ដោយ សុជីវី
2023.05.04
ព្រះតេជព្រះគុណ ប៊ុត ប៊ុនតិញ ស្ថាបនិកបណ្ដាញព្រះសង្ឃឯករាជ្យ ដើម្បីយុត្តិធម៌សង្គម។
រូប៖ RFA
ឆ្លើយតបទៅនឹងសេចក្ដីថ្លែងការណ៍របស់គណៈសង្ឃពុទ្ធសាសនាកម្ពុជា ព្រះតេជព្រះគុណ ប៊ុត ប៊ុនតិញ មានថេរដីកាថា គណៈសង្ឃពុទ្ធសាសនា ថ្កោលទោសព្រះអង្គលើសពីវិន័យសាសនា ហើយចំណាត់ការនេះ គឺជាការគាំទ្រលោក ហ៊ុន សែន ឱ្យបន្តបំផ្លាញព្រះពុទ្ធសាសនានៅកម្ពុជា។ អ្នកវិភាគនយោបាយយល់ឃើញថា គណៈសង្ឃនាយក គួរមានតួនាទីបង្កើតការផ្សះផ្សាជាតិ និងលើកកម្ពស់តម្លៃព្រះពុទ្ធសាសនា ជាជាងចេញសេចក្ដីថ្លែងការណ៍មានលក្ខណៈនយោបាយ គាំទ្រលោក ហ៊ុន សែន។
ស្ថាបនិកបណ្ដាញព្រះសង្ឃឯករាជ្យ ដើម្បីយុត្តិធម៌សង្គម ព្រះតេជព្រះគុណ ប៊ុត ប៊ុនតិញ អះអាងថា គណៈសង្ឃព្រះពុទ្ធសាសនាកម្ពុជា មានចេតនាទុច្ចរិត ឃោសនាបំភ្លៃវិន័យសង្ឃ ដើម្បីបំផ្លាញកិត្តិយសព្រះអង្គ និងមានគោលបំណងបំបែកបំបាក់សាមគ្គីភាពរវាងសប្បុរសជនខ្មែរ ជាមួយព្រះអង្គ។
ព្រះតេជព្រះគុណ ប៊ុត ប៊ុនតិញ មានថេរដីកានៅថ្ងៃទី៤ ឧសភាថា គណៈសង្ឃនាយកកម្ពុជា មានចំណាត់ការលើព្រះអង្គហួសហេតុ ដោយព្រះអង្គគ្រាន់តែមានការបកស្រាយពាក្យបាលីមិនត្រឹមត្រូវតែមួយម៉ាត់ប៉ុណ្ណោះ។ ព្រះអង្គបន្ថែមថា ក្នុងវិន័យព្រះពុទ្ធសាសនា មិនបានចែងតម្រូវឱ្យព្រះសង្ឃសឹកនោះឡើយ ដោយគ្រាន់តែតម្រូវឱ្យព្រះសង្ឃខមាទោស ចំពោះការបកស្រាយធម៌ខុសតែប៉ុណ្ណោះ ប៉ុន្តែគណៈសង្ឃព្រះពុទ្ធសាសនាកម្ពុជា បែរជាចេញសេចក្ដីថ្លែងការណ៍មិនទទួលស្គាល់ព្រះអង្គជាព្រះសង្ឃ និងចាត់ឱ្យស្ថិតនៅក្រៅសហគមន៍សង្ឃខ្មែរទៅវិញ។ ព្រះតេជព្រះគុណ ប៊ុត ប៊ុនតិញ ចាត់ទុកទង្វើរបស់គណៈសង្ឃនាយកបែបនេះ គឺជាការគាំទ្រលោក ហ៊ុន សែន ឱ្យបន្តបំផ្លាញសាសនាព្រះពុទ្ធនៅកម្ពុជា។
ជាមួយគ្នានេះ ព្រះតេជព្រះគុណ ប៊ុត ប៊ុនតិញ បញ្ជាក់ឡើងវិញថា លោក ហ៊ុន សែន ក៏មិនសក្ដិសមទទួលបានគោរមងារ ពុទ្ធមាមកាភិបាល (អានថា ពុទ្ធ ម៉ាម មៈ កា ភិបាល) ដែលមានន័យថា អ្នករក្សា ឬគោរពព្រះពុទ្ធសាសនាដ៏ក្រៃលែងនោះដែរ ព្រោះលោក ហ៊ុន សែន បានបញ្ជាឱ្យគណៈសង្ឃនាយកធ្វើអ្វីតាមទំនើងចិត្តរបស់លោក ដោយមិនផ្អែកលើធម៌ វិន័យរបស់ព្រះពុទ្ធសាសនានោះឡើយ។
