Khmer Circle:
That is the reason why the CPP was formed in the first place.
នោះហើយជាមូលហេតុដែលគណបក្សប្រជាជនត្រូវបានបង្កើតឡើងតាំងពីដំបូង។
^^^
2023.05.20
ពលរដ្ឋរស់នៅតាមបណ្តាខេត្តមួយចំនួនព្រួយបារម្ភពីអនាគតស្រុកទេស កំពុងជំពាក់ជំពិនដោយវិបត្តិនយោបាយកាន់តែធ្ងន់ គ្មានច្រកចេញ ប៉ះពាល់ធំធេងដល់ជីវភាពពលរដ្ឋ។ ពលរដ្ឋលើកឡើងដូច្នេះ ក្រោយពីគ.ជ.ប មិនអនុញ្ញាតឱ្យគណបក្សភ្លើងទៀនចូលរួមប្រកួតប្រជែងបោះឆ្នោតនៅពេលខាងមុខ។
ពលរដ្ឋមួយចំនួនទាមទារឲ្យគ.ជ.បពិចារណាឡើងវិញក្នុងការផ្តល់សិទ្ធិឱ្យគណបក្សនយោបាយភ្លើងទៀន ចូលរួមប្រកួតប្រជែងការបោះឆ្នោតជាតិខាងមុខនេះដើម្បីឱ្យមានវត្តមានគណបក្សប្រឆាំងចូលរួម កែលម្អចំណុចខ្វះចន្លោះរបស់រដ្ឋាភិបាល។
ពលរដ្ឋខ្លះបានចាត់ទុក ទង្វើរបស់គ.ជ.បថា ដើរតាមខ្សែញាក់របស់អ្នកនយោបាយ ប៉ះពាល់សិទ្ធិសេរីភាពពលរដ្ឋ នៅពេលគ្មានវត្តមានគណបក្សប្រឆាំងចូលរួមប្រកួតប្រជែងការបោះឆ្នោតជាតិ។
ពលរដ្ឋរស់នៅខេត្តសៀមរាប លោក សៀម វ៉ាន់ ប្រាប់វិទ្យុអាស៊ីសេរីនៅថ្ងៃទី១៩ ឧសភា ថា ក្នុងអាណត្តិទី០៦ កន្លងទៅ រដ្ឋាភិបាលឯកបក្សដឹកនាំរដ្ឋមិនបានផ្តល់ផលចម្រើនដល់ពលរដ្ឋឱ្យរស់នៅមានជីវភាពធូរធារឡើយ តែផ្ទុយទៅវិញ ពលរដ្ឋចំណាកស្រុកស្ងាត់ភូមិតម្លៃកសិផលធ្លាក់ចុះ ជំពាក់បំណុលធនាគារ និងថយចុះធនធានធម្មជាតិជាដើម។ លោកថា រយៈពេលជាង ៤ ឆ្នាំកន្លងទៅនេះ ពលរដ្ឋរស់នៅដោយភាពភ័យខ្លាចមិនហ៊ានបញ្ចេញមតិ បញ្ហាសង្គមជាតិនោះឡើយ ហើយពួកគាត់ខ្លះទៀត សុខចិត្តអត់ធ្មត់មិនហ៊ានតវ៉ាទាមទារឱ្យអាជ្ញាធរដោះស្រាយបញ្ហាប្រឈមនៅមូលដ្ឋានដែលអាជ្ញាធរមើលរំលងនោះទេ។
លោក សៀម វ៉ាន់៖ «ព្រៃឈើនៅលើគេ សូម្បីតែរ៉ែពេជ្រមាសនៅលើគេ មាននរណាទៅក្អក ធ្វើអីទៀត ប៉ះពាល់ធំធេងសេដ្ឋកិច្ចក្នុងប្រទេសខ្មែរ។ ប៉ះពាល់ធ្ងន់សេដ្ឋកិច្ចក្នុងប្រទេសខ្មែរមានអីទៀត អត់មាននរណាទៅជ្រែង ទៅទប់ស្កាត់បានទេ។ ចូលអន្លង់កម្មមួយហើយ គ្មានដោះស្រាយអីចេញ ព្រៃឈើមួយប្រទេសខ្មែរមានអីទៀតអត់មាននរណាទៅជ្រែងទៅឈប់ស្កាត់បានទេ»។
