ដោយ សន ចាន់រដ្ឋា
2022-03-09
 |
ស្លាកសញ្ញាគណបក្សភ្លើងទៀន ស្ថិតនៅភូមិព្រៃប្រកៀប ឃុំដូនតី ស្រុកពញាក្រែក ខេត្តត្បូងឃ្មុំ ត្រូវបានជនមិនស្គាល់មុខលួចបំផ្លាញដុតបំផ្លាញកាលពីថ្ងៃទី៣ ខែមីនា ឆ្នាំ២០២២។ រូប៖ គណបក្សភ្លើងទៀន ខេត្តត្បូងឃ្មុំ |
គណបក្សភ្លើងទៀនបន្តរងការគំរាមកំហែងពីអាជ្ញាធរ និងជនមិនស្គាល់មុខ ខណៈការបោះឆ្នោតជ្រើសរើសក្រុមប្រឹក្សាឃុំសង្កាត់កាន់តែខិតជិតមកដល់។ ការធ្វើទុក្ខបុកម្នេញនេះ បានកើតឡើងនៅរាជធានីភ្នំពេញ និងនៅខេត្តចំនួន ៤ ផ្សេងៗទៀត។ មន្រ្តីសង្គមស៊ីវិលធ្វើការងារផ្នែកបោះឆ្នោតជំរុញរដ្ឋាភិបាល គួរមានវិធានការលើមន្រ្តីមូលដ្ឋានដែលបង្កការលំបាកដល់គណបក្សនយោបាយ និងស្វែងរកជនប្រព្រឹត្តដែលបំផ្លាញស្លាកគណបក្សយកមកផ្ដន្ទាទោស។
ការគំរាមកំហែងលើគណបក្សភ្លើងទៀនពេលនេះ បានកើតឡើងនៅរាជធានីភ្នំពេញ ខេត្តកំពង់ឆ្នាំង ត្បូងឃ្មុំ ព្រះសីហនុ និងខេត្តប៉ៃលិន ក្នុងរូបភាពស្រដៀងៗគ្នា គឺការលួចផ្ដួលស្លាក និងការគំរាមកំហែងបេក្ខជនឈរឈ្មោះសម្រាប់ការបោះឆ្នោតឃុំសង្កាត់។
មន្ត្រីគណបក្សភ្លើងទៀន នៅសង្កាត់ចោមចៅទី១ ខណ្ឌពោធិសែនជ័យ និងជាបេក្ខជនឈរឈ្មោះបោះឆ្នោតនៃគណបក្សភ្លើងទៀន លោកស្រី ប្រណម្យ ចាន់ណារី ឲ្យវិទ្យុអាស៊ីសេរីដឹងថ្ងៃទី៩ ខែមីនា ថាក្រុមការងារលោកស្រី បានទៅលើកស្លាកគណបក្សនៅទីតាំងសាធារណៈតាមបណ្ដោយប្រឡាយ ជិតស្លាកគណបក្សប្រជាជនកម្ពុជា និងជិតរបងផ្ទះរបស់ពលរដ្ឋក្នុងមូលដ្ឋាននេះ កាលពីថ្ងៃទី៦ ខែមីនា ប៉ុន្តែមួយថ្ងៃក្រោយមក ស្រាប់តែមានជនមិនស្គាល់មុខបានលួចលើកស្លាកគណបក្សភ្លើងទៀនចេញបាត់។ លោកស្រីឲ្យដឹងទៀតថា ក្រោយមានករណីនេះអាជ្ញាធរមូលដ្ឋាន ប្រាប់លោកស្រីថា ម្ចាស់ដីក្បែរនោះមិនពេញចិត្តនឹងការលើកស្លាកគណបក្សភ្លើងទៀន ប៉ុន្តែអាជ្ញាធរមិនដឹងថា អ្នកណាជាអ្នកដកស្លាកគណបក្សភ្លើងទៀនចេញទេ។ លោកស្រី ប្រណម្យ ចាន់ណារី យល់ថា នេះការការរារាំង និងគំរាមកំហែង នៃការធ្វើសកម្មភាពនយោបាយរបស់គណបក្សភ្លើងទៀន។ ទោះយ៉ាងណា សកម្មជនគណបក្សភ្លើងទៀនរូបនេះ ប្រាប់ថា ក្រុមការងារមិនចង់មានជម្លោះវែងឆ្ងាយនោះទេ ហើយថា ពេលនេះក្រុមការងារលោកស្រី បានរកទីតាំងថ្មីនៅជិតទីតាំងចាស់ដើម្បីលើកស្លាកគណបក្ស៖ «គេប្រាប់ថា ម្ចាស់ដីអត់ពេញចិត្តអ៊ីចឹង តាមពិតទៅយើងអត់ពេញចិត្តទេ ព្រោះអីដោយសារករណីហ្នឹងយើងដាក់ត្រូវអស់ហើយ (ដាក់ស្លាក) ព្រោះអីយើងដាក់ឃ្លាតពីរបងជិតពីរម៉ែត្រ ហើយផ្លូវហ្នឹងសាធារណៈទេ»។
