2023.10.09
ពលករខ្មែរ និងជនភៀសខ្លួននៅប្រទេសថៃ (Thailand) មិនបានទៅជួបជុំក្រុមគ្រួសារនៅស្រុកកំណើតនោះទេ ដោយសារតែពួកគេមានជីវភាពខ្វះខាត ហើយអ្នកខ្លះរងការធ្វើទុក្ខបុកម្នេញផ្នែកនយោបាយនៅកម្ពុជា។ ទោះយ៉ាងណានៅថ្ងៃកាន់បិណ្ឌទី៩នេះ ពួកគេរាប់រយនាក់បានគ្នាប្រារព្ធពិធីបុណ្យភ្ជុំបិណ្ឌ ដើម្បីឧទ្ទិសកុសលផលបុណ្យជូនដល់វិញ្ញាណក្ខន្ធបុព្វការីជន ដែលបានចែកឋានទៅ ស្របពេលមន្ត្រីស្ថានទូត និងមន្ត្រីបក្សប្រជាជនកម្ពុជារៀបចំពិធីបុណ្យកាន់បិណ្ឌ និងភ្ជុំបិណ្ឌជាមួយកម្មកររាប់ពាន់នៅប្រទេសថៃនេះដែរ។
ពលរដ្ឋខ្មែរ និងជនភៀសខ្លួននៅប្រទេសថៃប្រមាណ៥រយនាក់បានប្រារព្ធពិធីបុណ្យកាន់បិណ្ឌ និងភ្ជុំបិណ្ឌនៅថ្ងៃទី៨ ខែតុលា នៅក្នុងវត្តមង្គលនិម្មិត នៅខេត្តសាមុតប្រាកាន (Samut Prakan)។ ក្នុងសម្លៀកបំពាក់ចម្រុះពណ៌ ពួកគាត់ឈររាប់បាត្រនិមន្តព្រះសង្ឃ៧អង្គចម្រើនព្រះបរិត្ត និងធ្វើបទនមស្សការសមាទានសីលវេរចង្ហាន់ប្រគេនព្រះសង្ឃ ព្រមទាំងមានផ្កា ធូប ទៀន ថ្វាយព្រះឧទ្ទិសកុសល ដល់ជីដូនជីតារបស់ពួកគេដែលបានចែកឋានទៅកាន់លោកខាងមុខ។
«សូមអនុមោទនាបុណ្យភ្ជុំបិណ្ឌសាមគ្គី! សាធុ! សូមអនុមោទនាកុសលផលបុណ្យ! សាធុ! »។
តំណាងពលករ និងជាអ្នកផ្ដួចផ្ដើមរៀបចំកម្មវិធីបុណ្យនេះ លោក ឆន សុខឿន ប្រាប់វិទ្យុអាស៊ីសេរីថា ឆ្នាំនេះមានពលរដ្ឋខ្មែរមកពីគ្រប់ទិសទីយ៉ាងច្រើនកុះករបានជ្រះថ្លាមូលមតិគ្នាចូលរួមបុណ្យកាន់បិណ្ឌ បើទោះបីមន្ត្រីគណបក្សកាន់អំណាចយកតារាចម្រៀងរៀបចំកម្មវិធីជួបជុំនៅវត្តក្បែរនោះ ដើម្បីបំបែកកម្លាំងរបស់ពលករក្តី។ លោកឱ្យដឹងថា ការរៀបចំពិធីបុណ្យភ្ជុំបិណ្ឌនៅប្រទេសថៃនេះ ដើម្បីឲ្យពលករខ្មែរ ដែលមិនមានលុយកាក់ទៅចូលរួមពិធីបុណ្យនៅស្រុកកំណើត មានឱកាសជួបជុំគ្នាធ្វើបុណ្យបួងសួងឧទ្ទិសកុសល និងរក្សាសាមគ្គីភាពតាមប្រពៃណីបានដែរ។
លោក ឆន សុខឿន៖ «យើងរៀបចំនេះ ដើម្បីរក្សាវប្បធម៌ប្រពៃណីជាតិទីមួយ។ ទីពីរចង់បញ្ជាក់ពីការសាមគ្គីរបស់ខ្មែរ ទោះបីមិនបាននៅក្នុងប្រទេសរបស់ខ្លួន នៅប្រទេសគេក្តី ប៉ុន្តែនៅតែមានឱកាសធ្វើបុណ្យ ចង់ថែរក្សាវប្បធម៌ប្រពៃណី និងសាមគ្គីគ្នាបានយ៉ាងណាច្រើនកុះករ ហើយទីបីយើងចង់បញ្ជាក់ទៅក្មេងៗ ជំនាន់ក្រោយថា យើងមិនបោះបង់វប្បធម៌ប្រពៃណីជាតិរបស់ខ្លួនទេ»។
