2023.06.18
ស្ត្រីពលករខ្មែរមួយរូបធ្វើកម្មករក្នុងចំការកៅស៊ូប្រទេសថៃ ធ្វើការលក់កម្លាំងស៊ីឈ្នួលរកប្រាក់ឱ្យកូនស្រីពីរនាក់ បន្តការសិក្សានៅប្រទេសថៃ បើទោះជាប្ដីរបស់ខ្លួនកំពុងជាប់ពន្ធនាគារនៅប្រទេសនេះ ទាំងយុត្តិធម៌ជាង១ឆ្នាំហើយក្ដី។ តើស្ត្រីពលករខ្មែរតស៊ូជំនះឧបសគ្គអ្វីខ្លះនៅប្រទេសថៃ?
ជាកម្មករធ្វើការក្នុងចំការកៅស៊ូ បានប្រាក់កម្រៃ២៧០បាត ឬជាង៧ដុល្លារក្នុងមួយថ្ងៃ លោកស្រី ជ័យ មុំ រកប្រាក់ចំណូល ការចំណាយស្ទើរស្មើគ្នា ដែលធ្វើឱ្យស្ត្រីរូបនេះ ត្រូវធ្វើការងារ ពីមួយខែទៅមួយខែ គ្មានថ្ងៃសម្រាកដើម្បីបានប្រាក់ទិញអង្ក ទិញម្ហូប ឱ្យប្រាក់ឱ្យកូនស្រីពីរនាក់ទៅរៀន និងផ្ញើប្រាក់ខ្លះទៀត ឱ្យប្ដីនៅពន្ធនាគារទៀតផង។ មានរៀងតូចល្អិត តែចិត្តធំ ស្ត្រីពលករ ជ័យ មុំ អាយុ៤០ឆ្នាំ មានកូនស្រីពីរ ម្នាក់រៀនថ្នាក់ទី៥ ម្នាក់ទៀតរៀនថ្នាក់ទី៦ នៅប្រទេសថៃ។ «»
ជាងមួយឆ្នាំមកនេះ លោកស្រី ជ័យ មុំ ត្រូវរកប្រាក់តែម្នាក់ឯង នៅក្នុងចំការកៅស៊ូ មួយកន្លែងក្នុងខេត្តឈុនបុរី (Chunbori) ប្រទេសថៃ (Thailand) លោកស្រីទទួលនៅកន្លែងកែច្នៃឈើកៅស៊ូ ជាមួយស្ត្រីពលករខ្មែរពីរនាក់បីទៀត ក្រោមការគ្រប់គ្រងរបស់មេការជនជាតិថៃ។ ការងារនេះ បើលោកស្រីធ្វើការទើបបានប្រាក់ ហើយក្នុងមួយសប្ដាហ៍បានប្រាក់ជិត១.២០០(មួយពាន់ពីររយ) បាត។ «»
ពលករខ្មែរនៅទីនេះ ថៅកែអនុញ្ញាតឱ្យស្នាក់នៅក្នុងបរិវេណចំការ ដោយគេសង់បន្ទប់ជាប់ៗគ្នា ធ្វើពីឈើក្រាលបេតុងស៊ីម៉ងត៍។ បើទោះជាលោកស្រី ជ័យ មុំ ធ្វើការមួយថ្ងៃបានប្រាក់តែជិត៣០០បាតក្ដី លោកស្រី ត្រូវចំណាយប្រាក់ជិត១០០បាត ឱ្យកូនស្រីទាំងពីរនាក់ របស់ខ្លួនទៅរៀន ដែលប្រាក់នោះសម្រាប់ចំណាយលើការហូបចំណី និងថ្ងៃទិញឯកសារ ការចំណាយនេះមិនទាន់រាប់បញ្ចូលលើថ្លៃចំណាយនៃម្ហូបអាហារប្រចាំថ្ងៃផង។