ករណីដូចគ្នានេះដែរ ក៏បានកើតឡើងនៅខេត្តព្រះសីហនុដែរ ដោយជនមិនស្គាល់មុខបានលួចផ្ដួលស្លាកគណបក្សភ្លើងទៀនចំនួនពីរកន្លែងផ្សេងគ្នា ស្ថិតនៅភូមិ២ និងភូមិ៣ សង្កាត់លេខ១ ក្រុងព្រះសីហនុ កាលពីថ្ងៃទី៦ និងថ្ងៃទី៧ ខែមីនា។ ចំណែកនៅខេត្តត្បូងឃ្មុំ ក៏មានជនមានឥទ្ធិពលនៅដ្ឋានក្នុងខេត្តនេះបានទៅគំរាមកំហែងបេក្ខជនឈរឈ្មោះរបស់គណបក្សភ្លើងទៀនពីរនាក់មិនឲ្យឈរឈ្មោះបោះឆ្នោតតទៅទៀត។
មន្រ្តីគណបក្សភ្លើងទៀននៅឃុំវាលម្លូ លោក ហែម ហង់ ឲ្យវិទ្យុអាស៊ីសេរីដឹងថា មានបុរសម្នាក់ជិះឡានទៅដឹកបេក្ខជនរបស់គណបក្សលោកក្នុងឃុំនេះឲ្យលាលែងចេញពីបេក្ខជនក្រុមប្រឹក្សាឃុំ។ លោកបន្តទៀតថា មកដល់ពេលនេះក្នុងចំណោមបេក្ខជនពីរនាក់ដែលរងការគំរាមកំហែងនោះ មានម្នាក់បានយល់ព្រមមិនឈរឈ្មោះឲ្យគណបក្សលោកទៀតទេ ចំណែកបេក្ខជនម្នាក់ទៀត កំពុងស្ថិតក្នុងការសម្របសម្រួល៖ «មូលហេតុខ្ញុំមិនដឹងដែរ ថ្ងៃនេះឃើញឡានគេដឹកមកយកគេមកដល់កន្លែង (គណៈកម្មការរៀបចំការបោះឆ្នោតឃុំសង្កាត់) តែម្ដង។ ខ្ញុំកំពុងសម្របសម្រួលផង ហើយរកបេក្ខជនថ្មីៗជាបណ្ដើរៗ»។
ស្រដៀងគ្នានេះដែរ ក្រុមការងារគណបក្សភ្លើងទៀនខេត្តកំពង់ឆ្នាំង បានឲ្យវិទ្យុអាស៊ីសេរីដឹងដែរថា អាជ្ញាធរឃុំឆ្នុកទ្រូ ស្រុកបរិបូរណ៌ ក៏មានករណី ធ្វើទុក្ខបុកម្នេញដល់បេក្ខជនឈរឈ្មោះរបស់គណបក្សភ្លើងទៀនដែរ។ រីឯប្រធានក្រុមការងារ បណ្ដោះអាសន្នគណបក្សភ្លើងទៀន ខេត្តប៉ៃលិន លោក ខឹម មុនីកុសល បានដាក់ពាក្យ ប្តឹងប្រធានគណៈកម្មការរៀបចំការបោះឆ្នោតឃុំសង្កាត់ នៅឃុំស្ទឹងកាច់ ទៅគណៈកម្មការរៀបចំការបោះឆ្នោតខេត្តប៉ៃលិន។ លោក ខឹម មុនីកុសល ឲ្យដឹងថា គណៈកម្មការរៀបចំការបោះឆ្នោតខេត្តប៉ៃលិន នឹងដោះស្រាយបញ្ហានេះនៅថ្ងៃទី១២ ខែមីនាខាងមុខ។ លោកឲ្យដឹងទៀតថា មូលហេតុនៃការប្ដឹងនេះព្រោះ គណៈកម្មការរៀបចំការបោះឆ្នោតឃុំសង្កាត់ បានធ្វើឲ្យប៉ះពាល់ដល់ការដាក់បេក្ខជនឈរឈ្មោះនៃគណបក្សរបស់លោក ក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់នាពេលខាងមុខ ហើយនេះក៏ជាការរើសអើងផ្នែកនយោបាយផងដែរ៖ «គ្រាន់តែទឹកប៊ិចសរសេរខុសគ្នា (គណៈកម្មការរៀបចំការបោះឆ្នោតឃុំសង្កាត់) គាត់មិនយកគាត់ឲ្យយើងសរសេរឡើងវិញទេ ហើយចំណុចមួយទៀតទាក់ទងអាសយដ្ឋានរបស់គណបក្សអីហ្នឹង នៅក្នុងទម្រង់លិខិត១០០៨គេបាននិយាយច្បាស់ហើយមិនមានទាមទារការបញ្ជាក់លិខិតអីបន្ថែមទេគ្រាន់តែសរសេរអាសយដ្ឋាននៅលើទម្រង់១០០៨តែប៉ុណ្ណឹង ហើយគាត់នៅតែទាមទារម្ដងជាពីរដងដដែល»។
ជុំវិញបញ្ហានេះ វិទ្យុអាស៊ីសេរីមិនអាចសុំការអត្ថាធិប្បាយពីអ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) លោក ហង្ស ពុទ្ធា និងអ្នកនាំពាក្យក្រសួងមហាផ្ទៃលោក ខៀវ សុភ័គ បានទេនៅថ្ងៃទី៩ ខែមីនា។ ទោះយ៉ាងណា ការគំរាមកំហែងលើការធ្វើសកម្មភាពនយោបាយរបស់គណបក្សភ្លើងទៀនពេលនេះ ធ្វើឡើងប៉ុន្មានថ្ងៃក្រោយពេលលោកនាយករដ្ឋមន្រ្តី ហ៊ុន សែន ប្រកាសឲ្យអាជ្ញាធរមូលដ្ឋានអនុញ្ញាតឲ្យគ្រប់គណបក្សចុះឈ្មោះប្រកួតប្រជែងការបោះឆ្នោតនៅពេលខាងមុខ ធ្វើសកម្មភាពនយោបាយដោយសេរី និងគ្មានការរំខាន។
