2024.01.20
លោក ហ៊ុន សែន ប្រាប់សមាជិកក្រុមប្រឹក្សាឃុំសង្កាត់របស់ខ្លួនដែលជាអង្គបោះឆ្នោតនៃការបោះឆ្នោតព្រឹទ្ធសភា គឺត្រូវស្មោះត្រង់ដោយបោះឆ្នោតឱ្យគណបក្សប្រជាជនកម្ពុជា។ អ្នកឃ្លាំមើលនយោបាយលើកឡើងថា លោក ហ៊ុន សែន ទាមទារឱ្យអង្គបោះឆ្នោតមានភាពស្មោះត្រង់ជាមួយខ្លួនបែបនេះ ព្រោះលោកបារម្ភខ្លាចមិនបានធ្វើជាប្រធានព្រឹទ្ធសភាដូចការគ្រោងទុក។
លោក ហ៊ុន សែន ស្វះស្វែងជួបសមាជិកក្រុមប្រឹក្សាឃុំសង្កាត់ដែលជាអង្គបោះឆ្នោតនៃការបោះឆ្នោតព្រឹទ្ធសភានៅពេលនេះ ខណៈការបោះឆ្នោតព្រឹទ្ធសភា កាន់តែខិតចូលមកដល់នៅចុងខែកុម្ភៈខាងមុខ។ លោក ហ៊ុន សែន ដែលគ្រោងទៅដឹកនាំព្រឹទ្ធសភា ក្រោយការបោះឆ្នោតនេះ ក៏មិនភ្លេចរំលឹកទៅអង្គបោះឆ្នោតរបស់ខ្លួនត្រូវបោះឆ្នោតគាំទ្របេក្ខជនរបស់គណបក្សនៅតាមភូមិភាគរបស់ខ្លួន។
លោក ហ៊ុន សែន លើកឡើងដូច្នេះក្នុងពេលជួបអង្គបោះឆ្នោតជ្រើសតាំងសមាជិកព្រឹទ្ធសភា និងសមាជិកគណបក្សប្រជាជនកម្ពុជាផ្សេងទៀតនៅថ្ងៃទី២០ ខែមករា នៅវិមាន៧មករា។
អ្នកនាំពាក្យគណបក្សប្រជាជនកម្ពុជា លោក សុខ ឥសាន លើកឡើងថា នេះជារឿងធម្មតាទេ ដែលលោក ហ៊ុន សែន ដែលជាប្រធានគណបក្សកាន់អំណាច ណែនាំទៅសមាជិករបស់ខ្លួនឱ្យត្រៀមខ្លួន និងមានភាពស្មោះត្រង់ក្នុងបោះឆ្នោតជួនគណបក្សប្រជាជនកម្ពុជា ក្នុងការបោះឆ្នោតព្រឹទ្ធសភានាពេលខាងមុខ។ អ្នកនាំពាក្យគណបក្សកាន់អំណាចរូបនេះ រំពឹងថា ក្រោយការបោះឆ្នោតព្រឹទ្ធសភា លោក ហ៊ុន សែន ក្លាយជាប្រធានព្រឹទ្ធសភា ត្បិតគណបក្សនេះមានអង្គបោះឆ្នោតច្រើនលើសលប់។
លោក សុខ ឥសាន៖«ណែនាំឱ្យត្រៀមលក្ខណៈសម្បត្តិក៏ដូចជាសុខភាព ដើម្បីឱ្យមានលទ្ធភាពទៅបោះឆ្នោតតាមការកំណត់ហើយបោះឆ្នោតឱ្យត្រូវតាមឆន្ទៈរបស់ខ្លួនដែលគណបក្សបណ្ដុះបណ្ដាលមកហ្នឹងគឺថា បោះឆ្នោតឱ្យមុខសញ្ញាបេក្ខជនរបស់គណបក្សហ្នឹងឯង គេមិនដែលគណបក្សមួយទៅឃោសនាឱ្យអង្គបោះឆ្នោតទៅបោះឆ្នោតឱ្យគណបក្សផ្សេងទេ»។
