Khmer Circle:
With the need for 'development' and private capital to drive it as an excuse, what is left of public space and, indeed, Cambodia, is being consigned to terminal extinction.
After 75 years of grief and loss, Kampuchea Krom may soon be joined by what remains of Cambodia in that trqagic fate...
***
ជាមួយនឹងតម្រូវការសម្រាប់ 'ការអភិវឌ្ឍន៍' និងដើមទុនឯកជនដើម្បីជំរុញវាជាលេស អ្វីដែលនៅសេសសល់នៃកន្លែងសាធារណៈ ហើយជាការពិត ប្រទេសកម្ពុជាកំពុងត្រូវបានបញ្ជូនទៅឱ្យផុតពូជ។ក្រោយសោកនាដកម្ម និងការបាត់បង់រយៈពេល ៧៥ឆ្នាំ កម្ពុជាក្រោមអាចនឹងត្រូវរួមរស់ជាមួយអ្វីដែលនៅសេសសល់របស់កម្ពុជាក្នុងជោគវាសនាដ៏ក្រៀមក្រំនោះ...^^^
2023.06.13
ប្រជាពលរដ្ឋរាប់រយគ្រួសារនៅស្រុកស្វាយទាប ខេត្តស្វាយរៀង បារម្ភពីការបាត់បង់ស្រះទឹកសាធារណៈដែលពួកគាត់តែងតែប្រើប្រាស់សម្រាប់ចិញ្ចឹមគោក្របីជាប្រចាំ។ ក្ដីបារម្ភនេះបន្ទាប់ ពីក្រុមហ៊ុន អេស ប៊ី ប៊ី ភី គ្រុប(SBBP Group) ដែលពលរដ្ឋស្គាល់ថា ជារបស់លោក សួស សម្បត្តិ បានរំលោភយក ហើយចាក់ដីលុប តាមតែអំពើចិត្ត ដោយពុំមានអាជ្ញាធរណាទប់ស្កាត់ឡើយ។
ផ្ទៃដីស្រះសាធារណៈដែលមានទំហំជាង១ហិកតារស្ថិតក្នុង ឃុំព្រែកតាអី ស្រុកស្វាយទាប ធ្លាប់តែផ្ដល់ប្រយោជន៍ដល់ពលរដ្ឋរាប់រយគ្រួសារដើម្បីចិញ្ចឹមគោក្របី និងស្រោចដំណាំផ្សេងៗ តាំងពីឆ្នាំ១៩៩៨រហូតមក ប៉ុន្តែបច្ចុប្បន្នមានគ្រឿងចក្រ និងឡានដឹកដីរបស់ក្រុមហ៊ុនឯកជន ចាក់ដីលុបជាបន្តបន្ទាប់។ បញ្ហានេះ ពលរដ្ឋបារម្ភថា បើសិនជាអាជ្ញាធរពាក់ព័ន្ធមិនចុះដោះស្រាយឱ្យបានទាន់ពេលវេលាទេ នោះពួកគាត់នឹងពុំមានទឹកប្រើប្រាស់គ្រប់គ្រាន់ នៅរដូវប្រាំងនោះទេ។
អស់រយៈពេលជាច្រើនឆ្នាំ គេតែងតែឃើញមានគោក្របីទាំងហ្វូងៗ បណ្ដើរគ្នាមកផឹកទឹកស្រះនៅខាងលិចភូមិត្រពាំងតាអី ជាញឹកញាប់ ហើយពលរដ្ឋមួយចំនួនក៏អាចរកត្រីសម្រាប់បរិភោគ ប្រចាំថ្ងៃផងដែរ។ ផ្ទុយទៅវិញ ចាប់តាំងពី មានវត្តមានក្រុមហ៊ុន អេស ប៊ី ប៊ី ភី គ្រុបមក ផ្ទៃដីភាគច្រើននៅជុំវិញទឹកស្រះសាធារណៈនេះ បានប្រែក្លាយជាតំបន់អភិវឌ្ឍន៍។ ពលរដ្ឋអះអាងថា គម្រោងអភិវឌ្ឍន៍នេះទំនងជាយកធ្វើរោងចក្រ ដែលជាការវិនិយោគរបស់ក្រុមហ៊ុនចិន។