នាយកប្រតិបត្តិអង្គការឃ្លាំមើលការបោះឆ្នោតនៅកម្ពុជាហៅកាត់និចហ្វិច (Nicfec) លោក សំ គន្ធាមី យល់ថា លោកនាយករដ្ឋមន្ត្រី ហ៊ុន សែន គួរមានវិធានការលើមន្ត្រីនានាដែលមិនបានអនុវត្តតាមការណែនាំរបស់នាយករដ្ឋមន្ត្រី។ លោកក៏សង្កេតឃើញ គណបក្សភ្លើងទៀន កំពុងរងនូវការធ្វើទុក្ខម្នេញច្រើនជាងគណបក្សនានាដែលចូលរួមការបោះឆ្នោតខាងមុខ។ ទោះយ៉ាងណាលោកយល់ថា ការគំរាមកំហែងលើបេក្ខជននេះ គឺគណបក្សអាចដោះស្រាយបានព្រោះការដាក់បេក្ខជនរបស់គ្រប់គណបក្សតែងមានបេក្ខជនឈរឈ្មោះ និងបេក្ខជនបម្រុង។ មន្រ្តីសង្គមស៊ីវិលធ្វើការងារផ្នែកបោះឆ្នោតរូបនេះក៏ស្នើទៅអាជ្ញាធរឱ្យដោះស្រាយករណី មន្រ្តីគណបក្សភ្លើងទៀនដែលបានព្យាយាមរកដំណោះស្រាយជាមួយអាជ្ញាធរ និងភាគីពាក់ព័ន្ធ លើបញ្ហានេះ៖ «យើងចង់ឃើញគាត់ (លោកនាយករដ្ឋមន្ត្រី ហ៊ុន សែន)អនុវត្តច្បាប់គ្រាន់តែនិយាយណែនាំ ប៉ុន្តែអត់ចាត់ការផងដល់ទាល់តែចាត់វិធានការបានការណែនាំនោះមានប្រសិទ្ធភាព»។
ការគំរាមកំហែងនេះ ស្របពេលគណបក្សភ្លើងទៀន បានដាក់បេក្ខជនជាងមួយពាន់ប្រាំមួយរយ (១.៦០០) ឃុំសង្កាត់ក្នុងចំណោមឃុំសង្កាត់ មួយពាន់ប្រាំមួយរយហាសិបពីរ (១.៦៥២) ទូទាំងប្រទេស។ ស្ថិតក្នុងស្ថានភាពបែបនេះ មិនទាន់មានសញ្ញាណណាមួយបង្ហាញថា គណបក្សនេះនឹងចូលរួមក្នុងការបោះឆ្នោតឆ្នាំ២០២២ និងឆ្នាំ២០២៣ខាងមុខនៅឡើយទេ៕
1 comment:
Something to think about:
Yuon's goal is denying Khmer people from having a national hero or a good leader. So, they said something bad to discredit Khmer leader. Without a leader, there will be NO solidarity.
We have to remember that nobody will drop from the sky to lead Khmer people. Therefore, we have to accept the least evil or the one who is the most popular as Khmer leader.
For example, in the case of Sam Rainsy, some stupid people always said he ran out of Cambodia to escape prison time. But when Sam Rainsy wanted to go back to Cambodia to challenge his accuser Hun Sen, he never allowed to get back. Instead of insulting Hun Sen who was a coward, they labeled Sam Rainsy as a coward.
Khmer people must stop playing Yuon's game by stop attacking the good leader, otherwise, they will be stuck with Ah Yuon's slave Hun Sen.
Post a Comment