ស្រដៀងគ្នានេះដែរ ពលករម្នាក់ទៀតធ្វើការនៅរោងចក្រចំណីសត្វនៅជិតខេត្តសាមុតប្រាកាន លោក គិត បញ្ញា ប្រាប់ថា លោក និងប្រពន្ធរីករាយដែលបានជួបជុំជាមួយពលរដ្ឋខ្មែររៀបចំចង្ហាន់ប្រគេនព្រះសង្ឃ ដើម្បីបួងសួងសុំសេចក្ដីសុខ និងឧទ្ទិសកុសលដល់អ្នកមានគុណ ដែលបានចែកឋានទៅ។ ពលកររូបនេះរៀបរាប់ថា រដូវបុណ្យទានបែបនេះលោកនឹករលឹកឪពុកម្ដាយបងប្អូន ដោយសារលោកមិនបានទៅស្រុកកំណើតនៅខេត្តប៉ៃលិនក្នុងពីធីបុណ្យភ្ជុំបិណ្ឌឆ្នាំនេះទេ ព្រោះលោកកង្វះខាតថវិកាសម្រាប់ធ្វើដំណើរ ខណៈប្រាក់ឈ្នួលនៅកន្លែងការងារទទួលបានតិចតួចសឹងដោះស្រាយការហូបចុកប្រចាំថ្ងៃមិនបានផង។
លោក គិត បញ្ញា៖ «ខ្ញុំនឹកមែនទែនឱ្យតែនឹកឃើញខ្ញុំចង់តែស្រក់ទឹកភ្នែក ពីព្រោះយើងជាជនជាតិមួយនៅទល់ដែនថៃ តែយើងគ្មានលទ្ធភាពទៅលេងស្រុកកំណើត។ ខ្ញុំសប្បាយមែនទែនដែលបានមកជួបបងប្អូនខ្មែរយើង ហើយខ្ញុំឃើញពួកគាត់រួសរាយរាក់ទាក់ ដែលមកជួបជុំ គឺមានមនុស្សអ៊ូអរណាស់»។
ចំណែកសកម្មជនបក្សប្រឆាំងដែលបង្ខំចិត្តនិរទេសខ្លួននៅក្រៅប្រទេស ដើម្បីគេចពីការធ្វើទុក្ខបុកម្នេញ និងតាមចាប់ខ្លួនរបស់អាជ្ញាធរក្រុងភ្នំពេញដែលបានចូលរួមធ្វើបុណ្យកាន់បិណ្ឌជាមួយក្រុមពលករ លោក ធន់ ច័ន្ទថា រៀបរាប់ទាំងទឹកភ្នែករលីងរលោងថា លោក និងសកម្មជនមួយចំនួនទៀតពុំមានឱកាសជួបជុំក្រុមគ្រួសារសាច់ញាតិ និងយកចង្ហាន់ទៅប្រគេនព្រះសង្ឃតាមវត្តអារាមនានា ដូចគេឯងទេ។ លោកស្នើឲ្យរដ្ឋាភិបាលថ្មីបញ្ឈប់ការធ្វើទុក្ខបុកម្នេញលើសកម្មជនបក្សប្រឆាំង និងបើកឱកាសឲ្យពួកលោកបានវិលត្រឡប់ទៅរស់នៅជួបជុំក្រុមគ្រួសារវិញ។
លោក ធន់ ច័ន្ទថា៖ «ដល់រដូវបុណ្យទាន់ដល់ពេលយើងយកលុយជូនម្តាយ អ៊ំពូមីគ្រប់សព្វបែបយ៉ាង តែដល់ពេលរដូវភ្ជុំ យើងមកទីនេះជាជនភៀសខ្លួនមិនបានជួបជុំបងប្អូនក្រុមគ្រួសារ យើងសោកស្តាយបំផុតមិនបានជួប ពីព្រោះទឹកចិត្តរបស់យើងពុះកញ្ជ្រោលចង់ទៅស្រុកខ្មែរវិញ ដើម្បីជួបជុំបងប្អូន ដោយពួកគាត់មានបញ្ហាជាមួយរដ្ឋាភិបាលផ្ដាច់ការ ធ្វើឱ្យពួកគាត់មិនអាចចូលក្នុងស្រុកបាន»។
