ដោយ មាន ឫទ្ធិ
2023.07.10
រូប៖ ហ្វេសប៊ុក
រដ្ឋាភិបាលរបស់លោក ហ៊ុន សែន ដាក់ឈ្មោះមន្ត្រីគណបក្សភ្លើងទៀនចំនួនបីនាក់នៅក្រៅប្រទេសចូលក្នុងបញ្ជីខ្មៅ (Black List) ដែលត្រូវចាប់ខ្លួន។ មន្ត្រីបក្សប្រឆាំងចាត់ទុកទង្វើនេះថា ជាការធ្វើទុក្ខបុកម្នេញ និងរារាំងនូវការអនុវត្តសិទ្ធិនយោបាយ។ចំណែកមន្ត្រីសិទ្ធិមនុស្សថា ចំណាត់ការរបស់អាជ្ញាធរធ្វើឡើងមិនត្រឹមត្រូវតាមច្បាប់។
អគ្គស្នងការដ្ឋាននគរបាលជាតិបានផ្ញើលិខិតមួយច្បាប់ទៅរដ្ឋមន្ត្រីក្រសួងមហាផ្ទៃលោក ស ខេង កាលពីចុងខែឧសភា ដើម្បីឱ្យអគ្គនាយកដ្ឋានអន្តោប្រវេសន៍ដាក់បញ្ចូលឈ្មោះមន្ត្រីជាន់ខ្ពស់របស់គណបក្សភ្លើងទៀនរស់នៅក្រៅប្រទេសចំនួនបីនាក់ចូលក្នុងបញ្ជីខ្មៅ (Black List)។ លិខិតដែលចុះហត្ថលេខាដោយលោក នេត សាវឿន បញ្ជាក់ថា អ្នកទាំងបីនាក់នោះ គឺជាជនជាប់ចោទដែលសាលាដំបូងរាជធានីភ្នំពេញបង្គាប់ឱ្យសមត្ថកិច្ចចាប់ខ្លួនពីបទ «ប្រមាថព្រះមហាក្សត្រ ញុះញង់ឱ្យមានការរើសអើងពូជសាសន៍ និងញុះញង់ឱ្យមានភាពវឹកវរធ្ងន់ធ្ងរដល់សន្តិសុខសង្គម» ដែលបានប្រព្រឹត្តនៅកម្ពុជា និងក្នុងបណ្ដាញសង្គមហ្វេសប៊ុក កាលពីអំឡុងឆ្នាំ២០២០ ដល់ឆ្នាំ២០២២។ មន្ត្រីគណបក្សភ្លើងទៀនទាំងនោះ រួមមាន លោក សៅ រ៉ាស៊ី រស់នៅប្រទេសនូវែលហ្សេឡង់ (New Zealand) លោក ជា គឹមលី និងលោក ស៊ុម ទិត្យា រស់នៅសហរដ្ឋអាមេរិក។
វិទ្យុអាស៊ីសេរីមិនអាចទាក់ទងអ្នកនាំពាក្យអគ្គស្នងការដ្ឋាននគរបាលជាតិលោក ឆាយ គឹមខឿន និងអ្នកនាំពាក្យតុលាការក្រុងភ្នំពេញលោក អ៊ី រិន្ទ ដើម្បីបញ្ជាក់បន្ថែមជុំវិញរឿងនេះបានទេនៅថ្ងៃទី១០ ខែកក្កដា។
ចំណាត់ការរបស់អាជ្ញាធរកម្ពុជានេះ គឺបន្ទាប់ពីលោក ហ៊ុន សែន ដែលកាលពីពេលថ្មីៗ នេះ បានបញ្ជាឱ្យរដ្ឋមន្ត្រីក្រសួងយុត្តិធម៌ត្រូវក្ដាប់នយោបាយព្រហ្មទណ្ឌឱ្យច្បាស់ដើម្បីចាត់ការលើមន្ត្រី និងសកម្មជនបក្សប្រឆាំង។
ឆ្លើយតបរឿងនេះ លោក សៅ រ៉ាស៊ី ដែលតុលាការបង្គាប់ឱ្យចាប់ខ្លួន ប្រាប់វិទ្យុអាស៊ីសេរី នៅថ្ងៃទី១០ ខែកក្កដាថា ដំបូងឡើយលោកបានប្រកាសជាសាធារណៈថា លោកនឹងទៅកម្ពុជា ដើម្បីចូលរួមការបោះឆ្នោត ដោយសារតែលោក ហ៊ុន សែន បានកែច្បាប់បោះឆ្នោត ដើម្បីបំបិទសិទ្ធិរបស់អ្នកនយោបាយ។ ប៉ុន្តែក្រោយមកអាជ្ញាធរកម្ពុជាបែរជាបង្កើតរឿងចោទប្រកាន់តាមប្រព័ន្ធតុលាការ ហើយថែមទាំងដាក់ឈ្មោះរបស់លោកក្នុងបញ្ជីខ្មៅ (Black List) ខណៈអាជ្ញាធរមិនដែលកោះហៅលោកទៅបំភ្លឺម្ដងណាឡើយ។ លោកអះអាងថាលោកមិនបានប្រព្រឹត្តល្មើសដូចតុលាការចោទកាន់នោះទេ។ មន្ត្រីជាន់ខ្ពស់បក្សប្រឆាំងដែលរស់នៅនៅប្រទេសនូវែលហ្សេឡង់ (New Zealand) រូបនេះ ចាត់ទុកចំណាត់ការរបស់អាជ្ញាធរកម្ពុជាថា មានចរិតនយោបាយដែលមានចេតនារារាំងថ្នាក់ដឹកនាំគណបក្សភ្លើងទៀននៅក្រៅប្រទេសមិនឱ្យចូលស្រុកបាន។
