មន្ត្រីគណបក្សប្រឆាំងនិងអ្នកតាមដានស្ថានការណ៍សង្គមរិះគន់លោកនាយករដ្ឋមន្ត្រី ហ៊ុន ម៉ាណែត ដែលថា រដ្ឋាភិបាលរបស់លោកកំពុងយកចិត្តទុកដាក់ជួយដល់ពលរដ្ឋខ្មែរនៅប្រទេសអ៊ីស្រាអែល(Israel)។ ពួកគេថា លោក ហ៊ុន ម៉ាណែត ឆ្លើយដោះសាយករួចខ្លួនដើម្បីគេចចេញពីការទទួលខុសត្រូវប៉ុណ្ណោះ។
មន្ត្រីបក្សប្រឆាំងនិងអ្នកតាមដានស្ថានការណ៍សង្គមលើកឡើងថា រដ្ឋាភិបាលគួរតែជម្លៀសពលរដ្ឋខ្មែរត្រឡប់មកកម្ពុជាវិញ។
មន្ត្រីគណបក្សសង្គ្រោះជាតិដែលកំពុងភៀសខ្លួននៅក្រៅប្រទេសលោក ម៉េង សុធារ៉ា ប្រាប់វិទ្យុអាស៊ីសេរី នៅថ្ងៃទី២៥ តុលា ថា ពលរដ្ឋខ្មែរនៅប្រទេសអ៊ីស្រាអែលនៅតែប្រឈមនឹងគ្រោះថ្នាក់ដែលរដ្ឋាភិបាលដឹកនាំដោយលោក ហ៊ុន ម៉ាណែត គួរតែបញ្ជូនពួកគេត្រឡប់មកកម្ពុជាវិញ ដើម្បីសុវត្ថិភាព។ លោកបន្តថា លោក ហ៊ុន ម៉ាណែត មិនគួរលើកយកយោបល់រៃអង្គាសប្រាក់របស់ប្រធានស្ដីទីគណបក្សសង្គ្រោះជាតិលោក សម រង្ស៊ី រឿងជួយដល់ពលរដ្ឋខ្មែរនៅប្រទេសអ៊ីស្រាអែលមកវាយប្រហារជាសាធារណៈបែបនេះទេ។
លោក ហ៊ុន ម៉ាណែត៖ «អីចឹងអ្វីដែលយើងឃើញលទ្ធផលគ្រាន់តែជះទឹកដាក់តែប៉ុណ្ណោះ នៅពេលដែលគេមានគំនិតល្អជាងខ្លួនអីចឹងខ្លាចខ្លួនឯងអន់។អីចឹងមេដឹកនាំបែបនេះជាមេដឹកនាំរឹតតែអន់ ជាពិសេសយើងខ្មាសគេនៅក្នុងតំបន់ មេដឹកនាំគេស្វះស្វែងជម្លៀសពលរដ្ឋគេចេញយ៉ាងសស្រាក់សស្រាំ ទោះបីចំណាយលុយជាតិប៉ុណ្ណាក៏គេហ៊ានចំណាយដែរ។ ចំណែកលោក ហ៊ុន ម៉ាណែត គាត់ហ៊ានចំណាយទៅលើការកៀរគរមនុស្សទៅគាំទ្រគាត់នោះគាត់ហ៊ានចំណាយ តែចំពោះការបញ្ចេញលុយជាតិសង្គ្រោះពលរដ្ឋខ្លួនឯង ដែលជាប់នៅក្នុងសង្គ្រាមគាត់អត់ព្រម»។
