ដោយ ទីន ហ្សាការីយ៉ា
2021-12-15
លោក ហ៊ុន សែន ពេលចូលរួមសម្ពោធដាក់ឱ្យប្រើប្រាស់សណ្ឋាគារ «ហាយ៉ាត់ រីជិនស៊ី ភ្នំពេញ» នៅព្រឹកថ្ងៃពុធ ទី១៥ ខែធ្នូ ឆ្នាំ២០២១ នៅរាជធានីភ្នំពេញ។
រូប៖ ហ្វេសប៊ុក SMP
មេដឹកនាំរដ្ឋាភិបាលឯកបក្សលោក ហ៊ុន សែន អះអាងថា លោកនឹងប្រឹងប្រែង សម្រួលសភាពការណ៍នៅប្រទេសភូមា ឬមីយ៉ាន់ម៉ា (Myanmar) ឱ្យវិលទៅរកស្ថានភាពមួយល្អប្រសើរ។ អ្នកតាមដានស្ថានការណ៍នយោបាយជំរុញឱ្យមេដឹកនាំកម្ពុជារូបនេះ កុំព្យាយាមទាញរបបសឹកភូមាឱ្យចូលវេទិកាថ្នាក់តំបន់ និងអន្តរជាតិដែលកម្ពុជាគ្រោងរៀបចំក្នុងនាមជាប្រធានប្ដូរវេនអាស៊ាន ដើម្បីចៀសវាងការខូចឈ្មោះលើឆាកអន្តរជាតិ។
លោកនាយករដ្ឋមន្ត្រី ហ៊ុន សែន ប្រកាសតាំងខ្លួនថា ជាអ្នកពូកែចរចារកដំណោះស្រាយ ហើយលោកនឹងយកបទពិសោធន៍ដែលមាន ដើម្បីទៅចរចារកដំណោះស្រាយវិបត្តិនយោបាយនៅប្រទេសភូមា។ លោកស្នើដល់មជ្ឈដ្ឋាននានាឱ្យឈប់រិះគន់ ឬបញ្ចេញយោបល់ចំពោះដំណើរទស្សនកិច្ចរបស់លោកទៅកាន់ប្រទេសភូមា ដោយទុកពេលឱ្យលោកធ្វើការសិន៖ «ការចរចាដែលបានផលបំផុត គឺការចរចា អាលើតុគ្រាន់តែយកមកប្រថាប់ត្រាទេ អាក្រោមតុ ទើបវាសំខាន់។ អ៊ីចឹងការជួបផ្ទាល់ជាមួយមេដឹកនាំនៅមីយ៉ាន់ម៉ា វាសំខាន់ណាស់សម្រាប់ខ្ញុំ។ សូមកុំរំខានខ្ញុំ ទុកពេលវេលាឱ្យខ្ញុំធ្វើ។ ខ្ញុំមិនមែនធ្វើគ្រូអស់លោកអ្នកទេ ក៏ប៉ុន្តែអស់លោកអ្នកគួរកុំតាំងខ្លួនធ្វើជាគ្រូរបស់ខ្ញុំ»។
លោក ហ៊ុន សែន ថ្លែងបែបនេះនៅចំពោះមុខមន្ត្រីរដ្ឋាភិបាល និងអ្នកការទូតបរទេសជាច្រើននាក់ ក្នុងពិធីសម្ពោធសណ្ឋាគារឯកជនមួយ នៅព្រឹកថ្ងៃទី១៥ ខែធ្នូ ឆ្នាំ២០២១នេះ។ ថ្វីបើតាំងខ្លួនជាអ្នកពូកែចរចាយ៉ាងនេះក្ដី លោក ហ៊ុន សែន បានទទូចទុកជាមុនដល់សហគមន៍ជាតិ និងអន្តរជាតិ កុំឱ្យស្ដីបន្ទោសលោក ប្រសិនបើលោកមិនអាចដោះស្រាយវិបត្តិនៅប្រទេសភូមាបានទេនោះ៖ «សូមកុំបន្ទោសខ្ញុំ! សូមនិយាយគ្នាឱ្យហើយ កុំបន្ទោសឱ្យសោះ។ ដោះ(ស្រាយ)ចប់ ឬមិនចប់ វាមិនចំណុះលើអាស៊ានទេ។ អាស៊ានគ្រាន់តែជាចំណែកក្នុងការជួយដល់មីយ៉ាន់ម៉ា ក៏ប៉ុន្តែដោះបញ្ហាខ្លួនឯង គឺមីយ៉ាន់ម៉ាខ្លួនឯងជាអ្នកដោះ។ តែកម្ពុជានឹងខិតខំដើម្បីសម្រួលសភាពការណ៍មីយ៉ាន់ម៉ា ដើម្បីវិលត្រឡប់ទៅរកស្ថានភាពមួយដ៏ប្រសើរ»។
