ដោយ ទីន ហ្សាការីយ៉ា
2023.12.18
(ឆ្វេង) អ្នកនាង ជៀម សុខជា លក់គ្រាប់ឈូក និងគ្រាប់ល្អៅលីងរកប្រាក់ផ្គត់ផ្គង់សេដ្ឋកិច្ចគ្រួសារ ដែលខ្វះខាត ក្រោយបាត់បង់ការងារពីរោងចក្រ សិន តៃ តាំងពីថ្ងៃទី៩ ខែមិនា ឆ្នាំ2023។
រូបពីពលរដ្ឋ
គណបក្សកម្លាំងជាតិ និងអង្គការសង្គមស៊ីវិលចង់ឃើញរដ្ឋាភិបាលដាក់ចេញយន្តការដោះស្រាយវិបត្តិបំណុលនៅកម្ពុជាឱ្យទាន់ពេលវេលា ព្រោះថា ពលរដ្ឋដែលពុំមានលទ្ធភាពសងកំពុងរស់ដោយលំបាក និងបាត់បង់ដីធ្លីដោយសារតែគ្មានលទ្ធភាពសងបំណុល។
គណបក្សកម្លាំងជាតិនៅថ្ងៃទី១៨ ខែធ្នូ ដាក់លិខិតទៅរដ្ឋាភិបាលប្រើប្រាស់បំណុលសាធារណៈរបស់រដ្ឋ (Public Debts) និងអន្តរាគមន៍ឱ្យគ្រឹះស្ថានមីក្រូហិរញ្ញវត្ថុ និងធនាគារឯកជនពន្យារយកការប្រាក់យ៉ាងតិចចំនួន ២ឆ្នាំ ដើម្បីដោះស្រាយវិបត្តិបំណុលវ័ណ្ឌករបស់ប្រជាពលរដ្ឋ។
គណបក្សកម្លាំងជាតិលើកឡើងថា ស្ថានភាពសេដ្ឋកិច្ចកម្ពុជាមានសភាពយ៉ាប់យ៉ឺន ដែលធ្វើឱ្យជីវភាពប្រជាពលរដ្ឋកាន់តែលំបាក និងកំពុងប្រឈមមុខវិបត្តិបំណុលវ័ណ្ឌក ដោយសារគ្មានលទ្ធភាពសងបំណុលគ្រឹះស្ថានមីក្រូហិរញ្ញវត្ថុ និងធនាគារឯកជន។ លិខិតដដែលលើកឡើងថា
មានគ្រួសារជំពាក់បំណុលគ្រឹះស្ថានមីក្រូហិរញ្ញវត្ថុ និងធនាគារឯកជន កើនឡើងរហូតដល់ជាង ៣លានគ្រួសារ ក្នុងចំណោមគ្រួសារសរុបជាង ៤លាន។
គណបក្សកម្លាំងជាតិលើកឡើងថា ក្នុងស្ថានភាពសេដ្ឋកិច្ចជាតិលំបាកនេះ រដ្ឋាភិបាលគួរប្រើប្រាស់បំណុលសាធារណៈរបស់រដ្ឋ (Public Debts) ដើម្បីយកទៅដោះស្រាយវិបត្តិបំណុលរបស់ប្រជាពលរដ្ឋ ហើយរដ្ឋាភិបាលគួរបង្កើតគោលនយោបាយស្ដីពីការអនុគ្រោះដូចជាបញ្ចុះអត្រាការប្រាក់ រួមទាំងការ ពន្យារពេលសងបំណុលគ្រឹះស្ថានមីក្រូហិរញ្ញវត្ថុ និងធនាគារឯកជន យ៉ាងតិច ២ឆ្នាំចំពោះប្រជាពលរដ្ឋ ដែលជំពាក់បំណុលវ័ណ្ឌក។
ទីប្រឹក្សាគណបក្សកម្លាំងជាតិ លោក រ៉ុង ឈុន លើកឡើងថា លោកបានចុះជួប និងសាកសួរព័ត៌មានពីពលរដ្ឋមូលដ្ឋាន គឺមានភាពដូចគ្នា ដែលរបាយការណ៍ជាតិ និងអន្តរជាតិរកឃើញពីវិបត្តិបំណុលនៅកម្ពុជា ដែលធ្វើពលរដ្ឋជាច្រើនបាត់បង់ផ្ទះ ដី ស្រែចម្ការ និងមិនមានអាហារបរិភោគប្រចាំថ្ងៃ។
លោក រ៉ុង ឈុន ជឿជាក់ថារដ្ឋាភិបាលមានលទ្ធភាពក្នុងការប្រើប្រាស់បំណុលសាធារណៈរបស់រដ្ឋ និងអន្តរាគមន៍ឱ្យគ្រឹះស្ថានមីក្រូហិរញ្ញវត្ថុ និងធនាគារឯកជនពន្យារពេលយកការ ដើម្បីដោះស្រាយវិបត្តិបំណុលវ័ណ្ឌករបស់ប្រជាពលរដ្ឋ។