ចំណែកឯពលរដ្ឋរស់នៅខេត្តកោះកុង លោកស្រី ហៀប ឪ បារម្ភថា អាជ្ញាធរឯកបក្ស នឹងជិះសេះលែងដៃបន្តទៀតដោយពុំបានបំពេញតួនាទីបម្រើពលរដ្ឋស្របតាមច្បាប់នោះឡើយ តែផ្ទុយទៅវិញនឹងប្រើអំណាចធ្វើបាបពលរដ្ឋស្លូតត្រង់ ដែលស្រែកទាមទារយុត្តិធម៌ ក្នុងរឿងដីធ្លី និងធនធានធម្មជាតិ ប្រសិនបើគណបក្សភ្លើងទៀនមិនអាចចូលរួមការបោះឆ្នោតនៅពេលខាងមុខ។
លោក សៀម វ៉ាន់៖ «គេនៅតែបំផ្លាញអត់មានអាជ្ញាធរមករារាំងបានអ៊ីចឹងនិយាយរួមគេ មិនត្រឹមមិនរារាំង គឺគេមិនចូលរួមហ្មង នរណាយកអីយកទៅ។ បាត់បង់ធម្មជាតិម៉េច? គេអត់គិតទេ បាត់អីបាត់ទៅ។ បាត់អស់ក្តាមខ្យល់សមុទ្រអី គេចាក់ដីរាល់ថ្ងៃ»។
ពលរដ្ឋចំណាំថា កាលនៅមានវត្តមានគណបក្សប្រឆាំងអាជ្ញាធរមិនហ៊ានធ្វើអ្វីផ្តេសផ្តាសឡើយ គោរពសិទ្ធិពលរដ្ឋ និងស្វះស្វែងរកដំណោះស្រាយជូនពលរដ្ឋខ្លះៗ ដោយសារគណបក្សប្រឆាំងតែងតែតាមដានទង្វើរបស់អាជ្ញាធរគ្រប់សកម្មភាព។
ពលរដ្ឋរស់នៅខេត្តកណ្តាល លោក ម៉ៅ ឆន សង្កេតឃើញថា រដ្ឋាភិបាលឯកបក្សក្នុងអាណត្តិទី៦ កន្លងទៅ ធ្វើអ្វីស្រេចតែចិត្ត ដោយគ្មានគណបក្សជំទាស់ចូលរួមកែលម្អនោះឡើយធ្វើឱ្យប៉ះពាល់ជីវភាពពលរដ្ឋ និងសង្គមជាតិ។ រីឯតំណាងរាស្ត្រ របស់គណបក្សប្រជាជនកម្ពុជាជាង ១០០នាក់ ក៏មិនបានបំពេញតួនាទី ជួយសម្របសម្រួលដោះស្រាយបញ្ហាប្រឈម និងក្តីកង្វល់របស់ពលរដ្ឋនៅមូលដ្ឋានដែរ។
លោក ម៉ៅ ឆន៖ «ខ្ញុំចង់ឱ្យមានការចូលរួមពីអ្នកនយោបាយឱ្យមានការប្រកួតប្រជែង ចង់ឱ្យពលរដ្ឋមានការសម្រេចចិត្តបើមានការដឹកនាំឯកបក្សមួយអាណត្តិនេះទៀត ផលអវិជ្ជមានច្រើនទៀតហើយ អស់ដីធ្លី ព្រៃឈើរំលោភសិទ្ធិលំនៅឋានផ្សេង ពលរដ្ឋគាត់តវ៉ាខ្លួន អត់មានអ្នកតំណាងរាស្ត្រជួយគាត់។ បញ្ហារឹតតែធំទៅៗ អត់មានដំណោះស្រាយនោះទេ»។
ឆ្លើយតបរឿងនេះ អ្នកនាំពាក្យអ្នកនាំពាក្យគណបក្សប្រជាជនកម្ពុជា លោក សុខ ឥសាន បកស្រាយថា គណបក្សភ្លើងទៀនមិនបានចូលរួមប្រកួតប្រជែងបោះឆ្នោតជាតិ គឺជាកំហុសរបស់មេដឹកនាំ គណបក្សមួយនេះ ដែលមិនបានបំពេញបែបបទរដ្ឋបាលជូនគ.ជ.ប។