ចំណែក លោក ហ៊ុន សែន ឱ្យដឹងតាមរយៈទំព័រហ្វេសប៊ុករបស់លោកនៅថ្ងៃទី២០ ខែមករា ដោយលោកជំរុញទៅមន្ត្រីមូលដ្ឋានត្រូវផ្ដល់សេវាសាធារណៈ រួមមានសេវាតម្រូវការចាំបាច់ទាំងឡាយ និងសេវាសំណូមពរនានា ជូនប្រជាពលរដ្ឋ ឱ្យបានលឿន និងមានប្រសិទ្ធភាព ហើយត្រូវខិតខំបំបាត់ភាពអសកម្មនានា។
អ្នកអត្ថាធិប្បាយនយោបាយ លោក គឹម សុខ យល់ថា ចរិតរបស់លោក ហ៊ុន សែន តែងតែប្រយ័ត្នជានិច្ច បើទោះជាលោកដឹងថា ខ្លួននឹងឈ្នះក្នុងការបោះឆ្នោតព្រឹទ្ធសភាខាងមុខនេះក្ដី តែលោក ហ៊ុន សែន នៅតែរំលឹកទៅអង្គបោះឆ្នោតត្រូវស្មោះត្រង់ជាមួយខ្លួនជានិច្ច។ លោកបន្តថា ទៀត លោក ហ៊ុន សែន អាចនឹងមានល្បិចជាច្រើន ប្រាប់ទៅអង្គបោះឆ្នោត ក្នុងការបំបែកសំឡេងឆ្នោតគណបក្សប្រឆាំង ត្បិត លោក ហ៊ុន សែន មិនចង់ឃើញសមាជិកព្រឹទ្ធសភាមកពីគណបក្សឆន្ទៈខ្មែរដែលតំណាងឱ្យគណបក្សភ្លើងទៀន ឬក៏សមាជិកព្រឹទ្ធសភាមកពីគណបក្សកម្លាំងជាតិចូលអង្គុយធ្វើការនៅព្រឹទ្ធសភា ជាមួយលោកឡើយ។
លោក គឹម សុខ៖ «គណបក្សប្រជាជនកម្ពុជា គេកំណត់ថា គេយកប៉ុន្មាន ហើយអង្គបោះឆ្នោតណាខ្លះត្រូវបោះឆ្នោតគណបក្សប្រជាជន ឬមួយគេមានយុទ្ធសាស្ត្រឱ្យគណបក្សហ៊្វុនស៊ិនប៉ិចខ្លះឧទាហរណ៍ថា ៣កៅអី ឬ៥កៅអីអង្គបោះឆ្នោតណាខ្លះត្រូវបោះឆ្នោតឱ្យគណបក្សហ៊្វុនស៊ិនប៉ិច ហើយមួយវិញទៀតមានល្បិចក្នុងការជាន់ពន្លិចគណបក្សជាគូប្រជែង»។
ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ នឹងប្រព្រឹត្តទៅនៅថ្ងៃទី២៥ ខែកុម្ភៈខាងមុខ ដោយមានគណបក្ស៤ចូលរួម គឺគណបក្សប្រជាជនកម្ពុជា គណបក្សហ៊្វុនស៊ិនប៉ិច គណបក្សកម្លាំងជាតិ និងគណបក្សឆន្ទៈខ្មែរដែលតំណាងឱ្យគណបក្សគណបក្សភ្លើងទៀន។ គណបក្សប្រជាជនកម្ពុជា ដែលឈ្នះការបោះឆ្នោតឆ្នាំ២០២៣ ដោយការរារាំងមិនឱ្យគណបក្សគណបក្សភ្លើងទៀន គណបក្សនេះមានសមាជិកក្រុមប្រឹក្សាឃុំសង្កាត់ទូទាំងប្រទេសជាង ៩ពាន់ ៣រយអាសនៈ (៩.៣៣៨) ក្នុងចំណោមសរុបជាង ១ម៉ឺន ១ពាន់អាសនៈ (១១.៦២២) ហើយបើផ្អែកលើអង្គបោះឆ្នោតជាង៩០ភាគរយនេះ នឹងធ្វើឱ្យគណបក្សប្រជាជនកម្ពុជា មានសំឡេងច្រើនលើសលប់ដើម្បីដឹកនាំព្រឹទ្ធសភាបានដដែល៕
No comments:
Post a Comment