លោក រ៉ុង ឈុន៖ «អាចដោះស្រាយបាន ពីព្រោះក្នុងករណីព្យួររយៈពេល ២ឆ្នាំ បន្ទាប់ពីសេដ្ឋកិច្ចមានកំណើនឡើងវិញ ពេលហ្នឹងប្រជាពលរដ្ឋនឹងចាប់ផ្ដើមសងដល់ធនាគារគេឡើងវិញហើយ ដូចជាករណីប្រទេសសៀម ដែលរដ្ឋាភិបាលថ្ងៃតែមួយជាមួយរដ្ឋាភិបាលកម្ពុជាដែរ នៅពេលដែលគេឡើងមកដល់ភ្លាម គេមានគោលនយោបាយរបស់គេពន្យារនូវការបង់ឱ្យប្រជាពលរដ្ឋ»។
លោក រ៉ុង ឈុន ទីប្រឹក្សាគណបក្សកម្លាំងជាតិ ក្នុងពិធីបើកទីស្នាក់គណបក្សនៅខេត្តកណ្ដាល កាលពីធ្ងៃទី១៧ ខែធ្នូ ឆ្នាំ២០២៣។ រូប៖ ហ្វេសប៊ុកលោក រ៉ុង ឈុន
វិទ្យុអាស៊ីសេរីមិនទាន់អាចសុំការឆ្លើយតបរឿងនេះ ពីអ្នកនាំពាក្យក្រសួងសេដ្ឋកិច្ច និងហិរញ្ញវត្ថុ លោក មាស សុខសេនសាន និងអ្នកនាំពាក្យនាយករដ្ឋមន្ត្រីលោក មាស សោភ័ណ្ឌ បានទេ នៅថ្ងៃទី១៨ ធ្នូ។
ប៉ុន្តែកាលពីខែវិច្ឆិកា លោក ហ៊ុន ម៉ាណែត អះអាងថា រដ្ឋាភិបាល និងធនាគារជាតិ ទើបតែបន្ធូរបន្ថយលក្ខខណ្ឌមួយចំនួន ដើម្បីជួយកាត់បន្ថយសម្ពាធដល់ធនាគារ គ្រឹះស្ថានមីក្រូហិរញ្ញវត្ថុ និងក្រុមហ៊ុនក្នុងវិស័យមួយចំនួន រួមទាំងវិស័យអចលនទ្រព្យជាដើម។
ជុំវិញករណីនេះដែរ ប្រធានអង្គការសមធម៌កម្ពុជា លោក អៀង វុទ្ធី មានប្រសាសន៍ថា តាមរយៈការស្រាវជ្រាវកន្លងមកថ្មីៗ នេះ ស្ថានភាពបំណុលកាន់តែធ្ងន់ធ្ងរ ដែលធ្វើឱ្យពលរដ្ឋជាច្រើនមិនមានលទ្ធភាពសងបំណុលទៅគ្រឹះស្ថានមីក្រូហិរញ្ញវត្ថុវិញ។ លោក អៀង វុទ្ធី ថា ចង់ឃើញរដ្ឋាភិបាលដាក់ចេញនូវយន្តការបន្ទាន់ និងជាក់លាក់ ដែលអាចជួយដល់ពលរដ្ឋទូទៅ ឱ្យអាចងើបចេញពីវិបត្តិបំណុលនេះ។
លោក អៀង វុទ្ធី៖ «ដោយសារគាត់មិនមានលទ្ធភាពសងបំណុលទាំងអស់ហ្នឹង ហើយយើងឃើញមានបញ្ហាចំណាកស្រុកក៏ច្រើន បញ្ហាបាត់បង់ការសិក្សារបស់កុមារ ក៏មាន។ អ៊ីចឹង យើងទទូចហើយទទូចទៀត សុំឱ្យរដ្ឋាភិបាលធ្វើការយ៉ាងណាជួយសម្រួល ដើម្បីឱ្យមានការពិភាក្សាលក្ខណៈរួមតែម្ដងទៅលើវិស័យហ្នឹង ដើម្បីឈានទៅដល់ការជួយអន្តរាគមន៍ ឬជួយសម្រួលដល់ស្ថានភាពរបស់ប្រជាពលរដ្ឋ»។
អង្គការសមធម៌កម្ពុជា និងអង្គការសម្ព័ន្ធខ្មែរជំរឿន និងការពារសិទ្ធិមនុស្សលីកាដូ កាលពីខែសីហា បានចេញរបាយការណ៍ស្រាវជ្រាវលើគ្រួសារមួយចំនួនក្នុងខេត្តកំពង់ស្ពឺ ដោយរកឃើញថា ការរីករាលដាលនៃភាពជំពាក់បំណុលច្រើនលើសលប់ បាននាំឱ្យមានការរំលោភសិទ្ធិមនុស្សធ្ងន់ធ្ងរជាច្រើន រួមមាន ភាពអត់ឃ្លាន ពលកម្មកុមារ និងការលក់ដីដោយបង្ខំជាដើម នៅទូទាំងខេត្តកំពង់ស្ពឺ។ អ្នកខ្ចីប្រាក់ កំពុងធ្វើការលះបង់ដោយមិនសមស្របជាច្រើន ដើម្បីបង់សងកម្ចី ដែលតម្រូវឱ្យដាក់ធានានូវប័ណ្ណកម្មសិទ្ធិដីធ្លីដ៏ច្រើនលើសលប់ ហើយជារឿយៗ វាតែងតែលើសពីប្រាក់ចំណូល និងសមត្ថភាពរបស់អ្នកខ្ចី ក្នុងការបង់សង៕
No comments:
Post a Comment