2023.01.14
រូប៖ ពលរដ្ឋផ្ដល់ឱ្យ
ក្រុមយុវជនការពារបរិស្ថាន ព្យាយាមចែកស្ទីកឃ័រ ឬខិត្តប័ណ្ណដល់សាធារណជនអំពីកោះកុងក្រៅ ទោះបីអាជ្ញាធរ រារាំងមិនឲ្យចែកនៅក្នុងបរិវេណសាកលវិទ្យាល័យភូមិន្ទភ្នំពេញក្ដី។ ពួកគេ ដើរចែកចាយខិត្តប័ណ្ណនៅម្ដុំស្តុបវិទ្យាល័យសន្ធរម៉ុក ខណ្ឌទួលគោក ទីក្រុងភ្នំពេញ។ អាជ្ញាធរតាមមករារាំងមិនឲ្យយុវជនបន្តចែកខិត្តប័ណ្ណកោះកុងក្រៅនៅទីនោះទៀត។
ក្រោយពីអ្នកគ្រប់គ្រងសាកលវិទ្យាល័យភូមិន្ទភ្នំពេញ និងអាជ្ញាធរខណ្ឌទួលគោក បិទស្តង់ ឬតូបរបស់ក្រុមនិស្សិត ដែលជាសកម្មជនបរិស្ថាន មិនឲ្យលក់ដូង និងចែកខិត្តប័ណ្ណផ្សព្វផ្សាយកោះកុងក្រៅក្នុងខួបលើកទី៦៣ឆ្នាំរបស់សាលា ក្រុមសកម្មជនប្រមាណ២០នាក់ បន្តចែកខិត្តប័ណ្ណកោះកុងក្រៅនៅខាងក្រៅបរិវេណរបស់សាលាវិញ ប៉ុន្តែនៅតែមានការរំខានពីក្រុមអាជ្ញាធរខណ្ឌទួលគោកប្រហែល ១០នាក់ដដែល។
សកម្មជនបរិស្ថាន និងជានិស្សិតឆ្នាំទី៤ សិក្សាផ្នែកព័ត៌មានវិទ្យា នៅសាកលវិទ្យាល័យភូមិន្ទភ្នំពេញ កញ្ញា ភួន កែវរស្មី ប្រាប់វិទ្យុអាស៊ីសេរី នៅថ្ងៃទី១៤ ខែមករា ថា ការបិទស្តង់របស់ក្រុមសកម្មជនបរិស្ថាន ជាគំរូអាក្រក់មួយរបស់ថ្នាក់ដឹកនាំសាកលវិទ្យាល័យ ព្រោះសាលាជាកន្លែងបណ្ដុះធនធានមនុស្សឲ្យចេះស្រឡាញ់បរិស្ថាន ប៉ុន្តែមកហាមយុវជនផ្សព្វផ្សាយពីបរិស្ថានទៅវិញ។ កញ្ញាបន្តថា កន្លែងអប់រំគួរតែ បើកសិទ្ធិទូលំទូលាយដល់សិស្សនិស្សិតឲ្យធ្វើប្រយោជន៍ដល់សង្គម ហើយអាជ្ញាធរមិនគួរមករឹតត្បិត ដោយគ្រាន់តែយុវជនចែកចាយខិត្តប័ណ្ណកោះកុងក្រៅនោះទេ។
កញ្ញា ភួន កែវរស្មី៖ «ការអនុវត្តសិទ្ធិសេរីភាពផ្សេងៗទៀត មិនតែខ្ញុំទេ បងប្អូនប្រជាពលរដ្ឋខ្មែរសុទ្ធតែអាចធ្វើបាន។ អ៊ីចឹងទៅយើងអត់បង្ហាញថា ការគំរាមកំហែងទាំងអស់ហ្នឹង វាមានផល ឬក៏វាមានប្រសិទ្ធភាពមកលើយុវជនទេ។ គ្រាន់តែយើងគោរពការសម្រេចចិត្តរបស់សកលវិទ្យាធិការ ដោយមិនចង់មានជម្លោះបន្ត ប៉ុន្តែមិនមែនមានន័យថា យើងទទួលស្គាល់ថាអ្វីដែលពួកយើងធ្វើហ្នឹងជារឿងខុសទេ។ យើងខ្លាចតែគាត់យល់ថាអ្វីដែលគាត់ធ្វើហ្នឹងជារឿងខុសចាស»។
ស្រដៀងគ្នានេះដែរ សកម្មជនចលនាមាតាធម្មជាតិម្នាក់ទៀត កញ្ញា ធួន ស្រីពៅ ឲ្យដឹងថា ទោះជាមានការរារាំងពីអាជ្ញាធរមិនឲ្យចែកស្ទីកឃ័រកោះកុងក្រៅក៏ដោយ ក៏ក្រុមរបស់កញ្ញានៅតែចង់ផ្សព្វផ្សាយពីធនធានធម្មជាតិមួយនេះឲ្យខ្មែរបានដឹងដែរ។ កញ្ញាបញ្ជាក់ថា កញ្ញាមានសិទ្ធិគ្រប់គ្រាន់ សម្រាប់ការជួយថែសម្បត្តិធម្មជាតិរបស់ជាតិ ដោយមិនមានបុគ្គលណាម្នាក់មកបំបិទសិទ្ធិកញ្ញាបានឡើយ។
