ដោយ ជាតិ ចំណាន
2022-02-13
លោកនាយករដ្ឋមន្ត្រី ហ៊ុន សែន (ឆ្វេង) និងស្ថាបនិកអង្គការសហព័ន្ធសន្តិភាពសកល អ្នកស្រី ហាក់ ចា ហាន់ ម៉ូន (Hak Ja Han Moon) (ស្ដាំ)
រូបហ្វេសប៊ុក ហ៊ុន សែន
លោកនាយករដ្ឋមន្ត្រី ហ៊ុន សែន បានទទួលពានរង្វាន់សន្តិភាពស៊ុនហាក់ពីអង្គការសហព័ន្ធសន្តិភាពសកល (UPF)រួចហើយនៅព្រឹកថ្ងៃទី១២ ខែកុម្ភៈ នៅទីក្រុងសេអ៊ូល (Seoul) ប្រទេសកូរ៉េខាងត្បូង(South-Korea)។ ទោះជាយ៉ាងណាពលរដ្ឋខ្មែររស់នៅប្រទេសកូរ៉េខាងត្បូង មិនពេញចិត្តចំពោះការប្រគល់ពានរង្វាន់នេះទេ និងនាំគ្នាធ្វើបាតុកម្មប្រឆាំងលោក ហ៊ុន សែន ដែលពួកគាត់ចាត់ទុកថា ជាមេដឹកនាំផ្ដាច់ការ រំលោភសិទ្ធិមនុស្ស និងបំផ្លាញលទ្ធិប្រជាធិបតេយ្យ។
លោក ហ៊ុន សែន បានទទួលពានរង្វាន់សន្តិភាពស៊ុនហាក់រួចហើយ ក្រោមសំឡេងរិះគន់ និងការតវ៉ាជំទាស់ពីប្រជាពលរដ្ឋខ្មែររស់នៅប្រទេសកូរ៉េខាងត្បូង។
លោក ហ៊ុន សែន ថ្លែងក្នុងពិធីទទួលពានរង្វាន់ថា លោកពិតជារំភើបនិងមានកិត្តិយសក្រៃលែងដែលគណៈកម្មាធិការពានរង្វាន់សន្តិភាពស៊ុនហាក់ ទទួលស្គាល់ស្នាដៃរបស់ លោកក្នុងការបញ្ចប់សង្គ្រាមស៊ីវិល និងកសាងសន្តិភាពពេញលេញនៅកម្ពុជា។ មេដឹកនាំដែលចូលចិត្តប្រើភាសាហិង្សាគំរាមកំហែង និងតែងព្រមានបង្កសង្គ្រាមប្រសិនបើ ចាញ់ឆ្នោតរូបនេះ បន្តថា សន្តិភាព មានតម្លៃជាងអ្វីៗទាំងអស់។សន្តិភាពគឺជាអ្វីដែល ស្រស់ស្អាតបំផុត។ សន្តិភាពផ្តល់នូវក្តីសង្ឃឹម និងស្នាមញញឹមដល់មនុស្សគ្រប់រូប។ អតីតកម្មាភិបាលខ្មែរក្រហមរូបនេះ ប្តេជ្ញាចិត្តថា លោក នឹងបន្តការពារនិងលើកស្ទួយសន្តិភាពបន្ថែមទៀត៖ «គោលនយោបាយឈ្នះឈ្នះ បានជំរុញឲ្យប្រទេសកម្ពុជា ទទួលបាននូវសន្តិភាពពេញលេញនៅឆ្នាំ១៩៩៨។ គោលនយោបាយឈ្នះឈ្នះ ក៏អនុញ្ញាតផងដែរ ឲ្យរាជរដ្ឋាភិបាល ផ្តោតការយកចិត្តទុកដាក់ទាំងស្រុងទៅលើការ អភិវឌ្ឍជាតិ ខណៈដែលប្រជាជនកម្ពុជាទទួលបាននូវផលប្រយោជន៍ និងកាលានុវត្តភាពនានាពីសន្តិភាពនិងការអភិវឌ្ឍ»។
ទោះជាយ៉ាងណា ការផ្តល់ពានរង្វាន់ដល់លោក ហ៊ុន សែន នេះបានបណ្តាលឲ្យមានការរិះគន់ព្រោងព្រាតលើបណ្ដាញសង្គមហ្វេសប៊ុក(Facebook) និងថែមទាំងផ្ទុះបាតុកម្មតវ៉ាប្រឆាំងពីសំណាក់ប្រជាពលរដ្ឋខ្មែរដែលរស់នៅប្រទេសកូរ៉េខាងត្បូងទៀតផង។ ក្រុមបាតុករប្រមាណ៥០នាក់ បានធ្វើបាតុកម្មដុតភ្លើងទៀនជាង១ម៉ោងនៅ ព្រលប់ថ្ងៃសៅរ៍ និងមានការចាក់បញ្ចាំងវីដេអូអំពីទង្វើរំលោភសិទ្ធិមនុស្សនៅកម្ពុជា ប្រព្រឹត្តដោយអាជ្ញាធររដ្ឋាភិបាលលោក ហ៊ុន សែន ជាដើម។