ប្រតិកម្មរបស់មន្ត្រីគណបក្សប្រឆាំងនេះ គឺបន្ទាប់ពីលោក ហ៊ុន ម៉ាណែត មានប្រសាសន៍ក្នុងពិធីសំណេះសំណាលជាមួយកម្មកររោងចក្រជាង ១ម៉ឺន ២ពាន់នាក់(១២.០៦០)នៅខេត្តកំពង់ចាម នៅព្រឹកថ្ងៃទី២៥ តុលា ដោយលោកឌឺដងទំនងសំដៅទៅលើលោក សម រង្ស៊ី ដែលថានឹងរៃអង្គាសប្រាក់ជួយដល់និស្សិតខ្មែរនោះ ជាការនិយាយគ្មានការពិត។ លោកអះអាង ថា រដ្ឋាភិបាលបានយកចិត្តទុកដាក់ខ្ពស់លើសុខទុក្ខរបស់ពលរដ្ឋខ្មែរនៅប្រទេសអ៊ីស្រាអែល។ លោកបញ្ជាក់ថា ក្នុងមួយថ្ងៃលោកបញ្ជាឱ្យក្រសួងពាក់ព័ន្ធរាយការណ៍ជូនលោកចំនួន៤ដង អំពីសុខទុក្ខរបស់និស្សិតខ្មែរដែលកំពុងស្នាក់នៅប្រទេសអ៊ីស្រាអែល។
លោក ហ៊ុន ម៉ាណែត៖ «អ៊ីចឹងសូមបញ្ជាក់ការយកចិត្តទុកដាក់ដល់អាយុជីវិតពលរដ្ឋនៅគ្រប់កន្លែងរួមទាំងនិស្សិតរបស់យើង នៅអ៊ីស្រាអែលយើងបានធ្វើជាប់ជាប្រចាំនៅក្នុងពីរបីសប្ដាហ៍នេះ។ ហើយយើងមិនចោលទេ រហូតទាល់តែស្ថានភាពនៅទីនោះត្រូវបានបញ្ចប់នេះ ជាការយកចិត្តដាក់និងការធានាហើយបងប្អូនជឿទុកចិត្តចុះ។ ខ្ញុំសុំយកពេលនេះបញ្ជូនសារ យើងមិនមែនត្រឹមតែបញ្ចេញវីដេអូមួយឃ្លិបពីរហើយឈប់និយាយជាមួយបងប្អូនទៅនិយាយរឿងអីផ្សេងនោះទេ តែយើងធ្វើការជាប់ជាប្រចាំមួយថ្ងៃ រាយការណ៍ឱ្យ៤ដងនាយករដ្ឋមន្ត្រីតាមដានផ្ទាល់»។
ជុំវិញរឿងនេះ ប្រធានកម្មវិធីប្រឆាំងការជួញដូរមនុស្ស និងទេសន្តរប្រវេសក៍នៃអង្គការសង់ត្រាល់ (Central) លោក ឌី ថេហូយ៉ា យល់ឃើញថា រដ្ឋាភិបាលមានតួនាទីដោះស្រាយបញ្ហានានាជូនពលរដ្ឋ ដូច្នេះប្រសិនបើរដ្ឋាភិបាលធ្វើការមិនល្អ នោះមហាជននឹងរិះគន់ជារឿងធម្មតា។ លោក ចាត់ទុកការលើកឡើងរបស់លោក ហ៊ុន ម៉ាណែត ថា គ្រាន់តែជាការដោះសាដើម្បីគេចពីការទទួលខុសត្រូវ។
លោក ឌី ថេហូយ៉ា៖ «រដ្ឋាភិបាលគួរតែលះបង់ចោលនូវការគិតមួយដែលអ្នកដទៃមើលឃើញខុសពីខ្លួន ហើយថាគេជាក្រុមប្រឆាំង។ មែនៗទៅការគិតរបស់គេនោះ ក៏គេគិតគូរពីជាតិសាសន៍របស់គេគិតគួរអំពីប្រជាពលរដ្ឋរបស់គេ ហើយការលើកឡើងទាំងអស់ហ្នឹងគួរយកទៅពិចារណាដើម្បីស្វែងរកដំណោះស្រាយរួមគ្នា ជាជាងការដែលរដ្ឋាភិបាលគិតផ្សេង ហើយអ្នកនៅក្រៅរដ្ឋាភិបាលគិតផ្សេង។ ហើយអ្នកដែលគិតផ្សេងពីរដ្ឋាភិបាលហ្នឹងត្រូវបានរដ្ឋាភិបាលចាត់ទុកជាក្រុមបក្សប្រឆាំង ឬជនប្រតិកិរិយាអីជាដើម ការគិតបែបនេះគឺមិនចំរើនសម្រាប់ជាតិសាសន៍របស់យើងទេ»។
