ដោយ មាន ឫទ្ធិ
2022-01-06
រដ្ឋលេខាធិការ និងជាអ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន ក្នុងវេទិកាអ្នកស្ដាប់វិទ្យុអាស៊ីសេរី នៅយប់ថ្ងៃទី៩ ខែឧសភា ឆ្នាំ២០១៦។
RFA
អ្នកនាំពាក្យរដ្ឋាភិបាលចោទប្រកាន់ថា ក្រុមអង្គការសង្គមស៊ីវិល កំពុងធ្វើការងារប្រឆាំងនឹងរដ្ឋាភិបាល ប៉ុន្តែ មន្ត្រីសង្គមស៊ីវិលអះអាងផ្ទុយវិញថា អង្គការសង្គមស៊ីវិលជាដៃគូរបស់រដ្ឋាភិបាលហើយធ្វើ ការងារដើម្បីចូលរួមចំណែកការអភិវឌ្ឍ និងលើកកម្ពស់ការគោរពសិទ្ធិមនុស្ស ប្រជាធិបតេយ្យ។
ការចោទប្រកាន់អង្គការសង្គមស៊ីវិល ពីមន្ត្រីជាន់ខ្ពស់រដ្ឋាភិបាលបែបនេះធ្វើឡើង ខណៈរដ្ឋាភិបាលបានចាត់វិធានការបង្ក្រាបឥតឈប់ឈរនូវសំឡេងមិនដែលស្របនឹងរដ្ឋាភិបាល ខណៈសហគមន៍អន្តរជាតិកំពុងថ្កោលទោសរដ្ឋាភិបាលថា បានរំលោភសិទ្ធិមនុស្ស និងប្រជាធិបតេយ្យធ្ងន់ធ្ងរ។
ថ្លែងក្នុងពិធីជួបជុំជាមួយអ្នកសារព័ត៌មានថ្ងៃទី០៦ ខែមករា នៅទីស្ដីការគណៈរដ្ឋមន្ត្រី អ្នកនាំពាក្យរដ្ឋាភិបាល លោក ផៃ ស៊ីផាន ចោទប្រកាន់ថា អង្គការសង្គមស៊ីវិលសព្វថ្ងៃមិនបានដើរជាអ្នកសម្របសម្រួលនោះទេ ប៉ុន្តែបានក្លាយជាអ្នកប្រឆាំងរដ្ឋាភិបាល។ លោកបន្តទៀតថា គោលជំហររបស់អង្គការសង្គមស៊ីវិលដែលបង្កើតឡើងដើម្បីគោរពច្បាប់ប៉ុន្តែការប្រតិបត្តិការងាររបស់អង្គការសង្គមស៊ីវិលមិនបានអនុវត្តបែបនេះទេ៖ «អ៊ិនជីអូ (NGO)ហ្នឹងគឺគាត់បង្កើតមកគាត់យករដ្ឋាភិបាលជាសត្រូវអត់ព្រមធ្វើការជាមួយគ្នា យើងគួរសោកស្ដាយ ប៉ុន្តែ ខ្ញុំជឿថា ឆ្នាំថ្មីនេះយើងមធ្យោបាយធ្វើយ៉ាងម៉េចដើម្បីកៀរគរជុំគ្នាមើលដើម្បីយើងចូលរួមទទួលខុសត្រូវចំពោះសន្តិភាព»។
ទោះយ៉ាងណាក្រុមមន្ត្រីអង្គការសង្គមស៊ីវិលលើកឡើងថា រដ្ឋាភិបាល និងអង្គការសង្គមស៊ីវិលជាដៃគូអភិវឌ្ឍន៍មិនអាចខ្វះមួយណាបាន។
នាយករងទទួលបន្ទុកកម្មវិធីឃ្លាំមើលសិទិ្ធមនុស្សនៃអង្គការលីកាដូ (Licadho) លោក អំ សំអាត យល់ថា ការចោទប្រកាន់អង្គការស៊ីវិលបែបនេះគឺជាការលាបពណ៌អង្គការសង្គមស៊ីវិល។ លោកលើកឡើងថា អង្គការរបស់លោកក៏ដូចអង្គការសង្គមស៊ីវិលផ្សេងទៀត បំពេញការងារដើម្បីចូលរួមអភិវឌ្ឍន៍ លើកកម្ពស់ការគោរពសិទ្ធិមនុស្ស