ពលរដ្ឋម្នាក់ដែលរស់នៅភូមិត្រពាំងតាអី ឃុំព្រៃតាអី ស្រុកស្វាយទាប ដែលតែងតែប្រើប្រាស់ទឹកស្រះនេះ លោក រចនា ប្រាប់វិទ្យុអាស៊ីសេរីថា លោកមិនសប្បាយចិត្តចំពោះទង្វើរបស់ក្រុមហ៊ុនឯកជនមួយនេះ ដែលច្បាមយកដីស្រះ ធ្វើជាកម្មសិទ្ធិរបស់ខ្លួន តាមតែអំពើចិត្តនោះទេ។ លោកបន្តថា ស្រះទឹកនេះ គឺជាសម្បត្តិរួមរបស់ពលរដ្ឋ ដែលតែងតែអាស្រ័យផលជាយូរហើយ។
លោក រចនា៖ «ខ្ញុំអត់ពេញចិត្ត ព្រោះអីខ្ញុំប្រជាពលរដ្ឋនៅនេះរស់នៅយូរឆ្នាំហើយ វា៣០-៤០ឆ្នាំហើយ។ ខ្ញុំអត់ពេញចិត្តទេ ព្រោះក្រុមហ៊ុនបានចាក់ដីលុបស្រះ។ និយាយរួមគោក្របីភាគច្រើន នាំគ្នាទៅផឹកទឹក តែកន្លែងនឹងទេ ពេល[ពិសេស] រដូវប្រាំង»។
លិខិតប្លង់ដីដែលចេញដោយអាជ្ញាធរភូមិឃុំ និងមន្ទីររៀបចំដែនដី នគរូបនីយកម្ម សំណង និង សុរិយោដីខេត្តស្វាយរៀង កាលពីខែឧសភា ឆ្នាំ២០០៨ បង្ហាញថា ក្រុមហ៊ុន អេស ប៊ី ប៊ី ភី គ្រុប បានទិញដីពីពលរដ្ឋ និងរដ្ឋមានទំហំដីជាង៧០ហិកតារ នៅក្នុងភូមិត្រពាំងតាអី ឃុំព្រៃតាអី ស្រុកស្វាយទាប ក៏ប៉ុន្តែដីស្រះទឹក ដែលជាប់នឹងដីក្រុមហ៊ុននោះ មានទំហំជាង១ហិកតារ ពុំមានការកាត់ឆ្វៀលលក់ឱ្យទៅក្រុមហ៊ុននោះទេ។
ដោយឡែក អស់រយៈពេលជិត ១ខែមកនេះ បែរជាមានឡានដឹកដីរបស់ក្រុមហ៊ុនចាក់ដីលុបស្រះទឹកដែលប្រជាពលរដ្ឋរាប់រយគ្រួសារប្រើប្រាស់ជាប្រចាំថ្ងៃ ដោយពុំមានការជូនដំណឹងជាមុនដល់ពលរដ្ឋ។ កន្លងមក ប្រជាពលរដ្ឋបានព្យាយាមរកការអន្តរាគមន៍ពីអាជ្ញាធរមូលដ្ឋាន ជាច្រើនលើក ប៉ុន្តែពុំមានដំណោះស្រាយ។ ចំណែក លោក សួស សម្បត្តិ ដែលពលរដ្ឋស្គាល់ថា ជាតំណាងក្រុមហ៊ុន អះអាងប្រាប់ពលរដ្ឋថា ដីស្រះនេះ គឺពួកគាត់បានទិញដាច់ហើយ ពីអាជ្ញាធរក្នុងមូលដ្ឋាននៅឃុំព្រៃតាអី ស្រុកស្វាយទាប។
ជុំវិញរឿងនេះវិទ្យុអាស៊ីសេរី មិនអាចទាក់ទងតំណាងក្រុមហ៊ុន អេស ប៊ី ប៊ី ភី គ្រុប លោក សួស សម្បត្តិ ដើម្បីបកស្រាយជុំវិញរឿងនេះបានទេ នៅថ្ងៃទី១២ ខែមិថុនានេះ។ ទោះជាយ៉ាងណា ចាប់តាំងពីមានការចេញតវ៉ាជាបន្តបន្ទាប់ ពីសំណាកប្រជាពលរដ្ឋមក គេឃើញមានវត្តមាន លោក សួស សម្បត្តិ ចេញមុខការពារ និងថែមទាំងគំរាមបើកឡានបុកមកលើពលរដ្ឋណា ដែលនៅតែប្រឆាំងនឹងរូបលោក ហើយហាមពលរដ្ឋមិនឱ្យចូលក្នុងដីនោះថែមទៀត។ លោក សួស សម្បត្តិ ក៏បានទទូចឱ្យប្រជាពលរដ្ឋដាក់ពាក្យប្ដឹងទៅតុលាការ បើសិនជាលោកពិតជាខុសច្បាប់។
លោក សួស សម្បត្តិ៖ «អញៗ មានឃាត់ឯងណា បើចង់ប្ដឹងៗទៅ ចង់និយាយអ៊ីចឹងហ្ន៎ា! .មិនខ្លាចទេចង់ប្ដឹងៗទៅ (ប្ដឹងទៅតុលាការ) យី ស្មានតែអញខ្លាច។ [លោក សួស សម្បត្តិ តវ៉ាជាមួយពលរដ្ឋ]»។.