លោកស្រី ជ័យ មុំ រៀបរាប់ប្រាប់វិទ្យុអាស៊ីសេរីដឹងថា គ្រួសារលោកស្រីសព្វថ្ងៃត្រឹមហូបឱ្យឆ្អែតក្រពះ ប៉ុណ្ណោះ ព្រោះគ្មានប្រាក់ទិញអាហារឆ្ងាញ់ ហូបឡើយ។ លោកស្រីឱ្យដឹងទៀតថា ថ្ងៃខ្លះអត់លុយឱ្យកូនទៅសាលា លោកស្រីត្រូវដើរខ្ចីលុយអ្នកជិតខាង។ «»
ជីវិតគ្រួសារលោកស្រី ជ័យ មុំ ទន្ទឹមនឹងជួបការលំបាកផ្នែកជីវភាព លោកស្រីក៏ជួបរឿងអយុត្តិធម៌មួយទៀតដែរ ដោយប្ដីលោកស្រី ពេលនេះកំពុងឃុំក្នុងពន្ធនាគារប្រទេសថៃ ទាំងអយុត្តិធម៌អស់រយៈពេលជាង១ឆ្នាំមកហើយ ព្រោះថៅកែមុនរបស់លោកស្រី ដែលជាថៅកែចំការដូងប្រេង បានចោទប្រកាន់ថា ប្ដីលោកស្រីបានលួចដូងប្រេងរបស់គេយកទៅលក់។
លោកស្រី ជ័យ មុំ រំលឹកថា កាលពីខែកុម្ភៈឆ្នាំ២០២២ មេការជនជាតិថៃ ដែលគ្រប់គ្រង ចំការដូងប្រេងនោះ បានចោទប្រកាន់ថា ប្ដីលោកស្រី និងពលករខ្មែរម្នាក់ទៀតថា លួចដូងប្រេង ប្រមាណ១តោន យកទៅលក់ ហើយថៅកែថៃម្ចាស់ចំការ ក៏ជឿតាមសំដីរបស់មេការថៃ និងបានប្ដឹងសមត្ថកិច្ចថៃ ឱ្យចាប់ប្ដីលោកស្រី និងពលករខ្មែរម្នាក់យកទៅឃុំ។ លោកស្រីបញ្ជាក់ថា នៅពេលសាកសួរនោះ សមត្ថកិច្ចថៃរកមិនឃើញភស្តុតាងថា ប្ដីលោកស្រីលួចដូងប្រេងទេ ហើយប្ដីលោកស្រី ក៏មិនបានសារភាពដែរ។
ទោះបែបនេះលោកស្រីថា ប៉ូលិសថៃ បានសម្លុតប្ដីលោកស្រី និងពលករម្នាក់ទៀតឱ្យសារភាព ហើយប៉ូលិសថៃ បានកុហកថា បើពួកគាត់សារភាពនឹងបានរួចខ្លួន ហើយក្រោយមក ពលករខ្មែរម្នាក់ ដែលសមត្ថកិច្ចចាប់ខ្លួនជាមួយប្ដីលោកស្រីនោះបានសារភាព តែសមត្ថកិច្ចថៃមិនបានដោះលែងដូចការសន្យាទេ ប៉ុន្តែសមត្ថកិច្ចបានបញ្ជូនសំណុំរឿងនេះទៅតុលាការ ហើយតុលាការថៃសម្រេចចោទប្រកាន់ និងឃុំខ្លួនពួកគាត់ម្នាក់ៗឱ្យជាប់ឃុំរយៈ១៨ខែ។ «»
ប្ដីរបស់លោកស្រី ជ័យ មុំ ឈ្មោះ ម៉េត បូលី អាយុ៣៩ឆ្នាំ ជាកម្មករបេះដូងប្រេង។ លោកជាមនុស្សស្លូតបូត មិនចេះផឹកស្រាជក់បារី លេងល្បែងហើយក៏មិនចេះនិយាយភាសាថៃដែរ។
