ដោយ ខែ សុណង
2021-12-21
(ស្ដាំទីពីរ) លោក ម៉ន ផល្លា ប្រធានគណៈកម្មាធិការប្រតិបត្តិបក្សសង្គ្រោះជាតិរាជធានីភ្នំពេញ ជួបលោក អាន់វ៉ា អ៊ីប្រាហ៊ីម (Anwar Ibrahim) មេដឹកនាំគណបក្សប្រឆាំងដ៏ល្បីរបស់ប្រទេសម៉ាឡេស៊ី និងមន្រ្តីជាន់ខ្ពស់រដ្ឋាភិបាលប្រទេសនេះ លោក មហាម៉ាត អាហ្ស្មី (Mohamad Abdul Hamid) (កណ្ដាល) នៅថ្ងៃទី២១ ខែធ្នូ ឆ្នាំ២០២១។
រូប៖ គេផ្ដល់ឱ្យ
មន្ត្រីគណបក្សសង្គ្រោះជាតិដែលកំពុងភៀសខ្លួននៅក្រៅប្រទេសបានជួបពិភាក្សាជាមួយជួបមេដឹកនាំគណបក្សប្រឆាំង និងមន្ត្រីជាន់ខ្ពស់រដ្ឋាភិបាលម៉ាឡេស៊ី ដើម្បីស្នើឱ្យរដ្ឋាភិបាលប្រទេសនេះជំរុញទៅរដ្ឋាភិបាលលោក ហ៊ុន សែន ឱ្យគោរពសិទ្ធិមនុស្ស និងស្ដារលទ្ធិប្រជាធិបតេយ្យឡើងវិញ។ ប៉ុន្តែមន្ត្រីជាន់ខ្ពស់គណបក្សកាន់អំណាចយល់ថា សកម្មភាពនេះ នឹងមិនបានផលអ្វីនោះទេ។
មន្ត្រីគណបក្សសង្គ្រោះជាតិបានជួបពិភាក្សាជាមួយមេដឹកនាំគណបក្សប្រឆាំងដ៏ល្បីរបស់ប្រទេសម៉ាឡេស៊ី គឺលោក អាន់វ៉ា អ៊ីប្រាហ៊ីម (Anwar Ibrahim) និងមន្រ្តីជាន់ខ្ពស់រដ្ឋាភិបាលប្រទេសនេះលោក មហាម៉ាត អាហ្ស្មី (Mohamad Abdul Hamid) នៅថ្ងៃទី ២១ ខែធ្នូ។ ពួកគេបានស្នើដល់តំណាងរាស្រ្តម៉ាឡេស៊ីជួយជំរុញឱ្យរដ្ឋាភិបាលលោក ហ៊ុន សែន ឱ្យងាកមកគោរពសិទ្ធិមនុស្ស និងស្តារប្រជាធិបតេយ្យឡើងវិញ។
ប្រធានគណៈកម្មាធិការប្រតិបត្តិបក្សសង្គ្រោះជាតិរាជធានីភ្នំពេញលោក ម៉ន ផល្លា ថ្លែងប្រាប់វិទ្យុអាស៊ីសេរីក្រោយជំនួបនោះថា មន្ត្រីគណបក្សសង្គ្រោះជាតិបានលើកឡើងអំពីស្ថានភាពនយោបាយនៅកម្ពុជា ដូចជាការធ្វើទុក្ខបុកម្នេញ គំរាមកំហែង និងរំលោភសិទ្ធិមនុស្សធ្ងន់ធ្ងរលើអ្នកប្រជាធិបតេយ្យដែលមាននិន្នាការផ្ទុយពីរដ្ឋាភិបាល។ លោកថា រូបភាពអាក្រក់ពីសំណាក់រដ្ឋាភិបាលកម្ពុជាជាបន្តបន្ទាប់មកនេះបានប៉ះពាល់ដល់មុខមាត់របស់សហគមនអាស៊ាន ដោយសារលោក ហ៊ុន សែន កំពុងគាំទ្រមេដឹងនាំយោធានៅភូមា(Burma)។ លោកក៏បានស្នើសុំឱ្យតំណាងរាស្រ្តប្រទេសមួយនេះអន្តរាគមន៍ទៅរដ្ឋាភិបាលកម្ពុជាដោះស្រាយវិបត្តិនយោបាយ ដោយបើកផ្លូវឱ្យមន្រ្តីគណបក្សប្រឆាំងចូលរួមការបោះឆ្នោតខាងមុខដោយសេរី ត្រឹមត្រូវនិងយុត្តិធម៌។ ជាមួយគ្នានេះ លោកបានស្នើឱ្យរដ្ឋាភិបាលម៉ាឡេស៊ីជួយយកចិត្តទុកដាក់ដល់ ពលករខ្មែរដែលកំពុងធ្វើការនៅប្រទេសម៉ាឡេស៊ីផងដែរ៖ «ខ្ញុំមានមោទកភាពនឹងជំនឿថាក្រោយពីខ្ញុំបានដាក់សំណើនេះទៅប្រធានគណបក្សប្រឆាំងដែលជាសមាជិកសភាប្រទេសម៉ាឡេស៊ី លោកបានទទួលសំណើផ្លូវការរបស់ខ្ញុំ ហើយគាត់នឹងមានទំនាក់ទំនង និងវិធានការតាមសមាជិកសភាគេនឹងធ្វើការពេលខាងមុខ»។