លោក សុខ ឥសាន៖ «ចំពោះបងប្អូនមួយចំនួនតូចដែលជឿតាមបក្ខភ្លើងទៀនទទួលការញុះញង់ពីអ្នកខាងក្រៅមក ខ្ញុំយល់ថា នឹងទទួលផលលំបាកហើយ។ ព្រោះគ.ជ.បគេសម្រេចហើយ មិនឱ្យគណបក្សភ្លើងទៀនចូលរួមប្រកួតប្រជែង។ អានេះដោយសារខ្វះឯកសាររដ្ឋបាលទេ»។
ទោះយ៉ាងណា មន្ត្រីសង្គមស៊ីវិល មើលឃើញថា គណបក្សភ្លើងទៀនដែលធ្លាប់ចូលរួមបោះឆ្នោតជ្រើសរើសឃុំ/សង្កាត់បាន ក៏ប៉ុន្តែបែរជាអាក់ខានក្នុងការចូលរួមប្រកួតប្រជែងបោះឆ្នោតជាតិ គឺជាគំនិតទុច្ចរិតរបស់លោកនាយករដ្ឋមន្ត្រី ហ៊ុន សែន ដើម្បីក្តាប់អំណាចដោយមិនក្រែងចិត្តពលរដ្ឋ។
ជុំវិញរឿងនេះ ប្រធានក្រុមប្រឹក្សាឃ្លាំមើលកម្ពុជា នៅប្រទេសន័រវែស លោក ម៉ែន ណាត សង្កេតឃើញថា រដ្ឋាភិបាលឯកបក្សរបស់លោក ហ៊ុន សែន បានបង្កើតអំពើអយុត្តិធម៌ចំពោះសង្គមជាតិម្តងហើយម្តងទៀត តាមរយៈធ្វើទុក្ខបុកម្នេញលើគណបក្សប្រឆាំងនិងអ្នកនយោបាយណា ដែលមានទស្សនៈផ្ទុយ។ លោកថា ទង្វើបែបនេះដើម្បីក្តាប់អំណាចត ជំនាន់ ដោយមិនខ្វល់ពីផលប៉ះពាល់ជីវភាពពលរដ្ឋ និង សង្គមជាតិនោះឡើយ។
លោក ម៉ែន ណាត៖ «ប្រព័ន្ធកុម្មុយនិស្ត ដឹងស្រាប់តែប្រព័ន្ធផ្ទេរអំណាច គឺត្រូវបង្ក្រាបគ្រប់រូបភាពទាំងអស់ ពួកផ្ដាច់ការ មិនថា ស្រុកចិន និងស្រុកខ្មែរដូចគ្នា។ រដ្ឋាភិបាល ហ៊ុន សែន បង្កើតអំពើអយុត្តិធម៌សម្រាប់គណបក្សដៃគូ មើលទៅមិនសូវស្រួល ហើយយកលេសនយោបាយដាក់បន្ទុក»។
មន្ត្រីសង្គមស៊ីវិលរូបនេះបន្ថែមថា គណបក្សភ្លើងទៀន ជាដៃគូប្រកួតប្រជែង នឹងគណបក្សកាន់អំណាចតែមួយគត់ ហេតុនេះ លោក ហ៊ុន សែន គួរតែបើកចំហសេរីភាពនយោបាយនិងទទួលយកការសម្ដែងមតិរបស់ពលរដ្ឋដែលចង់ឃើញបរិយាកាសប្រកួតប្រជែងការបោះឆ្នោតមានការចូលរួមពីបក្សប្រឆាំង៕
2 comments:
In Cambodia, Hun Sen is above everything. Cambodia's interest is below Hun Sen's interest.
Hun Sen is Samdach Pouk Jiat. So Jiat must listen to Hun Sen, or else.
Post a Comment