លោកនាយករដ្ឋមន្ត្រី ហ៊ុន សែន គ្រោងដឹកនាំគណៈប្រតិភូទៅបំពេញទស្សនកិច្ចនៅប្រទេសភូមា ដើម្បីជួបជាមួយមេដឹកនាំរដ្ឋប្រហារយោធាភូមាលោក មីន អ៊ុងឡាំង (Min Aung Hlaing) នៅថ្ងៃទី៧ និងទី៨ ខែមករា ឆ្នាំ២០២២។ លោកបញ្ជាក់ជាថ្មីទៀតថា លោកមិនអាចធ្វើការជាមួយអ្នកណាផ្សេង ក្រៅពីមេដឹកនាំយោធារូបនេះឡើយ។
លោកប្រកាសថា លោកនឹងតែងតាំងរដ្ឋមន្ត្រីការបរទេសលោក ប្រាក់ សុខុន ជាបេសកជនពិសេសរបស់ប្រធានអាស៊ាន និងរដ្ឋមន្ត្រីក្រសួងឧស្សាហកម្ម លោក ចម ប្រសិទ្ធ ជាជំនួយការ សម្រាប់សម្របសម្រួលជាមួយភាគីភូមា។ លោក ហ៊ុន សែន អះអាងម្ដងទៀតថា ការព្យាយាមទាញប្រទេសភូមាឱ្យត្រឡប់មកវិញនេះ ជាការអនុវត្តតាមធម្មនុញ្ញអាស៊ាន និងជាការសង្គ្រោះអង្គការតំបន់មួយនេះ ដែលលោកថា កំពុងបែកបាក់គ្នាដោយសារវិបត្តិនៅភូមា។
ទោះជាយ៉ាងណា ក្រុមអ្នកតាមដានស្ថានការណ៍នយោបាយពិនិត្យឃើញថា ប្រទេសភូមាត្រូវបានគេផាត់ចេញពីវេទិកាថ្នាក់តំបន់ និងអន្តរជាតិ ដោយសារតែប្រទេសនេះកំពុងគ្រប់គ្រងដោយរបបសឹក ដែលកាប់សម្លាប់ និងបង្ក្រាបដោយហិង្សាលើពលរដ្ឋរបស់ខ្លួន។ អ្នកឃ្លាំមើលថា ករណីនេះមិនមែនបង្ហាញថា អាស៊ានបែកបាក់នោះទេ តែបង្ហាញថា អាស៊ានមានសាមគ្គីភាពក្នុងការដាក់សម្ពាធលើមេដឹកនាំប្រទេសសមាជិករូបណាដែលប្រព្រឹត្តអំពើរំលោភសិទ្ធិមនុស្សធ្ងន់ធ្ងរទៅវិញទេ។
អគ្គលេខាធិការសហព័ន្ធនិស្សិតបញ្ញវន្តកម្ពុជា លោក គៀន ពន្លក ថ្លែងថា ទោះបីជាវិបត្តិនយោបាយនៅប្រទេសភូមាជាបញ្ហាផ្ទៃក្នុងរបស់ភូមាក៏ដោយ ក៏ពេលនេះវាហាក់បានក្លាយជាបញ្ហាអន្តរជាតិរួចទៅហើយ ព្រោះសហគមន៍អន្តរជាតិកំពុងជួយឈឺឆ្អាលច្រើន។ ក្នុងបរិបទបែបនេះ លោកថា លោកនាយករដ្ឋមន្ត្រី ហ៊ុន សែន មិនគួរបង្ហាញជំហរគាំទ្ររបបសឹកភូមានោះទេ ហើយរឹតតែមិនគួរប្រឹងប្រែងទាញរបបនេះឱ្យចូលមកក្នុងវេទិកាអាស៊ានវិញនោះឡើយ៖ «នេះគឺជាដំណើរមួយដែលលោកនាយករដ្ឋមន្ត្រី ហ៊ុន សែន កំពុងតែលម្អៀងទៅមេដឹកនាំផ្ដាច់ការ ដែលអន្តរជាតិកំពុងតែថ្កោលទោស ហើយជាពិសេសហ្នឹង គឺប្រសិនបើកម្ពុជានៅតែបន្តគាំទ្រមេដឹកនាំផ្ដាច់ការបែបនេះទៀត ខ្ញុំគិតថា នេះគ្រាន់តែជាលេសមួយដើម្បីចងសម្ពន្ធភាព។ ហើយរដ្ឋាភិបាលកម្ពុជាក៏ប្រឈមទៅនឹងការដាក់ទណ្ឌកម្មទាំងផ្នែកសេដ្ឋកិច្ច និងផ្នែកនយោបាយ ដូចប្រទេសភូមាដែរ»។