បច្ចុប្បន្ន មាននិស្សិតខ្មែរជាង ៤៥០នាក់ កំពុងសិក្សានៅប្រទេសអ៊ីស្រាអែល។ ក្នុងព្រឹត្តិការណ៍ប្រយុទ្ធគ្នារវាងក្រុមជីវពលប្រដាប់អាវុធហាម៉ាស (Hamas) និងកងទ័ពអ៊ីស្រាអែលចាប់តាំងពីថ្ងៃទី៧ ខែតុលា រហូតមកដល់ពេលនេះ មាននិស្សិតខ្មែរម្នាក់ ឈ្មោះ ចាន់ ឧត្តម បានស្លាប់។
រហូតមកដល់ពេលនេះ ស្ថានការណ៍សង្គ្រាមនៅតំបន់នោះមិនទាន់ស្ងប់ស្ងាត់នៅឡើយ ហើយមានសភាពកាន់តែរីកធំឡើង។ បញ្ហានេះធ្វើឱ្យប្រទេសជាច្រើននៅលើពិភពលោកបានជម្លៀសពលរដ្ឋរបស់ខ្លួនត្រឡប់ទៅប្រទេសវិញ ក្នុងនោះប្រទេសថៃ (Thailand) ដែលនៅជិតខាងកម្ពុជា បានយកយន្តហោះយោធានិងជួលយន្តហោះឯកជនជាច្រើនគ្រឿងដឹកពលរដ្ឋរបស់ខ្លួនបានជិត១ម៉ឺននាក់ហើយត្រឡប់ទៅប្រទេសវិញ។ ចំណែកកម្ពុជាវិញរហូតមកទល់ពេលនេះរដ្ឋាភិបាលមិនទាន់បញ្ជូនពលរដ្ឋណាម្នាក់ត្រឡប់មកកម្ពុជាវិញនៅឡើយ ខណៈដែលអតីតនាយករដ្ឋមន្ត្រីលោក ហ៊ុន សែន ផ្ដល់យោបល់ថា ត្រូវរង់ចាំរហូតដល់រដ្ឋាភិបាលអ៊ីស្រាអែលប្រកាសឱ្យកម្ពុជាជម្លៀសពលរដ្ឋចេញ នោះទើបកម្ពុជាគួរទៅដឹកពួកគេត្រឡប់មកស្រុកវិញ។
ហ្វេសប៊ុកនិស្សិតខ្មែរមួយចំនួនបានបង្ហោះរូបភាពការជួបជុំគ្នាជាធម្មតា ហាក់បង្ហាញថា ពួកគេនៅកន្លែងមានសុវត្ថិភាព។ វិទ្យុអាស៊ីសេរីមិនអាចទាក់ទងនិស្សិតខ្មែរនៅប្រទេសអ៊ីស្រាអែល ដើម្បីសាកសួរបន្ថែមអំពីការរស់នៅរបស់ពួកគេបាននៅថ្ងៃទី២៥ តុលា។
មន្ត្រីបក្សប្រឆាំងនិងអ្នកតាមដានស្ថានការណ៍សង្គមលើកឡើងថា រដ្ឋាភិបាលធ្វើបែបនេះជារឿងមិនត្រូវឡើយព្រោះពលរដ្ឋខ្មែរនៅទីនោះស្ថិតក្នុងស្ថានភាពគ្រោះថ្នាក់ដែលរដ្ឋាភិបាលគួរតែជម្លៀសពួកគេត្រឡប់មកប្រទេសវិញជាបន្ទាន់៕
1 comment:
Hun Manet Seuch Sess because of his father fucker Hun Sen.
Post a Comment