ពលរដ្ឋម្នាក់ទៀត លោក ខន សិលា លើកឡើងថា ការរំលោភយកដីរបស់ក្រុមហ៊ុនឯកជន នេះ គឺជារឿងដែលមិនត្រឹមត្រូវនោះទេ ខណៈដែលឯកសារពាក់ព័ន្ធនឹងដីស្រះនេះ គឺពុំមានបង្ហាញពីការលក់ដូរ ដូចការលើកឡើងរបស់តំណាងក្រុមហ៊ុននោះដែរ។ លោកទទូចឱ្យអាជ្ញាធរពាក់ព័ន្ធ ជួយដោះស្រាយករណីនេះឱ្យបានឆាប់ ដើម្បីឱ្យពួកគាត់ប្រើប្រាស់ទឹកស្រះសាធារណៈមួយនេះ។
លោក ខន សិលា៖ «ខ្ញុំចង់ឱ្យខាងក្រុមហ៊ុននឹងវាស់ដីថា ដីពីមុននឹងប៉ុណ្ណា អ៊ីចឹងចង់ឱ្យនៅដូចដើមវិញ ចង់យកទំហំដើមវិញ។ ពីមុខរាងធំដូចជា១ហិកតារជាង ១ហិកតារកន្លះ វាស់វគ្គមុនឃើញតែ ១ហិកតា ២៥អារទេ អ៊ីចឹងវាបាត់ដី។ អ៊ីចឹង ខ្ញុំមកទាមទារដើម្បីឱ្យខាងក្រុមហ៊ុនដោះស្រាយឱ្យគាត់ទុកដីឱ្យដូចមុនវិញ»។
ទាក់ទងបញ្ហានេះ ជំទប់ទី២ ឃុំព្រៃតាអី ស្រុកស្វាយទាប លោក សេក សាវឿន ប្រាប់វិទ្យុអាស៊ីសេរីនៅថ្ងៃទី១២ ខែមិថុនាថា ករណីវិវាទដីធ្លីនេះ អាជ្ញាធរពាក់ព័ន្ធបានដោះស្រាយរួចរាល់ហើយ គឺក្រុមហ៊ុននឹងប្រគល់ដីនោះជូនពលរដ្ឋវិញ ពោលគឺពុំមានការរំលោភយកដីស្រះទៀតនោះទេ។ លោកបន្តថា ចំណែកមន្ត្រីថ្នាក់ស្រុកស្វាយទាប នឹងមកធ្វើការវាស់វែងនៅថ្ងៃទី១៣ ខែមិថុនា ជូនប្រជាពលរដ្ឋវិញ។
លោក សេក សាវឿន៖ «បញ្ហាហ្នឹងក្រុមហ៊ុនគេព្រមព្រៀងឱ្យវិញតើ ស្អែកហ្នឹងគឺខាងភូមិបាល មន្ត្រីស្រុក(ស្វាយទាប) ចុះមកវាស់ប្លង់ដី [ជូនពលរដ្ឋវិញ] តាមជាក់ស្ដែងនៅក្នុងហ្នឹង កន្លែងឱ្យនឹង ខាងមន្ត្រីភូមិបាលវាស់កាលពីលើកមុខ»។
ទោះជាបែបនេះ ប្រជាពលរដ្ឋថា នេះគ្រាន់តែជាការសន្យាខ្យល់ ព្រោះករណីរំលោភយកដីស្រះទឹកសាធារណៈនេះ កើតមានជិត ១ខែហើយ ប៉ុន្តែពុំឃើញមានអាជ្ញាធរពាក់ព័ន្ធចេញមុខដោះស្រាយនោះឡើយ។ មិនតែប៉ុណ្ណោះ កាលថ្ងៃទី១ ខែមិថុនា នេះ អាជ្ញាធរឃុំ ថែមទាំងចេញលិខិតជូនដំណឹងប្រាប់ពលរដ្ឋថា ដីស្រះដែលមានទំហំជាង ១ហិកតារនោះ គឺអាជ្ញាធរបានលក់ឱ្យក្រុមហ៊ុន អេស ប៊ី ប៊ី ភី តាំងពីឆ្នាំ២០០៨។
