពិភពលោក (WHO) ប្រចាំកម្ពុជា អ្នកស្រីវេជ្ជបណ្ឌិត លី អាយលែន (Li Ailan) បារម្ភយ៉ាងខ្លាំង ពីការឆ្លងរាលដាលខ្លាំងនៃ វីរុសកូវីដ-១៩ បំប្លែងខ្លួនថ្មី ដែលមានប្រភពនៅប្រទេសឥណ្ឌា ឈ្មោះ ដែលតា (Delta) ឬ B.1.617.2 ត្រូវបានរកឃើញនៅកម្ពុជា តាមរយៈការនាំចូលពីក្រៅប្រទេសកន្លងមក។
អ្នកស្រីបានសរសេរក្នុងបណ្ដាញសង្គមធ្វីតធើ (Twitter) កាលពីថ្ងៃទី២៦ ខែមិថុនា ម្សិលមិញថា ប្រជាពលរដ្ឋខ្មែរ ត្រូវតែចូលរួមឲ្យសកម្ម និងទទួលខុសត្រូវ ដើម្បីបន្តអនុវត្តវិធានការសុខាភិបាលឲ្យបានត្រឹមត្រូវ ក្នុងការទប់ស្កាត់និងការពារការឆ្លងនៃ “វីរុសបំប្លែងថ្មីឈ្មោះដែលតានេះ ដែលបានរកឃើញជាបន្តបន្ទាប់នៅកម្ពុជា។
ក្រសួងសុខាភិបាល កាលពីថ្ងៃទី២៥ ខែមិថុនា បានចេញសេចក្តីប្រកាសព័ត៌មានមួយ ដោយណែនាំដល់គណៈអភិបាលរាជធានីខេត្តទាំង២៥ ស្ដីពីការពង្រឹងវិធានការចត្តាឡីស័កនៅតាមបណ្តា ច្រកព្រំដែន និងការពង្រឹងវិធានការរដ្ឋបាលចាំបាច់ ដើម្បីទប់ស្កាត់ការរីករាលដាលវីរុសកូវីដ-១៩ បំប្លែងថ្មីនេះ នៅក្នុងសហគមន៍។
គិតត្រឹមថ្ងៃទី២៦ ខែមិថុនា ចំនួនអ្នកស្លាប់ដោយសារជំងឺកូវីដ-១៩ (Covid-19) បានកើនឡើងដល់ ៥២៣នាក់ហើយ។ ចំណែកតួលេខអ្នកឆ្លងជំងឺកូវីដ-១៩ នៅកម្ពុជា សរុបមានជិត ៤ម៉ឺន ៧ពាន់នាក់ (៤៦.៨១០) ក្នុងនោះអ្នកជាសះស្បើយមានជាង ៤ម៉ឺន ១ពាន់នាក់ (៤១.៤៣៩)។
ទាក់ទងនឹងវ៉ាក់សាំងបង្ការជំងឺកូវីដ-១៩ វិញ ប្រទេសចិនបានបញ្ជូនវ៉ាក់សាំងស៊ីណូវ៉ាក់ (Sinovac) ចំនួន ១លានដូសទៀត មកដល់កម្ពុជានៅព្រឹកថ្ងៃដដែលនេះ ដែលវ៉ាក់សាំងទាំងនោះ រដ្ឋាភិបាលកម្ពុជាបានបញ្ជាទិញពីប្រទេសចិន។ គិតមកដល់ពេលនេះ កម្ពុជាទទួលបានវ៉ាក់សាំងទាំងជំនួយ និងបញ្ជាទិញ សរុបជាង ១០លានដូសហើយ ដោយភាគច្រើនជាវ៉ាក់សាំងរបស់ចិន។
រដ្ឋាភិបាលបានសម្រុកចាក់វ៉ាក់សាំងទាំងនោះជូនពលរដ្ឋ បានជិត ៤លាននាក់ ឬស្មើនឹងជាង ៣៨% ក្នុងចំណោមប្រជាជនដែលត្រូវចាក់វ៉ាក់សាំងចំនួន ១០លាននាក់៕
No comments:
Post a Comment