ដោយឡែក ស្ថានទូតខ្មែរប្រចាំប្រទេសថៃ និងក្រុមឧកញ៉ាមកពីកម្ពុជាវិញ បានរៀបចំពិធីបុណ្យកាន់បិណ្ឌ និងភ្ជុំបិណ្ឌដែលត្រូវនឹងបិណ្ឌទី៩ ជាច្រើនកន្លែង មានដូចជា នៅវត្តសូរថននិម្មិត នៅខេត្តសាមុតប្រាកាន និងតំបន់ប្រាទូណាម (Pratunam) ក្រុងបាងកក (Bangkok) ដែលមានពលរដ្ឋខ្មែរចូលរួមរាប់ពាន់នាក់។
វិទ្យុអាស៊ីសេរីមិនអាចទាក់ទងមន្ត្រីអនុព័ន្ធការងារអមស្ថានទូតកម្ពុជាប្រចាំប្រទេសថៃលោក ឈឹម វិបុល ដើម្បីបញ្ជាក់ជុំវិញរឿងនេះបានទេ នៅថ្ងៃទី៨ ខែតុលា។
ជុំវិញរឿងនេះព្រះសង្ឃគង់នៅវត្តមួយនៅខេត្តឈុនបុរី (Chonburi) ដែលចូលរួមក្នុងពិធីបុណ្យភ្ជុំបិណ្ឌ គឺព្រះគ្រូ វត ភិសិដ្ឋ មានព្រះថេរដីកាថា ពលរដ្ឋខ្មែរមិនមានឱកាសមកធ្វើបុណ្យនៅស្រុកកំណើតក្តី ក៏ តែពួកគាត់មិនបង់បោះការធ្វើពិធីបុណ្យតាមប្រពៃណីនេះទេ ដើម្បីសាងបុណ្យកុសល រំឭកដឹងគុណដូនតា និងថែរក្សាវប្បធម៌ប្រពៃណី។ ព្រះអង្គបានរំឭកប្រវត្តិភ្ជុំបិណ្ឌ ព្រមទាំងផ្តល់ឱកាសដល់ពុទ្ធបរិស័ទទាំងអស់ត្រូវចេះសាមគ្គី ធ្វើបុណ្យរក្សាសីលប្រាំ ដោយជៀសពីអំពើបៀតបៀនអ្នកដទៃជាដើម៕
លោក ឈឹម វិបុល៖ «មួយថ្ងៃនេះពួកគាត់មកធ្វើបុណ្យមានទឹកចិត្តរីករាយ តែបើតាមអាត្មាសង្កេតទៅអ្នកខ្លះ ក៏មុខស្រគត់ស្រគំនឹក ដោយអត់បានទៅជួបម៉ែបងប្អូន កូនចៅដែលនៅស្រុកខ្មែរ រឿងហ្នឹងធ្វើឱ្យគាត់មានទុក្ខជាមួយរឿងមួយ ដែលសេដ្ឋកិច្ចរបស់យើងអត់ល្អ»។
ពិធីកាន់បិណ្ឌមានរយៈពេល ១៥ថ្ងៃ គឺចាប់ពីថ្ងៃទី៣០ ខែកញ្ញា ដល់ថ្ងៃទី១៤ ខែតុលា ជាថ្ងៃបុណ្យភ្ជុំធំ ទៅតាមទំនៀមទម្លាប់របស់ពលរដ្ឋខ្មែរ និងកាលកំណត់ជាទៀងទាត់ពីបុរាណមក។ បុណ្យនេះធ្វើឡើងដើម្បីឧទ្ទិសកុសលដល់វិញ្ញាណក្ខន្ធនៃអ្នកមានគុណទាំងឡាយ ដែលបានលាចាកលោកនេះ ទៅកាន់លោកខាងមុខ។ ម្យ៉ាងទៀតវាជាឱកាសល្អសម្រាប់ការជួបជុំក្រុមគ្រួសារដែលមានជីវិតអាចឈ្វេងយល់អំពីសុខទុក្ខ ការគោរពស្រឡាញ់គ្នា ការដឹងគុណ ព្រមទាំងបង្កើននូវសាមគ្គីភាពថែមទៀតផង៕
No comments:
Post a Comment