អ្នកនាំពាក្យនៃចលនាប្រជាធិបតេយ្យសង្គ្រោះជាតិនៅប្រទេសកូរ៉េខាងត្បូងលោក ម៉ាត់ វណ្ណនី ថ្លែងថា ពួកលោក ធ្វើបាតុកម្មនេះ ដើម្បីប្រឆាំងការផ្តល់ពានរង្វាន់ និងទាមទារឱ្យលោក ហ៊ុន សែន គោរពរដ្ឋធម្មនុញ្ញ ស្តារប្រជាធិបតេយ្យ និងការគោរពសិទ្ធិមនុស្សពិតប្រាកដឡើងវិញ។ លោក អះអាងថា ថ្វីដ្បិតតែក្នុងប្រទេសកម្ពុជា គ្មានសង្គ្រាមប្រដាប់អាវុធក្តី ប៉ុន្តែសន្តិភាពបែបនេះ គឺជាសន្តិភាពមិនពេញលេញ ឬជាសន្តិភាពក្លែងក្លាយ ព្រោះក្រោមការដឹកនាំរបស់លោក ហ៊ុន សែន ពោរពេញដោយអំពើហិង្សា អំពើពុករលួយ ការកាប់សម្លាប់ អំពើអយុតិ្តធម៌សង្គម ការរំលោភដីធ្លី និងបិទសេរីភាពប្រជាពលរដ្ឋរបស់ខ្លួនជាដើម៖ «សន្តិភាពដែលលោក ហ៊ុន សែន បាននិយាយនេះជាសន្តិភាពដែលអត់មានសង្គ្រាម ប៉ុន្តែដោយឡែកភាពសុខដុមរមនា សេចក្តីសុខក្សេមក្សាន្ត សេចក្តីសុខផ្លូវចិត្ត គឺវាអត់មាន។ ដូច្នេះបើយើងធ្វើការប្រៀបធៀបទៅ ខ្ញុំគិតថា ពានរង្វាន់នេះ គួរតែផ្តល់ឲ្យដល់លោក គីម ជុងអ៊ុន ព្រោះនៅប្រទេសកូរ៉េខាងជើង ក៏អត់មានសង្គ្រាមដែរ ប៉ុន្តែស្ថានភាពប្រទេសទាំងពីរនេះអត់ខុសគ្នាទេ គឺប្រជាពលរដ្ឋអត់សប្បាយចិត្ត និងរងទុក្ខវេទនាឈឺចាប់»។
ពលករខ្មែរនៅប្រទេសកូរ៉េខាងត្បូងម្នាក់ទៀតដែលរួមធ្វើបាតុកម្មនេះដែរ គឺលោក ឡេង វណ្ណៈ ថ្លែងថា លោកប្រឆាំងដាច់ខាតចំពោះការប្រគល់ពានរង្វាន់សន្តិភាពនេះ ព្រោះលោក ហ៊ុន សែន គឺជាមេដឹកនាំផ្ដាច់ការ ដែលសហគមន៍ជាតិ និងអន្តរជាតិ កំពុងថ្កោលទោស និងដាក់ទណ្ឌកម្មជាបន្តបន្ទាប់ ពាក់ព័ន្ធនឹងការរំលោភសិទ្ធិមនុស្សជាប្រព័ន្ធ។លោក មើលឃើញថា សន្តិភាពនៅកម្ពុជា អាចមានសម្រាប់តែក្រុមបក្ខពួក ឬអ្នករណបលោក ហ៊ុន សែន ប៉ុណ្ណោះ ចំណែកពលរដ្ឋក្រីក្រឬអ្នកមាននិន្នាការផ្ទុយ គឺគ្មានសន្តិភាពអ្វីឡើយ៖ «គាត់និយាយអរគុណសន្តិភាព គឺបានតែនិយាយ ប៉ុន្តែក្នុងប្រទេសអត់មានសន្តិភាពពិតប្រាកដ។ ប្រជាពលរដ្ឋគ្មានសន្តិភាពទេ យំស្រែករឿងគេយកដីធ្លី ចាប់ដាក់គុកអីតាមតែអំពើចិត្ត។ និយាយទៅ ហ៊ុន សែន ជាជនផ្ដាច់ការ ដូច្នេះគាត់ធ្វើអីដើម្បីតែអំណាចរបស់គាត់»។
ក្រុមបាតុករអះអាងថា ពួកគាត់ នឹងបន្តជួបជុំគ្នាតវ៉ាម្តងទៀត នៅថ្ងៃអាទិត្យចាប់ពីម៉ោង១១ព្រឹក ដល់ម៉ោង២រសៀល ដើម្បីលើកបដា និងស្រែកតវ៉ាប្រឆាំងនឹងវត្តមានលោក ហ៊ុន សែន។