និងបំពេញនូវភាពខ្វះចន្លោះរបស់រដ្ឋាភិបាល។ លោកបន្តថា ទោះការបំពេញការងារខ្លះមានទស្សនៈខ្វែងពីរដ្ឋាភិបាល មិនមែនបញ្ជាក់ថា អង្គការសង្គមស៊ីវិលប្រឆាំងរដ្ឋាភិបាលនោះទេ៖ «អ៊ីចឹងអ្វីក៏ដោយត្រូវចាត់ទុកគ្នាដៃគូមិនមែនអង្គការក្រៅរដ្ឋាភិបាលដែលយើងធ្វើការមានទស្សនៈខ្លះអាចនឹងខ្វែងគំនិតគ្នាជាមួយទស្សនៈរដ្ឋាភិបាលសុទ្ធតែប្រឆាំងនឹងរដ្ឋាភិបាល មិនកើតទេ បានន័យជាការលាបពណ៌ហើយមិនមែនជាការចូលរួមចំណែកជាមួយគ្នា»។
ស្រដៀងគ្នានេះដែរ អ្នកនាំពាក្យសមាគមការពារសិទ្ធិមនុស្ស អាដហុក (Adhoc) លោក ស៊ឹង សែនករុណា និយាយថា សង្គមប្រជាធិបតេយ្យតែងមានមតិស្រប និងមតិផ្ទុយ។ លោកសង្កេតឃើញថា នេះមិនមែនជាលើកទី១ដែលមន្ត្រីរដ្ឋាភិបាលចោទប្រកាន់លើក្រុមអង្គការសង្គមស៊ីវិលបែបនេះ។ លោកយល់ថា រដ្ឋាភិបាលគួរទទួលយកការរិះគន់នានារបស់ក្រុមអង្គការសង្គមស៊ីវិលដើម្បីយកមតិទាំងនោះទៅកែលំអនូវកំហុសឆ្គង ឬភាពខ្វះចន្លោះរបស់ខ្លួន៖ «មិនអាចយកតែមតិដែលស្របទេ ព្រោះមតិស្របភាគច្រើនគេមិនហ៊ានថា គេមិនហ៊ាននិយាយ រឿងដែលមិនត្រឹមត្រូវកាន់តែជ្រៅៗទៅ ជាការពិតយើងចង់ឃើញមានកិច្ចសហការមានការបើកចិត្តឲ្យទូលំទូលាយទទួលយកមតិរិះគន់ទាំងអស់ហ្នឹង»។
នាប៉ុន្មានឆ្នាំចុងក្រោយនេះ រដ្ឋាភិបាលបានបង្កើតច្បាប់មួយចំនួនក្នុងនោះរួមទាំងច្បាប់ស្ដីពីសមាគមនិងអង្គការមិនមែនរដ្ឋាភិបាលផង ដែលប៉ះពាល់ដល់ការងារផ្នែកសិទ្ធិមនុស្ស ប្រជាធិបតេយ្យ និងអភិបាលកិច្ចល្អ។
អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា ធ្លាប់បង្ហាញក្តីបារម្ភក្នុងរបាយការណ៍ ក្នុងកិច្ចប្រជុំអង្គការសហប្រជាជាតិថា កម្ពុជាកំពុងតែដើរថយក្រោយ ដោយងាកចេញពីការគោរពសិទ្ធិមនុស្ស និងគន្លងប្រជាធិបតេយ្យ។ លោក វិទិត មុនតាប៊ន (Vitit Muntarbhorn) បានបញ្ជាក់ថា ទោះបីជាប្រទេសកម្ពុជា មានអង្គការសមាគម ប្រមាណជា ៥ពាន់ ក៏ដោយ ក៏អង្គការដែលធ្វើការផ្នែកសិទ្ធិមនុស្ស លើកស្ទួយលទ្ធិប្រជាធិបតេយ្យ និងបរិស្ថាន កំពុងជួបបញ្ហាលំបាកជាខ្លាំង ក្នុងការអនុវត្តការងាររបស់ពួកគេ ជាមួយអាជ្ញាធរមូលដ្ឋាន៕
No comments:
Post a Comment