លោក សៅ រ៉ាស៊ី៖ «បំណងរបស់ខ្ញុំចូលទៅកម្ពុជាគ្មានបំណងធ្វើអ្វីដើម្បីរំខានដល់រដ្ឋាភិបាលទេ ប៉ុន្តែខ្ញុំគ្រាន់តែចង់ពង្រឹងសកម្មជន ថ្នាក់ដឹកនាំប្រជាធិបតេយ្យនៅក្នុងស្រុកខ្មែរឱ្យរឹងមាំដដែល ជាពិសេសខ្ញុំគ្មានកំហុស ហើយខ្ញុំចូលក្នុងប្រទេសរបស់ខ្ញុំ រឿងអ្វីខ្ញុំត្រូវខុសមករារាំងខ្ញុំ ដើម្បីអ្វី វាជាចេតនានយោបាយមួយ ដែលបង្អាក់មិនឱ្យអ្នកនយោបាយប្រជាធិបតេយ្យ ជាពិសេសគណបក្សប្រឆាំងហ្នឹង អ៊ីចឹង សូមឱ្យរដ្ឋាភិបាលពិចារណាដើម្បីជៀសវាងកុំឱ្យមានការដាក់ទណ្ឌកម្មណាមួយនៅក្រោយការបោះឆ្នោត»។
ជុំវិញរឿងនេះ អ្នកនាំពាក្យសមាគមការពារសិទ្ធិមនុស្សអាដហុក (Adhoc) លោក ស៊ឹង សែនករុណា មានប្រសាសន៍ថា ការដាក់ឈ្មោះរបស់មន្ត្រីបក្សប្រឆាំងចូលក្នុងបញ្ជីខ្មៅនោះ គឺធ្វើឡើយដោយមិនត្រឹមត្រូវតាមច្បាប់។ លោកបញ្ជាក់ថា ទោះបីពួកគេត្រូវបានតុលាការចោទប្រកាន់ និងចេញដីកាចាប់ខ្លួនក្ដី ប៉ុន្តែតុលាការមិនទាន់បានជំនុំជម្រះក្ដីដោយយុត្តិធម៌ និងសម្រេចជាផ្លូវការថា ពួកគេត្រូវមានទោសនៅឡើយទេ។ មន្ត្រីសិទ្ធិមនុស្សសង្កេតឃើញថា សកម្មភាពរបស់សកម្មជនបក្សប្រឆាំងកន្លងមក គឺជាការអនុវត្តសិទ្ធិរបស់ខ្លួន ដែលមានចែងក្នុងរដ្ឋធម្មនុញ្ញ ហើយបើការចោទប្រកាន់ណាមួយដែលគ្មានមូលដ្ឋានត្រឹមត្រូវ ជៀសមិនផុតពីសហគមន៍ជាតិ និងអន្តរជាតិរិះគន់ករណីនេះថាជារឿងនយោបាយជាងការអនុវត្តច្បាប់។
លោក ស៊ឹង សែនករុណា៖ «វាជារំលោភលើគោលការណ៍គ្មានទោស ក្នុងនោះគឺនៅពេលតុលាការមិនទាន់ចេញសាលក្រមស្ថាពរ បុគ្គលនោះស្ថិតក្នុងជនដែលគ្មានទោសនៅឡើយ បើសិនជាយើងដាក់នៅក្នុងចំណុចណាមួយដោយអ្នកទាំងនោះមិនទាន់ឆ្លងកាត់ដំណើរការតាមផ្លូវច្បាប់បានត្រឹមត្រូវ ហើយយើងដាក់នៅក្នុងចំណុចទោសទណ្ឌណាមួយ អាហ្នឹងវាមិនមែនជារឿងត្រឹមត្រូវតាមផ្លូវច្បាប់ទេបាទ»។
អ្នកឃ្លាំមើលបញ្ហាសង្គមនិងនយោបាយកម្ពុជា មើលឃើញថា របបដឹកនាំរបស់លោក ហ៊ុន សែន កំពុងបង្កើនកម្ដៅនយោបាយ និងព្យុះភ្លៀងបោកបក់ទៅលើគណបក្សប្រឆាំងតាមគ្រប់រូបភាព មានទាំងការគំរាមកំហែង និងការប្រើប្រាស់ប្រព័ន្ធតុលាការធ្វើជាអាវុធ។ ក្នុងនោះរួមមាន ការប្ដឹងផ្ដល់ទារសំណងជំងឺចិត្តរាប់សែនដុល្លារពីអនុប្រធានគណបក្សភ្លើងទៀន លោក សុន ឆ័យ ការរឹបអូសផ្ទះសម្បែង និងដីធ្លីរបស់ឧត្ដមទីប្រឹក្សាគណបក្សភ្លើងទៀន លោក គង់ គាំ រួមទាំងការចោទប្រកាន់ចាប់ខ្លួនលោក ថាច់ សេដ្ឋា និងសកម្មជនជាច្រើននាក់ទៀត ដាក់ពន្ធនាគារកាលពីពេលថ្មីៗ នេះ ដែលមតិជាតិ និងអន្តរជាតិចាត់ទុកជារឿងនយោបាយ៕
No comments:
Post a Comment