ព្រះសង្ឃមួយអង្គដែលតែងឈឺឆ្អាលបញ្ហាសង្គម និងធនធានធម្មជាតិ ហើយកំពុងភៀសព្រះកាយនៅប្រទេសស្វីស (Switzerland)ដោយសារអាជ្ញាធររដ្ឋាភិបាលតាមចាប់ព្រះកាយ គឺព្រះតេជព្រះគុណ បូរ បេត មានថេរដីកាទាំងងឿងឆ្ងល់ថា តើអង្គការដែលផ្តល់ពានរង្វាន់នេះ វាយតម្លៃបែបណា ឬមានទំនាក់ទំនងស៊ីជម្រៅបែបណាជាមួយលោក ហ៊ុន សែន នោះទេ ទើបប្រគល់ពានរង្វាន់សន្តិភាពដល់មេដឹកផ្ដាច់ការ និងមានបាតដៃប្រឡាក់ឈាមបែបនេះ។ ទោះជាយ៉ាងណា ព្រះតេជព្រះគុណ មានមន្ទិលសង្ស័យថា លោក ហ៊ុន សែន អាចប្រើលុយដែលបានពីអំពើពុករលួយទៅទិញពានរង្វាន់នេះ ដើម្បីយកមកឃោសនាបំភ័ន្តភ្នែកសាធារណជនជាតិ និងអន្តរជាតិ៖ «លោក ហ៊ុន សែន ជាមេដឹកនាំផ្ដាច់ការ ជាមេដឹកនាំពុករលួយ ជាមេដឹកនាំធ្វើបាបរាស្ត្រ ជិះជាន់រាស្ត្រ បំផ្លាញធនធានធម្មជាតិ រំលោភសិទ្ធិនយោបាយ រំលោភសិទ្ធិពលរដ្ឋ សិទ្ធិកម្មករ និងធ្វើទុក្ខបុកម្នេញលើព្រះសង្ឃនិងសង្គម កម្ពុជាទាំងមូល ។ ក្នុងការដឹកនាំប្រទេសប្រមាណ៤០ឆ្នាំមកនេះ គឺគាត់មិនស័ក្តិសមជាអ្នកទទួលបានពានរង្វាន់សន្តិភាពទេ ព្រោះយើងមើលឃើញថា ទង្វើរបស់គាត់ គឺជាមនុស្សឃោរឃៅ ។ទាំងការនិយាយស្តី និងទង្វើរបស់គាត់គ្រប់បែបយ៉ាង គឺជាមនុស្សដែលខ្វះគុណធម៌ និងជាមនុស្សដែលមិនមានសន្តិភាពផ្លូវចិត្តខ្លួនឯងផង»។
ស្ថាបនិកអង្គការសហព័ន្ធសន្តិភាពសកលដែលបានផ្តល់ពានរង្វាន់ឲ្យលោក ហ៊ុន សែន នេះ ជាប្តីប្រពន្ធជនជាតិកូរ៉េខាងត្បូងពីរនាក់ គឺលោក ស៊ុន ម្យ៉ុង ម៉ូន (Sun Myung Moon) និងអ្នកស្រី ហាក់ ចា ហាន់ ម៉ូន (Hak Ja Han Moon)។ សារព័ត៌មានអង់គ្លេស (www.mirror.co.uk) ធ្លាប់បានចុះផ្សាយថា ពួកគេ គឺជាក្រុមមនុស្សឆបោក និងជាមនុស្សមិនគ្រប់ទឹក ហើយតែងមានទំនាក់ទំនងជិតស្និត និងតែងបង្កើតពានរង្វាន់សម្រាប់ក្រុមមេដឹកនាំមួយចំនួនដែលក្រាញអំណាច ពុករលួយ និងរងការរិះគន់ពីការរំលោភសិទ្ធិមនុស្សជាដើម។ លើសពីនេះលោក ស៊ុន ម្យ៉ុង ម៉ូន ក៏ធ្លាប់មានប្រវត្តិជាប់គុកនៅសហរដ្ឋអាមេរិករយៈពេល១៨ខែ ដោយសារអំពើទុច្ចរិតរបស់គាត់។
ប្រធានស្តីទីគណបក្សសង្គ្រោះជាតិ លើកឡើងថា លោក ហ៊ុន សែន ទំនងជានឹងបង្ខំព្រះមហាក្សត្រ ឲ្យអបអរសាទរពានរង្វាន់ឆ្កួតៗមួយនេះ ដែលគ្មានអ្នកណាឲ្យតម្លៃអ្វីទាល់តែសោះ ដើម្បីបោកបញ្ឆោតប្រជារាស្ត្រខ្មែរថា គាត់ទទួលបានកិត្តិយសដ៏ធំធេងលើឆាកអន្តរជាតិ៕
2 comments:
So the future of Cambodia will belong to the evil Yuon, the chinese, and now the Koreans are active. Japan has been active as well. I guess Khmers should just flee to the west and become mayor. It is getting to the point where Khmers have no fight and everything is lost. Khmers are the same like the Thais and Laotians. 50 million chinese in thailand. They want to be replace. They are a disgraceful people.
Piece award.
Post a Comment