ប្រតិកម្មរបស់ព្រះតេជព្រះគុណ ប៊ុត ប៊ុនតិញ បែបនេះ ធ្វើឡើងបន្ទាប់ពីគណៈសង្ឃនាយកកម្ពុជា បានចេញសេចក្ដីថ្លែងការណ៍ កាលពីថ្ងៃទី៣ ខែឧសភា ចាត់ទុកព្រះតេជព្រះគុណ ប៊ុត ប៊ុនតិញ ថា ជាបុគ្គលរបឹងរឹងរូស មានន័យថា ជាអ្នកពិបាកប្រដៅ និងថា ព្រះអង្គមិនមែនជាអ្នកបួសក្នុងពុទ្ធសាសនាពិតប្រាកដនោះឡើយ ដោយគ្រាន់តែព្រះអង្គបកស្រាយពាក្យគោរមងារ ដែលលោក ហ៊ុន សែន ទទួលបានពីអង្គការពុទ្ធសាសនិកពិភពលោក ខុសអត្ថន័យតែប៉ុណ្ណោះ។ លើសពីនេះ គណៈសង្ឃនាយក ថែមទាំងចាត់ទុកព្រះតេជព្រះគុណ ប៊ុត ប៊ុនតិញ ថា ជាបុគ្គលទ្រុស្ដសីល និងសំណូមពរកុំឱ្យមហាជនគាំទ្រ ទាំងសម្ភារៈ និងស្មារតី ទៅដល់ព្រះអង្គ ដើម្បីរារាំងកុំឱ្យព្រះអង្គបន្តធ្វើសកម្មភាពបំផ្លាញពុទ្ធសាសនា និងសង្គមទៀតផង។
ទោះជាយ៉ាងណា គណៈសង្ឃនាយកនៃព្រះរាជាណាចក្រកម្ពុជា ត្រូវបានគេមើលឃើញថា មិនបានធ្វើការលើកកម្ពស់ការគោរពវិន័យ និងការប្រតិបត្តិធម៌សាសនាព្រះពុទ្ធនោះឡើយ ហើយស្ថាប័ននេះ តែងតែធ្វើទុកបុកម្នេញទៅលើព្រះសង្ឃ ដែលមានឧត្ដមគតិចូលរួមការងារសង្គម លើកកម្ពស់ការគោរពសិទ្ធិមនុស្ស និងលទ្ធិប្រជាធិបតេយ្យទៅវិញ។ ជាក់ស្ដែង គណៈសង្ឃនាយក មិនដែលអប់រំលោកនាយករដ្ឋមន្ត្រី មិនឱ្យពោលពាក្យអសុរោះ ជេរព្រះសង្ឃនៅទីសាធារណៈនោះឡើយ ប៉ុន្តែបែរជាគាំទ្ររដ្ឋាភិបាលលោក ហ៊ុន សែន ផ្សឹកព្រះសង្ឃ ដែលសកម្មចូលរួមការងារសង្គម រួមមានដូចជា អតីតព្រះសង្ឃខ្មែរថាវរៈ ព្រះអង្គ កើត សារ៉ាយ យកទៅដាក់ពន្ធនាគារ និងថ្មីៗ នេះ ព្រះអង្គ សយ សាត ជាដើម។
ជុំវិញរឿងនេះ អ្នកវិភាគនយោបាយ លោក គឹម សុខ គាំទ្រចំពោះការលើកឡើងថា លោក ហ៊ុន សែន និងគណៈសង្ឃនាយក បានធ្វើឱ្យវិស័យព្រះពុទ្ធសាសនានៅកម្ពុជាអន់ថយ ព្រោះតាមការសង្កេតរបស់លោក ការគោរពធម៌វិន័យរបស់ព្រះសង្ឃនៅកម្ពុជា កាន់តែមានភាពទន់ខ្សោយ ដោយសារគណបក្សប្រជាជនកម្ពុជា បានតែងតាំងតែព្រះសង្ឃដែលគាំទ្រគណបក្សកាន់អំណាចតែប៉ុណ្ណោះ ឱ្យក្លាយជាមន្ត្រីសង្ឃ និងមានតំណែងគ្រប់គ្រងវត្ត។ លោកបន្ថែមថា គណៈសង្ឃនាយក គួរដើរតួនាទីជាអ្នកផ្សះផ្សាជាតិតាមរយៈការអប់រំឱ្យថ្នាក់ដឹកនាំប្រកាន់ព្រហ្មវិហារធម៌ ជាជាងធ្វើការដោយលំអៀងនាំឱ្យបែកបាក់សាមគ្គីភាពជាតិខ្មែរ។
អ្នកវិភាគនយោបាយលើកឡើងថា គណៈសង្ឃនាយកនៅកម្ពុជា មិនគួរធ្វើការក្រោមការបង្គាប់បញ្ជារបស់លោក ហ៊ុន សែន នោះឡើយ ហើយគួរធ្វើការដោយផ្អែកទៅលើវិន័យសង្ឃ និងធម៌របស់សាសនាព្រះពុទ្ធ ទើបអាចលើកកម្ពស់តម្លៃពុទ្ធសាសនានៅកម្ពុជាបាន៕
No comments:
Post a Comment