2023.10.22
មិនខុសពីឪពុករបស់លោក លោកនាយករដ្ឋមន្ត្រី ហ៊ុន ម៉ាណែត ប្ដេជ្ញាពង្រឹងបន្ថែមនូវកិច្ចសហប្រតិបត្តិការរបស់កម្ពុជាកាន់តែខ្លាំងទៀតជាមួយចៅហ្វាយនាយចិន លើគម្រោងគំនិតផ្តួចផ្តើមខ្សែក្រវាត់ និងផ្លូវ (BRI)។ ការប្តេជ្ញាចិត្តនេះ ធ្វើឡើងក្នុងពេលដែលលោកទៅចូលរួមវេទិកាខ្សែក្រវាត់ និងផ្លូវលើកទី៣ (3rd BRF) នៅរដ្ឋធានីប៉េកាំង (Beijing) កាលពីសប្ដាហ៍មុន។
គម្រោង BRI របស់ចិនរងនូវការរិះគន់ជារួមពីក្រុមប្រទេសលោកខាងលិចថា ជាអន្ទាក់បំណុល ជាគម្រោងអភិវឌ្ឍន៍ហេដ្ឋារចនាសម្ព័ន្ធខ្វះតម្លាភាព រំលោភសិទ្ធិមនុស្ស រំលោភអធិបតេយ្យ បង្កើតឱ្យមានអំពើពុករលួយ និងបំផ្លិចបំផ្លាញបរិស្ថាន ដើម្បីសម្រេចនូវមហិច្ឆតាប្រចាំសតវត្សរបស់ចិនក្នុងការគ្រប់គ្រង និងក្លាយជាមហាអំណាចពិភពលោក។ ជាក់ស្តែង ការស្រាវជ្រាវចុងក្រោយមួយដោយសាកលវិទ្យាល័យបូស្តុន (Boston University) នៅសហរដ្ឋអាមេរិក រកឃើញថា បើទោះបីជាគម្រោង BRI របស់ចិន ជួយឱ្យមានកំណើនសេដ្ឋកិច្ចក្នុងប្រទេសកំពុងអភិវឌ្ឍន៍គួរឱ្យកត់សម្គាល់ក៏ដោយ ក៏គម្រោង BRI របស់ចិនបង្កឱ្យមានហានិភ័យជាច្រើនដល់ប្រទេសទទួល ក្នុងនោះមានដូចជា ការធ្លាក់ក្នុងបំណុលវ័ណ្ឌក ការបំពុលខ្យល់អាកាស ហានិភ័យដល់ជីវចម្រុះ និងដីធ្លីរបស់ជនជាតិដើមភាគតិច ជាដើម៕
No comments:
Post a Comment