ទាក់ទងនឹងការចរចារកដំណោះស្រាយវិបត្តិនៅប្រទេសភូមានេះដែរ អ្នកស្រាវជ្រាវផ្នែកភូមិសាស្ត្រនយោបាយលោក វណ្ណ ប៊ុនណា ថ្លែងថា រដ្ឋាភិបាលកម្ពុជាក៏ត្រូវធ្វើការជាមួយគណបក្សឈ្នះឆ្នោតរបស់អ្នកស្រី អ៊ុង សានសូជី (Aung San Suu Kyi) ដែរ ដើម្បីបង្កើតទំនុកចិត្តពីគ្រប់ភាគី និងទទួលបានដំណោះស្រាយរួម៖ «កម្ពុជាជារឿងល្អហើយ ដែលទៅជួបប្រាស្រ័យទាក់ទងជាមួយពួកមេដឹកនាំយោធាភូមាហ្នឹង ក៏ប៉ុន្តែជាជំហានបន្ទាប់កម្ពុជាត្រូវតែប្រាកដថា ខ្លួននឹងបញ្ចូល ឬមានទំនាក់ទំនងជាមួយរដ្ឋាភិបាលស្រមោលរបស់ក្រុមស៊ីវិលភូមាផងដែរ អាហ្នឹងទើបដំណោះស្រាយអាចកើតចេញជារូបរាងទៅបាន។ បើទាក់ទងទៅខាងតែយោធា ហើយយោធាមិនអនុញ្ញាតឱ្យទៅជួបខាងរដ្ឋាភិបាលស៊ីវិលទេ អាហ្នឹងចង់ ឬមិនចង់ វានៅតែជារឿងមិនទទួលបានជោគជ័យ ឬក៏យើងអាចហៅថាបរាជ័យដដែល។ ហើយបើរឿងហ្នឹងបរាជ័យទៅ វាធ្វើឱ្យការចូលរួមរបស់កម្ពុជាជាមួយពួកមេដឹកនាំយោធា(ភូមា)ហ្នឹងគ្រាន់តែជាលក្ខណៈបំពេញរូបភាពឱ្យមានភាពស្របច្បាប់បន្ថែមទៀតទៅលើមេដឹកនាំយោធា(ភូមា)»។
វិបត្តិនយោបាយនៅប្រទេសភូមាបានអូសបន្លាយរយៈពេលជិតមួយឆ្នាំមកហើយ បន្ទាប់ពីក្រុមយោធាបានធ្វើរដ្ឋប្រហារដណ្ដើមអំណាចពីរដ្ឋាភិបាលស៊ីវិលដឹកនាំដោយអ្នកស្រី អ៊ុង សានសូជី កាលពីដើមខែកុម្ភៈ ឆ្នាំ២០២១។ កងកម្លាំងយោធា និងសន្តិសុខ ក្រោមបញ្ជាការរបស់ឧត្តមសេនីយ៍ មីន អ៊ុងឡាំង បានវាយបង្ក្រាបក្នុងថ្លុកឈាមលើក្រុមពលរដ្ឋដែលតវ៉ាប្រឆាំងនឹងអំពើរដ្ឋប្រហារ និងចង់បានលទ្ធិប្រជាធិបតេយ្យ បណ្ដាលឱ្យមានមនុស្សស្លាបយ៉ាងហោចណាស់ជាង ១ពាន់ ៣រយនាក់ (១.៣០៥) និងជាង ១ម៉ឺននាក់ (១០.៧៥៦) ផ្សេងទៀត ត្រូវបានចាប់ខ្លួន ក្នុងនោះក៏រួមមានទាំងកុមារ និងស្ត្រីជាច្រើននាក់ផងដែរ។
ក្រុមអ្នកតាមដានស្ថានការណ៍នយោបាយព្រមានថា កម្ពុជាអាចនឹងខូចឈ្មោះថែមទៀតលើឆាកអន្តរជាតិ បើលោក ហ៊ុន សែន ដោះស្រាយវិបត្តិនៅប្រទេសភូមានេះមិនបានត្រឹមត្រូវ ជាពិសេសបើលោកនៅតែព្យាយាមទាញក្រុមមេដឹកនាំរបបសឹកភូមាឱ្យចូលវេទិកានានារបស់អាស៊ានឡើងវិញ។ ជាងនេះទៅទៀត ប្រជាពលរដ្ឋភូមាមួយចំនួនបានថ្កោលទោសលោក ហ៊ុន សែន ចំពោះដំណើរទស្សនកិច្ចទៅកាន់ប្រទេសភូមា ដោយពួកគេបានទាមទារឱ្យលោកដកខ្លួនថយពីឧក្រិដ្ឋកម្មរបស់ពួកយោធាភូមា បើពុំនោះទេ បុរសខ្លាំងនៃកម្ពុជារូបនេះនឹងក្លាយសត្រូវរបស់ពលរដ្ឋភូមា។ ថ្មីៗនេះទៀតសោត មន្ត្រីជាន់ខ្ពស់ក្រសួងការបរទេសអាមេរិក ក៏បានជំរុញកម្ពុជា កុំឱ្យធ្វើសម្បទានណាមួយទៅឱ្យរបបសឹកភូមា ក្នុងពេលដែលខ្លួនធ្វើជាប្រធានអាស៊ានផងដែរ៕
No comments:
Post a Comment