លោក ម៉ន ផល្លា បញ្ជាក់ថា មេបក្សប្រឆាំងរូបនេះ បានតាមដានពីស្ថានភាពនយោបាយនៅកម្ពុជារហូតមក ព្រមទាំងទទួលយកសំណើរបស់មន្ត្រីបក្សសង្គ្រោះជាតិ ដើម្បីជួយអន្តរាគមន៍ទៅរដ្ឋសភានិងរដ្ឋាភិបាលម៉ាឡេស៊ីតាមរយៈក្រសួងការបរទេស។
វិទ្យុអាស៊ីសេរីមិនអាចទាក់ទងអ្នកនាំពាក្យក្រសួងការបរទេសកម្ពុជា និងមន្ត្រីស្ថានទូតខ្មែរប្រចាំប្រទេសម៉ាឡេស៊ី ដើម្បីសុំអត្ថាធិប្បាយបញ្ហានេះបានទេ នៅថ្ងៃទី២១ ខែធ្នូ។
ប៉ុន្តែអ្នកនាំពាក្យគណបក្សប្រជាជនកម្ពុជា លោក សុខ ឥសាន លើកឡើងថារដ្ឋាភិបាលកម្ពុជាពុំមានការរំលោភសិទ្ធិមនុស្ស និងលទ្ធិប្រជាធិបតេយ្យដូចការលើករបស់មន្រ្តីបក្សប្រឆាំងនោះទេ។ លោកយល់ថាសកម្មភាពមន្រ្តីបក្សសង្គ្រោះជាតិស្វែងរកកិច្ចអន្តរាគមន៍ពីតំណាងរាស្ត្រប្រទេសម៉ាសឡេស៊ីមិនបានលទ្ធផលអ្វីនោះដែរ ព្រោះធម្មនុញ្ញអាស៊ានមិនបានអនុញ្ញាតឱ្យលូកជ្រៀតជ្រែកកិច្ចការផ្ទៃក្នុងរបស់ប្រទេសសមាជិកទាក់ទងរឿងសិទ្ធិមនុស្ស និងប្រជាធិបតេយ្យឡើយ៖ «នៅកម្ពុជាកំពុងដំណើរការលទ្ធិប្រជាធិបតេយ្យទៅតាមគោលការណ៍នៃកិច្ចព្រមព្រៀងទីក្រុងប៉ារីស ហើយអត់មានការរំលោភសិទ្ធិមនុស្សដែរ ហើយការប្រជុំអាស៊ាននេះអត់មានលើកយកបញ្ហាប្រទេសណាមកអនុវត្តទេ ជាពិសេសថាតើយកបញ្ហាសិទ្ធិមនុស្ស ឬលទ្ធិប្រជាធិបតេយ្យនៅកម្ពុជាគឺអត់មានហើយ»។
រដ្ឋាភិបាលឯកបក្សលោក ហ៊ុន សែន បានរំលាយគណបក្សសង្គ្រោះជាតិដែលមានអ្នកគាំទ្រជិតពាក់កណ្តាលប្រទេស កាលពីចុងឆ្នាំ២០១៧ រួចរៀបចំការបោះឆ្នោតដោយប្រមូលយកអាសនៈសភាទាំងស្រុងមកកាន់កាប់តែម្នាក់ឯង។ រដ្ឋាភិបាលបានបំបិទសិទ្ធិថ្នាក់ដឹកនាំគណបក្សប្រឆាំងចំនួន១១៨ នាក់ មិនឱ្យធ្វើនយោបាយរយៈពេល៥ ឆ្នាំ និងដកហូតយកអាសនៈពីថ្នាក់មូលដ្ឋានរហូតដល់ថ្នាក់ជាតិរបស់បក្សសង្គ្រោះជាតិទៅចែកគ្នាកាន់កាប់។ មកដល់ពេលនេះ ថ្នាក់ដឹកនាំ និងសកម្មជនបក្សប្រឆាំងជាច្រើនរូបកំពុងជាប់បណ្តឹងនៅតុលាការ ក្រោមបទចោទ ញុះញង់ និងរួមគំនិតក្បត់ ក្នុងនោះមួយចំនួនកំពុងជាប់ឃុំក្នុងពន្ធនាគារ និងភៀសខ្លួននៅក្រៅប្រទេស។ អាជ្ញាធរមិនមែនធ្វើទុកបុកម្នេញលើសកម្មជនគណបក្សសង្គ្រោះជាតិតែក្នុងប្រទេសនោះទេ សកម្មជនបក្សនេះដែលកំពុងភៀសខ្លួននៅក្រៅប្រទេសក៏អាជ្ញាធរបានតាមចាប់ខ្លួនបញ្ជូនទៅកម្ពុជាវិញដែរ។