អ្នកសម្របសម្រួលគម្រោងធុរកិច្ចនិងសិទ្ធិមនុស្ស របស់មជ្ឈមណ្ឌលសិទ្ធិមនុស្សកម្ពុជាលោក វណ្ណ សុផាត លើកឡើងថា ករណីការរំលោភយកដីស្រះទឹកដែលជាសម្បត្តិសាធារណៈរបស់រដ្ឋនេះ គឺជាទង្វើខុសច្បាប់ ហើយអាជ្ញាធរពាក់ព័ន្ធគួរតែចាត់វិធានការឱ្យបានតឹងរ៉ឹង ចំពោះជនទាំងនោះ មិនថា អ្នកនោះ ជាអ្នកមានលុយមានអំណាចក៏ដោយ គឺត្រូវតែទទួលខុសត្រូវចំពោះមុខច្បាប់។ លោកថា បើសិនជាករណីរំលោភយកដីរដ្ឋ និងដីពលរដ្ឋ កើតមានតាមតែអំពើចិត្តបែបនេះ អ្នកដែលរងគ្រោះគឺពលរដ្ឋ។
លោក វណ្ណ សុផាត៖ «ក្រុមហ៊ុនហ្នឹង គឺជាក្រុមហ៊ុនដែលរំលោភលើដីសាធារណៈរបស់រដ្ឋដែលខុសច្បាប់ គឺត្រូវតែមានវិធានការតាមផ្លូវច្បាប់។ អ៊ីចឹងប្រជាពលរដ្ឋគាត់អាចមានសិទ្ធិដាក់ពាក្យបណ្ដឹងទៅកាន់គណៈកម្មការសុរិយោដីស្រុក-ខេត្ត និងអាចមានសិទ្ធិដាក់ពាក្យដល់ថ្នាក់ជាតិដែរ»។
ប្រជាពលរដ្ឋរស់នៅឃុំព្រៃតាអី ស្រុកស្វាយទាប មានសរុប ជិត ២ពាន់គ្រួសារ (១៨០៧) ហើយស្ទើរតែ៧០ភាគរយជាអ្នកធ្វើកសិកម្ម និងចិញ្ចឹមគោក្របី។ ប្រជាពលរដ្ឋ អះអាងថា ការប្រើប្រាស់ទឹកស្រះសាធារណៈ គឺជារឿងចាំបាច់បំផុតនៅក្នុងតំបន់របស់ពួកគាត់ ជាពិសេសនៅរដូវប្រាំង ដើម្បីយកមកចិញ្ចឹមគោក្របី។ ពលរដ្ឋប្ដេជ្ញាថា ពួកគាត់នឹងបន្តប្រមូលម្ដុំ តវ៉ាជាបន្តបន្ទាប់ទៀត ហើយនឹងដាក់ពាក្យបណ្ដឹងទៅតុលាការ បើសិនជាពុំមានដោះស្រាយក្នុងពេលឆាប់ៗទេនោះ៕
1 comment:
Did you hear about the attack of police in Dak Lak by Montagnard in Vietnam? The Montagnards are more active than Khmers. The Rebels in Thailand, The Myanmar Junta, and The Taliban all have more respect than Khmers. While Khmers lose everything and do nothing.
Post a Comment