លោកស្រី ជ័យ មុំ រំលឹកថា កាលពីសមត្ថកិច្ចចាប់ប្ដីលោកស្រីថ្មីៗនោះ លោកស្រី បានហៅទូរស័ព្ទទៅមន្ត្រីស្ថានទូតខ្មែរប្រចាំប្រទេសថៃ ស្ទើររាល់ថ្ងៃ តែខាងស្ថានទូតមិនដែលទទួលទូរស័ព្ទ ឬហៅទូរស័ព្ទត្រឡប់មកវិញទេ ហើយជាងនេះមួយឆ្នាំមកនេះក៏មិនដែលមានមន្ត្រីស្ថានទូតខ្មែររូបណា មកសួរនាំលោកស្រីដែរ។
នៅពេលប្ដីដែលជាជនបង្គោលជាប់ឃុំ ការរកប្រាក់ផ្គត់ផ្គង់ក្នុងគ្រួសារ ក៏មិនបានល្អដូចគ្រួសារគេដែលមានប្ដីប្រពន្ធនៅជុំគ្នាដែរ។ កូនស្រីរបស់ស្ត្រីពលកររូបនេះ មិនសូវមានអាហារហូបចុកគ្រប់គ្រាន់ ឬមានអាហារមានសារធាតុចិញ្ចឹមទទួលទានទេ ពួកគេទាំងពីរនាក់មានទឹកមុខស្លេកស្លាំង។
កំពុងអានសំបុត្រ ឪពុកផ្ញើមកពីពន្ធនាគារ កុមារី ឡី វិច្ឆិកា អាយុ១៤ឆ្នាំ កំពុងរៀនថ្នាក់ទី៦ នៅប្រទេសថៃ នាងជាសិស្សពូកែក្នុងថ្នាក់ ដោយរៀនបានចំណាត់ថ្នាក់លេខ៤ប្រចាំឆ្នាំ។ កុមារ ឡី វិច្ឆិកា ចេះនិយាយ ចេះអានភាសាថៃ យ៉ាងស្ទាត់ហើយនាងអាចអានសំបុត្ររបស់ឪពុក ដែលសរសេរជាភាសាថៃ មកជាភាសាខ្មែរបានភ្លាមៗផងដែរ។ «»
កុមារ ឡី វិច្ឆិកា មិនជឿថា ឪពុករបស់នាងលួចដូងប្រេងគេ ដូចការចោទប្រកាន់ឡើយ ឪពុកនាងជាមនុស្សឧស្សាហ៍ ថៅកែប្រើឱ្យធ្វើអ្វីគាត់មិនដែលប្រកែកឡើយ ណាមួយទៀតឪពុកប្អូនស្រីមិនចេះបើកឡាន មិនចេះភាសាថៃ តើធ្វើដូចម្ដេចអាចយកដូងប្រេងនោះទៅលក់កើត?។
បើទោះជាស្ថានភាពគ្រួសារ កំពុងជួបការលំបាក ឃើញម្ដាយធ្វើការហត់រកប្រាក់តែឯង នៅពេលទំនេរពីការរៀនសូត្រ កុមារ ឡី វិច្ឆិកា តែងតែជួយបោកខោអាវ លាងចាន និងជួយធ្វើការងារផ្ទះម្ដាយ។ កុមារ ឡី វិច្ឆិកា ថា នាងប្រឹងប្រែងរៀនសូត្រ ព្រោះរំពឹងថា ពេលខ្លួនធំដឹងក្ដី រៀបចប់អាចរកការងារល្អបានធ្វើ បានប្រាក់ខែខ្ពស់ ដើម្បីយកប្រាក់នោះមកជួយឪពុកម្ដាយវិញ។ «»
ទាក់ទងរឿងរឿងនេះ វិទ្យុអាស៊ីសេរីមិនអាចសុំការអត្ថាធិប្បាយពីមន្ត្រីអនុព័ន្ធការងារនៃស្ថានទូតកម្ពុជា ប្រចាំប្រទេសថៃ លោក ឈឹម វិបុល អ្នកនាំពាក្យក្រសួងការបរទេស លោក អាន សុខខឿន និងប្រធានអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន បានទេនៅថ្ងៃទី១៧ ខែមិថុនា។
