ដោយ ខែ សុណង
2022-03-08
 |
លោក គ្រីស្ទៀន បារហ្គើរិ៍ (Christian Barger) ឯកអគ្គរដ្ឋទូតអាល្លឺម៉ង់ប្រចាំនៅកម្ពុជា។ រូប៖ German Embassy Cambodia |
ស្របពេលគ្នានឹងលោកឧបនាយករដ្ឋមន្ត្រី ស ខេង ចេញមុខដោះស្រាយជម្លោះរវាងកម្មករ និងថៅកែក្រុមហ៊ុនកាស៊ីណូណាហ្គាវើលដ៍ (Naga World) នេះ ឯកអគ្គរដ្ឋទូតអាល្លឺម៉ង់ប្រចាំនៅកម្ពុជាលោក គ្រីស្ទៀន បារហ្គើរិ៍ (Christian Barger) បានអំពាវនាវឲ្យភាគីពាក់ព័ន្ធទាំងអស់ គួរវិលមកតុចរចា ដើម្បីស្វែងរកដំណោះស្រាយបញ្ចប់ជម្លោះនៅក្រុមហ៊ុនបនល្បែងមួយនេះ។
ការអំពាវនាវរបស់លោក គ្រីស្ទៀន បាហ្គើរិ៍ ធ្វើឡើងចំថ្ងៃទិវាសិទ្ធិនារីអន្តរជាតិ៨មីនា។ លោកឯកអគ្គរដ្ឋទូត បានថ្លែងនៅក្នុងសេចក្ដីថ្លែងការណ៍ ដែលបានចុះផ្សាយនៅលើបណ្ដាញសង្គមហ្វេសប៊ុក (Facebook) ស្ថានទូតអាល្លឺម៉ង់ កាលពីថ្ងៃទី៨ ខែមីនា ដោយជំរុញឲ្យភាគីពាក់ព័ន្ធទាំងចូលរួម ដោះស្រាយជម្លោះនេះដោយសន្តិវិធី។
លោកបន្ថែមថា បើសិនជាភាគីពាក់ព័ន្ធនៅតែបែខ្នងដាក់គ្នានោះ ជម្លោះនេះ នឹងមិនអាចបញ្ចប់បានទេ។
លោកឯកអគ្គរដ្ឋទូតអាល្លឺម៉ង់ បន្តនៅក្នុងសេចក្ដីថ្លែងការណ៍ដដែលថា ការចរចាដែលអាចប្រព្រឹត្តទៅបាននោះ លុះត្រាតែមានការចូលរួមពីតំណាងរបស់ក្រុមកម្មករដែរ ដើម្បីឈានទៅដល់ការស្រុះស្រួលគ្នាដោយសន្តិវិធី និងសុច្ចរឹតភាព ដែលជាប្រយោជន៍ដល់ភាគីពាក់ព័ន្ធទាំងអស់។
លោករំលឹកទៀតថា៖ «ថ្ងៃនេះ ជាទិវាសិទ្ធិនារីអន្តរជាតិ ខ្ញុំសូមបង្ហាញពីសាមគ្គីភាពរបស់យើងជាមួយស្ត្រីគ្រប់រូបនៅក្នុងប្រទេសកម្ពុជា និងនៅលើពិភពលោក។សមភាពយេនឌ័រនៅតែជារបៀបវារៈ ឬជាចំណុចដ៏សំខាន់ដែលត្រូវសម្រេចឱ្យបាននៅក្នុងប្រទេសរបស់ខ្ញុំ ក៏ដូចជានៅក្នុងប្រទេសកម្ពុជា។ ដោយសារកូដករណាហ្គាវើលដ៍ (Naga world) ភាគច្រើនគឺជាស្ត្រីនោះ សូមអនុញ្ញាតឱ្យខ្ញុំបញ្ជាក់ជាថ្មីថា សកម្មភាពកូដកម្មរបស់ស្ត្រីវ័យក្មេងនិងក្លាហានទាំងនេះ គ្រាន់តែជាការប្រើប្រាស់សិទ្ធិក្នុងការបញ្ចេញមតិលើបញ្ហាប្រឈម និងក្ដីកង្វល់របស់ពួកគេតែប៉ុណ្ណោះ»។
នេះមិនមែនជាលើកទី១ទេ ដែលឯកអគ្គរដ្ឋទូតអាល្លឺម៉ង់ប្រចាំនៅកម្ពុជា ជំរុញឲ្យភាគីពាក់ព័ន្ធចូលរួមដោះស្រាយជម្លោះនៅក្រុមហ៊ុនណាហ្គាវើលដ៍នេះ។ កាលពីពេលថ្មីៗនេះ លោក ឯកអគ្គរដ្ឋទូតអាល្លឺម៉ង់ បានសរសេរសារនៅលើបណ្ដាញសង្គមហ្វេសប៊ុកដែរថា ជម្លោះការងារនៅក្រុមហ៊ុនបនល្បែងណាហ្គានេះ កំពុងទាញការចាប់អារម្មណ៍ពីសហគមន៍អន្តរជាតិកាន់តែខ្លាំងឡើង ដែលទាមទារឲ្យអាជ្ញាធរកម្ពុជាដោះស្រាយបញ្ចប់ជម្លោះនេះកាន់តែឆាប់កាន់តែល្អ៕
1 comment:
Even a tiny problem in Naga world, Ah Kwack Hun Sen has no ability to solve. His actions have only exacerbated the problems.
But that is not surprise because Ah Sen is Ah Lngi Lngeu.
Post a Comment