បច្ចុប្បន្ននេះ សកម្មជនគណបក្សសង្គ្រោះជាតិដែលកំពុងភៀសខ្លួនក្នុងប្រទេសថៃ ម៉ាឡេស៊ី និងហ្វីលីពីនជាង១០០នាក់ ដោយពួកគាត់ភាគច្រើនត្រូវបានចោទប្រកាន់ក្នុងសំណុំរឿងដំណើរមាតុភូមិនិវត្តន៍របស់លោក សម រង្ស៊ី កាលពីថ្ងៃទី៩ វិច្ឆិកា ឆ្នាំ២០១៩។
ជុំវិញរឿងនេះ អគ្គលេខាសហព័ន្ធនិស្សិតបញ្ញវន្តកម្ពុជាលោក គៀន ពន្លក យល់ថាសកម្មភាពតស៊ូមតិតាមបណ្តាប្រទេសក្នុងតំបន់អាស៊ានអាចមានប្រសិទ្ធភាព និងជះឥទ្ធិលដល់មុខមាត់រដ្ឋាភិបាលលើឆាកអន្តរជាតិ ហើយលើសពីនេះពួកនឹងទទួលបានបទពិសោធន៍តស៊ូផ្នែកនយោបាយ និងលទ្ធិប្រជាធិបតេយ្យតាមរយៈការបោះឆ្នោត។ លោកជឿជាក់ថា ក្រោយទទួលជំនួបជាមួយអ្នកប្រជាធិបតេយ្យ ឬតំណាងរាស្រ្តម៉ាឡេស៊ីរួចនោះ ប្រទេសដែលគោរពលទ្ធិប្រជាធិបតេយ្យមួយនេះអាចនឹងរកមធ្យោបាយជួយអន្តរាគមន៍ក្រោមរូបភាពផ្សេងៗ ដើម្បីជំរុញឱ្យរដ្ឋាភិបាលកម្ពុជាបើកលំហការគោរពសិទ្ធិមនុស្សនិងប្រជាធិបតេយ្យឡើងវិញ៖ «ទាំងប្រទេសម៉ាឡេស៊ីនិងប្រទេសអាស៊ានដែលប្រកាន់របបប្រជាធិបតេយ្យហ្នឹង គេនៅតែទទួលស្គាល់គណបក្សសង្គ្រោះជាតិជាគណបក្សប្រឆាំងដ៏ធំជាងគេ ប្រជាប្រិយភាពជាងគេជាពិសេសបក្សសំបូរទៅដោយអ្នកប្រជាធិបតេយ្យ ហើយបញ្ហានេះហើយដែលធ្វើឱ្យគណបក្សកាន់អំណាចឈឺក្បាលកំពុងព្រួយបារម្ភថាស្ថានការណ៍ខាងមុខនឹងអាចប៉ះពាល់ទៅដល់ការកាន់អំណាច»។
មន្ត្រីគណបក្សសង្គ្រោះជាតិឱ្យដឹងទៀតថាក្រោយជួបពិភាក្សាជាមួយមេដឹកនាំប្រធានក្រុមតំណាងរាស្រ្តបក្សប្រឆាំងនៅម៉ាឡេស៊ីហើយ ពួកគេក៏គ្រោងជួបមន្រ្តីរដ្ឋាភិបាល សមាជិកសភា និងគណបក្សផ្សេងទៀតផងដែរ។
សហគមន៍ជាតិ និងអន្តរជាតិ និងគណបក្សសង្គ្រោះជាតិទទូចដល់រដ្ឋាភិបាលលោក ហ៊ុន សែន ឱ្យបញ្ឈប់ការធ្វើទុក្ខបុកម្នេញលើអ្នកដែលមាននិន្នាការផ្ទុយពីរដ្ឋាភិបាលតទៅទៀត ហើយរដ្ឋាភិបាល ត្រូវតែបើកលំហនយោបាយ ដើម្បីឱ្យប្រជាពលរដ្ឋអាចជ្រើសរើសគណបក្សនយោបាយដែលពួកគាត់ពេញចិត្ត ស្របតាមគោលការណ៍ប្រជាធិបតេយ្យឡើងវិញ ដើម្បីចៀសផុតពីសម្ពាធ ឬទណ្ឌកម្មនានារបស់អន្តរជាតិ៕
No comments:
Post a Comment