កញ្ញា ធួន ស្រីពៅ៖ «ពួកយើងមានការខកចិត្តមែនទែន ដោយសារតែពួកយើងជានិស្សិតដែលរៀននៅកន្លែងហ្នឹង ពួកយើងចុះឈ្មោះយកស្តង់ដែលសាលាផ្ដល់ឲ្យយើង ហើយយើងគេចោទយើងថាផ្សព្វផ្សាយពីនយោបាយ ចង់ផ្ដួលរំលំរដ្ឋាភិបាល។ សួរថាស្ទីកឃ័រមួយនេះអាចផ្ដួលរំលំ ឬក៏ធ្វើឲ្យមានភាពចលាចលទៅដល់សាលាឬអត់ គ្រាន់តែស្ទីកឃ័រមួយដាក់ថាខ្ញុំស្រឡាញ់កោះកុងក្រៅ វាអត់មានជាការខុសទេ។ ហើយពួកយើងប្រើប្រាស់សិទ្ធិ គឺដើម្បីធ្វើ ហើយសាកល(វិទ្យាល័យ)ទាំងមូល ក៏ដូចជាសិស្សានុសិស្សក៏គាត់មកទទួលយកស្ទីកឃ័រពីពួកយើងដែរ។ ពួកយើងក្នុងនាមខ្ញុំអ្នកសិក្សានៅទីនោះ ខ្ញុំបានដើរចែកស្ទីកឃ័រនេះទៅដល់មិត្តភ័ក្ដិ»។
ក្រុមសកម្មជនបរិស្ថាន ចែកខិត្តប័ណ្ណកោះកុងក្រៅដល់និស្សិត និងពលរដ្ឋ គ្រប់ចំនួន ហើយពួកគេសង្ឃឹមថា ពលរដ្ឋនឹងចាប់អារម្មណ៍កោះកុងក្រៅកាន់តែច្រើន និងរួមគ្នាការពារកោះកុងក្រៅ មិនឲ្យធ្លាក់ទៅលើក្រុមហ៊ុនឯកជន ឬអ្នកមានអំណាចណាមួយ យកទៅធ្វើរីសត ឬតំបន់ទេសចរណ៍ផ្ដាច់មុខរបស់គេ ដោយមិនឲ្យពលរដ្ឋទទួលបានប្រយោជន៍ពីកោះកុងក្រៅ។
វិទ្យុអាស៊ីសេរី មិនអាចទាក់ទងសុំការស្រាយបំភ្លឺជុំវិញបញ្ហានេះ ពី សាកលវិទ្យាធិការនៃសាកលវិទ្យាល័យភូមិន្ទភ្នំពេញ លោក ជេត ជាលី និងអធិការនគរបាលខណ្ឌទួលគោក លោក សុខ ហេង បានទេ នៅថ្ងៃទី១៤ ខែមករា។
មន្ត្រីកម្មវិធីស្រាវជ្រាវ និងតស៊ូមតិ នៃសមាគមបណ្ដាញយុវជនកម្ពុជា លោក ហេង គឹមហុង យល់ឃើញថា ការដែលអាជ្ញាធរ និងអ្នកគ្រប់គ្រងសាលាមិនផ្ដល់សិទ្ធិឲ្យនិស្សិតធ្វើសកម្មភាពបង្ហាញពីការស្រឡាញ់បរិស្ថាន នេះជារឿងមិនត្រឹមត្រូវ។ លោកបន្តថា ស្ថាប័នអប់រំជាកន្លែងបណ្ដុះបណ្ដាលយុវជនឲ្យគិតពីប្រយោជន៍សង្គមជាចម្បង តែបែរមកហាមឃាត់យុវជនកំពុងធ្វើប្រយោជន៍ឲ្យជាតិ គឺបិទសិទ្ធិពួកគេផ្ទុយពីច្បាប់។
លោក ហេង គឹមហុង៖ «អាជ្ញាធរមូលដ្ឋាននិងសាលាទាំងអស់ ដែលជាកន្លែងបណ្ដុះធនធានមនុស្សហ្នឹង គួរតែបើកទូលាយឲ្យក្រុមមនុស្សហ្នឹងគាត់មានការគិត។ ជាពិសេសក្រុមអ្នកដែលមានការគិតផលប្រយោជន៍រួមសង្គមហ្នឹង គួរតែទទួលបានឱកាសឲ្យកាន់តែល្អ ឬក៏ការបើកទូលាយឲ្យមានការពិភាក្សាពីបញ្ហាផលប្រយោជន៍សង្គម បញ្ហាបរិស្ថានធនធានធម្មជាតិ ដើម្បីកុំឲ្យមនុស្សហ្នឹងក្រិនគំនិត។ ហើយបើសិនជាសាលាដើរតួនាទីជាកន្លែងរឹតត្បិតនៃការគិតមិនឲ្យមានការរីកចម្រើន ធនធានមនុស្សដែលផលិតមកមិនមានភាពរីកចម្រើនដែរបាទ»។
កោះកុង ឬអ្នកស្រុកនិយមហៅថាកោះកុងក្រៅ មានទីតាំងស្ថិតនៅឃុំជ្រោយប្រស់ ស្រុកកោះកុង មានចម្ងាយប្រមាណ ៣០គីឡូម៉ែត្រ ពីក្រុងខេមរភូមិន្ទ ទីរួមខេត្តកោះកុង។ សកម្មជនបរិស្ថានអះអាងថា កោះនេះមានផ្ទៃ ១០៣គីឡូម៉ែត្រក្រឡា និងសម្បូរដោយធនធានធម្មជាតិចម្រុះរួមមានព្រៃឈើ ឆ្នេរខ្សាច់សក្បុស ទឹកសមុទ្រថ្លាឈ្វេង កូនភ្នំ ទឹកជ្រោះ ព្រមទាំងសត្វព្រៃ និងសត្វសមុទ្រជាច្រើនប្រភេទ៕
No comments:
Post a Comment