ដោយ ជាតិ ចំណាន
2021-12-26
លោក ហេង សួរ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ និងដែលគេស្គាល់ថា ជាមនុស្សស្និទ្ធនឹងកូនប្រុសច្បងលោកនាយករដ្ឋមន្ត្រីហ៊ុន សែន គឺលោក ហ៊ុន ម៉ាណែត។
រូប៖ ហ្វេសប៊ុកលោក ហេង សួរ
ក្រុមយុវជននិងសកម្មជនសង្គម ប្ដេជ្ញាធ្វើយុទ្ធនាការលើកបដាទាមទារតាមហ្វេសប៊ុក (facebook) ឲ្យមន្រី្តជាន់ខ្ពស់ក្រសួងការងារលោក ហេង សួរ លុបសារគំរាមកំហែង និងបញ្ឈប់ការលាបពណ៌កម្មករ។ សហជីព ថាសារគំរាមរបស់លោកហេង សួរ មានចរិតជាការលាបពណ៌ និងគាបសង្កត់ធ្ងន់ធ្ងរដល់សិទ្ធិធ្វើបាតុកម្ម។
សកម្មជនសង្គម នឹងធ្វើការតស៊ូមតិទាមទាររហូតទាល់តែរដ្ឋលេខាធិការ និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈលោក ហេង សួរ ព្រមចេញមុខមកបកស្រាយ និងសន្យាបញ្ឈប់ការគំរាមកំហែងកម្មករបន្តទៀត ពិសេស គឺការលាបពណ៌កម្មករដោយភ្ជាប់ទៅនឹងបទឧក្រិដ្ឋកម្មធ្ងន់ធ្ងរដូចជាការធ្វើបដិវត្តន៍ពណ៌ជាដើម។
យុវជននៃក្រុមខ្មែរថាវរៈលោក ស្វាយ សំណាង បញ្ជាក់ថា ក្នុងករណីលោក ហេង សួរ មិនព្រមចេញមុខបកស្រាយឲ្យច្បាស់ និងមិនព្រមបញ្ឈប់ការគំរាមកំហែងទេ ក្រុមយុវជនប្ដេជ្ញាថា ពួកគេនឹងបង្កើនការទាមទារតាមបណ្ដាញសង្គម (facebook) ឲ្យខ្លាំងក្លាបន្ថែមទៀត៖ «ឃើញថាប៉ុន្មានថ្ងៃនេះ គឺមានសន្ទុះនៃការចូលរួមច្រើនដែរ ការចែករំលែកនៅលើបណ្ដាញសង្គម ក៏ដូចជា នៅក្នុងផេកផ្ទាល់របស់លោកហេង សួរ កន្លែងសំណេរដែលគាត់បានបង្ហោះហ្នឹង ក៏មានគេស្នើសុំឲ្យគាត់លុបចេញដែរ»។
យុវជននៃក្រុមខ្មែរថាវរៈម្នាក់ទៀត គឺកញ្ញា អេង វ៉ាន់ឌី សោកស្ដាយចំពោះការប្រើសារទាំងបំពាន និងបំផ្លើសរបស់លោក ហេង សួរ។ កញ្ញាយល់ថា លោក ហេង សួរ គួរតែលុបសារនេះចោល ហើយបញ្ឈប់ការគំរាមកម្មករទើបជារឿងប្រសើរ។ កញ្ញាប្ដេជ្ញាថា នឹងចូលរួមបង្ហោះសារយុទ្ធនាការនេះរហូតទាល់តែលោក ហេង សួរ ឈប់ប្រើអំណាចសម្លុតស្ត្រីជាកម្មករបន្តទៀត៖ «លោក ហេង សួរ មកបកស្រាយពីសំណេររបស់គាត់អ៊ីចឹងណា ហើយគួរលុបសំណេរចេញពីបណ្ដាញសង្គមអ៊ីចឹងណា លោកពូ»។