មន្ត្រីផ្នែកការពារសិទ្ធិពលករចំណាកស្រុក នៃអង្គការសង់ត្រាល់ (CENTRAL) ប្រចាំនៅប្រទេសថៃ លោក លឹង សុផុន ប្រាប់ថា ទម្រាំលោកបានដឹង ករណីចោទប្រកាន់ប្ដីលោកស្រី ជ័យ មុំ គឺយឹតពេលទៅហើយ តុលាការថៃបានសម្រេចចោទប្រកាន់លើប្ដីលោកស្រី ជ័យ មុំ ទៅហើយ។ មន្ត្រីសង្គមស៊ីវិលការពារសិទ្ធិពលរដ្ឋរូបនេះថា ប្រសិនបើស្ថានទូតខ្មែរប្រចាំប្រទេសថៃ ជួយតាមដាន និងស៊ើបអង្កេត ឬផ្ដល់ជំនួយផ្នែកផ្លូវច្បាប់ លើរឿងនេះទាន់ពេល ក្រុមពលករដែលកំពុងជាប់ឃុំទាំងនេះ ទំនងរួចផុតការចោទប្រកាន់ ព្រោះលោកសង្កេតឃើញថា សំណុំរឿងនេះមានភាពអយុត្តិធម៌លើក្រុមពលករខ្មែរ។ លោក លឹង សុផុន ដែលតាមដានដំណើររឿងនេះ បន្តទៀត ថា ការប្រឹងប្រែងតស៊ូរបស់លោកស្រី ជ័យ មុំ ដែលមិនបោះបង់ក្ដីសង្ឃឹម ប្រឹងធ្វើការរកប្រាក់ឱ្យកូនស្រីទាំងពីរនាក់ អាចបន្តការសិក្សា គឺជាគំរូល្អ និងជាការលះបង់ធំធេងរបស់ស្ត្រីពលកររូបនេះ។ «»
កាលពីពេលថ្មីៗ លោក លឹង សុផុន បានយកស្បៀងអាហារជូនគ្រួសារ លោកស្រី ជ័យ មុំ ដើម្បី ដោះទ័លក្នុងគ្រាលំបាកនេះ។
ប្ដីលោកស្រី ជ័យ មុំ ដែលបានជាប់ឃុំចំនួន១៨ខែមកហើយ នឹងត្រូវអនុវត្តទោស រួចរាល់ថ្ងៃទី២៣ ខែសីហា ខាងមុខ។ លោកស្រី ជ័យ មុំ ឱ្យដឹងថា សមត្ថកិច្ចថៃបានបង្គាប់លោកស្រីបង់ប្រាក់ឱ្យគេចំនួន១ម៉ឺនបាត ឬប្រមាណ៣០០ដុល្លារ ទើបនៅពេលដោះលែង សមត្ថកិច្ចអាចដោះលែងនៅប្រទេសថៃ តែមិនដូច្នេះទេ គេនឹងបញ្ជូនទៅខ្មែរវិញ។ លោកស្រីត្អូញត្អែរថា លោកស្រីគ្មានប្រាក់១ម៉ឺនបាតបង់ឱ្យប៉ូលិសថៃទេ ទោះយ៉ាងណា លោកស្រីថា បើទោះជាលោកស្រី គ្មានប្រាក់បង់ឱ្យសមត្ថកិច្ចថៃក្ដី តែនៅថ្ងៃដែលប៉ូលិសថៃដោះលែងប្ដីលោកស្រី នឹងជិះម៉ូតូទៅចាំប្ដីនៅមុខពន្ធនាគារ ដើម្បីបានឃើញមុខប្ដី និងរង់ចាំមើលថា តើសមត្ថកិច្ចថៃ នឹងបញ្ជូនប្ដីលោកស្រីយកទៅណាទៀត៕
No comments:
Post a Comment