យុទ្ធនាការរបស់ក្រុមយុវជននេះ គឺបន្ទាប់ពីលោក ហេង សួរ បានបញ្ចេញសារបែបចោទប្រកាន់ និងលាបពណ៌លើអ្នកតវ៉ា នៅចំពេលក្រុមបុគ្គលិក និងនិយោជិតនៃក្រុមហ៊ុនកាស៊ីណូណាហ្គាវើល៍ (Nagaworld) រាប់ពាន់នាក់កំពុងផ្ទុះកូដកម្មទ្រង់ទ្រាយធំទាមទារឱ្យក្រុមហ៊ុនគោរពសិទ្ធិ និងច្បាប់ការងារ។ លោកសរសេរលើហ្វេសប៊ុកកាលពីថ្ងៃទី១៩ ខែធ្នូ ក្នុងន័យថា ការតវ៉ាដោយប្រើប្រាស់អនីតិជន ឬស្ត្រី ពិសេសស្ត្រីមានកូនខ្ចី ឬស្ត្រីមានផ្ទៃពោះ ជាតាក់ទិចដែលមានសរសេរនៅក្នុងក្បួនរបស់អ្នករៀបចំចលនាបដិវត្តន៍ពណ៌នៅប្រទេសណាមួយ។ អ្នករៀបចំផែនការតែងតែបន់ស្រន់ឱ្យមានគ្រោះថ្នាក់ដោយចៃដន្យណាមួយកើតឡើងលើអនីតិជន ឬលើស្រ្តី ដើម្បីទាក់ទាញសមានចិត្ត និងបញ្ឆេះកំហឹងមហាជន។
ពាក់ព័ន្ធករណីនេះ វិទ្យុអាស៊ីសេរីមិនអាចសុំការបញ្ជាក់ពីលោក ហេង សួរ បានទេនៅថ្ងៃទី២៥ ខែធ្នូ។ ប៉ុន្តែលោកបានប្រាប់វិទ្យុអាស៊ីសេរីកាលពីថ្ងៃទី២០ ខែធ្នូ ថា លោកមិនបានចោទនរណាទេ តែសាររបស់លោកនេះជាការចែករំលែកចំណេះដឹងទាក់ទងនឹងតាក់តិកនៃការធ្វើបដិវត្តន៍ពណ៌ប៉ុណ្ណោះ៖ «វាជាចំណេះដឹង គួរតែជាព័ត៌មានដែលយើងដឹង ហើយដកពិសោធន៍ ប្រយ័ត្នប្រយែងក្នុងការអនុវត្តការងារហ្នឹង»។
ផ្ទុយពីការបកស្រាយនេះ ប្រធានសហព័ន្ធសហជីពឯករាជ្យលោក រី សិទ្ធីណែត ថ្លែងថា លោក ហេង សួរ គួរតែបញ្ឈប់ការលាបពណ៌កម្មករ ព្រោះការធ្វើបែបនេះ បង្ហាញឲ្យឃើញថា លោក ហេង សួរ ជាតំណាងក្រសួងការងារអសមត្ថភាពដោះស្រាយវិវាទ និងមិនយកចិត្តទុកដាក់ចំពោះកម្មករ។ មេសហជីពរូបនេះ ព្រួយបារម្ភថា ការចោទប្រកាន់ និងការលាបពណ៌ក្នុងន័យបំបិទសិទ្ធិកម្មករនេះ នឹងក្លាយជាទម្លាប់អាក្រក់ ហើយប៉ះពាល់ធ្ងន់ធ្ងរដល់សិទ្ធិ និងផលប្រយោជន៍កម្មករ។ លោកបញ្ជាក់ថា ការធ្វើបាតុកម្ម គឺជាសិទ្ធិស្របច្បាប់ ដោយសារកម្មករមិនទទួលបានដំណោះស្រាយ៖ «វិវាទការងារទេ ហើយលក្ខខណ្ឌដែលសហជីពនៅណាហ្គាវើលដ៍ទាមទារ គឺលក្ខខណ្ឌការងារ មិនមែនជាបដិវត្តន៍ពណ៌ទេ»។
លោក ហេង សួរ ដែលគេស្គាល់ថា ជាមនុស្សស្និទ្ធនឹងកូនប្រុសច្បងលោកនាយករដ្ឋមន្ត្រីហ៊ុន សែន គឺលោក ហ៊ុន ម៉ាណែត តែងតែបានប្រើសារសម្លុតគំរាមកម្មករ ពលករ តាមអំពើចិត្តគ្រប់រូបភាព។ កាលពីឆ្នាំ២០១៨ មានសារសំឡេងបែកធ្លាយមួយដែលគេសង្ស័យថា ជាសាររបស់លោក ហេង សួរ ដោយលោកមានបំណងឱ្យក្រុមអ្នកលេងតាមព្រួតវាយពលករខ្មែរណា ដែលហ៊ានតវ៉ានៅប្រទេសជប៉ុន ប្រឆាំងនឹងរដ្ឋាភិបាល ឬក៏លបសម្លាប់ពួកគេនៅពេលដែលវិលត្រឡប់មកកម្ពុជាវិញ។ នៅខែមេសា ឆ្នាំ២០២១ លោក ហេង សួរ ក៏ធ្លាប់ផ្ដួចផ្ដើមគំនិតឲ្យថៅកែបណ្ដេញកម្មករណាដែលមិនព្រមចាក់វ៉ាក់សាំងចិន ដែលគ្មានការទទួលស្គាល់ត្រឹមត្រូវនៅពេលនោះ ដោយគ្មានផ្ដល់ប្រាក់សំណងដែរ៕
No comments:
Post a Comment